“Magpadayon sa Pagpamungag Daghan”

“Magpadayon sa pagpamungag daghan ug magpamatuod nga akong mga tinun-an.”—Juan 15:8.

1. (a) Unsang kinahanglanon sa pagkatinun-an ang gihisgotan ni Jesus sa iyang mga apostoles? (b) Unsang pangutana ang angay natong isukna sa atong kaugalingon?

 BISPERAS kadto sa iyang kamatayon. Si Jesus migahin ug taastaas nga panahon sa pagdasig sa iyang mga apostoles pinaagi sa seryosong pagpakigsulti kanila. Lagmit lapas na kadto sa tungang gabii, apan si Jesus, kay gitukmod sa gugma alang sa iyang suod nga mga higala, nagpadayon sa pagsulti. Dayon, panahon sa ilang kabildohay, iyang gipahinumdoman sila sa usa pa ka kinahanglanon nga kinahanglan nilang kab-oton aron magpabiling iyang mga tinun-an. Siya miingon: “Ang akong Amahan mahimaya niini, nga kamo magpadayon sa pagpamungag daghan ug magpamatuod nga akong mga tinun-an.” (Juan 15:8) Kita ba karon nakakab-ot niining maong kinahanglanon sa pagkatinun-an? Unsay ipasabot sa “pagpamungag daghan”? Aron mahibaloan nato, hisgotan nato ang kabildohay nianang gabhiona.

2. Unsang ilustrasyon bahin sa bunga ang giasoy ni Jesus sa bisperas sa iyang kamatayon?

² Ang tambag nga mamungag daghan maoy bahin sa ilustrasyon nga giasoy ni Jesus sa iyang mga apostoles. Siya miingon: “Ako mao ang matuod nga punoan sa paras, ug ang akong Amahan mao ang magtitikad. Ang tanan kong sanga nga dili mamunga iyang pagaputlon, ug ang tanan nga mamunga iyang pagahinloan, aron nga kini mamunga ug daghan pa. Kamo mahinlo na tungod sa pulong  nga akong gisulti kaninyo. Magpabilin nga nahiusa kanako, ug ako nahiusa kaninyo. Ingon nga ang sanga dili makapamunga sa kaugalingon niini gawas kon kini magpabilin sa punoan sa paras, sa samang paagi dili kamo makapamunga, gawas kon kamo magpabilin nga nahiusa kanako. Ako mao ang punoan sa paras, kamo ang mga sanga. . . . Ang akong Amahan mahimaya niini, nga kamo magpadayon sa pagpamungag daghan ug magpamatuod nga akong mga tinun-an. Ingon nga ang Amahan nahigugma kanako ug ako nahigugma kaninyo, magpabilin kamo sa akong gugma. Kon sundon ninyo ang akong mga sugo, kamo magpabilin sa akong gugma.”—Juan 15:1-10.

3. Unsay angayng buhaton sa mga sumusunod ni Jesus aron makapamunga?

³ Niining maong ilustrasyon si Jehova mao ang Magtitikad, si Jesus mao ang punoan sa paras, ug ang mga apostoles nga kaestorya ni Jesus mao ang mga sanga. Basta maningkamot lang ang mga apostoles sa ‘pagpabilin nga nahiusa’ kang Jesus, sila mamunga. Dayon gipatin-aw ni Jesus kon sa unsang paagi ang mga apostoles molampos sa paghupot niining hinungdanong panaghiusa: “Kon sundon ninyo ang akong mga sugo, kamo magpabilin sa akong gugma.” Sa ulahi, si apostol Juan misulat sa susamang mga pulong ngadto sa mga isigka-Kristohanon: “Siya nga nagbantay sa mga sugo [ni Kristo] nagpabiling nahiusa kaniya.” a (1 Juan 2:24; 3:24) Busa, pinaagi sa pagtuman sa mga sugo ni Kristo, ang iyang mga sumusunod magpabiling nahiusa kaniya, ug kanang maong panaghiusa, sa baylo, makapaarang kanila sa pagpamunga. Unsang matanga sa bunga ang kinahanglan natong ipatungha?

Kahigayonan nga Mouswag

4. Unsay atong makat-onan gikan sa kamatuoran nga “pagaputlon” ni Jehova ang tanang sanga nga dili mamunga?

⁴ Diha sa ilustrasyon sa punoan sa paras, “pagaputlon,” o pung-olon, ni Jehova ang sanga nga dili mamunga. Unsay gipadayag niini kanato? Kini nagpadayag kanato nga dili lang kay ang tanang tinun-an gikinahanglan nga mamunga kondili usab nga ang tanan makahimo niana, bisan unsa pay ilang mga sirkumstansiya o mga limitasyon. Sa pagkatinuod, kasukwahi sa mahigugmaong mga dalan ni Jehova ang ‘pagputol,’ o pagdiskuwalipikar, sa usa ka tinun-an ni Kristo tungod kay napakyas sa pagkab-ot sa usa ka butang nga saylo sa iyang maabot.—Salmo 103:14; Colosas 3:23; 1 Juan 5:3.

5. (a) Sa unsang paagi ang ilustrasyon ni Jesus nagpakita nga kita makapamunga pag daghan? (b) Unsang duha ka matang sa mga bunga ang atong hisgotan?

⁵ Ang ilustrasyon ni Jesus bahin sa punoan sa paras nagpakita usab nga sulod sa mga limitasyon sa atong mga sirkumstansiya, kinahanglang mangita kitag kahigayonan nga mouswag diha sa atong mga kalihokan ingong tinun-an. Matikdi kon giunsa kini pagsulti ni Jesus: “Ang tanan kong sanga nga dili mamunga iyang pagaputlon, ug ang tanan nga mamunga iyang pagahinloan, aron nga kini mamunga ug daghan pa.” (Juan 15:2) Sa kataposang bahin sa ilustrasyon, giawhag ni Jesus ang iyang mga sumusunod sa pagpamungag “daghan.” (Bersikulo 8) Unsay gipasabot niini? Ingong mga tinun-an, kita dili gayod angayng magrelaksrelaks na lang. (Pinadayag 3:14, 15, 19) Hinunoa, kita angayng mangitag mga paagi nga makapamunga pag daghan. Unsang matanga sa mga bunga ang angay natong paningkamotan nga ipatungha pa? Dunay duha ka matang (1) “ang bunga sa espiritu” ug (2) ang bunga sa Gingharian.—Galacia 5:22, 23; Mateo 24:14.

Ang Bunga sa Kristohanong mga Hiyas

6. Sa unsang paagi gipasiugda ni Jesu-Kristo ang kahinungdanon sa unang gihisgotan nga bunga sa espiritu?

⁶ Ang unang gilista diha sa “bunga sa espiritu” mao ang gugma. Ang balaang espiritu sa Diyos magpatungha ug gugma diha sa mga Kristohanon, kay sila nagtuman sa sugo nga gihatag ni Jesus sa dayon na niyang giasoy ang ilustrasyon bahin sa punoan sa paras nga nagapamunga. Giingnan niya ang iyang mga apostoles: “Ako magahatag kaninyog bag-ong sugo, nga kamo maghigugmaay sa usag usa.” (Juan 13:34) Gani, sa iyang pakigkabildohay nianang kataposang gabii sa iyang yutan-ong kinabuhi, sublisubling gipahinumdoman ni Jesus ang mga apostoles sa panginahanglan sa pagpakita sa hiyas sa gugma.—Juan 14:15, 21, 23, 24; 15:12, 13, 17.

7. Sa unsang paagi gipakita ni apostol Pedro nga ang pagpamunga nalangkit sa pagpasundayag ug samag-Kristo nga mga hiyas?

⁷ Si Pedro, nga presente nianang gabhiona, nakasabot nga ang samag-Kristo nga gugma ug ang susama niana nga mga hiyas kinahanglang ipasundayag  taliwala sa tinuod nga mga tinun-an ni Kristo. Katuigan sa ulahi, gidasig ni Pedro ang mga Kristohanon sa pag-ugmad sa mga hiyas sama sa pagpugong-sa-kaugalingon, inigsoong pagbati, ug gugma. Midugang siya nga sa pagbuhat niana mapugngan kita “sa pagkahimong dili-aktibo o dili-mabungahon.” (2 Pedro 1:5-8) Bisan unsa pa ang atong mga sirkumstansiya, ang pagpasundayag sa bunga sa espiritu posibleng mahimo nato. Busa, hinaot nga kita maningkamot sa pagpakitag gugma, kalulot, kalumo, ug ubang samag-Kristong mga hiyas sa mas bug-os pa, kay “batok sa maong mga butang walay balaod,” o limitasyon. (Galacia 5:23) Sa pagkatinuod, ‘mamunga pa kitag daghan.’

Pagpatungha ug Bunga sa Gingharian

8. (a) Unsay kalambigitan tali sa bunga sa espiritu ug sa bunga sa Gingharian? (b) Unsang pangutana ang angay natong tagdon?

⁸ Ang daghag kolor ug dugaon nga mga prutas magdayandayan sa usa ka tanom. Apan, ang bili nianang maong mga prutas saylo pa nianang sa pagdayandayan lamang. Ang mga prutas hinungdanon usab alang sa pagpadaghan sa tanom pinaagi sa mga binhi niini. Sa susama, ang bunga sa espiritu makahimog labaw pa kay sa pagdayandayan lamang sa atong Kristohanong personalidad. Ang mga hiyas sama sa gugma ug pagtuo magpalihok usab kanato sa pagsabwag sa samag-binhi nga mensahe sa Gingharian nga makita diha sa Pulong sa Diyos. Matikdi kon sa unsang paagi gipasiugda ni apostol Pablo kining hinungdanong kalambigitan. Siya nag-ingon: “Kami usab nagapasundayag ug pagtuo [bahin sa bunga sa espiritu] ug busa kami nagasulti.” (2 Corinto 4:13) Niining paagiha, misaysay pa si Pablo, kami ‘nagtanyag kanunay sa Diyos ug halad sa pagdayeg, nga mao, ang bunga sa mga ngabil’—ang ikaduhang matang sa bunga nga kinahanglan natong ipasundayag. (Hebreohanon 13:15) Duna bay mga kahigayonan sa atong kinabuhi nga mahimong mas mabungahon, sa pagkatinuod mamungag “daghan,” ingong mga magmamantala sa Gingharian sa Diyos?

9. Ang pagpamunga ba susama sa paghimong mga tinun-an? Ipatin-aw.

⁹ Aron matubag sa hustong paagi, kinahanglan una natong masabtan kon unsay nalangkit sa bunga sa Gingharian. Husto ba nga mohinapos nga ang pagpamunga nagpasabot ug paghimog mga tinun-an? (Mateo 28:19) Ang bunga ba nga atong ipatungha sa panguna magtumong sa mga tawo nga atong gitabangan nga mahimong bawtismadong mga magsisimba ni Jehova? Dili. Kon mao kana, ang situwasyon makapahigawad gayod alang niadtong minahal nga mga Saksi nga matinumanong nagwali sa mensahe sa Gingharian sulod sa daghang tuig diha sa dili kaayo masanongon nga mga teritoryo. Aw, kon ang bunga sa Gingharian nga atong ipatungha gihawasan lamang sa bag-ong mga tinun-an, ang maong kugihan nga mga Saksi mahisama sa mga sanga nga wala mamunga diha sa ilustrasyon ni Jesus! Siyempre, dili kana mao ang kahimtang. Nan, unsa man ang pangunang bunga sa Gingharian sa atong ministeryo?

Mabungahon Pinaagi sa Pagsabwag sa Binhi sa Gingharian

10. Sa unsang paagi ang ilustrasyon ni Jesus bahin sa magpupugas ug sa lainlaing matang sa yuta nagpakita kon unsay ipasabot sa bunga sa Gingharian ug unsay wala ipasabot niini?

¹⁰ Ang ilustrasyon ni Jesus bahin sa magpupugas ug sa lainlaing matang sa yuta nagpunting sa tubag—usa ka makapadasig nga tubag alang niadtong nagsangyaw diha sa dili kaayo mabungahon  nga mga teritoryo. Si Jesus miingon nga ang binhi mao ang mensahe sa Gingharian nga makita diha sa Pulong sa Diyos ug ang yuta naghawas sa mahulagwayong kasingkasing sa tawo. Ang ubang binhi “nahulog sa maayong yuta, ug, human mogitib, mipatungha kinig bunga.” (Lucas 8:8) Unsa nga bunga? Aw, human ang punoan sa trigo moturok ug mogulang, kini mopatunghag bunga, dili gagmayng mga punoan sa trigo, kondili bag-ong binhi. Sa susama, ang usa ka Kristohanon mopatunghag bunga, dili kanunayng magpasabot ug bag-ong mga tinun-an, kondili bag-ong binhi sa Gingharian.

11. Sa unsang paagi mahubit ang bunga sa Gingharian?

¹¹ Busa, ang bunga niining kasoha dili ang bag-ong mga tinun-an ni ang maayong Kristohanong mga hiyas. Tungod kay ang binhi nga gipugas mao ang pulong sa Gingharian, ang bunga nagtumong sa dugang pang binhi sa Gingharian. Ang pagpamunga niining kasoha nagtumong sa pagpahayag bahin sa Gingharian. (Mateo 24:14) Posible ba ang pagpatungha nianang bunga sa Gingharian—pagwali sa maayong balita sa Gingharian—bisan unsa pa man ang atong mga sirkumstansiya? Oo, posible kana! Sa mao gihapong ilustrasyon, gipatin-aw ni Jesus kon ngano.

Paghatag sa Atong Kinamaayohan Alang sa Kahimayaan sa Diyos

12. Ang pagpatungha ba ug bunga sa Gingharian posibleng mahimo sa tanang Kristohanon? Ipatin-aw.

¹² Ang “napugas sa maayong yuta,” miingon si Jesus, “magapatunghag abot, kini usa ka gatos ka pilo, kana kan-uman, ang lain katloan.” (Mateo 13:23) Ang binhi nga gipugas sa usa ka uma mahimong magkalainlain ug abot sumala sa mga sirkumstansiya.  Sa susama, ang atong mahimo sa pagmantala sa maayong balita magkalainlain tingali depende sa atong mga sirkumstansiya, ug gipakita ni Jesus nga giila niya kini. Ang uban tingali mas daghag kahigayonan; ang uban mas maayog lawas ug mas lagsik. Busa, ang atong mahimo puwedeng mas dako o mas gamay kay sa mahimo sa uban, apan basta kini mao ang atong kinamaayohan, mahimuot niini si Jehova. (Galacia 6:4) Bisan pag ang pagkatigulang o pagkabaldado maglimite sa atong pagpakig-ambit diha sa buluhatong pagsangyaw, ang atong maluluy-ong Amahan, si Jehova, sa walay duhaduha mag-isip kanato ingong usa niadtong kinsa ‘nagpadayon sa pagpamungag daghan.’ Ngano? Tungod kay gihatag nato kaniya ‘ang tanan nga atong nabatonan’—atong bug-os kalag nga pag-alagad. b—Marcos 12:43, 44; Lucas 10:27.

13. (a) Unsa ang pangunang rason nga kita “magpadayon” sa pagpatungha ug bunga sa Gingharian? (b) Unsay motabang kanato sa pagpamunga kanunay diha sa dili kaayo masanongon nga mga teritoryo? (Tan-awa ang kahon sa panid 21.)

¹³ Sa unsa mang sukod nga kita makapatungha ug bunga sa Gingharian, matukmod kita sa ‘pagpadayon ug pagpamunga kanunay’ sa dihang hinumdoman nato kon nganong gibuhat nato kana. (Juan 15:16) Gihisgotan ni Jesus ang pangunang rason: “Ang akong Amahan mahimaya niini, nga kamo magpadayon sa pagpamungag daghan.” (Juan 15:8) Oo, ang atong buluhatong pagsangyaw magbalaan sa ngalan ni Jehova atubangan sa tanang katawhan. (Salmo 109:30) Si Honor, usa ka matinumanong Saksi nga nag-edad na ug 75 anyos, nag-ingon: “Bisan diha sa dili kaayo masanongon nga mga teritoryo, usa ka pribilehiyo nga mohawas sa Labing Hataas.” Sa dihang si Claudio, kinsa usa ka masibotong Saksi sukad pa sa 1974, gipangutana kon nganong nagpadayon siya sa pagsangyaw bisan pag pipila ra diha sa iyang teritoryo ang misanong, iyang gikutlo ang Juan 4:34, diin atong mabasa ang giingon ni Jesus: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.” Midugang si Claudio: “Sama kang Jesus, gusto nako nga dili lang sugdan kondili usab humanon ang akong buluhaton ingong magwawali sa Gingharian.” (Juan 17:4) Ang mga Saksi ni Jehova sa tibuok kalibotan mouyon niana.—Tan-awa ang kahon nga “Kon Unsaon sa ‘Pagpamunga Uban ang Paglahutay,’” sa panid 21.

Pagsangyaw ug Pagtudlo

14. (a) Unsa ang duha-ka-pilo nga katuyoan sa buluhaton ni Juan Bawtista ug ni Jesus? (b) Unsaon nimo paghubit ang Kristohanong kalihokan karon?

¹⁴ Ang unang magwawali sa Gingharian nga gihisgotan sa mga Ebanghelyo mao si Juan Bawtista. (Mateo 3:1, 2; Lucas 3:18) Ang iyang pangunang tumong mao ang ‘pagsaksi,’ ug gibuhat niya kana uban ang hugot nga pagtuo ug paglaom nga “ang tanang matang sa katawhan motuo.” (Juan 1:6, 7) Sa pagkatinuod, ang uban nga gisangyawan ni Juan nahimong mga tinun-an ni Kristo. (Juan 1:35-37) Busa, si Juan maoy usa ka magsasangyaw ug usa usab ka tighimo ug tinun-an. Si Jesus usab maoy usa ka magsasangyaw ug magtutudlo. (Mateo 4:23; 11:1) Nan, dili ikatingala nga gisugo ni Jesus ang iyang mga sumusunod nga dili lamang mosangyaw sa mensahe sa Gingharian kondili usab motabang sa mga tawo nga modawat niana aron mahimong iyang mga tinun-an. (Mateo 28:19, 20) Ang atong buluhaton karon sa ingon maoy kombinasyon sa pagsangyaw ug pagpanudlo.

15. Unsay kasamahan sa reaksiyon ngadto sa buluhatong pagsangyaw nga gihimo sa unang siglo K.P. ug nianang ginahimo karon?

¹⁵ Sa mga tawo sa unang siglo K.P. nga nakadungog kang Pablo nga nagsangyaw ug nagtudlo, “dihay pipila nga mituo sa mga butang nga iyang gisulti; ang uban wala motuo.” (Buhat 28:24) Karon, susama gayod niana ang reaksiyon. Ikasubo nga kadaghanang binhi sa Gingharian nahulog sa dili-madinawatong yuta. Bisan pa niana, ang ubang mga binhi nahulog gihapon sa maayong yuta, migamot, ug miturok, ingon gayod sa gitagna ni Jesus. Gani, sa tibuok kalibotan, dunay aberids nga  kapin sa 5,000 ka tawo ang nahimong tinuod nga mga tinun-an ni Kristo kada semana sa tuig! Kining bag-ong mga tinun-an ‘mituo sa mga butang nga gisulti,’ bisan tuod ang kadaghanan sa ubang mga tawo wala. Unsay nakatabang sa paghimo sa ilang kasingkasing nga madinawaton sa mensahe sa Gingharian? Kasagaran ang personal nga interes nga gipakita sa mga Saksi—ang pagbisibis sa bag-ong gipugas nga binhi, ingnon ta—dakog epekto. (1 Corinto 3:6) Tagda ang duha lamang sa daghang pananglitan.

Dakog Epekto ang Pagpakitag Personal nga Interes

16, 17. Nganong hinungdanon ang pagpakita ug personal nga interes niadtong atong mahimamat diha sa atong ministeryo?

¹⁶ Si Karolien, usa ka batan-ong Saksi sa Belgium, miduaw sa usa ka tigulang nga babaye nga wala magpakitag interes sa mensahe sa Gingharian. Tungod kay ang kamot sa babaye naputos sa bendahe, si Karolien ug ang iyang kauban mitanyag ug tabang, apan mibalibad ang babaye. Duha ka adlaw sa ulahi ang mao gihapong mga Saksi mibalik sa balay sa babaye ug nangomosta sa iyang kahimtang. “Dako kinig epekto,” miingon si Karolien. “Natingala siya sa pagkakita nga kami interesado gayod kaniya sa personal. Gipadayon mi niya sa iyang balay, ug usa ka pagtuon sa Bibliya ang nasugdan.”

¹⁷ Si Sandi, usa ka Saksi nga taga-Tinipong Bansa, nagpakita usab ug personal nga interes niadtong iyang gisangyawan. Susihon niya ang mga anunsiyo diha sa lokal nga mantalaan bahin sa bag-ong natawong mga bata ug dayon duawon niya ang bag-ong mga ginikanan dala ang Akong Basahon sa mga Estorya sa Bibliya. c Tungod kay ang inahan kasagarang naa sa balay ug mapagarbohong magpakita sa iyang anak ngadto sa mga bisita, subsob nga moresulta ang kabildohay. “Makigsulti ko sa mga ginikanan bahin sa kahinungdanon sa pagmugnag suod nga relasyon uban sa bag-ong natawong bata pinaagi sa pagbasa,” misaysay si Sandi. “Dayon hisgotan nako ang mga problema sa pagmatuto ug bata sa pagkakaron.” Di pa dugay, tungod sa ingon niana nga pagduaw, usa ka inahan ug unom ka anak ang misugod sa pag-alagad kang Jehova. Ang pagpakitag kamamugnaon ug personal nga interes mahimong mosangpot sa susamang makapalipayng mga resulta diha sa atong ministeryo.

18. (a) Nganong ang kinahanglanon sa “pagpamungag daghan” posibleng mahimo natong tanan? (b) Unsang tulo ka kinahanglanon sa pagkatinun-an nga gihisgotan diha sa Ebanghelyo ni Juan ang gusto gayod nimong kab-oton?

¹⁸ Pagkamakapadasig ang pagkahibalo nga ang kinahanglanon sa ‘pagpadayon sa pagpamungag daghan’ posibleng mahimo nato! Kita man bata o tigulang, kita man maayog lawas o masakiton, kita man nagsangyaw sa masanongon o dili kaayo masanongon nga mga teritoryo, kitang tanan makapamungag daghan. Sa unsang paagi? Pinaagi sa mas bug-os pa nga pagpasundayag sa bunga sa espiritu ug pinaagi sa pagsangyaw sa mensahe sa Gingharian sa Diyos kutob sa atong mahimo. Sa samang panahon, maningkamot kita sa ‘pagpabilin sa pulong ni Jesus’ ug sa ‘pagbaton ug gugma sa atong taliwala.’ Oo, pinaagi sa pagkab-ot niining tulo ka hinungdanong mga kinahanglanon sa pagkatinun-an nga gihisgotan diha sa Ebanghelyo ni Juan, atong gipamatud-an nga kita ‘mga tinun-an gayod ni Kristo.’—Juan 8:31; 13:35.

[Mga footnote]

Mga Pangutana Alang sa Pagsubli

• Unsang matanga sa bunga ang kinahanglang ipatungha nato nga mas dagaya?

• Nganong ang tumong sa “pagpamungag daghan” posibleng makab-ot nato?

• Unsang tulo ka hinungdanong mga kinahanglanon alang sa pagkatinun-an nga gihisgotan diha sa Ebanghelyo ni Juan ang atong nahisgotan?

[Mga Pangutana sa Pagtuon]

[Kahon/Hulagway sa panid 21]

Kon Unsaon Sa ‘Pagpamunga Uban Ang Paglahutay’

UNSAY makatabang kanimo sa pagpadayon nga matinumanong magasangyaw sa mensahe sa Gingharian diha sa dili kaayo masanongon nga mga teritoryo? Aniay pipila ka mapuslanong mga tubag niining pangutanaha.

“Ang pagkahibalo nga nabatonan nato ang bug-os nga pagpaluyo ni Jesus makadasig kanato nga mahimong positibo ug malahutayon, bisan unsa pay reaksiyon diha sa teritoryo.”—Harry, nag-edad ug 72; nabawtismohan sa 1946.

“Ang teksto sa 2 Corinto 2:17 kanunayng nagdasig kanako. Kini nag-ingon nga kita makig-ambit diha sa ministeryo ‘ilalom sa panan-aw sa Diyos, kauban ni Kristo.’ Sa dihang magsangyaw ako, malipay ako sa pagpakig-uban sa akong kinasuorang mga higala.”—Claudio, nag-edad ug 43; nabawtismohan sa 1974.

“Sa tinuoray lang, alang kanako ang buluhatong pagsangyaw maoy personal nga pagpakigbisog. Bisan pa niana, naeksperyensiyahan nako ang kamatuoran sa giingon diha sa Salmo 18:29: ‘Pinaagi sa akong Diyos makakatkat ako ug paril.’”—Gerard, nag-edad ug 79; nabawtismohan sa 1955.

“Kon makabasa ko bisag usa lang ka teksto diha sa ministeryo, kini makahatag kanakog katagbawan nga dunay tawo nga nagpasusi sa iyang kasingkasing pinaagi sa Bibliya.”—Eleanor, nag-edad ug 26; nabawtismohan sa 1989.

“Kanunay nakong gisulayan ang lainlaing mga introduksiyon. Daghan kaayo kini nga dili nako magamit kining tanan sa nahibiling mga tuig sa akong kinabuhi.”—Paul, nag-edad ug 79; nabawtismohan sa 1940.

“Dili ko mahiubos sa negatibong mga reaksiyon. Gipaningkamotan ko nga moduol sa mahigalaong paagi, nga makigsulti sa mga tawo ug mamati sa ilang panglantaw.”—Daniel, nag-edad ug 75; nabawtismohan sa 1946.

“Nakahimamat ako ug mga bag-ong bawtismado kinsa miingon nga ang akong buluhatong pagsangyaw nakatampo sa ilang pagkahimong mga Saksi. Wala lang nako mahibaloi nga sa ulahi dihay lain nga nagtuon sa Bibliya uban kanila ug mitabang kanila sa pag-uswag. Nakapalipay nako ang pagkahibalo nga ang atong ministeryo maoy usa ka tiningob nga paningkamot.”—Joan, nag-edad ug 66; nabawtismohan sa 1954.

Unsay makatabang kanimo sa ‘pagpamunga uban ang paglahutay’?—Lucas 8:15.

[Mga hulagway sa panid 20]

Pinaagi sa pagpasundayag sa bunga sa espiritu ug pinaagi sa pagmantala sa mensahe sa Gingharian, kita nagapamungag daghan

[Hulagway sa panid 23]

Unsay gipasabot ni Jesus sa dihang giingnan niya ang iyang mga apostoles: “Magpadayon sa pagpamungag daghan”?