Unsa ka Lig-on ang Imong Pagtuo?
Unsa ka Lig-on ang Imong Pagtuo?
“Kamo nagabarog tungod sa inyong pagtuo.”—2 CORINTO 1:24.
1, 2. Nganong angay natong mabatonan ang pagtuo, ug sa unsang paagi kini molig-on pa?
ANG mga alagad ni Jehova nahibalo nga sila kinahanglang dunay pagtuo. Gani, ‘kon walay pagtuo imposible ang pagpahimuot sa Diyos.’ (Hebreohanon 11:6) Busa, maalamon nga mag-ampo kita alang sa balaang espiritu ug sa pagtuo, nga maoy bahin sa maanindot nga bunga niini. (Lucas 11:13; Galacia 5:22, 23) Ang pagsundog sa pagtuo sa mga isigkamagtutuo makapalig-on usab niining maong hiyas diha kanato.—2 Timoteo 1:5; Hebreohanon 13:7.
2 Ang atong pagtuo molig-on pa kon kita magpadayon sa pagsubay sa dalan nga gilatid sa Pulong sa Diyos alang sa tanang Kristohanon. Ang napauswag nga pagtuo moresulta gumikan sa adlaw-adlaw nga pagbasa sa Bibliya ug sa makugihong pagtuon sa Kasulatan sa tabang sa mga publikasyon nga gitagana pinaagi sa “matinumanong piniyalan.” (Lucas 12:42-44; Josue 1:7, 8) Madasig kita sa pagtuo sa usag usa pinaagi sa atong regular nga pagtambong sa Kristohanong mga tigom, mga asembliya, ug mga kombensiyon. (Roma 1:11, 12; Hebreohanon 10:24, 25) Ug ang atong pagtuo mapalig-on kon kita makigsulti sa uban diha sa ministeryo.—Salmo 145:10-13; Roma 10:11-15.
3. Maylabot sa pagtuo, unsang tabang ang atong makuha gikan sa mahigugmaong Kristohanong mga ansiyano?
3 Pinaagi sa paghatag ug Kasulatanhong tambag ug pagdasig, ang mahigugmaong Kristohanon nga mga ansiyano makatabang kanato sa pagpalig-on sa atong pagtuo. Sila adunay espiritu nga sama nianang kang apostol Pablo, kinsa miingon sa mga Kristohanon: “Kami mga isigkamagbubuhat alang sa inyong kalipay, kay kamo nagabarog tungod sa inyong pagtuo.” (2 Corinto 1:23, 24) Ang laing hubad mabasa: “Kami nakigtambayayong kaninyo aron malipay kamo, tungod kay lig-on ang inyong pagtuo.” (Contemporary English Version) Ang matarong mabuhi tungod sa pagtuo. Siyempre, walay si bisan kinsa nga makapasundayag ug pagtuo alang kanato o makapahimo kanatong maunongong mga tighupot sa integridad. Maylabot niini, ‘kita kinahanglang magpas-an sa atong kaugalingong luwan.’—Galacia 3:11; 6:5.
4. Sa unsang paagi ang Kasulatanhong mga asoy bahin sa matinumanong mga alagad sa Diyos motabang sa pagpalig-on sa atong pagtuo?
4 Ang Kasulatan natugob sa mga asoy bahin niadtong dunay pagtuo. Kita tingali nasinati sa daghan sa ilang talagsaong mga buhat, apan nasinati ba usab kita sa pagtuo nga gipakita adlaw-adlaw, tingali latas sa taas nga kinabuhi? Ang pagpalandong karon kon sa unsang paagi gipasundayag nila kining maong hiyas sa mga sirkumstansiya nga susama sa atoa makatabang sa pagpalig-on sa atong pagtuo.
Ang Pagtuo Maghatag Kanatog Kaisog
5. Unsay Kasulatanhong pamatuod nga ang pagtuo magpalig-on kanato sa pagmantala sa pulong sa Diyos nga maisogon?
5 Ang pagtuo magpalig-on kanato sa pagpahayag sa pulong sa Diyos uban ang kaisog. Si Enoc maisogong nagtagna sa pagpahamtang sa paghukom sa Diyos. “Tan-awa!” siya miingon, “si Jehova miabot uban sa iyang balaang mga tinagpulo ka libo, aron ipahamtang ang paghukom batok sa tanan, ug aron hukmang sad-an ang tanang dili-diyosnon labot sa tanan nilang dili-diyosnong binuhatan nga ilang gibuhat sa dili-diyosnong paagi, ug labot sa tanang makalilisang nga mga butang nga gisulti sa dili-diyosnong mga makasasala batok kaniya.” (Judas 14, 15) Sa pagkadungog nianang mga pulonga, ang walay-diyos nga mga kaaway ni Enoc tinong gustong mopatay kaniya. Bisan pa niana, siya maisogong nagsulti diha sa pagtuo, ug “siya gilalin” sa Diyos pinaagi sa pagtapos sa iyang kinabuhi samtang anaa siya sa usa ka panan-awon, dayag nga wala siya tugoti nga moantos sa kasakit sa kamatayon. (Genesis 5:24; Hebreohanon 11:5) Dili nato masinati ang maong mga milagro, apan si Jehova motubag sa atong mga pag-ampo aron makapahayag kita sa iyang pulong uban ang pagtuo ug kaisog.—Buhat 4:24-31.
6. Sa unsang paagi ang hinatag-sa-Diyos nga pagtuo ug kaisog nakatabang kang Noe?
6 Tungod sa pagtuo si Noe “nagtukod ug arka aron sa pagluwas sa iyang panimalay.” (Hebreohanon 11:7; Genesis 6:13-22) Si Noe usab maoy “usa ka magwawali sa pagkamatarong” kinsa maisogong nagpahayag sa pasidaan sa Diyos ngadto sa iyang mga katalirongan. (2 Pedro 2:5) Sila lagmit gayong nagbugalbugal sa iyang mensahe bahin sa umaabot nga Lunop, maingon nga ang pipila magbugalbugal sa dihang mohatag kita ug Kasulatanhong pamatuod nga ang presenteng sistema sa mga butang laglagon sa dili madugay. (2 Pedro 3:3-12) Apan, sama kang Enoc ug Noe, makahatag kita sa maong mensahe tungod sa atong hinatag-sa-Diyos nga pagtuo ug kaisog.
Ang Pagtuo Makapahimo Kanatong Mapailobon
7. Sa unsang paagi si Abraham ug ang uban nagpasundayag ug pagtuo ug pagkamapailobon?
7 Kita nagkinahanglan ug pagtuo ug pailob, ilabina samtang nagpaabot kita sa kataposan niining daotang sistema. Lakip niadtong ‘kinsa pinaagi sa pagtuo ug pailob makapanunod sa mga saad’ mao ang mahinadlokon-sa-Diyos nga patriarkang si Abraham. (Hebreohanon 6:11, 12) Tungod sa pagtuo siya mibiya sa siyudad sa Ur, uban sa tanang mga bentaha niini, ug nahimong langyaw sa usa ka langyawng yuta nga gisaad sa Diyos kaniya. Si Isaac ug Jacob maoy mga manununod sa mao gihapong saad. Apan, “diha sa pagtuo kini silang tanan nangamatay, bisan ug wala sila makabaton sa katumanan sa mga saad.” Pinaagi sa pagtuo sila ‘nagtinguha sa usa ka mas maayong dapit, nga mao, usa nga iya sa langit.’ Tungod niini, ang Diyos ‘may giandam nga usa ka siyudad alang kanila.’ (Hebreohanon 11:8-16) Oo, si Abraham, Isaac, ug Jacob—ug ang ilang diyosnong mga asawa—mapailobong nagpaabot sa langitnong Gingharian sa Diyos, nga ilalom niana sila pagabanhawon sa kinabuhi dinhi sa yuta.
8. Bisan pa sa unsa nga si Abraham, Isaac, ug Jacob nagpasundayag ug pagkamapailobon ug pagtuo?
8 Si Abraham, Isaac, ug Jacob wala mawad-i sa pagtuo. Ang Yutang Saad wala mailalom sa ilang pagdumala, ug wala nila makita ang tanang nasod nga nagpanalangin sa ilang kaugalingon pinaagi sa binhi ni Abraham. (Genesis 15:5-7; 22:15-18) Bisan tuod ang ‘siyudad nga giandam sa Diyos’ wala motungha hangtod sa paglabay sa mga siglo, kining mga tawhana nagpadayon sa pagpakita ug pagtuo ug pailob sa tibuok nilang kinabuhi. Siyempre, angay natong buhaton ang susama niana karon nga ang Mesiyanikong Gingharian nagmando na sa langit.—Salmo 42:5, 11; 43:5.
Ang Pagtuo Maghatag Kanato sa Labing Hamiling mga Tumong
9. Unsay kalabotan sa pagtuo diha sa mga tumong?
9 Ang matinumanong mga patriarka wala gayod mosagop sa makauulawng estilo sa kinabuhi sa mga Canaanhon, kay sila adunay mas taas nga mga tumong. Sa susama ang pagtuo maghatag kanato ug espirituwal nga mga tumong nga makapaarang kanato sa pagpakigbisog nga dili mahimong bahin sa kalibotan nga nahimutang sa gahom sa usa nga daotan, si Satanas nga Yawa.—1 Juan 2:15-17; 5:19.
10. Sa unsang paagi kita nahibalo nga si Jose nangagpas sa usa ka tumong nga mas taas kay nianang sa pagkahimong inila sa kalibotan?
10 Tungod sa paggiya sa Diyos, ang anak ni Jacob nga si Jose nagsilbing administrador sa pagkaon didto sa Ehipto, apan dili niya tumong nga mahimong bantogang tawo niining kalibotana. Uban ang pagtuo sa katumanan sa mga saad ni Jehova, ang 110-anyos nga si Jose miingon sa iyang mga igsoon: “Himalatyon na ako; apan ang Diyos sa walay pakyas magliso sa iyang pagtagad nganha kaninyo, ug siya magpagawas gayod kaninyo gikan niining yutaa ngadto sa yuta nga iyang gipanumpa kang Abraham, kang Isaac ug kang Jacob.” Mihangyo si Jose nga ilubong siya sa yutang saad. Sa pagkamatay niya, siya giembalsamar ug gibutang sa lungon sa Ehipto. Apan sa dihang ang mga Israelinhon napagawas na gikan sa pagkaulipon sa Ehipto, gidala ni manalagnang Moises ang mga bukog ni Jose aron ilubong didto sa Yutang Saad. (Genesis 50:22-26; Exodo 13:19) Ang pagtuo nga sama nianang kang Jose angayng magtukmod kanato sa pagpangagpas sa mga tumong nga mas taas kay sa pagkahimong inila sa kalibotan.—1 Corinto 7:29-31.
11. Sa unsang paagi si Moises naghatag ug pamatuod nga siya adunay espirituwal nga mga tumong?
11 Si Moises “mipalabi nga daogdaogon uban sa katawhan sa Diyos inay magpahimulos sa umalaging kalipay sa pagpakasala” ingong edukado nga membro sa harianong pamilya sa Ehipto. (Hebreohanon 11:23-26; Buhat 7:20-22) Gitalikdan niya ang pagkahimong inila sa kalibotan ug tingali ang maanindot nga paglubong diha sa gidayandayanan-pag-ayo nga lungon diha sa usa ka iladong dapit sa Ehipto. Apan unsay bili niana kon itandi sa pribilehiyo nga mahimong “tawo sa matuod nga Diyos,” ang tigpataliwala sa Balaod sa pakigsaad, ang manalagna ni Jehova, ug magsusulat sa Bibliya? (Esdras 3:2) Gitinguha ba nimo ang tinamod nga sekular nga promosyon, o tungod sa pagtuo nakabaton ka ug mas taas nga espirituwal nga mga tumong?
Ang Pagtuo Moresulta sa Makapatagbawng Kinabuhi
12. Unsay epekto sa pagtuo diha sa kinabuhi ni Rahab?
12 Ang pagtuo naghatag sa mga tawo dili lamang sa kinatas-ang mga tumong kondili usab sa usa ka makapatagbawng kinabuhi. Si Rahab sa Jerico lagmit gayong mibati nga ang iyang kinabuhi ingong pampam dili makapatagbaw. Bisan pa niana, ang iyang kinabuhi nahimong makapatagbaw sa dihang siya nagpasundayag ug pagtuo! Siya ‘gipahayag nga matarong pinaagi sa mga buhat sa pagtuo, human nga maabiabihon niyang gidawat ang mga mensahero nga mga Israelinhon ug gipalakaw sila sa laing agianan,’ mao nga nakalikay sila sa ilang Canaanhong mga kaaway. (Santiago 2:24-26) Nag-ila kang Jehova ingong matuod nga Diyos, si Rahab nagpakita usab ug pagtuo pinaagi sa pagbiya sa iyang pagpamampam. (Josue 2:9-11; Hebreohanon 11:30, 31) Naminyo siya sa usa ka alagad ni Jehova, dili sa usa ka dili-magtutuong Canaanhon. (Deuteronomio 7:3, 4; 1 Corinto 7:39) Naangkon ni Rahab ang dakong pribilehiyo nga mahimong katigulangan sa Mesiyas. (1 Cronicas 2:3-15; Ruth 4:20-22; Mateo 1:5, 6) Sama sa uban, nga ang pipila mibiya sa imoral nga kinabuhi, siya makadawat ug lain pang ganti—usa ka pagkabanhaw sa kinabuhi diha sa paraisong yuta.
13. Sa unsang paagi nakasala si David maylabot kang Batseba, apan unsang tinamdan ang iyang gipakita?
13 Human talikdi ang iyang makasasalang kinabuhi, si Rahab dayag nga nagsubay sa matarong nga dalan. Apan, ang uban nga dugay nang nakapahinungod sa Diyos nakahimog grabeng sala. Si Haring David nakapanapaw uban kang Batseba, nagpapatay sa iyang bana diha sa gubat, ug dayon gikuha siya ingong iyang asawa. (2 Samuel 11:1-27) Naghinulsol uban sa dakong kasubo, si David nangaliyupo kang Jehova: “Ayaw kuhaa ang imong balaang espiritu gikan kanako.” Si David wala mawad-i sa espiritu sa Diyos. Siya nagtuo nga si Jehova, sa iyang kaluoy, dili magtamay sa “usa ka kasingkasing nga gun-ob ug dugmok” tungod sa sala. (Salmo 51:11, 17; 103:10-14) Tungod sa ilang pagtuo, si David ug Batseba gigantihan ug pribilehiyo nga malakip sa mga katigulangan sa Mesiyas.—1 Cronicas 3:5; Mateo 1:6, 16; Lucas 3:23, 31.
Ang Pagtuo Gipalig-on sa Pasalig
14. Unsang mga pasalig ang nadawat ni Gideon, ug sa unsang paagi kining maong asoy makaapektar sa atong pagtuo?
14 Bisan tuod kita nagalakaw pinaagi sa pagtuo, kita usahay nagkinahanglan ug pasalig nga tabangan sa Diyos. Tinuod kana kang Maghuhukom Gideon, ang usa niadtong “tungod sa pagtuo nagpildi sa mga gingharian diha sa panaggubat.” (Hebreohanon 11:32, 33) Sa dihang ang mga Midianhon ug ang ilang mga kaalyado misulong sa Israel, si Gideon giliminan sa espiritu sa Diyos. Kay gustong pasaligan nga si Jehova nagauban kaniya, nagsugyot siya ug mga pagsulay nga naggamit sa usa ka balhibo sa karnero nga giladlad diha sa giokanan sa tibuok gabii. Sa unang pagsulay, ang yamog anaa lamang sa balhibo, samtang ang yuta nagpabiling mala. Ang situwasyon nabali sa ikaduhang pagsulay. Napalig-on niining maong mga pasalig, ang mainampingong Gideon milihok diha sa pagtuo ug nagpildi sa mga kaaway sa Israel. (Maghuhukom 6:33-40; 7:19-25) Kon kita mangayog pasalig sa dihang mag-atubang sa usa ka desisyon, wala kini magpasabot nga nakulangan kita ug pagtuo. Sa pagkatinuod kita nagpakita ug pagtuo pinaagi sa pagkonsulta sa Bibliya ug sa Kristohanong mga publikasyon ug pinaagi sa pag-ampo alang sa giya sa balaang espiritu sa dihang mohimog mga desisyon.—Roma 8:26, 27.
15. Sa unsang paagi tingali kita matabangan sa pagpalandong bahin sa pagtuo ni Barak?
15 Ang pagtuo ni Maghuhukom Barak napalig-on sa pasalig diha sa dagway sa pagdasig. Ang manalagnang si Debora nagdasig kaniya sa pagpanguna sa pagpagawas sa mga Israelinhon gikan sa pagdaogdaog sa Canaanhon nga Haring Jabin. Diha sa pagtuo ug uban sa pasalig sa pagpaluyo sa Diyos, gipangunahan ni Barak ang 10,000 ka lalaki nga kulang ug kasangkapan sa pagpakiggubat ug midaog batok sa mas dakong puwersa sa kasundalohan ni Jabin nga gipangulohan ni Sisera. Ang maong kadaogan nabantog diha sa kulbahinam nga awit ni Debora ug Barak. (Maghuhukom 4:1–5:31) Gidasig ni Debora si Barak nga molihok ingong tinudlo-sa Diyos nga lider sa Israel, ug siya maoy usa sa mga alagad ni Jehova kinsa tungod sa pagtuo “nagparot sa kasundalohan sa mga langyaw.” (Hebreohanon 11:34) Ang pagpalandong kon giunsa pagganti sa Diyos si Barak tungod sa paglihok diha sa pagtuo mahimong magtukmod kanato sa pagpalihok kon kita medyo magpanuko sa pagtuman sa malisod nga asaynment diha sa pag-alagad kang Jehova.
Ang Pagtuo Magpalambo sa Pakigdait
16. Unsang maayong panig-ingnan ang gipakita ni Abraham sa pagtinguha ug panagdait uban kang Lot?
16 Maingon nga ang pagtuo motabang kanato sa pagtuman sa malisod nga mga asaynment diha sa pag-alagad sa Diyos, kini usab magpalambo sa pakigdait ug kalinaw. Gitugotan sa tigulang nga si Abraham ang iyang mas batang pag-umangkon nga si Lot sa pagpili sa kinamaayohang mga sibsibanan sa dihang ang ilang mga magbalantay sa panon nag-away ug gikinahanglan nga sila magbulag. (Genesis 13:7-12) Lagmit si Abraham miampo diha sa pagtuo alang sa tabang sa Diyos sa pagsulbad niining problemaha. Inay kay unahon ang iyang kaugalingong intereses, iyang gihusay ang mga butang sa makigdaitong paagi. Kon kita adunay gikabangi nga Kristohanong igsoon, mag-ampo kita diha sa pagtuo ug ‘mangita sa pakigdait,’ nga ibutang sa hunahuna ang panig-ingnan ni Abraham sa mahigugmaong konsiderasyon.—1 Pedro 3:10-12.
17. Nganong makaingon kita nga ang dayag nga panagbangi nila ni Pablo, Bernabe, ug Marcos nahusay sa malinawong paagi?
17 Tagda kon sa unsang paagi ang pagpadapat sa Kristohanong mga prinsipyo diha sa pagtuo makatabang kanato sa pagpalambo sa pakigdait. Sa dihang si Pablo hapit nang mosugod sa iyang ikaduhang misyonaryong panaw, si Bernabe miuyon sa sugyot nga ilang duawon pag-usab ang mga kongregasyon sa Cipro ug Asia Minor. Apan, gustong dad-on ni Bernabe ang iyang ig-agaw nga si Marcos. Misupak si Pablo tungod kay si Marcos mibiya kanila sa Pamfilia. Nahitabo ang “pagsilaob sa kasuko,” ug tungod niining maong panagbangi sila nagbulag. Gikuyog ni Bernabe si Marcos paingon sa Cipro, samtang gipili ni Pablo si Silas ingong iyang kauban ug “milibot sa Sirya ug Cilicia, nga nagpalig-on sa mga kongregasyon.” (Buhat 15:36-41) Sa ngadtongadto, ang dayag nga panagbangi nahusay, kay si Marcos kauban na ni Pablo sa Roma, ug ang apostol nagdayeg kaniya. (Colosas 4:10; Filemon 23, 24) Sa dihang si Pablo nabilanggo didto sa Roma sa mga 65 K.P., giingnan niya si Timoteo: “Kuhaa si Marcos ug dad-a siya diri uban kanimo, kay siya mapuslanon kanako sa pag-alagad.” (2 Timoteo 4:11) Dayag nga gilakip ni Pablo sa iyang mga pag-ampo sa pagtuo ang iyang relasyon uban kang Bernabe ug Marcos, ug kini miresulta sa kalinaw nga nalangkit sa “kalinaw sa Diyos.”—Filipos 4:6, 7.
18. Unsay lagmit nga nahitabo sa kaso ni Euodia ug Sintique?
18 Siyempre, tungod kay dili hingpit, “kitang tanan mangapandol sa makadaghan.” (Santiago 3:2) Nagkabingkil ang duha ka Kristohanong mga babaye, nga bahin kanila si Pablo misulat: “Awhagon ko si Euodia ug awhagon ko si Sintique sa pagbaton ug samang kaisipan diha sa Ginoo. . . . Padayon mong tabangan kining mga babayhana nga naningkamot kiliran sa kiliran uban kanako diha sa maayong balita.” (Filipos 4:1-3) Lagmit gayod nga kining diyosnong mga babaye naghusay sa ilang problema sa malinawong paagi pinaagi sa pagpadapat sa tambag nga gisulat diha sa Mateo 5:23, 24. Ang pagpadapat sa Kasulatanhong mga prinsipyo diha sa pagtuo dakog mahimo sa pagpalambo ug pagtuo karon.
Ang Pagtuo Makapaarang Kanato sa Paglahutay
19. Unsang masulayong situwasyon ang wala gayod makabungkag sa pagtuo ni Isaac ug Rebeca?
19 Tungod sa pagtuo kita usab makaantos sa kalisdanan. Tingali naguol kita tungod kay usa ka bawtismadong membro sa atong pamilya misupak sa Diyos pinaagi sa pagpakigminyo sa usa ka dili-magtutuo. (1 Corinto 7:39) Si Isaac ug Rebeca nag-antos tungod sa pagpakigminyo sa ilang anak nga si Esau ngadto sa dili-diyosnong mga babaye. Ang iyang mga asawang Hitihanon ‘maoy tinubdan sa kapaitan sa ilang espiritu’—mao nga nakaingon si Rebeca: “Gikasilagan ko kining akong kinabuhi tungod sa mga anak nga babaye ni Het. Kon si Jacob magkuha ug asawa gikan sa mga anak nga babaye ni Het nga sama niini nila gikan sa mga anak nga babaye sa yuta, unsa pay kapuslanan sa akong kinabuhi?” (Genesis 26:34, 35; 27:46) Bisan pa niana, kining masulayong situwasyon wala gayod magbungkag sa pagtuo ni Isaac ug Rebeca. Hinaot nga huptan nato ang lig-ong pagtuo kon ang malisod nga mga sirkumstansiya mahimong lisod natong sagubangon.
20. Unsang mga panig-ingnan sa pagtuo ang atong nabatonan diha kang Noemi ug Ruth?
20 Ang tigulang nga biyuda nga si Noemi maoy taga-Judea ug nahibalo nga ang pipila ka babaye sa Juda mahimong manganak ug mga anak nga lalaki nga mahimong mga katigulangan sa Mesiyas. Apan, tungod kay ang iyang mga anak nga lalaki nangamatay nga walay anak ug siya dili na manganak gumikan sa katigulangon, diyutay na lang ang posibilidad nga ang iyang pamilya mahimong bahin sa kaliwat sa Mesiyas. Bisan pa niana, ang iyang nabalo nga umagad nga babaye nga si Ruth napangasawa sa tigulang nga si Boaz, nanganak alang kaniya ug anak nga lalaki, ug nahimong katigulangan ni Jesus, ang Mesiyas! (Genesis 49:10, 33; Ruth 1:3-5; 4:13-22; Mateo 1:1, 5) Ang pagtuo ni Noemi ug Ruth nakalabang sa kalisdanan ug naghatag kanilag kalipay. Dako usab ang atong kalipay kon huptan nato ang atong pagtuo atubangan sa kalisdanan.
21. Unsay himoon sa pagtuo alang kanato, ug unsay atong determinasyon?
21 Bisan tuod wala kita mahibalo kon unsay anaa sa ugma alang kanato sa tinagsatagsa, tungod sa pagtuo kita makasagubang sa bisan unsang masulayong kahimtang. Ang pagtuo makapahimo kanatong maisogon ug mapailobon. Kini mohatag kanato sa kinatas-ang mga tumong ug usa ka makapatagbawng kinabuhi. Ang pagtuo adunay positibong mga epekto diha sa atong relasyon sa uban ug makalahutay sa kalisdanan. Busa hinaot nga kita mahimong “matang nga adunay pagtuo ngadto sa pagtipig nga buhi sa kalag.” (Hebreohanon 10:39) Diha sa kalig-on sa atong mahigugmaong Diyos, si Jehova, ug alang sa iyang kahimayaan, magpadayon kita sa pagpasundayag ug lig-on nga pagtuo.
Unsaon Nimo Pagtubag?
• Unsay Kasulatanhong pamatuod nga ang pagtuo makapahimo kanatong maisogon?
• Nganong makaingon kita nga ang pagtuo maghatag kanato ug makapatagbawng kinabuhi?
• Sa unsang paagi ang pagtuo magpalambo sa pakigdait?
• Unsay pamatuod nga ang pagtuo makapaarang kanato sa paglahutay sa kalisdanan?
[Mga Pangutana sa Pagtuon]
[Mga hulagway sa panid 16]
Ang pagtuo naghatag kang Noe ug Enoc ug kaisog sa pagpahayag sa mga mensahe ni Jehova
[Mga hulagway sa panid 17]
Ang pagtuo nga sama nianang kang Moises magpalihok kanato sa pagpangagpas sa espirituwal nga mga tumong
[Mga hulagway sa panid 18]
Ang pasalig sa tabang sa Diyos nagpalig-on sa pagtuo ni Barak, Debora, ug Gideon