Gigantihan ang Iyang Pagkamalahutayon

Buot sa daghang matinud-anon ug kasingkasing nga mga indibiduwal nga ang ilang mga minahal makakat-on bahin sa mga katuyoan sa Diyos ug sa ingon makabaton ug malipayong kinabuhi. Sa dihang ipahinungod sa usa ka tawo ang iyang kinabuhi ngadto sa Diyos, ang uban, batan-on o tigulang, mahimong nakaamot gayod sa maong maalamong desisyon pinaagi sa ilang maayong panggawi. Mao kana ang kahimtang ni Jearim, usa ka tin-edyer nga babaye nga taga-Mexico, kinsa mihatag sa mosunod nga mensahe diha sa usa ka espesyal nga adlaw nga asembliya sa mga Saksi ni Jehova:

“Buot kong ipaambit kaninyo ang dako kong kalipay. Pasultiha ko kon ngano. Desiotso ka tuig kanhi, sa wala pa ako matawo, nakat-onan sa akong mga ginikanan ang kamatuoran. Ang akong inahan miuswag sa kamatuoran, ug sa ulahi miuswag usab kami sa akong igsoong lalaki. Sa tingob kami nag-ampo kang Jehova nga mahidangat usab unta ang akong amahan sa dalan sa kamatuoran. Desiotso na ka tuig ang milabay, ug karong adlawa maoy espesyal gayod nga adlaw alang kanamo. Bawtismohan na ang akong amahan. Nagpasalamat ako kang Jehova nga wala pa niya ipadangat ang kataposan una pa niining dugay nang gipaabot nga higayon. Salamat Jehova!”

Latas sa katuigan, seguradong anaa sa hunahuna sa pamilya niining maong batan-ong babaye ang mga prinsipyo nga gihubit diha sa inspiradong tambag sa 1 Pedro 3:1, 2, nga nagkanayon: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.” Ug ang batan-on nga si Jearim nagpadapat gayod sa giingon sa Deuteronomio 5:16: “Pasidunggi ang imong amahan ug ang imong inahan, ingon sa gisugo kanimo ni Jehova nga imong Diyos.” Ang pagpadapat sa maong mga prinsipyo ug ang mapailobong pagpaabot kang Jehova dayag nga nagdalag mga panalangin kang Jearim ug sa iyang pamilya.