Kon Unsaon Pag-ugmad ug Timbang nga Panglantaw sa Trabaho

SA MAKAPATENSIYON nga kalibotan karon sa negosyo, grabeng kompetensiya, ug dinaghang paggama ug produkto, daghang tawo ang walay ganang motrabaho matag adlaw. Apan, angay unta kitang malipay sa atong trabaho. Ngano? Tungod kay kita gilalang sa dagway sa Diyos—ug ang Diyos nalipay sa iyang trabaho. Pananglitan, sa pagrepaso sa iyang nahimo sa kataposan sa unom ka “adlaw,” o hataas nga mga yugto sa panahon, sa paglalang “nakita sa Diyos ang tanan nga iyang gibuhat ug, tan-awa! kadto maayo kaayo,” matod sa Genesis 1:31.

Ang kalipay ni Jehova sa pagtrabaho walay duhaduha maoy usa ka rason nga gitawag siya nga “malipayong Diyos.” (1 Timoteo 1:11) Nan, dili ba makataronganon nga kon kita kanunayng magsundog kaniya, kita mahimong labi pang malipayon? Bahin niini, si Haring Solomon sa karaang Israel, kinsa usa ka ekselenteng magtutukod ug tig-organisar, misulat: “Ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.”—Ecclesiastes 3:13.

Malisod ang pag-ugmad ug timbang, maayong panglantaw sa trabaho diha sa trabahoan nga kusog kaayong nagakausab karon. Apan panalanginan ni Jehova kadtong mosunod sa iyang mahigugmaong pagtultol. (Salmo 119:99, 100) Sila mahimong bililhon ug sinaligang mga empleyado ug sa ingon gamayg purohan nga mawad-an sa ilang trabaho. Makakat-on sila sa pagtagad sa ilang kinabuhi ug trabaho dili lang gikan sa materyal kondili gikan usab sa espirituwal nga punto-debista. Magpaarang kini kanila sa paghimog responsableng mga desisyon sa kinabuhi ug ilang masabtan nga ang ilang kalipay ug pagbatig kasegurohan dili bug-os nga nag-agad sa ilang trabaho o sa sagad di-kasaligang panarbaho. (Mateo 6:31-33; 1 Corinto 2:14, 15) Motabang kini kanila sa pag-ugmad ug timbang gayod nga batasan sa pagtrabaho.

Ugmara ang Diyosnong Batasan sa Pagtrabaho

Ang pipila ka tawo maoy lunod-patay nga mga trabahador, nga nag-una sa ilang trabaho labaw sa tanan. Ang uban nagdali nga mohapon na dayon aron makaundang na sila sa trabaho ug makapauli. Unsa ang timbang nga panglantaw? Ang Bibliya nagtubag: “Mas maayo pa ang usa ka hakop  nga pahulay kay sa duha ka hakop nga kahago ug paggukod sa hangin.” (Ecclesiastes 4:6) Ang pagtrabahog daghang oras, sa pagkatinuod, dili-mapuslanon—kini walay-pulos nga “paggukod sa hangin.” Ngano man? Tungod kay basin madaot na hinuon nato ang mismong mga butang nga naghatag kanatog kinadak-ang kalipay: ang atong relasyon sa atong pamilya ug mga higala, atong espirituwalidad, panglawas, ug bisan ang gitas-on sa atong kinabuhi. (1 Timoteo 6:9, 10) Ang timbang nga panglantaw mao nga magmakontento sa dili-kaayo daghang materyal nga kahinguhaan samtang nagtagamtam ug makataronganong sukod sa kalinaw imbes nga mabug-atan sa sobrang pagtrabaho nga inubanan sa panagbingkil ug kagul-anan.

Bisan tuod nagpasiugda sa maong timbang nga panglantaw, ang Bibliya supak sa pagkatapolan. (Proverbio 20:4) Ang pagkatapolan anam-anam nga modaot sa pagtahod-sa-kaugalingon ug tingali sa pagtahod sa uban kanato. Mas daotan pa, modaot kini sa atong relasyon sa Diyos. Ang Bibliya prangkang nag-ingon nga ang tawong dili motrabaho dili usab angayng pakan-on sa uban. (2 Tesalonica 3:10) Hinunoa, siya kinahanglang magbag-o ug magkugi, sa ingon magtagana sa dungganong paagi alang sa iyang kaugalingon ug sa mga tawong nagdepende kaniya. Pinaagi sa pagkugi basin makatabang pa siya niadtong tinuod nga nanginahanglan—usa ka buhat nga gidasig sa Pulong sa Diyos.—Proverbio 21:25, 26; Efeso 4:28.

Nabansay nga Pabilhan ang Trabaho Sukad Pagkabata

Ang maayong mga batasan sa pagtrabaho dili sulagma nga mabatonan; kini makat-onan sa pagkabata. Busa, ang Bibliya nag-awhag sa mga ginikanan: “Bansaya ang bata subay sa dalan nga alang kaniya; bisan kon siya matigulang na dili siya motipas gikan niana.” (Proverbio 22:6) Gawas nga ipakita nila mismo ang maayong panig-ingnan nga sila kugihan, ang maalamong mga ginikanan magsugod sa pagbansay sa ilang gagmayng mga anak pinaagi sa paghatag kanila ug mga buluhaton diha sa balay nga haom sa ilang edad. Bisan pag ang mga bata maglagot sa paghimo sa pipila ka buluhaton, sa ngadtongadto ilang isipon ang ilang kaugalingon ingong bililhong mga membro sa pamilya—ilabina kon dayegon sila ni Mama ug Papa tungod sa ilang maayong trabaho. Ikasubo, ang pipila ka ginikanan maoy mohimo sa halos tanan alang sa ilang mga anak, tingali tungod sa sayop nga kalulot. Kinahanglang palandongon sa maong mga ginikanan ang Proverbio 29:21, nga nag-ingon: “Kon patuyangan sa usa ka tawo ang gusto sa iyang sulugoon [o anak] sukad sa pagkabatan-on, siya mahimong ingrato sa ulahing bahin sa iyang kinabuhi.”

Ang responsableng mga ginikanan interesado usab kaayo sa pag-eskuyla sa ilang mga anak, nga  nagdasig kanila sa pagkat-on ug sa pagkugi samtang nag-eskuyla. Makahatag kinig kaayohan sa mga batan-on sa ulahi sa dihang sila kinahanglan nang mangita ug trabaho.

Magmaalamon sa Imong Pagpili ug Trabaho

Bisan tuod kita wala sultihi kon unsang matanga sa trabaho ang pangagpason, ang Bibliya naghatag kanato ug maayong mga giya aron ang atong espirituwal nga pag-uswag, ang pag-alagad sa Diyos, ug ubang hinungdanong mga responsabilidad dili mameligro. Pananglitan, si apostol Pablo misulat: “Ang panahong nabilin mubo na. Sukad karon kadtong . . . nagagamit sa kalibotan manig-ingon kanilang wala magagamit niini sa bug-os; kay ang talan-awon niining kalibotana nagakausab.” (1 Corinto 7:29-31) Walay butang nga permanente o bug-os nga malig-on niining presenteng sistema sa mga butang. Ang paghatag sa tanan natong panahon ug kusog ngadto niini maoy sama ra sa pagpamuhonan sa atong tibuok-kinabuhing kinitaan diha sa usa ka balay nga gitukod sa dapit nga bahaanan. Binuang gayod kini nga pagpamuhonan!

Ang ubang hubad sa Bibliya naghubad sa mga pulong “wala magagamit niini sa bug-os” ingong “dili malinga niini” ug “dili bug-os nga mapuliki niini.” (The Jerusalem Bible; Today’s English Version) Ang maalamong mga tawo dili gayod malimot nga ang panahon “hamubo na” alang niining presenteng sistema ug nga ang ‘pagkalinga,’ o ‘bug-os nga pagkapuliki,’ moresulta gayod sa kahigawad ug pagmahay.—1 Juan 2:15-17.

‘Dili Gayod Kamo Pagabiyaan sa Diyos’

Si Jehova mas nasayod sa atong mga panginahanglan kay kanato. Nasayod usab siya kon asang yugtoa na kita diha sa katumanan sa iyang katuyoan. Busa, siya nagpahinumdom kanato: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay [ang Diyos] nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’” (Hebreohanon 13:5) Pagkamakapahupay nianang mga pulonga! Agig pagsundog sa mahigugmaong kahingawa sa Diyos alang sa iyang katawhan, si Jesus naggahin ug dakong bahin sa iyang gibantog nga Wali sa Bukid sa pagtudlo sa iyang mga tinun-an sa hustong panglantaw sa trabaho ug sa materyal nga mga butang.—Mateo 6:19-33.

Ang mga Saksi ni Jehova naningkamot sa pagsunod sa maong mga pagtulon-an. Pananglitan, sa dihang gisultihan sa amo ang usa ka Saksi, nga usa ka elektrisyan, nga kanunayng mag-obertaym, gibalibaran kini sa empleyado. Ngano? Tungod kay dili niya gusto nga ang iyang sekular nga trabaho makabalda sa panahon nga iyang gigahin alang sa iyang pamilya ug sa espirituwal nga mga butang. Tungod kay siya maayo kaayo ug kasaligan nga mamumuo, gitahod sa iyang amo ang iyang gusto. Tinuod, dili ingon niana kanunay ang mahimong resulta, ug kinahanglan tingali nga ang usa mangita ug laing trabaho aron mamentinar ang usa ka balanse nga estilo sa kinabuhi. Bisan pa niana, kasagarang makita niadtong bug-os nga mosalig kang Jehova nga tungod sa ilang maayong paggawi ug batasan sa pagtrabaho ilang naangkon ang pabor sa ilang amo.—Proverbio 3:5, 6.

Sa Dihang Magantihon na ang Tanang Trabaho

Niining presente, dili-hingpit nga sistema sa mga butang, ang pagpangempleyo ug mga kalaoman sa pangempleyo aduna gayoy mga problema ug kawalay kasegurohan. Ang tinuod, magkagrabe pa ang mga kahimtang samtang ang kalibotan mas nagakahuyang ug ang mga ekonomiya mag-usab-usab  o madaot pa gani. Apan temporaryo lang kining kahimtanga. Sa dili madugay, wala nay mawad-ag trabaho. Gawas pa, ang tanang trabaho unya maoy makaiikag ug magantihon gayod. Sa unsang paagi kana mahitabo? Unsay magpahinabo niana nga kausaban?

Pinaagi sa iyang manalagna nga si Isaias, si Jehova nagpunting sa maong panahon. “Ako naglalang ug bag-ong mga langit ug usa ka bag-ong yuta,” matod ni Jehova, “ug ang unang mga butang dili na pagahinumdoman, ni kini sila motungha pa sa kasingkasing.” (Isaias 65:17) Siya naghisgot bahin sa iyang bag-ong gobyerno, nga ilalom niana matinuod na ang usa ka bag-o ug lahi gayod nga katilingban sa mga tawo.—Daniel 2:44.

Mahitungod sa paagi sa pagkinabuhi ug pagtrabaho sa mga tawo nianang umaabot nga panahon, ang tagna nagpadayon: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang mga kamot. Dili sila magbudlay sa walay kapuslanan, ni sila manganak alang sa kahasol; tungod kay sila mao ang mga anak nga gilangkoban sa mga gipanalanginan ni Jehova, ug ang ilang mga kaliwat kauban nila.”—Isaias 65:21-23.

Pagkadako gayod sa kausaban nga pagahimoon sa bag-ong kalibotan nga gidisenyo sa Diyos! Dili ba nimo buot nga mopuyo nianang kalibotana, usa ka kalibotan diin ikaw “dili na magbudlay sa walay kapuslanan” kondili bug-os nga magtagamtam sa “mga bunga” sa imong hinagoan? Apan, matikdi kon kinsay magtagamtam sa maong mga panalangin: “Sila mao ang mga anak nga gilangkoban sa mga gipanalanginan ni Jehova.” Ikaw mahimong usa nianang “mga gipanalanginan” pinaagi sa pagkat-on bahin kang Jehova ug pagkab-ot sa iyang mga kinahanglanon. Si Jesus nag-ingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ang mga Saksi ni Jehova malipay sa pagtabang kanimo sa pagbaton nianang nagahatag-kinabuhi nga kahibalo pinaagi sa sistematikong pagtuon sa Pulong sa Diyos, ang Bibliya.

[Kahon sa panid 6]

“Pinangita”

“Bisan unsay inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo,” matod sa Bibliya. (Colosas 3:23) Dayag nga pangitaong empleyado ang tawo kansang batasan sa pagtrabaho gigamhan niining maayong prinsipyo. Tungod niana, si J. J. Luna, diha sa iyang librong How to Be Invisible, nagtambag sa mga amo nga nangitag mga mamumuo nga mangita diha sa aktibong mga membro sa partikular nga relihiyosong mga grupo, apan siya midugang: “Sa aktuwal kami kasagarang mokuha ug mga Saksi [ni Jehova].” Ang usa sa mga rason nga iyang gihatag mao nga sila ilado tungod sa ilang pagkamatinud-anon, ug tungod niana sila “pinangita” sa lainlaing matang sa mga trabaho.

[Mga hulagway sa panid 5]

Ang pagbalanse sa trabaho uban sa espirituwal nga mga kalihokan ug lulinghayaw mohatag ug katagbawan