Pagkasinsero—Tilinguhaon, Apan Igo na ba Kini?

TILINGUHAON ba gayod ang pagkasinsero sa atong adlaw-adlaw nga kinabuhi? Usa ka diksiyonaryo naghubad sa “pagkasinsero” ingong “kawalay pagpakaaron-ingnon o pagkasalingkapaw; pagkamatinud-anon; pagkamadayganon; pagkatiunay.” Tin-aw, kining hiyasa mapuslanon sa pagpausbaw sa maayong relasyon sa uban. Si apostol Pablo nagtambag: “Magmasinugtanon kamo sa inyong mga agalon nga unodnon sa tanang butang, dili pinaagig mga buhat sa pakita-lang nga pag-alagad, ingong mga tigpahimuot sa mga tawo, kondili uban ang katim-os sa kasingkasing, nga may kahadlok kang Jehova.” (Colosas 3:22) Kinsay dili malipay nga makabaton ug trabahante nga ingon ka sinsero? Sa pagkakaron, ang sinserong mga tawo mas dakog kahigayonan nga makakaplag ug makahupot sa ilang mga trabaho.

Apan, ang katarongan nga tilinguhaon kaayo ang pagkasinsero mao ang epekto niini sa atong relasyon sa Diyos. Ang karaang mga Israelinhon nagpahimulos sa panalangin sa Diyos sa dihang sila maampingong nagsunod sa mga balaod ug mga pista. Bisan tuod naghisgot bahin sa pagkahinlo sa kongregasyon, giawhag ni Pablo ang mga Kristohanon: “Atong saulogon ang pista, dili pinaagi sa daan nga lebadura, ni pinaagi sa lebadura sa kangil-aran ug pagkadaotan, kondili pinaagi sa mga tinapay nga walay igpapatubo sa katim-os ug sa kamatuoran.” (1 Corinto 5:8) Aron ang atong pagsimba dalawaton sa Diyos, ang pagkasinsero dili lamang tilinguhaon kondili kinahanglanon. Apan, matikdi nga kini dili igo. Kinahanglang duyogan kini sa kamatuoran.

Ang mga magtutukod ug ang mga pasahero sa Titanic lagmit sinserong nagtuo nga ang dakong depasahero nga barko dili gayod malunod. Apan, sa unang paglawig niini niadtong 1912, kini nabangga sa dakong yelo ug ang 1,517 ka tawo nangamatay. Ang pipila ka Hudiyo sa unang siglo lagmit sinserong nagtuo sa ilang paagi sa pagsimba sa Diyos, apan ang ilang kasibot “dili sumala sa tukmang kahibalo.” (Roma 10:2) Aron kita dalawaton sa Diyos, ang atong sinserong mga tinuohan kinahanglang ipasukad sa tukmang impormasyon. Ang mga Saksi ni Jehova sa imong lugar malipay sa pagtabang kanimo sa pagsusi kon unsay nalangkit sa pag-alagad sa Diyos uban ang pagkasinsero ug kamatuoran.