Ang Daotan ba Nakadaog?

ANG ideya nga adunay tibuok-unibersong panagbugno tali sa maayo ug daotang mga puwersa nakapukaw sa di-matapos nga pagbanabana sa mga magsusulat ug mga pilosopo latas sa tibuok kasaysayan. Hinuon, adunay basahon nga naundan ug tukmang kasaysayan sa panagbugno tali sa Diyos ug sa Yawa. Kanang basahona mao ang Bibliya. Mohatag kinig kalamdagan bahin sa mga isyung nalangkit sa maong panagbangi ug mohatag ug paagi sa pagtino kon kinsay tinuod nga nakadaog.

Wala madugay human sa paglalang sa unang lalaki ug babaye, ang usa ka dili-makitang espiritung linalang, si Satanas nga Yawa, naghagit sa pagmando sa Diyos. Sa unsang paagi? Pinaagi sa malinglahong pagpasabot nga ang Diyos naghikaw ug maayong mga butang gikan sa iyang mga linalang ug ang mga tawo mas maayog kahimtang kon maindependente kaniya.—Genesis 3:1-5; Pinadayag 12:9.

Sa ulahi, sa mga adlaw sa patriarkang si Job, si Satanas nagpatunghag laing isyu. Kay nagtinguha nga bungkagon ang integridad ni Job ngadto sa Diyos, si Satanas miingon: “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag.” (Job 2:4) Malangkobon kaayo kadto nga pangangkon! Pinaagi sa paggamit sa kasagarang terminong “usa ka tawo” inay sa ngalang Job, giduhaduhaan ni Satanas ang integridad sa matag tawo. Sa pagkamatuod, siya nagpatuo: ‘Buhaton sa usa ka tawo ang bisan unsa aron pagluwas sa iyang kinabuhi. Hatagi akog kahigayonan, ug mapatalikod ko si bisan kinsa gikan sa Diyos.’

Matino ang kadaogan sa panagbugno tali sa Diyos ug sa Yawa pinaagi sa tubag sa duha ka pangutana: Ang tawo ba malamposong makamando sa iyang kaugalingon? Ang Yawa ba nakapatalikod sa tanang tawo gikan sa matuod nga Diyos?

Ang mga Tawo ba Malamposong Makamando sa Ilang Kaugalingon?

Sulod sa libolibong katuigan, ang mga tawo nakaeksperimento na sa nagkalainlaing mga matang sa pagmando. Ang nagkalainlaing mga matang sa gobyerno, sama sa monarkiya, aristokrasya, demokrasya, awtokrasya, Pasismo, ug Komunismo, nasulayan sa nangaging kapanahonan. Dili ba ang kamatuoran mismo nga gikinahanglan ang kanunayng pag-eksperimento nagpaila nga kulang ug katakos ang maong nagkadaiyang mga matang sa pagmando?

“Ang Romanong katawhan wala magdahom nga makahimo ug daghan kaayong eksperimento bahin sa administrasyon,” misulat si H. G. Wells diha sa A History of the World, nga gipatik niadtong 1922. Siya nagpadayon: “Nag-ilis-ilis kanunay ang matang sa administrasyon, wala gayod kadto malig-on. Sa usa ka diwa napakyas ang eksperimento. Sa laing diwa wala gayod matapos ang eksperimento, ug ang Uropa ug Amerika karong adlawa naningkamot gihapon sa pagsulbad sa mga gumonhap bahin sa tibuok-kalibotang pagdumala sa kahikayan sa estado nga unang giatubang sa Romanong katawhan.”

Ang pag-eksperimento bahin sa kagamhanan nagpadayon hangtod sa ika-20ng siglo. Kanang sigloha natapos nga ang demokratikanhong pagmando mas giuyonan kay sukad masukad. Sa teoriya giangkon sa demokrasya nga ang tanang tawo gilakip sa pagmando niini. Apan ang demokrasya ba nakapadayag nga ang tawo malamposong makamando nga wala ang Diyos? Si Jawaharlal Nehru, kanhi primer ministro sa India, nag-ingon nga ang demokrasya maoy tilinguhaon apan midugang: “Gisulti ko kini kay mas mangil-ad man ang ubang mga sistema sa pagdumala.” Ang kanhi presidente sa Pransiya nga si Valéry Giscard d’Estaing miingon: “Nasaksihan nato ang daotang situwasyon sa demokrasya diin gipili sa katawhan ang mga representante.”

Bisan sa ikalimang siglo W.K.P., ang Gregong pilosopo nga si Plato nakamatikod ug kahuyangan sa demokratikanhong paagi sa pagmando.  Sumala sa librong A History of Political Theory, iyang “gisaway ang kawalay-alamag ug kawalay-katakos sa mga politiko, nga mao ang linaing tunglo sa mga demokrasya.” Daghan sa mga politiko karong adlawa nagpahayag ug kasubo tungod sa kalisod nga mangita ug mga tawong may-katakos aron mag-alagad sa kagamhanan. Ang katawhan “mapikal sa mga lider nga daw way-katakos sa dihang ang mga suliran nga ilang giatubang maoy dagko kaayo,” matod sa The Wall Street Journal. Nagpadayon kini: “Nayugot sila sa pagkadili-makadesisyon ug sa korapsiyon sa ilang mga lider sa dihang sila nagkinahanglag pagtultol.”

Tagda karon ang pagmando ni Haring Solomon sa karaang Israel. Si Jehova nga Diyos mihatag ug talagsaong kaalam kang Solomon. (1 Hari 4:29-34) Malamposon ba ang nasod sa Israel panahon sa 40 ka tuig nga paghari ni Solomon? “Ang Juda ug Israel daghan,” maoy tubag sa Bibliya, “sama sa mga balas nga anaa sa daplin sa dagat ang gidaghanon, nga nangaon ug nanginom ug nagmaya.” Ang talaan nag-ingon usab: “Ang Juda ug Israel nagpadayon sa pagpuyo sa kasegurohan, ang matag usa ilalom sa iyang kaugalingong paras ug ilalom sa iyang kaugalingong kahoyng igos, gikan sa Dan ngadto sa Beer-seba, sa tanang adlaw ni Solomon.” (1 Hari 4:20, 25) Tungod kay ang usa ka maalamong hari maoy nagmando kanila isip nga makitang hawas sa dili-makitang Supremong Magmamando, si Jehova nga Diyos, ang nasod nagpahimulos ug dili-hitupngang kalig-on, kauswagan, ug kalipay.

Pagkalahi kaayo ang pagmando sa tawo ug ang iya sa Diyos! Duna bay makasulting matinud-anon nga si Satanas maoy nakadaog bahin sa isyu sa pagmando? Wala, kay ang manalagnang si Jeremias tukmang mipahayag: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.”—Jeremias 10:23.

Si Satanas Makapatalikod ba sa Tanan Gikan sa Diyos?

Malamposon ba si Satanas sa iyang pangangkon nga siya makapatalikod sa tanan gikan sa Diyos? Sa kapitulo 11 sa basahong Hebreohanon sa Bibliya, ginganlan ni apostol Pablo ang ubay-ubayng matinumanong mga lalaki ug mga babaye sa una-Kristohanong kapanahonan. Unya siya nagpahayag: “Kay kulangon ako sa panahon kon mopadayon ako sa pag-asoy bahin kang Gideon, kang Barak, kang Samson, kang Jepte, kang David ingon man kang Samuel ug sa ubang mga manalagna.” (Hebreohanon 11:32) Si Pablo yanong nagtumong niining maunongong mga alagad sa Diyos ingong ‘dakong panganod sa mga saksi.’ (Hebreohanon 12:1) Ang Gregong pulong nga gigamit dinhi alang sa “panganod” nagpasabot, dili ang nabulag, tatawng pagkalaraw nga panganod nga may tinong gidak-on ug porma, kondili dako kaayo, walay-porma nga panganod. Haom kini kay daghan kaayo ang matinumanong mga alagad sa Diyos sa nangagi nga sila samag dako kaayong panganod. Oo, latas sa mga siglo, ang di-maihap nga gidaghanon sa mga tawo naggamit sa ilang kagawasan sa pagpili ug mipili nga magmaunongon sila kang Jehova nga Diyos.—Josue 24:15.

 Unsay atong makita sa atong panahon? Ang gidaghanon sa mga Saksi ni Jehova sa tibuok kalibotan miuswag ngadto sa kapig unom ka milyon bisan pa sa grabeng paglutos ug pagsupak nga ilang naagoman sulod sa ika-20ng siglo. Ang dugang siyam ka milyon o labaw pa nakig-uban kanila, ug daghan kanila nagahimog tinong mga lakang aron makabaton ug suod personal nga relasyon uban sa Diyos.

Ang kinalabwang tubag sa pangangkon ni Satanas nga siya makapatalikod sa mga tawo gikan kang Jehova naggikan sa kaugalingong Anak sa Diyos, si Jesu-Kristo. Bisan ang grabeng kasakitan samtang didto sa estaka sa pagsakit wala makabungkag sa iyang integridad. Sa kataposang gininhawa ni Jesus, siya mipatugbaw: “Amahan, sa imong mga kamot itugyan ko ang akong espiritu.”—Lucas 23:46.

Gigamit ni Satanas ang tanang anaa sa iyang gahom—gikan sa mga tentasyon ngadto sa dayag ug direktang paglutos—nga iyang magamhan ang mga tawo. Pinaagi sa paggamit sa ‘tinguha sa unod ug tinguha sa mga mata ug mapagawalong pagpasundayag sa pangabuhian sa usa’ aron tentalon ang mga tawo, siya nagtinguha nga padayong magpahilayo o danihon nga magpahilayo sila kang Jehova. (1 Juan 2:16) Si Satanas usab ‘nagbuta sa mga hunahuna sa mga dili-magtutuo aron nga ang kahayag sa mahimayaong maayong balita bahin kang Kristo dili makadan-ag.’ (2 Corinto 4:4) Ug si Satanas dili manuko sa paggamit sa mga hulga ug sa pagpahimulos sa kahadlok sa mga tawo aron magmalamposon ang iyang tumong.—Buhat 5:40.

Bisan pa niana, kadtong dapig sa Diyos dili mabuntog sa Yawa. Nahidangat sila sa pagkaila kang Jehova nga Diyos ug ‘paghigugma kaniya uban sa tibuok nilang kasingkasing ug sa tibuok nilang kalag ug sa tibuok nilang hunahuna.’ (Mateo 22:37) Oo, ang di-matarog nga pagkamaunongon ni Jesu-Kristo ug sa di-maihap nga mga tawo nagpamatuod sa dako kaayong kapildihan ni Satanas nga Yawa.

Unsay Umaabot?

Ang mga eksperimento ba sa tawo sa kagamhanan magpadayon sa panahong walay tino? Ang manalagnang si Daniel mitagna: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Ang Gingharian nga gitukod sa Diyos sa langit maoy langitnong kagamhanan nga mandoan ni Jesu-Kristo. Kini mao ang samang Gingharian nga gitudlo ni Jesus nga iampo sa iyang mga sumusunod. (Mateo 6:9, 10) Ang maong Gingharian maglaglag sa tanang tawhanong mga kagamhanan panahon sa “[umaabot nga] gubat sa dakong adlaw sa Diyos nga Labing Gamhanan” ug moapektar sa tibuok yuta.—Pinadayag 16:14, 16.

Unsay mahitabo kang Satanas? Ang Bibliya nagbatbat niining umaabot nga panghitabo: “Gidakop [sa usa ka manulonda ni Jehova] ang dragon, ang orihinal nga halas, nga mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa kahiladman ug gisirhan kini ug gitimbrehan kini sa ibabaw niya, aron dili na siya makapahisalaag pa sa kanasoran hangtod nga matapos ang usa ka libo ka tuig.” (Pinadayag 20:1-3) Human lang sa pagtambog kang Satanas ngadto sa bung-aw sa kawalay-kalihokan nga ang Usa ka Libo ka Tuig nga Paghari ni Jesu-Kristo mosugod.

Pagkanindot na unyang dapit kining yutaa! Mawala na ang pagkadaotan ug ang mga nagpahinabo niini. Ang Bibliya nagsaad: “Ang mga mamumuhat ug daotan pagaputlon . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:9-11) Ang ilang kalinaw dili mameligro gikan sa bisan unsang tinubdan—tawo man o hayop. (Isaias 11:6-9) Bisan ang milyonmilyon kinsa, tungod sa kawalay-alamag ug tungod sa kakulang sa kahigayonan nga makaila kang Jehova, midapig sa Yawa sa nangagi banhawon ug tudloan mahitungod sa Diyos.—Buhat 24:15.

Pagkatapos sa Usa ka Libo ka Tuig nga Paghari, ang yuta mahimo nang paraiso, ug ang katawhan niana modangat sa tawhanong kahingpitan. Unya si Satanas buhian “sa makadiyot,” nga human niana pagalaglagon sa walay kataposan uban sa tanang magsusupak sa pagmando sa Diyos.—Pinadayag 20:3, 7-10.

 Kansang Kiliran ang Imong Pilion?

Ang ika-20ng siglo maoy panahon nga gidaot pag-ayo ni Satanas ang yuta. Bisan pa niana, inay magpaila nga siya maoy nakadaog, ang mga kahimtang sa yuta maoy ilhanan nga kita ania sa kataposang mga adlaw niining daotang kalibotan. (Mateo 24:3-14; Pinadayag 6:1-8) Ang kagrabe sa pagkadaotan sa yuta o ang panglantaw sa kinabag-an dili maoy magtino sa pagpaila kon kinsay nakadaog. Ang magtino maoy kon kansang paagi sa pagmando ang labing maayo ug kon aduna bay nag-alagad sa Diyos tungod sa gugma. Pinasukad sa maong duha ka resulta, si Jehova maoy nakadaog.

Kon ang gitugot nga panahon sa paglungtad ni Satanas nagpamatuod nga siya maoy sayop, nganong padayong gitugotan sa Diyos ang pagkadaotan? Si Jehova mapailobon “tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Ang kabubut-on sa Diyos “mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4) Hinaot imong gamiton ang nahibiling panahon sa pagtuon sa Bibliya ug ‘pagkuha ug kahibalo bahin sa bugtong matuod nga Diyos ug sa usa nga iyang gipadala, si Jesu-Kristo.’ (Juan 17:3) Ang mga Saksi ni Jehova malipay nga motabang kanimo sa pagbaton sa maong kahibalo aron ikaw makaduyog usab sa milyonmilyon nga malig-ong nagbarog sa madaogong kiliran.

[Mga hulagway sa panid 5]

Pinaagi sa paghupot sa integridad, ang mga Saksi ni Jehova dugang nagpamatuod sa kapildihan ni Satanas

[Hulagway sa panid 7]

Daghang maunongon kang Jehova ang anaa sa iyang kiliran