“Batoni ang Gugma sa Inyong Taliwala”

“Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—JUAN 13:35.

1. Unsang hiyasa ang gipasiugda ni Jesus sa dayon na siyang mamatay?

 “MINAHAL nga mga anak.” (Juan 13:33) Pinaagi nianang malumong ekspresyon, si Jesus nakigsulti sa iyang mga apostoles sa bisperas sa iyang kamatayon. Wala kitay rekord diha sa mga asoy sa Ebanghelyo nga si Jesus naggamit sukad niining mabinationg ekspresyon sa pagpakigsulti kanila. Apan, nianang espesyal nga gabii natukmod siya sa paggamit niining mabinationg paagi sa pagpakigsulti aron sa pagpahayag sa dulot nga gugma nga iyang gibati alang sa iyang mga sumusunod. Gani, si Jesus naghisgot sa gugma mga 30 ka beses nianang gabhiona. Nganong gipasiugda niya kining hiyasa?

2. Nganong ang pagpakita ug gugma hinungdanon kaayo alang sa mga Kristohanon?

² Gipatin-aw ni Jesus kon nganong hinungdanon kaayo ang gugma. “Pinaagi niini,” siya miingon, “ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35; 15:12, 17) Ang pagkasumusunod ni Kristo nalangkit pag-ayo sa pagpakita ug inigsoong gugma. Ang matuod nga mga Kristohanon mailhan, dili sa usa ka lahi nga pamesti o sa pipila ka talagsaong mga kostumbre, kondili sa mainit ug malumo nga gugma nga ilang gipakita sa usag usa. Ang pagbaton niining talagsaong matang sa gugma mao ang ikaduha sa tulo ka pangunang mga kinahanglanon sa usa ka tinun-an ni Kristo nga gihisgotan sa sinugdanan sa nag-unang artikulo. Unsay motabang kanato sa pagpadayon sa pagkab-ot niining maong kinahanglanon?

“Pagbuhat Niini sa Mas Bug-os Pa”

3. Unsang tambag mahitungod sa gugma ang gihatag ni apostol Pablo?

³ Sama sa mga sumusunod ni Kristo sa unang siglo, kining talagsaong gugma makita karon taliwala sa tinuod nga mga tinun-an ni Kristo. Ngadto sa unang-siglong mga Kristohanon, si apostol Pablo misulat: “Labot sa inigsoong gugma, dili na  kinahanglan nga mosulat pa kami kaninyo, kay kamo gitudloan na sa Diyos nga maghigugmaay sa usag usa; ug, ngani, kamo nagbuhat niini ngadto sa tanang kaigsoonan.” Bisan pa niana, si Pablo midugang: “Magpadayon sa pagbuhat niini sa mas bug-os pa.” (1 Tesalonica 3:12; 4:9, 10) Kita usab kinahanglang magpatalinghog sa tambag ni Pablo ug maningkamot sa pagpakita ug gugma alang sa usag usa “sa mas bug-os pa.”

4. Sumala kang Pablo ug Jesus, kinsa ang angay natong hatagan ug espesyal nga konsiderasyon?

⁴ Sa mao gihapong inspiradong sulat, gidasig ni Pablo ang iyang mga isigkamagtutuo nga ‘hupayon ang magul-anong mga kalag’ ug ‘buligan ang mga maluya.’ (1 Tesalonica 5:14) Sa laing okasyon, iyang gipahinumdoman ang mga Kristohanon nga kadtong “mga lig-on angayng mopas-an sa mga kaluyahon niadtong mga dili lig-on.” (Roma 15:1) Si Jesus usab naghatag ug mga instruksiyon labot sa pagtabang sa mga maluya. Human magtagna nga sa gabii sa pagdakop kaniya si Pedro mobiya kaniya, giingnan ni Jesus si Pedro: “Sa mahibalik ka na, palig-ona ang imong mga igsoon.” Ngano? Tungod kay biyaan usab nila si Jesus ug busa nagkinahanglan sila ug tabang. (Lucas 22:32; Juan 21:15-17) Mao nga gisugo kita sa Pulong sa Diyos sa pagpakita sa atong gugma ngadto sa mga maluya sa espirituwal ug niadtong wala na makig-uban sa Kristohanong kongregasyon. (Hebreohanon 12:12) Nganong buhaton man nato kana? Duha ka tataw nga ilustrasyon nga gihatag ni Jesus ang magtubag niana.

Nawalang Karnero ug Nawalang Sensilyo

5, 6. (a) Unsang duha ka mugbong ilustrasyon ang giasoy ni Jesus? (b) Unsay gipadayag niining mga ilustrasyona bahin kang Jehova?

⁵ Aron tudloan ang iyang mga sumusunod sa panglantaw ni Jehova niadtong nahisalaag, si Jesus mihatag ug duha ka mugbo nga mga ilustrasyon. Ang usa mahitungod sa usa ka magbalantay sa karnero. Si Jesus miingon: “Kinsa kaninyo nga may usa ka gatos ka karnero, nga sa mawad-an ug usa niini, dili mobiya sa kasiyamag-siyam diha sa kamingawan ug molakaw alang sa usa nga nawala hangtod makaplagan niya kini? Ug sa makaplagan na niya kini pas-anon niya kini sa iyang mga abaga ug magmaya. Ug sa makapauli na siya tawgon niya sa tingob ang iyang mga higala ug ang iyang mga silingan, nga ingnon sila, ‘Magmaya kamo uban kanako, tungod kay nakaplagan ko ang akong karnero nga nawala.’ Ako magasulti kaninyo nga sa ingon adunay labaw nga kalipay sa langit tungod sa usa ka makasasala nga maghinulsol kay sa kasiyamag-siyam nga mga matarong nga wala magkinahanglan sa paghinulsol.”—Lucas 15:4-7.

⁶ Ang ikaduhang ilustrasyon maoy bahin sa usa ka babaye. Si Jesus miingon: “Kinsang babayhana nga may napulo ka sensilyong drakma, nga kon siya mawad-ag usa ka sensilyong drakma, dili modagkot ug lampara ug mosilhig sa iyang balay ug mangitag maayo hangtod nga makaplagan niya kini? Ug sa makaplagan na niya kini tawgon niya sa tingob ang mga babaye nga iyang mga higala ug mga silingan, nga mag-ingon, ‘Magmaya kamo uban kanako, tungod kay nakaplagan ko ang akong sensilyong drakma nga nawala.’ Busa, sultihan ko kamo, may kalipay taliwala sa mga manulonda sa Diyos tungod sa usa ka makasasala nga maghinulsol.”—Lucas 15:8-10.

7. Unsang duha ka leksiyon ang gitudlo kanato sa mga ilustrasyon bahin sa nawalang karnero ug sa nawalang sensilyo?

⁷ Unsay atong makat-onan gikan niining mugbong mga ilustrasyon? Kini nagpakita kanato (1) kon unsay angay natong bation niadtong nangaluya ug (2) kon unsay angay natong buhaton sa pagtabang kanila. Tagdon nato kining mga puntoha.

Nawala Apan Gipabilhan

8. (a) Unsay reaksiyon sa magbalantay sa karnero ug sa babaye sa dihang nawad-an sila? (b) Unsay gipadayag kanato sa ilang reaksiyon maylabot sa ilang panglantaw sa nawalang karnero ug sensilyo?

⁸ Nianang duha ka ilustrasyon dunay nawala, apan matikdi ang reaksiyon sa mga tag-iya. Ang magbalantay sa karnero wala moingon: ‘Wa ray kaso kay usa ra ka karnero ang nawala. Total naa pa man koy 99 ka buok.’ Ang babaye wala moingon: ‘Nganong mabalaka man ko anang usa ra ka sensilyo? Kontento na ko sa siyam nga nia pa nako.’ Hinunoa, ang magbalantay nangita sa iyang nawalang karnero nga daw mao ra kanay iyang nabatonan. Ug naguol gayod ang babaye sa pagkawala sa iyang sensilyo nga daw wala na siyay laing mga sensilyo. Nianang duha ka kahimtang ang nawalang butang bililhon gihapon diha sa hunahuna sa tag-iya. Unsay giilustrar niini?

9. Unsay giilustrar sa kahingawa nga gipakita sa magbalantay ug sa babaye?

 ⁹ Matikdi ang konklusyon ni Jesus sa duha ka kaso: “Sa ingon adunay labaw nga kalipay sa langit tungod sa usa ka makasasala nga maghinulsol” ug “busa, sultihan ko kamo, may kalipay taliwala sa mga manulonda sa Diyos tungod sa usa ka makasasala nga maghinulsol.” Busa, ang kahingawa nga gipakita sa magbalantay ug sa babaye nagbanaag sa gamayng sukod, sa pagbati ni Jehova ug sa iyang langitnong mga linalang. Maingon nga ang nawala nagpabiling bililhon sa mga mata sa magbalantay ug sa babaye, busa kadtong napalayo sa kongregasyon ug wala na makig-uban sa katawhan sa Diyos bililhon gihapon sa mga mata ni Jehova. (Jeremias 31:3) Ang maong mga tawo luya tingali sa espirituwal, apan dili-awtomatikong magpasabot nga rebelyoso sila. Bisan pa sa ilang luya nga kahimtang, sa usa ka sukod sila tingali nagtuman gihapon sa mga kinahanglanon ni Jehova. (Salmo 119:176; Buhat 15:29) Busa, sa nangaging mga panahon, si Jehova wala magdalidali sa ‘pagsalikway kanila gikan sa iyang atubangan.’—2 Hari 13:23.

10, 11. (a) Sa unsang paagi lantawon nato kadtong napalayo sa kongregasyon? (b) Sumala sa duha ka ilustrasyon ni Jesus, sa unsang paagi nato ikapahayag ang atong kahingawa kanila?

¹⁰ Sama kang Jehova ug kang Jesus, kita usab nahingawa pag-ayo sa mga maluya ug niadtong wala na makig-uban sa Kristohanong kongregasyon. (Ezequiel 34:16; Lucas 19:10) Atong gilantaw ang mga tawo nga luya sa espirituwal ingong nawalang karnero—dili kay wala nay paglaom. Dili kita mangatarongan: ‘Nganong mabalaka pa sa maluya? Mouswag man gihapon ang kongregasyon kon wala siya.’ Hinunoa, sama kang Jehova, atong lantawon kadtong napalayo sa kongregasyon apan gustong mobalik ingong bililhon gihapon.

¹¹ Apan, sa unsang paagi nato ikapahayag ang atong kahingawa? Ang duha ka ilustrasyon ni Jesus nagpakita nga ikapahayag nato kana (1) pinaagi sa pagpakitag aktibong interes, (2) pinaagi sa pagkamaluloton, ug (3) pinaagi sa pagkatim-os. Usausahon nato pagsusi kining mga bahina.

Pagpakita ug Aktibong Interes

12. Unsay atong makat-onan sa mga pulong ‘pagpangita sa usa nga nawala’ bahin sa tinamdan sa magbalantay sa karnero?

¹² Sa una sa duha ka ilustrasyon, si Jesus nag-ingon nga ang magbalantay ‘mangita sa usa nga nawala.’ Ang magbalantay sa karnero magpakitag aktibong interes ug mohimog tinuyong paningkamot sa pagpangita sa nawalang karnero. Ang kalisdanan, kapeligrohan, ug gilay-on wala makapugong kaniya. Sa kasukwahi, ang magbalantay magpadayon sa pagpangita “hangtod makaplagan niya kini.”—Lucas 15:4.

13. Sa unsang paagi ang matinumanong mga lalaki sa karaang panahon misanong sa mga panginahanglan sa mga maluya, ug sa unsang paagi kita makasundog nianang maong mga panig-ingnan sa Bibliya?

¹³ Sa susama, sa pagtabang sa usa ka tawo nga nagkinahanglan ug pagdasig kasagarang gikinahanglan nga ang mas lig-on maoy magpakitag aktibong interes. Ang matinumanong mga lalaki sa karaang panahon nakasabot niini. Pananglitan, sa dihang si Jonathan, ang anak ni Haring Saul, nakamatikod nga ang iyang suod nga higalang si David nagkinahanglan ug pagdasig, si Jonathan “mitindog ug miadto kang David sa Hores, aron mapalig-on niya ang iyang kamot labot sa Diyos.” (1 Samuel 23:15, 16) Mga siglo sa ulahi, sa dihang nakita ni Gobernador Nehemias nga naluya ang buot sa pipila niya ka mga igsoong Hudiyo, siya usab ‘mitindog dayon’ ug nagdasig kanila sa ‘pagbutang kang Jehova sa ilang hunahuna.’ (Nehemias 4:14) Kita karon buot usab nga ‘motindog’—magpakitag aktibong interes—sa pagpalig-on sa  mga maluya. Apan kinsa diha sa kongregasyon ang angayng mohimo niana?

14. Kinsa diha sa Kristohanong kongregasyon ang aktibong motanyag ug tabang sa mga maluya?

¹⁴ Ang Kristohanong mga ansiyano, ilabina, ang dunay responsibilidad sa ‘pagpabaskog sa luyang mga kamot ug pagpalig-on sa mga tuhod nga nagkurogkurog’ ug sa ‘pagsulti sa mga nabalaka sa kasingkasing: “Magmalig-on. Ayaw kahadlok.”’ (Isaias 35:3, 4; 1 Pedro 5:1, 2) Apan, matikdi nga ang tambag ni Pablo sa ‘paghupay sa magul-anong mga kalag’ ug sa ‘pagbulig sa mga maluya’ wala ihatag sa mga ansiyano lamang. Hinunoa, ang mga pulong ni Pablo gitumong sa enterong “kongregasyon sa mga taga-Tesalonica.” (1 Tesalonica 1:1; 5:14) Ang aktibong pagtanyag ug tabang sa mga maluya sa ingon maoy buluhaton sa tanang Kristohanon. Sama sa magbalantay diha sa ilustrasyon, ang matag Kristohanon angayng mapalihok sa ‘pagpangita sa usa nga nawala.’ Siyempre, kini mas epektibong mahimo pinaagi sa pagpakigtambayayong sa mga ansiyano. Duna ka bay mahimo sa pagtabang sa usa nga maluya diha sa imong kongregasyon?

Magmaluloton

15. Nganong ingon niana ang gibuhat sa magbalantay?

¹⁵ Unsay buhaton sa magbalantay sa dihang sa kataposan makaplagan niya ang nawalang karnero? “Pas-anon niya kini sa iyang mga abaga.” (Lucas 15:5) Pagkamakapatandog ug pagkaepektibo nga detalye! Ang karnero tingali naglaaglaag sulod sa daghang adlaw ug mga gabii latas sa dili-sinati nga teritoryo, tingali nameligro pa sa mga leyon nga nangitag tukbonon. (Job 38:39, 40) Sa walay duhaduha ang karnero naluya tungod sa kakulang sa pagkaon. Kini huyang na kaayo nga wala kiniy igong kusog nga makabuntog sa mga babag nga maatubang niini pagbalik sa toril. Busa, ang magbalantay miyuko, malulotong gialsa ang karnero, ug gidala kini latas sa tanang babag balik didto sa panon. Sa unsang paagi ikasumbalik-silaw nato ang pagtagad nga gipakita niining maong magbalantay?

16. Nganong angay natong isumbalik-silaw ang kalumo nga gipakita sa magbalantay ngadto sa nahisalaag nga karnero?

¹⁶ Ang usa ka tawo nga wala na makig-uban sa kongregasyon maluya tingali sa espirituwal nga diwa. Sama sa karnero nga nahimulag gikan sa magbalantay, ang maong tawo tingali naglaaglaag nga way direksiyon latas sa mabatokong teritoryo sa kalibotan. Kon wala ang proteksiyon nga gitagana sa toril, ang Kristohanong kongregasyon, siya labi pang naladlad sa mga pag-atake sa Yawa, kinsa “nagasuroysuroy sama sa usa ka leyon nga nagangulob, nga nagapangitag matukob.” (1 Pedro 5:8) Dugang pa, siya naluya tungod sa kakulang sa espirituwal nga pagkaon. Busa, kon mag-inusara lagmit luya kaayo siya nga dili niya mabuntog ang mga babag nga iyang maatubang sa iyang pagbalik sa kongregasyon. Busa, kinahanglang moyuko kita, ingnon ta, malulotong alsahon ang usa nga maluya, ug pas-anon siya. (Galacia 6:2) Sa unsang paagi mahimo nato kana?

17. Sa unsang paagi nato masundog si apostol Pablo sa dihang moduaw kita sa usa nga maluya?

¹⁷ Si apostol Pablo miingon: “Kinsa man ang maluya, ug ako dili maluya?” (2 Corinto 11:29; 1 Corinto 9:22) Si Pablo may empatiya sa katawhan, lakip na sa mga maluya. Buot natong magpakita ug susamang empatiya alang sa mga maluya.  Sa dihang moduaw sa usa ka Kristohanon nga naluya sa espirituwal, pasaligi siya nga siya bililhon sa mga mata ni Jehova ug ang iyang mga isigka-Saksi gimingaw pag-ayo kaniya. (1 Tesalonica 2:17) Pahibaloa siya nga sila andam nga motabang kaniya ug mahimo alang kaniya nga “usa ka igsoon nga natawo alang sa panahon sa kasakit.” (Proverbio 17:17; Salmo 34:18) Ang atong kinasingkasing nga mga pahayag sa maluloton ug inanay nga paagi magdasig kaniya sa gilapdon nga makabalik siya sa panon. Unsay sunod natong buhaton? Ang ilustrasyon sa babaye ug sa nawala nga sensilyo makahatag kanatog giya.

Magmatim-os

18. (a) Nganong ang babaye diha sa ilustrasyon wala mawad-ig paglaom? (b) Unsang tim-os nga mga paningkamot ang gihimo sa babaye, ug unsay resulta niini?

¹⁸ Ang babaye nga nawad-an sa sensilyo nahibalo nga ang situwasyon malisod apan duna pay paglaom. Kon nahulog pa ang sensilyo sa usa ka dakong kalibonan o sa lawom, lapokon nga lanaw, lagmit hunahunaon niya nga imposible nang makit-an kana. Apan, kay nahibalo nga ang sensilyo naa ra sa iyang balay, posibleng makit-an, magsugod siya sa bug-os ug tim-os nga pagpangita niana. (Lucas 15:8) Una, magdagkot siya ug lampara aron mahayagan ang iyang ngitngit nga balay. Dayon, manilhig siya, nga magdahom nga makadungog ug tinagingting. Sa kataposan, mainampingon siyang mangita sa tanang suok hangtod mokidlap ang salapi sa dihang mahayagan kini sa lampara. Nagbunga ang tim-os nga paningkamot sa babaye!

19. Unsang mga leksiyon sa pagtabang sa mga maluya ang atong makuha gikan sa gibuhat sa babaye diha sa ilustrasyon bahin sa nawalang sensilyo?

¹⁹ Ingon sa gipahinumdom kanato niining maong detalye sa ilustrasyon, ang Kasulatanhong obligasyon sa pagtabang sa usa ka Kristohanon nga maluya maarangan nato. Sa samang panahon, atong maamgohan nga nagkinahanglan kini ug paningkamot. Sa pagkatinuod, si apostol Pablo miingon sa mga ansiyano sa Efeso: “Pinaagi sa ingon nga paghago kinahanglang inyong abagan kadtong mga maluya.” (Buhat 20:35a) Hinumdomi nga dili makita sa babaye ang sensilyo kon tira pasagad lang ang iyang pagpangita niini. Milampos siya tungod kay gisiksik niya pag-ayo ang iyang balay ‘hangtod nakaplagan niya kini.’ Sa susama, sa dihang maningkamot kita sa pagpasig-uli sa usa ka tawo nga naluya sa espirituwal, ang atong paagi kinahanglang tim-os ug may direksiyon. Unsay atong mahimo?

20. Unsay mahimo sa pagtabang sa mga maluya?

²⁰ Sa unsang paagi matabangan nato ang usa nga maluya aron makaugmad ug pagtuo ug apresasyon? Ang personal nga pagtuon sa Bibliya diha sa haom nga Kristohanong publikasyon basin maoy gikinahanglan. Sa pagkatinuod, pinaagi sa pagdumala ug pagtuon sa Bibliya uban sa tawo nga maluya kita makatabang kaniya sa bug-os ug mapinadayonon nga paagi. Lagmit ang magtatan-aw sa pag-alagad ang labing maayong makadeterminar kon kinsa ang mohatag sa gikinahanglang tabang. Tingali mosugyot siya kon unsang mga ulohana ang mahimong tun-an ug unsang publikasyona ang labing makatabang. Maingon nga ang babaye diha sa ilustrasyon migamit ug mapuslanong mga himan aron  makita ang sensilyo, karon usab nabatonan nato ang mga himan nga motabang kanato sa pagpalampos sa atong hinatag-sa-Diyos nga responsibilidad sa pag-abag sa mga maluya. Duha sa atong bag-ong mga himan, o mga publikasyon, ang ilabinang makatabang niining buluhatona. Kini mao ang mga librong Simbaha ang Bugtong Matuod nga Diyos ug Pakigsuod Kang Jehova. a

21. Sa unsang paagi ang pagtabang sa mga maluya magpanalangin sa tanan?

²¹ Ang pagtabang sa mga maluya magpanalangin sa tanan. Ang usa nga gitabangan makatagamtam sa kalipay nga mahiusa pag-usab sa matuod nga mga higala. Masinati nato ang kinasingkasing nga kalipay nga ipahinabo lamang sa paghatag. (Lucas 15:6, 9; Buhat 20:35b) Ang kongregasyon sa katibuk-an mahimong mas mainiton samtang ang matag membro magpakita ug mahigugmaong interes sa uban. Ug labaw sa tanan, maghatag kinig kadungganan sa atong mahingawaong mga Magbalantay, si Jehova ug Jesus, samtang ang ilang tinguha sa pagtabang sa maluya gibanaag diha sa ilang yutan-ong mga alagad. (Salmo 72:12-14; Mateo 11:28-30; 1 Corinto 11:1; Efeso 5:1) Busa, aduna gayod kitay maayong mga katarongan nga magpadayon sa ‘pagbaton ug gugma sa atong taliwala’!

[Footnote]

Makapatin-aw Ka Ba?

• Nganong ang pagpakita ug gugma kinahanglanon alang sa matag usa kanato?

• Nganong angay kitang magpakita ug gugma sa mga maluya?

• Unsang mga leksiyon ang gitudlo kanato sa mga ilustrasyon bahin sa nawalang karnero ug sa nawalang sensilyo?

• Unsang praktikal nga mga tikang ang atong mahimo sa pagtabang sa usa nga maluya?

[Mga Pangutana sa Pagtuon]

[Mga hulagway sa panid 16, 17]

Sa pagtabang sa mga maluya, kita magpakita ug aktibong interes ug maoy maluloton ug tim-os

[Hulagway sa panid 16, 17]

Ang pagtabang sa mga maluya magpanalangin sa tanan