Mga Pangutana Gikan sa mga Magbabasa

Nganong giingon man sa Isaias 30:21 nga ang pulong ni Jehova naggikan sa “imong luyo,” nga ang nag-unang bersikulo nagbutang man kang Jehova sa atubangan pinaagi sa pag-ingon nga, “Ang imong mga mata mahimo gayong mga mata nga makakita sa imong Dakong Instruktor”?

Ang Isaias 30:20, 21 mabasa: “Ang imong Dakong Instruktor dili na magtago sa iyang kaugalingon, ug ang imong mga mata mahimo gayong mga mata nga makakita sa imong Dakong Instruktor. Ug ang imong mga igdulungog makadungog ug pulong sa imong luyo nga mag-ingon: ‘Mao kini ang dalan. Lakaw kamo niini,’ kon kamo moadto sa tuo o kon kamo moadto sa wala.”

Kon sabton ang teksto sa literal nga paagi, ang magbabasa makakita kang Jehova, ang Dakong Instruktor, diha sa iyang atubangan apan makadungog sa Iyang tingog gikan sa luyo. Apan, ang maong mga pulong maoy mahulagwayon ug kinahanglang sabton nianang paagiha.

Ang mahulagwayong sinultihan nga gipahanduraw kanato sa bersikulo 20 maoy nianang sa usa ka alagad nga nagsilbi sa iyang agalon, nga andam gayod sa paglihok kon unsay isugo sa agalon. Sama sa usa ka alagad nga igmat nga nagtan-aw sa kamot sa iyang agalon aron masabtan ang iyang gustong ipabuhat, ang katawhan ni Jehova karon mainampingong nagsentro sa ilang pagtagad sa binase-sa-Bibliya nga mga instruksiyon nga anam-anam nga gihatag ni Jehova pinaagi sa iyang yutan-ong organisasyon. (Salmo 123:1, 2) Oo, sila milihok sumala sa iyang pagtultol, nga alisto bisan unsay ipadayag ni Jehova pinaagi sa “matinumanon ug maalamong ulipon.”—Mateo 24:45-47.

Nan, unsay ipasabot sa pulong nga nadungog sa iyang mga alagad gikan sa luyo? Makataronganon ang paghinapos nga ang tingog nga gikan sa luyo mao ang tingog sa Diyos nga iyang gisulti kaniadto pinaagi sa iyang sinulat nga Pulong samtang gipatin-aw kini pinaagi sa iyang “matinumanong piniyalan.” (Lucas 12:42) Ang modernong-adlaw nga mga alagad sa Diyos namati sa iyang tingog pinaagi sa makugihong pagtuon sa Bibliya ug pinaagi sa pagpadapat sa mga prinsipyo niini diha sa ilang kinabuhi uban sa tabang sa mga publikasyon nga giandam sa “matinumanon ug maalamong ulipon,” “ang matinumanong piniyalan.” Pinaagi sa pagsalig ug sa pagkahimong alisto gayod sa nunot-sa-panahon nga direksiyon nga gitagana sa Dakong Instruktor ug pinaagi sa pagtuon sa Pulong sa Diyos, nga gisulat kasiglohan kanhi, ang iyang mga alagad mahulagwayong makakita kaniya sa ilang atubangan ug makadungog sa iyang tingog gikan sa luyo.—Roma 15:4.