“Magpadayon sa Pagbantay”!

“Ang ginasulti ko kaninyo ginasulti ko sa tanan, Magpadayon sa pagbantay.”—MARCOS 13:37.

1, 2. (a) Unsang leksiyon ang nakat-onan sa usa ka tawo bahin sa pagbantay sa iyang propiedad? (b) Gikan sa ilustrasyon ni Jesus bahin sa usa ka kawatan, unsay atong makat-onan sa pagtukaw?

 GITIPIGAN ni Juan ang iyang bililhong mga butang diha sa balay. Gihipos niya kini ilalom sa iyang kama—sa iyang hunahuna ang labing luwas nga dapit sa iyang balay. Apan, usa niana ka gabii samtang siya ug ang iyang asawa nangatulog, usa ka kawatan ang misulod sa lawak katulganan. Dayag nga ang kawatan nahibalo gayod kon asa mangita. Hilom niyang gikuha ang tanang bililhong butang ilalom sa kama maingon man ang kuwarta nga gibutang ni Juan sa usa ka hunos sa lamesa tupad sa kama. Pagkabuntag, nadiskobrehan ni Juan nga gikawatan siya. Dugay niyang makalimtan ang makapasubong leksiyon nga iyang nakat-onan: Ang tawong natulog dili makabantay sa iyang mga kabtangan.

² Mao man usab sa espirituwal nga diwa. Dili nato mabantayan ang atong paglaom ug ang atong pagtuo kon kita makatulog. Busa, mitambag si Pablo: “Dili kita mangatulog sama sa ginahimo sa uban, kondili magtukaw kita ug maghupot ug maayong panghunahuna.” (1 Tesalonica 5:6) Aron ipakita kon unsa ka hinungdanon nga kita magtukaw, gigamit ni Jesus ang ilustrasyon  sa usa ka kawatan. Iyang gihubit ang mga hitabo nga motultol sa iyang pag-anhi ingong Maghuhukom, ug dayon siya nagpasidaan: “Busa, magpadayon sa pagbantay tungod kay kamo wala mahibalo kon unsang adlawa moabot ang inyong Ginoo. Apan hibaloi ang usa ka butang, nga kon nahibaloan pa sa tagbalay kon unsang yugtoa sa pagbantay moabot ang kawatan, magpabilin unta siyang nagmata ug dili motugot nga lungkabon ang iyang balay. Tungod niini pamatud-i usab ninyo nga kamo andam, tungod kay sa takna nga wala ninyo hunahunaa, ang Anak sa tawo moabot.” (Mateo 24:42-44) Ang usa ka kawatan dili magpahibalong daan kon kanus-a siya moabot. Siya nagdahom nga moabot sa dihang walay nagpaabot kaniya. Sa susama, sumala sa giingon ni Jesus, ang kataposan niining sistemaha moabot sa ‘takna nga wala nato hunahunaa.’

“Magtukaw, Barog nga Malig-on sa Pagtuo”

3. Sa unsang paagi si Jesus, nga naggamit sa ilustrasyon sa mga ulipon nga nagpaabot sa pagbalik sa ilang agalon gikan sa kasal, nagpakita sa kahinungdanon sa pagtukaw?

³ Sa mga pulong nga gisulat diha sa Ebanghelyo ni Lucas, gitandi ni Jesus ang mga Kristohanon sa mga ulipon nga nagpaabot sa pagbalik sa ilang agalon gikan sa kasal. Sila kinahanglang magbantay aron inig-abot niya sila nagtukaw, andam nga moabiabi kaniya. Sa samang paagi, si Jesus miingon: “Sa takna nga wala ninyo hunahunaa, ang Anak sa tawo moabot.” (Lucas 12:40) Ang uban nga nag-alagad kang Jehova sulod sa daghang tuig mawad-an tingali sa ilang pagbati sa pagkadinalian sa panahon nga atong gikinabuhian. Hayan manghinapos pa gani sila nga ang kataposan dugay pa kaayo. Apan, ang maong panghunahuna makapaliso sa atong pagtagad gikan sa espirituwal nga mga butang ngadto sa materyal nga mga tumong, mga butang nga makapaduka kanato sa espirituwal.—Lucas 8:14; 21:34, 35.

4. Unsang kombiksiyon ang magpalihok kanato sa pagtukaw, ug sa unsang paagi gipakita kini ni Jesus?

⁴ Makakuha kita ug laing leksiyon gikan sa ilustrasyon ni Jesus. Bisan tuod ang mga ulipon wala mahibalo sa takna kon kanus-a moabot ang ilang agalon, dayag nga nahibalo sila kon unsang gabhiona siya moabot. Malisod unta ang pagtukaw sa tibuok gabii kon ilang gihunahuna nga ang ilang agalon moabot sa laing gabii. Apan dili, sila nahibalo kon unsang gabhiona siya moabot, ug kana naghatag kanila ug lig-ong panukmod sa pagtukaw. Sa susamang paagi, ang mga tagna sa Bibliya klarong nagpadayag nga kita nagkinabuhi sa panahon sa kataposan; apan wala kini magtug-an kanato sa adlaw o takna sa kataposan. (Mateo 24:36) Ang atong pagtuo nga hapit na ang kataposan motabang kanato sa pagtukaw, apan kon kita kombinsido nga ang adlaw ni Jehova haduol na, kita dunay mas lig-on pang panukmod nga magbantay.—Sofonias 1:14.

5. Sa unsang paagi kita makasanong sa tambag ni Pablo nga “magtukaw”?

⁵ Sa dihang misulat sa mga taga-Corinto, si Pablo nag-awhag: “Magtukaw, barog nga malig-on sa pagtuo.” (1 Corinto 16:13) Oo, ang pagtukaw may kalambigitan sa atong pagbarog nga malig-on diha sa Kristohanong pagtuo. Sa unsang paagi kita makapabiling nagtukaw? Pinaagi sa pagkuha ug mas lalom nga kahibalo sa Pulong sa Diyos. (2 Timoteo 3:14, 15) Ang maayong mga batasan sa personal nga pagtuon ug ang regular nga pagtambong sa tigom makatabang sa pagpalig-on sa atong pagtuo, ug ang pagbutang kanunay  diha sa hunahuna sa adlaw ni Jehova maoy hinungdanong bahin sa atong pagtuo. Busa ang atong pagsubli matag karon ug unya sa Kasulatanhong pamatuod nga kita nagkinabuhi nga duol na kaayo sa kataposan niining sistemaha motabang kanato nga dili makalimot sa hinungdanong mga kamatuoran mahitungod nianang umaabot nga kataposan. a Maayo usab nga matikdan nato ang pagkadayag sa mga hitabo sa kalibotan nga maoy katumanan sa tagna sa Bibliya. Usa ka igsoon sa Alemanya misulat: “Sa matag higayon nga motan-aw akog balita—mga gubat, linog, kapintasan, ug ang paghugaw sa atong planeta—kini nagpasiugda kanako sa pagkaduol na sa kataposan.”

6. Sa unsang paagi giilustrar ni Jesus ang kiling nga mawad-an sa espirituwal nga kaigmat samtang nanglabay ang panahon?

⁶ Sa Marcos kapitulo 13, makita nato ang laing asoy bahin sa tambag ni Jesus ngadto sa iyang mga sumusunod nga sila magtukaw. Sumala niining kapituloha, gitandi ni Jesus ang ilang situwasyon nianang sa usa ka magbalantay sa pultahan nga naghulat sa iyang agalon nga mopauli gikan sa halayo nga panaw. Ang magbalantay sa pultahan wala mahibalo sa takna sa pagpauli sa iyang agalon. Basta kinahanglan lang siyang magbantay. Gihisgotan ni Jesus ang upat ka lainlaing mga yugto sa pagbantay nga nianang panahona mahimong moabot ang iyang agalon. Ang ikaupat nga yugto sa pagbantay maoy gikan sa mga alas tres sa kadlawon hangtod sa pagbanagbanag. Nianang kataposang yugto sa pagbantay, dali rang madaog sa duka ang magbalantay sa pultahan. Gikataho nga giisip sa mga sundalo ang takna sa dili pa mobanagbanag nga maoy kinamaayohang panahon sa pagsulong ug kalit sa mga kaaway. Sa susama, niining kataposang bahin sa kataposang mga adlaw, sa dihang sa espirituwal nga diwa ang kalibotan sa palibot nato nahinanok, basin kinahanglan kitang makigbisog kay sukad masukad nga magtukaw. (Roma 13:11, 12) Busa, sa iyang ilustrasyon, si Jesus sublisubling nag-awhag: “Magpadayon sa pagtan-aw, magpadayon sa pagtukaw . . . Busa magpadayon sa pagbantay . . . Ang ginasulti ko kaninyo ginasulti ko sa tanan, Magpadayon sa pagbantay.”—Marcos 13:32-37.

7. Unsang tinuod nga kapeligrohan ang naglungtad, ug nga naghunahuna niini, unsang pagdasig ang atong kanunayng mabasa diha sa Bibliya?

⁷ Daghang higayon panahon sa iyang ministeryo ug human sa iyang pagkabanhaw nga si Jesus nag-awhag nga magmabinantayon. Gani, halos matag higayon nga ang Kasulatan naghisgot sa kataposan niining sistema sa mga butang, atong makaplagan ang pasidaan nga magtukaw o magpadayon sa pagbantay. b (Lucas 12:38, 40;  Pinadayag 3:2; 16:14-16) Klaro nga ang espirituwal nga pagduka maoy usa ka tinuod nga kapeligrohan. Kitang tanan nagkinahanglan nianang maong mga pasidaan!—1 Corinto 10:12; 1 Tesalonica 5:2, 6.

Tulo ka Apostoles nga Wala Makapadayon sa Pagtukaw

8. Sa tanaman sa Getsemane, sa unsang paagi ang tulo ka apostoles ni Jesus misanong sa iyang hangyo nga sila magpadayon sa pagbantay?

⁸ Ang pagpadayon sa pagtukaw nagkinahanglan ug labaw pa kay sa maayong mga tuyo, sumala sa atong makita sa panig-ingnan ni Pedro, Santiago, ug Juan. Silang tulo maoy espirituwal nga mga lalaki nga maunongong nagsunod kang Jesus ug may dulot nga pagmahal kaniya. Bisan pa niana, sa gabii sa Nisan 14, 33 K.P., napakyas sila sa pagtukaw. Mibiya sa lawak sa itaas diin ilang gisaulog ang Paskuwa, ang tulo ka apostoles mikuyog kang Jesus ngadto sa tanaman sa Getsemane. Didto si Jesus miingon kanila: “Ang akong kalag naguol sa hilabihan, nga ikamatay gayod. Magpabilin kamo dinhi ug magpadayon sa pagbantay kauban nako.” (Mateo 26:38) Tulo ka higayon nga si Jesus kinasingkasing nga nag-ampo sa iyang langitnong Amahan, ug tulo ka higayon nga mibalik siya sa iyang mga higala, ug naabtan sila nga nangatulog.—Mateo 26:40, 43, 45.

9. Lagmit, unsay hinungdan sa pagduka sa mga apostoles?

⁹ Nganong kining matinumanong mga lalaki nakapahigawad kang Jesus nianang gabhiona? Ang kakapoy sa lawas maoy usa ka hinungdan. Lawom na ang gabii, lagmit lapas na sa tungang gabii, ug ‘bug-at na ang ilang mga mata’ sa katulogon. (Mateo 26:43) Bisan pa niana, si Jesus miingon: “Magpadayon sa pagbantay ug mag-ampo nga mapinadayonon, aron dili kamo mahiagom sa tentasyon. Hinuon, maikagon ang espiritu, apan maluya ang unod.”—Mateo 26:41.

10, 11. (a) Bisan pa sa iyang kalapoy, unsay nakatabang kang Jesus sa pagpadayon sa pagbantay diha sa tanaman sa Getsemane? (b) Unsay atong makat-onan gikan sa nahitabo sa tulo ka apostoles sa dihang gihangyo sila ni Jesus nga magpadayon sa pagbantay?

¹⁰ Sa walay duhaduha, si Jesus gikapoy usab nianang hinungdanon kaayong gabii. Apan, inay matulog, gigugol niya kadtong hinungdanong kataposan nga mga yugto sa kagawasan diha sa kinasingkasing nga pag-ampo. Pipila ka adlaw una pa niana, giawhag niya ang iyang mga sumusunod sa pag-ampo nga nag-ingon: “Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.” (Lucas 21:36; Efeso 6:18) Kon patalinghogan nato ang tambag ni Jesus ug sundon ang iyang maayong panig-ingnan maylabot sa pag-ampo, ang atong kinasingkasing nga mga pangamuyo kang Jehova motabang kanato nga magtukaw sa espirituwal.

¹¹ Siyempre, si Jesus nakasabot—nga wala masabti sa iyang mga tinun-an niadtong tungora—nga sa dili madugay siya pagadakpon ug hukman ug kamatayon. Ang iyang mga pagsulay makaabot sa masakit nga kinapungkayan niini diha sa estaka sa pagsakit. Gipasidan-an ni Jesus ang iyang mga apostoles niining mga butanga, apan wala sila makasabot kon unsay iyang ginasulti. Busa, sila nakatulog samtang siya nagtukaw nga nag-ampo. (Marcos 14:27-31; Lucas 22:15-18) Sama sa mga apostoles, ang atong unod luya usab ug dunay mga butang nga wala pa nato mahibaloi. Bisan pa niana, kon dili nato masabtan ang pagkadinalian sa mga panahon nga atong gikinabuhian, kita makatulog sa espirituwal nga diwa. Pinaagi lamang sa pagpabiling igmat nga kita mahimong magtukaw.

Tulo ka Hinungdanong mga Hiyas

12. Unsang tulo ka hiyas ang gilangkit ni Pablo sa paghupot sa atong maayong panghunahuna?

¹² Sa unsang paagi mamentinar nato ang atong pagbati sa pagkadinalian? Nakita na nato ang kahinungdanon sa pag-ampo ug ang panginahanglan sa pagbutang diha sa hunahuna sa adlaw ni Jehova. Gawas pa, si Pablo naghisgot ug tulo ka hinungdanong mga hiyas nga angay natong ugmaron. Siya miingon: “Bahin kanato nga iya sa adlaw, maghupot kita ug maayong panghunahuna ug magsul-ob sa panagang sa dughan nga mao ang pagtuo ug gugma ug ingong helmet ang paglaom sa kaluwasan.” (1 Tesalonica 5:8) Tagdon nato sa makadiyot ang papel sa pagtuo, paglaom, ug gugma diha sa atong padayong pagtukaw sa espirituwal.

13. Unsang papel ang gidula sa pagtuo diha sa atong pagpabiling igmat?

¹³ Kinahanglang mabatonan nato ang dili-matarog nga pagtuo nga si Jehova naglungtad ug nga “siya maoy tigganti sa mga matinuorong nagapangita kaniya.” (Hebreohanon 11:6) Ang unang katumanan sa tagna ni Jesus bahin sa kataposan nga nahitabo sa unang siglo magpalig-on sa atong pagtuo sa mas dakong katumanan niini  sa atong panahon. Ug tungod sa atong pagtuo maghinamhinam kita sa pagpaabot sa adlaw ni Jehova, nga makaseguro nga “[ang matagnaong panan-awon] matuman gayod. Kini dili maulahi.”—Habacuc 2:3.

14. Sa unsang paagi hinungdanon ang paglaom aron kita padayong magtukaw?

¹⁴ Ang atong seguradong paglaom samag “angkla sa kalag” nga makapaarang kanato sa pag-antos sa mga kalisdanan bisan pag kinahanglan kitang magpaabot sa tinong katumanan sa mga saad sa Diyos. (Hebreohanon 6:18, 19) Si Margaret, usa ka dinihogan sa espiritu nga sister nga kapin na sa 90 anyos kinsa nabawtismohan kapin sa 70 ka tuig kanhi, miangkon: “Sa dihang ang akong bana himalatyon sa kanser niadtong 1963, akong gibati nga maayo untag moabot na dayon ang kataposan. Apan karon akong naamgohan nga ako naghunahuna lamang sa akong kaugalingong kaayohan. Wala mi masayod niadtong panahona kon sa unsang gilapdon nga ang buluhaton mokaylap sa tibuok yuta. Bisan karon, duna gihapoy daghang dapit diin mao pa lay pagsugod sa buluhaton. Busa nalipay ako nga si Jehova nagmapailobon.” Si apostol Pablo nagpasalig kanato: “Ang paglahutay [magpatungha] ug usa ka inuyonang kahimtang; ang inuyonang kahimtang, sa baylo, ug paglaom, ug ang paglaom dili motultol sa pagkahigawad.”—Roma 5:3-5.

15. Sa unsang paagi ang gugma magpalihok kanato bisan pa ug morag dugay na kitang nagpaabot?

¹⁵ Ang Kristohanong gugma maoy maayo kaayong hiyas tungod kay mao kana ang nagpaluyong motibo sa tanan natong ginabuhat. Kita nag-alagad kang Jehova tungod kay kita nahigugma kaniya, bisan unsa pa ang iyang orasan. Ang gugma sa silingan magtukmod kanato sa pagsangyaw sa maayong balita sa Gingharian, bisan unsa pa ka dugay ang pagbuot sa Diyos nga buhaton nato kana ug bisan unsa pa ka daghan nga kita magbalikbalik sa mao gihapong mga balay. Sumala sa gisulat ni Pablo, “nagpabilin ang pagtuo, paglaom, gugma, kining tulo; apan ang kinalabwan niini nila mao ang gugma.” (1 Corinto 13:13) Ang gugma motabang kanato sa paglahutay ug sa pagpabiling nagtukaw. “[Ang gugma] molaom sa tanang butang, molahutay sa tanang butang. Ang gugma dili gayod mapakyas.”—1 Corinto 13:7, 8.

 “Pangupti Pag-ayo ang Imong Nabatonan”

16. Inay maghinayhinay, unsang tinamdan ang angay natong ugmaron?

¹⁶ Nagkinabuhi kita sa hinungdanong mga panahon sa dihang ang mga hitabo sa kalibotan kanunayng magpahinumdom kanato nga kita ania na sa kataposang bahin sa kataposang mga adlaw. (2 Timoteo 3:1-5) Dili panahon karon sa paghinayhinay kondili ‘sa pagpangupot pag-ayo sa atong nabatonan.’ (Pinadayag 3:11) Pinaagi sa ‘pagkamabinantayon labot sa mga pag-ampo’ ug pinaagi sa pag-ugmad sa pagtuo, paglaom, ug gugma, mapamatud-an nato nga kita andam sa takna sa pagsulay. (1 Pedro 4:7) Daghan kitag buhatonon diha sa buluhaton sa Ginoo. Ang pagkapuliki sa mga buhat sa diyosnong pagkamahinalaron motabang kanato nga bug-os nga magtukaw.—2 Pedro 3:11.

17. (a) Nganong ang popanagsang kahigawad dili angayng makapaluya sa atong buot? (Tan-awa ang kahon sa panid 21.) (b) Sa unsang paagi masundog nato si Jehova, ug unsang panalangin ang naghulat niadtong nagbuhat niana?

¹⁷ “Si Jehova ang akong bahin,” misulat si Jeremias, “mao nga ako magpakita ug mahulatong tinamdan kaniya. Maayo si Jehova alang sa usa nga naglaom kaniya, alang sa kalag nga nagpadayon sa pagpangita kaniya. Maayo nga ang usa ka tawo maghulat, nga mahilom gayod, alang sa kaluwasan ni Jehova.” (Lamentaciones 3:24-26) Ang uban kanato naghulat sulod lamang sa mubo nga panahon. Ang uban naghulat sulod sa daghang katuigan aron makita ang kaluwasan ni Jehova. Apan, pagkamubo niining atong paghulat kon itandi sa walay kataposang umaabot! (2 Corinto 4:16-18) Ug samtang naghulat kita sa takdang panahon ni Jehova, maugmad nato ang hinungdanon nga Kristohanong mga hiyas ug makatabang sa uban nga pahimuslan ang pailob ni Jehova ug modawat sa kamatuoran. Nan, hinaot kitang tanan magpadayon sa pagbantay. Sundogon nato si Jehova ug magmapailobon, nga mapasalamaton sa paglaom nga iyang gihatag kanato. Ug samtang kita magpabiling igmat, hinaot nga panguptan nato pag-ayo ang paglaom nga walay-kataposang kinabuhi. Dayon, kining matagnaong mga saad seguradong mapadapat sa atong kaso: “[Si Jehova] magabayaw kanimo aron sa pagpanag-iya sa yuta. Sa dihang pagalaglagon ang mga daotan, ikaw makakita niana.”—Salmo 37:34.

[Mga footnote]

Unsaon Nimo Pagtubag?

• Sa unsang paagi mapalig-on nato ang atong kombiksiyon nga ang kataposan niining sistemaha sa mga butang haduol na?

• Unsay makat-onan gikan sa mga panig-ingnan ni Pedro, Santiago, ug Juan?

• Unsang tulo ka hiyas ang motabang kanato sa pagpabiling mabinantayon sa espirituwal?

• Nganong panahon na karon nga ‘panguptan pag-ayo ang atong nabatonan’?

[Mga Pangutana sa Pagtuon]

[Kahon/Hulagway sa panid 21]

“Malipayon ang Usa nga Nagpadayon sa Pagpaabot.”—Daniel 12:12

Handurawa nga ang usa ka guwardiya nagsuspetsa nga usa ka kawatan ang nagplanong molungkab sa dapit nga iyang giguwardiyahan. Inigkagabii na, ang guwardiya mamati pag-ayo sa bisan unsang kasikas nga magpaila nga dunay kawatan. Matag oras maningkamot siya sa pagpamati ug pag-aninaw sa palibot. Dali rang masabtan nga mahimong malimbongan siya sa sayop nga alarma—ang tingog sa kalit nga paghuros sa hangin diha sa kakahoyan o sa iring nga nakatumba ug usa ka butang.—Lucas 12:39, 40.

Ang susama mahimong mahitabo niadtong “naghulat nga maikagon sa pagpadayag sa atong Ginoong Jesu-Kristo.” (1 Corinto 1:7) Ang mga apostoles naghunahuna nga ‘ipasig-uli ni Jesus ang gingharian sa Israel’ human dayon sa iyang pagkabanhaw. (Buhat 1:6) Katuigan sa ulahi, ang mga Kristohanon sa Tesalonica kinahanglang pahinumdoman nga ang presensiya ni Jesus maoy sa umaabot pa. (2 Tesalonica 2:3, 8) Bisan pa niana, ang napakyas nga mga pagdahom bahin sa adlaw ni Jehova wala gayod makapatalikod niadtong unang mga sumusunod ni Jesus gikan sa dalan nga motultol sa kinabuhi.—Mateo 7:13.

Sa atong adlaw, ang kahigawad tungod sa daw pagkalangan sa pag-abot sa kataposan niining sistemaha sa mga butang dili angayng magpahunong kanato sa pagbantay. Ang usa ka igmat nga magbalantay malimbongan tingali sa sayop nga alarma, apan angay siyang magpadayon sa pagbantay! Mao kana ang iyang trabaho. Mao man usab sa mga Kristohanon.

[Hulagway sa panid 18]

Kombinsido ka ba nga haduol na ang adlaw ni Jehova?

[Mga hulagway sa panid 19]

Ang mga miting, pag-ampo, ug maayong mga batasan sa pagtuon motabang kanato sa pagpadayon sa pagtukaw

[Hulagway sa panid 22]

Sama kang Margaret, hinaot nga kita mapailobon ug aktibo nga magpadayon sa pagbantay