Mga Pangutana Gikan sa mga Magbabasa

Unsay gipasabot ni Pablo sa dihang siya miingon: “Ingon kamakanunayon sa inyong pagkaon niini nga tinapay ug pag-inom niini nga kopa”?

Naghisgot bahin sa pagsugod sa Memoryal sa kamatayon ni Jesus, si Pablo misulat: “Ingon kamakanunayon sa inyong pagkaon niini nga tinapay ug pag-inom niini nga kopa, padayon ninyong gimantala ang kamatayon sa Ginoo, hangtod nga siya moabot.” (1 Corinto 11:25, 26) Nagtuo ang uban nga ang pulong dinhi nga “kamakanunayon” nagpaila nga ang kamatayon ni Kristo angayng saulogon kanunay, sa daghang higayon. Busa, mas subsob nila kining gisaulog, dili lang kas-a sa usa ka tuig. Mao ba kanay gipasabot ni Pablo?

Halos 2,000 ka tuig na karon sukad nga giinagurahan ni Jesus ang Memoryal sa iyang kamatayon. Busa, ang pagsaulog sa Memoryal bisag kas-a lang sa usa ka tuig nagkahulogan nga subsob na kining gisaulog sukad sa 33 K.P. Bisan pa niana, sa konteksto sa 1 Corinto 11:25, 26, ang gihisgotan ni Pablo maoy, dili kon unsa ka subsob, kondili kon sa unsang paagi saulogon ang Memoryal. Sa orihinal nga Grego, wala niya gamita ang pulong pol·laʹkis, nga nagkahulogang “subsob” o “kanunay.” Hinunoa, iyang gigamit ang pulong ho·saʹkis, nga nagkahulogang “ingon kamakanunayon sa,” nga usa ka idiom nga nagkahulogang “sa matag higayon nga,” “sa matag panahon nga.” Ang giingon ni Pablo mao: ‘Sa matag panahon nga buhaton ninyo kini, padayon ninyong gimantala ang kamatayon sa Ginoo.’

Nan, unsa ka subsob saulogon ang Memoryal sa kamatayon ni Jesus? Haom ang paghandom niini kas-a lamang sa usa ka tuig. Kini gayod maoy usa ka memoryal, ug ang mga memoryal kasagarang saulogon matag tuig. Gawas pa, si Jesus namatay sa adlaw sa Paskuwa sa mga Hudiyo, nga gihimo kas-a sa usa ka tuig. Sa kahaom, gitumong ni Pablo si Jesus ingong “Kristo nga atong inihaw sa paskuwa,” sanglit ang haladnong kamatayon ni Jesus nagbukas sa dalan sa kinabuhi alang sa espirituwal nga Israel, maingon nga ang unang halad sa Paskuwa nagtipig nga buhi sa mga panganay sa kinaiyanhong mga Israelinhon didto sa Ehipto ug nagbukas sa dalan alang sa kagawasan sa nasod gikan sa pagkaulipon. (1 Corinto 5:7; Galacia 6:16) Kini nga kalangkitan sa tinuig nga Paskuwa sa mga Hudiyo maoy dugang pamatuod nga ang Memoryal sa kamatayon ni Jesus angayng saulogon kas-a lamang sa usa ka tuig.

Dugang pa, gilangkit ni Pablo ang kamatayon ni Jesus sa lain pang tinuig nga kasaulogan sa mga Hudiyo, ang Adlaw sa Pagtabon sa Sala. Sa Hebreohanon 9:25, 26, atong mabasa: “Dili aron subsob ihalad [ni Jesus] ang iyang kaugalingon, sama gayod sa hataas nga saserdote nga mosulod sa balaang dapit tuigtuig [sa Adlaw sa Pagtabon sa Sala] nga dala ang dugo nga dili iyang kaugalingon. . . . Apan karon gipadayag na niya ang iyang kaugalingon makausa alang sa tanang panahon sa kataposan sa mga sistema sa mga butang aron sa pagwagtang sa sala pinaagi sa paghalad sa iyang kaugalingon.” Sanglit ang halad ni Jesus nagpuli sa tinuig nga halad sa Adlaw sa Pagtabon sa Sala, ang Memoryal sa iyang kamatayon haom nga saulogon matag tuig. Walay Kasulatanhong pamatuod nga saulogon ang Memoryal nga mas subsob pa niana.

Uyon niini, ang historyano nga si John Laurence von Mosheim nagtaho nga ang mga Kristohanon sa Asia Minor sa ikaduhang siglo naanad sa pagsaulog sa Memoryal sa kamatayon ni Jesus sa “ikakatorse nga adlaw sa unang Hudiyohanong bulan [sa Nisan].” Sa ulahing mga tuig lamang nga nabatasan na diha sa Kakristiyanohan ang pagsaulog niini nga mas subsob imbes kas-a sa usa ka tuig.