Nganong Saulogon ang Panihapon sa Ginoo?
Nganong Saulogon ang Panihapon sa Ginoo?
“Gikan sa Ginoo akong nadawat kanang akong gihatag usab kaninyo.”—1 CORINTO 11:23.
1, 2. Unsay gihimo ni Jesus sa gabii sa Paskuwa niadtong 33 K.P.?
PRESENTE ang bugtong Anak ni Jehova. Presente usab ang 11 ka lalaki nga ‘nagmaunongon kaniya sa iyang mga pagsulay.’ (Lucas 22:28) Huwebes kadto sa gabii, Marso 31, 33 K.P., ug lagmit gayod nga ang kalangitan ibabaw sa Jerusalem gidayandayanan sa takdol nga bulan. Si Jesu-Kristo ug ang iyang mga apostoles bag-o pang nakahuman sa pagsaulog sa Paskuwa. Ang maluibong si Judas Iskariote gipalakaw na, apan dili kadto panahon aron mohawa ang uban. Ngano? Tungod kay may himoon si Jesus nga hinungdanon kaayo. Unsa kadto?
2 Sanglit presente niadtong higayona ang magsusulat sa Ebanghelyo nga si Mateo, siya ang atong pasuginlon. Siya misulat: “Si Jesus nagkuhag tinapay ug, human makapasalamat, siya nagpikaspikas niini ug, naghatag niini sa mga tinun-an, siya miingon: ‘Pagkuha kamo, kaon. Kini nagkahulogan sa akong lawas.’ Unya, siya nagkuhag usa ka kopa ug, human makapasalamat, siya naghatag niini kanila, nga nag-ingon: ‘Inom kamo gikan niini, kamong tanan; kay kini nagkahulogan sa akong “dugo sa pakigsaad,” nga igabubo alang sa daghan sa kapasayloan sa mga sala.’” (Mateo 26:26-28) Usa ba kini ka okasyon nga kausa lamang gihimo? Unsay kahulogan niini? Kini ba may kahulogan kanato karon?
“Ipadayon Ninyo ang Pagbuhat Niini”
3. Nganong hinungdanon ang gihimo ni Jesus sa gabii sa Nisan 14, 33 K.P.?
3 Ang gihimo ni Jesu-Kristo sa gabii sa Nisan 14, 33 K.P., dili lang kay usa ka umalaging panghitabo sa iyang kinabuhi. Gihisgotan kini ni apostol Pablo sa dihang nagsulat ngadto sa dinihogang mga Kristohanon sa Corinto, diin gisundog gihapon ang maong sumbanan kapin sa 20 ka tuig sa ulahi. Bisan tuod si Pablo dili kauban ni Jesus ug sa 11 ka apostoles niadtong 33 K.P., tino nga nasayran niya gikan sa ubang mga apostoles kon unsay nahitabo nianang okasyona. Dugang pa, si Pablo dayag nga nakadawat ug kompirmasyon maylabot sa pipila ka bahin sa maong panghitabo pinaagig dinasig nga kapadayagan. Matod pa ni Pablo: “Gikan sa Ginoo akong nadawat kanang akong gihatag usab kaninyo, nga ang Ginoong Jesus sa gabii nga siya igatugyan nagkuhag tinapay ug, human makapasalamat, siya nagpikaspikas niini ug miingon: ‘Kini nagkahulogan sa akong lawas nga maoy alang kaninyo. Ipadayon ninyo ang pagbuhat niini sa paghandom kanako.’ Iyang gibuhat ang sama niana maylabot sa kopa usab, human siya manihapon, nga nag-ingon: ‘Kini nga kopa nagkahulogan sa bag-ong pakigsaad tungod sa akong dugo. Ipadayon ninyo ang pagbuhat niini, ingon kamakanunayon sa inyong pag-inom niini, sa paghandom kanako.’”—1 Corinto 11:23-25.
4. Nganong kinahanglang saulogon sa mga Kristohanon ang Panihapon sa Ginoo?
4 Ang magsusulat sa Ebanghelyo nga si Lucas nagpamatuod nga si Jesus nagsugo: “Ipadayon ninyo ang pagbuhat niini sa paghandom kanako.” (Lucas 22:19) Kining mga pulonga gihubad usab nga: “Buhata kini agig paghinumdom kanako.” (Today’s English Version) Sa pagkatinuod, kini nga pagsaulog sagad nga gitawag nga Memoryal sa kamatayon ni Kristo. Gitawag usab kini ni Pablo nga Panihapon sa Ginoo—tukma nga pagtawag, sanglit gabii kini gisugdan. (1 Corinto 11:20) Ang mga Kristohanon gisugo sa pagsaulog sa Panihapon sa Ginoo. Apan nganong gisugdan kining maong pagsaulog?
Kon Nganong Gisugdan Kini
5, 6. (a) Unsay usa ka rason nga gisugdan ni Jesus ang Memoryal? (b) Paghatag ug laing rason kon nganong gisugdan ang Panihapon sa Ginoo.
5 Ang usa ka rason nga gisugdan ang Memoryal dunay kalabotan sa usa ka katuyoan sa kamatayon ni Jesus. Siya namatay ingong tigbayaw sa pagkasoberano sa iyang langitnong Amahan. Sa ingon gipamatud-an ni Kristo nga bakakon si Satanas nga Yawa, kinsa nagbutangbutang nga ang mga tawo nag-alagad lamang sa Diyos tungod sa hakog nga mga motibo. (Job 2:1-5) Ang pagkamatinumanon ni Jesus hangtod sa kamatayon nagpamatuod nga bakak kining maong pangangkon ug nakapalipay sa kasingkasing ni Jehova.—Proverbio 27:11.
6 Ang laing rason nga gisugdan ang Panihapon sa Ginoo mao ang pagpahinumdom kanato nga pinaagi sa iyang kamatayon ingong hingpit, walay-sala nga tawo, ‘gihatag ni Jesus ang iyang kalag nga usa ka lukat baylo sa daghan.’ (Mateo 20:28) Sa dihang ang unang tawo nakasala sa Diyos, iyang nawala ang hingpit tawhanong kinabuhi ug ang tanang kalaoman niini. Apan, si Jesus nag-ingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Sa pagkatinuod, “ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” (Roma 6:23) Ang pagsaulog sa Panihapon sa Ginoo magpahinumdom kanato sa dakong gugma nga gipakita ni Jehova ug sa iyang Anak pinaagi sa haladnong kamatayon ni Jesus. Angay gayod kitang magmapasalamaton tungod sa maong gugma!
Kanus-a Kini Saulogon?
7. Nganong ang dinihogang mga Kristohanon ‘makanunayon’ nga makig-ambit sa Memoryal?
7 Mahitungod sa Panihapon sa Ginoo, si Pablo nag-ingon: “Ingon kamakanunayon sa inyong pagkaon niini nga tinapay ug pag-inom niini nga kopa, padayon ninyong gimantala ang kamatayon sa Ginoo, hangtod nga siya moabot.” (1 Corinto 11:26) Ang tagsa ka dinihogang Kristohanon makig-ambit sa mga emblema sa Memoryal hangtod sa ilang kamatayon. Sa ingon, sa atubangan ni Jehova nga Diyos ug sa kalibotan, sila sublisubli nga magpahayag sa ilang pagtuo sa tagana sa Diyos nga halad lukat ni Jesus.
8. Hangtod kanus-a saulogon sa grupo sa mga dinihogan ang Panihapon sa Ginoo?
8 Hangtod kanus-a saulogon sa grupo sa mga dinihogan ang Memoryal sa kamatayon ni Kristo? “Hangtod nga siya moabot,” matod ni Pablo, nga dayag nga nagpasabot nga kining maong mga pagsaulog magpadayon hangtod moabot si Jesus sa pagdawat sa iyang dinihogang mga sumusunod didto sa langit pinaagig pagkabanhaw panahon sa iyang “presensiya.” (1 Tesalonica 4:14-17) Kini nahiuyon sa mga pulong ni Jesus sa iyang 11 ka maunongong mga apostoles: “Kon ako moadto ug mag-andam ug dapit alang kaninyo, ako moanhi pag-usab ug pagadawaton ko kamo nganhi kanako, aron nga kon asa ako kamo atua usab.”—Juan 14:3.
9. Unsay ipasabot sa mga pulong ni Jesus nga natala sa Marcos 14:25?
9 Sa dihang gisugdan ni Jesus ang Memoryal, siya naghisgot bahin sa kopa sa bino ug nag-ingon sa iyang matinumanong mga apostoles: “Dili na gayod ako moinom pa sa produkto sa paras hangtod nianang adlawa sa dihang moinom ako ug bag-o niini diha sa gingharian sa Diyos.” (Marcos 14:25) Sanglit si Jesus dili man moinom ug literal nga bino didto sa langit, dayag nga siya naghunahuna bahin sa kalipay nga gisimbolohan usahay sa bino. (Salmo 104:15; Ecclesiastes 10:19) Ang ilang panag-uban didto sa Gingharian maoy usa ka makapalipayng kasinatian nga mahinamon kaayong gitinguha niya ug sa iyang mga sumusunod.—Roma 8:23; 2 Corinto 5:2.
10. Unsa ka subsob kinahanglang saulogon ang Memoryal?
10 Ang kamatayon ba ni Jesus kinahanglang saulogon kada bulan, kada semana, o bisan kada adlaw? Dili. Gisugdan ni Jesus ang Panihapon sa Ginoo ug gipatay siya sa adlaw sa Paskuwa, nga gisaulog ingong “usa ka handomanan” sa pagpahigawas sa Israel gikan sa pagkaulipon sa Ehipto niadtong 1513 W.K.P. (Exodo 12:14) Ang Paskuwa gisaulog kas-a lamang sa usa ka tuig, sa ika-14ng adlaw sa Hudiyohanong bulan sa Nisan. (Exodo 12:1-6; Levitico 23:5) Kini nagpakita nga ang kamatayon ni Jesus kinahanglang saulogon lamang nga ingon ka subsob sa Paskuwa—kada tuig—dili kada bulan, kada semana, o kada adlaw.
11, 12. Unsay gipadayag sa kasaysayan bahin sa unang mga pagsaulog sa Memoryal?
11 Busa, haom nga saulogon ang Memoryal kada tuig sa Nisan 14. Matod pa sa usa ka basahon: “Ang mga Kristohanon sa Asia Minor gitawag ug mga Kuwartodesimanos [mga Tigsaulog sa Ikakatorse] tungod sa ilang kostumbre sa pagsaulog kanunay sa pascha [Panihapon sa Ginoo] sa ika-14 sa Nisan . . . Ang maong petsa maatol tingali sa Biyernes o sa bisan unsang adlaw sa semana.”—The New Schaff-Herzog Encyclopedia of Religious Knowledge, Tomo IV, panid 44.
12 Nagkomento bahin sa maong batasan sa ikaduhang siglo K.P., ang historyano nga si J. L. von Mosheim nag-ingon nga ang mga Kuwartodesimanos nagsaulog sa Memoryal sa Nisan 14 tungod kay “ilang gilantaw nga usa ka sugo ang panig-ingnan ni Kristo.” Ang laing historyano nag-ingon: “Ang batasan sa mga relihiyong Kuwartodesimanos sa Asia maoy sama nianang sa relihiyon sa Jerusalem. Sa ikaduhang siglo kining mga relihiyona nagsaulog sa pagtubos nga naposible pinaagi sa kamatayon ni Kristo diha sa ilang mga Pascha sa ika-14 sa Nisan.”—Studia Patristica, Tomo V, 1962, panid 8.
Kahulogan sa Tinapay
13. Unsang tinapay ang gigamit ni Jesus sa dihang iyang gisugdan ang Panihapon sa Ginoo?
13 Sa dihang gisugdan ni Jesus ang Memoryal, “siya nagkuhag tinapay, nagpasalamat, nagpikaspikas niini ug naghatag niini [sa mga apostoles].” (Marcos 14:22) Ang tinapay nga mabatonan nianang higayona mao ang tinapay nga bag-o pang gigamit sa Paskuwa. (Exodo 13:6-10) Sanglit giluto kini nga walay lebadura, kini nipis ug kagumkom ug kinahanglang pikaspikason aron ikaapod-apod. Sa dihang milagrosong gipadaghan ni Jesus ang tinapay alang sa libolibo, kini usab nipis ug kagumkom, tungod kay kini iyang gipikaspikas aron kini maapod-apod. (Mateo 14:19; 15:36) Nan, dayag nga ang pagpikaspikas sa tinapay sa Memoryal walay espirituwal nga kahulogan.
14. (a) Nganong haom nga walay lebadura ang tinapay sa Memoryal? (b) Unsang matanga sa tinapay ang batonan o lutoon aron gamiton sa Panihapon sa Ginoo?
14 Bahin sa tinapay nga gigamit sa dihang gisugdan ang Memoryal, si Jesus nag-ingon: “Kini nagkahulogan sa akong lawas nga maoy alang kaninyo.” (1 Corinto 11:24; Marcos 14:22) Haom nga walay lebadura ang tinapay. Ngano? Tungod kay ang lebadura mahimong magkahulogan ug kangil-aran, pagkadaotan, o sala. (1 Corinto 5:6-8) Ang tinapay naghawas sa hingpit, walay-sala nga tawhanong lawas ni Jesus, nga haom nga gihalad ingong lukat. (Hebreohanon 7:26; 10:5-10) Ang mga Saksi ni Jehova naghinumdom ug nagsundog sa panig-ingnan nga gipakita ni Jesus pinaagi sa paggamit ug tinapay nga walay lebadura sa mga selebrasyon sa Memoryal. Diha sa pipila ka kahimtang, sila naggamit sa gigamit sa mga Hudiyo nga tab-ang nga mga matzo nga walay laing sagol, sama sa sibuyas o itlog. Kon dili, ang tinapay nga walay lebadura mahimong gam-on pinaagig gamayng harina gikan sa dili-hinashasang lugas (trigo, kon posible) nga sagolan ug gamayng tubig. Ang minasa kinahanglang panipson ug mahimong lutoon diha sa kalaha nga gihidhiran ug gamayng mantika hangtod nga ang tinapay mauga ug kagumkom na.
Kahulogan sa Bino
15. Unsay sulod sa kopa nga gigamit sa dihang gisugdan ni Kristo ang Memoryal sa iyang kamatayon?
15 Human ipasa ang tinapay nga walay lebadura, si Jesus mikuha ug kopa, “nagpasalamat ug naghatag niini [sa mga apostoles], ug silang tanan miinom gikan niini.” Si Jesus miingon: “Kini nagkahulogan sa akong ‘dugo sa pakigsaad,’ nga igabubo alang sa daghan.” (Marcos 14:23, 24) Unsay sulod sa kopa? Gipaaslom nga bino, dili duga sa ubas nga wala pa moaslom. Sa dihang ang Kasulatan maghisgot ug bino, dili duga sa ubas nga wala pa moaslom ang ipasabot niini. Pananglitan, ang gipaaslom nga bino, dili ang duga sa ubas, makapabusisi sa “daang panit nga mga sudlanag bino,” matod ni Jesus. Ug ang mga kaaway ni Kristo nagsumbong kaniya nga “palainom ug bino.” Wala untay kahulogan kana nga sumbong kon ang bino duga lang sa ubas. (Mateo 9:17; 11:19) May binong giinom panahon sa pagsaulog sa Paskuwa, ug gigamit kini ni Kristo sa dihang iyang gisugdan ang Memoryal sa iyang kamatayon.
16, 17. Unsang matanga sa bino ang angay sa mga pagsaulog sa Memoryal, ug ngano?
16 Pulang bino lamang ang angay nga simbolo sa kon unsay gihawasan sa sulod sa kopa, nga mao ang giulang dugo ni Jesus. Siya mismo nag-ingon: “Kini nagkahulogan sa akong ‘dugo sa pakigsaad,’ nga igabubo alang sa daghan.” Ug si apostol Pedro misulat: “Kamo [dinihogang mga Kristohanon] nahibalo nga dili pinaagi sa madunot nga mga butang, sa plata o sa bulawan, nga kamo gipahigawas gikan sa inyong walay-pulos nga matang sa panggawi nga napanunod pinaagi sa tradisyon gikan sa inyong mga katigulangan. Apan kini maoy pinaagi sa bililhong dugo, sama nianang sa walay lama ug sa walay buling nga nating karnero, kang Kristo mismo.”—1 Pedro 1:18, 19.
17 Tino nga bino sa pula nga ubas ang gigamit ni Jesus sa gisugdan ang Memoryal. Apan, ang ubang pula nga mga bino karon dili puwedeng gamiton tungod kay gisambogan kini ug alkohol o brandy o gidugangan ug mga yerba ug lamas. Ang dugo ni Jesus igo na, nga wala nay bisan unsang gikinahanglan nga idugang niini. Busa, ang mga bino sama sa port, sherry, ug vermouth dili angay. Ang sulod sa kopa sa Memoryal kinahanglan nga pulang bino nga walay asukar ug walay sambog. Mahimong gamiton ang hinimo-sa-balay, walay-asukar nga pulang bino sa ubas, ug puwede usab ang mga bino sama sa pula nga burgundy ug claret.
18. Nganong wala maghimog milagro si Jesus maylabot sa tinapay ug bino sa Memoryal?
18 Sa dihang gisugdan kining maong pagpangaon, si Jesus wala maghimog milagro, nga gihimo ang mga emblema nga iyang literal nga unod ug dugo. Ang pagkaog unod sa tawo ug pag-inom ug dugo maoy kanibalismo, pagsupak sa balaod sa Diyos. (Genesis 9:3, 4; Levitico 17:10) Nabatonan gihapon ni Jesus ang iyang bug-os nga unodnong lawas ug ang tanan niyang dugo. Ang iyang lawas gihalad ingong hingpit nga halad, ug ang iyang dugo giula pagkasunod hapon sa mao gihapon nga Hudiyohanong adlaw, Nisan 14. Busa, ang tinapay ug bino sa Memoryal maoy simboliko, naghawas sa unod ug dugo ni Kristo. *
Ang Memoryal—Hiniusang Pagpangaon
19. Nganong dili ra usa ka plato ug usa ka kopa ang mahimong gamiton sa pagsaulog sa Panihapon sa Ginoo?
19 Sa dihang gisugdan ni Jesus ang Memoryal, iyang gidapit ang iyang matinumanong mga apostoles sa pag-inom diha sa usa ra ka kopa. Matod sa Ebanghelyo ni Mateo: “[Si Jesus] nagkuhag usa ka kopa ug, human makapasalamat, siya naghatag niini kanila, nga nag-ingon: ‘Inom kamo gikan niini, kamong tanan.’” (Mateo 26:27) Ang paggamit ug “usa ka kopa,” ug dili daghang kopa, dili problema sanglit nianang higayona 11 ra ka mag-aambit ang dayag nga diha sa usa ka lamesa ug dali rang makapasa sa kopa sa usag usa. Karong tuiga, milyonmilyon ang magtigom alang sa Panihapon sa Ginoo diha sa kapin sa 94,000 ka kongregasyon sa mga Saksi ni Jehova sa tibuok kalibotan. Kay daghan kaayo ang magtigom alang niini nga pagsaulog sa mao rang gabhiona, dili mahimo nga usa ra ka kopa ang gamiton alang sa tanan. Apan ang prinsipyo padayong ginasunod diha sa dagkong mga kongregasyon pinaagi sa paggamit ug daghang kopa aron kini ikapasa diha sa mga tumatambong sa makataronganong gitas-on sa panahon. Sa susama, dili ra usa ka plato ang mahimong gamiton alang sa tinapay. Wala ipakita sa Kasulatan nga ang kopa o sudlanan mismo kinahanglan nga may espesipikong disenyo. Apan, kini ug ang plato kinahanglang magbanaag sa dignidad sa okasyon. Maalamon nga likayang mapuno pag-ayo ang kopa kay basin mayabo ang bino inigpasa niini.
20, 21. Nganong makaingon kita nga ang Memoryal maoy hiniusang pagpangaon?
20 Bisan tuod dili ra usa ka plato sa tinapay ug usa ka kopa sa bino ang mahimong gamiton, ang Memoryal maoy usa ka hiniusang pagpangaon. Sa karaang Israel, ang usa ka tawo makahatag ug pagkaon alang sa hiniusang pagpangaon pinaagi sa pagdala ug hayop ngadto sa sangtuwaryo sa Diyos, diin kini ihawon. May usa ka bahin sa hayop nga sunogon diha sa halaran, ang usa ka bahin maiyaha sa nag-alagad nga saserdote ug ang lain mailaha sa saserdoteng mga anak ni Aaron, ug ang naghatag ug ang iyang panimalay moapil sa pagpangaon. (Levitico 3:1-16; 7:28-36) Ang Memoryal usab maoy usa ka hiniusang pagpangaon tungod kay may panag-ambit nga nalangkit.
21 Apil si Jehova niining hiniusang pagpangaon ingong Tigmugna sa maong kahikayan. Si Jesus mao ang halad, ug ang dinihogang mga Kristohanon makig-ambit sa mga emblema kay apil usab sila sa pagpangaon. Ang pagkaon diha sa lamesa ni Jehova nagkahulogan nga ang mga mag-aambit may pakigdait uban kaniya. Busa, si Pablo misulat: “Ang kopa sa panalangin nga atong gipanalanginan, dili ba kini usa ka pagpakig-ambit sa dugo ni Kristo? Ang tinapay nga atong gipikaspikas, dili ba kini pagpakig-ambit sa lawas ni Kristo? Tungod kay adunay usa ka tinapay, kita, bisan tuod daghan, usa ka lawas, kay kitang tanan nagapakig-ambit nianang usa ka tinapay.”—1 Corinto 10:16, 17.
22. Unsa pa nga mga pangutana bahin sa Memoryal ang atong konsiderahon?
22 Ang Panihapon sa Ginoo mao ang bugtong tinuig nga relihiyosong selebrasyon sa mga Saksi ni Jehova. Haom kini tungod kay si Jesus nagsugo sa iyang mga sumusunod: “Ipadayon ninyo ang pagbuhat niini sa paghandom kanako.” Panahon sa Memoryal, kita naghandom sa kamatayon ni Jesus, usa ka kamatayon nga nagtuboy sa pagkasoberano ni Jehova. Sumala sa atong nahisgotan, niining hiniusang pagpangaon, ang tinapay nagkahulogan sa gihalad nga tawhanong lawas ni Kristo ug ang bino nagkahulogan sa iyang giula nga dugo. Apan, gamay ra kaayo ang makig-ambit sa emblema nga tinapay ug bino. Ngano man? Ang Memoryal ba dunay tinuod nga kahulogan alang sa minilyon nga dili makig-ambit? Sa pagkatinuod, unsa gayoy kahulogan sa Panihapon sa Ginoo alang kanimo?
[Footnote]
^ par. 18 Tan-awa ang Tomo 2, panid 271, sa Insight on the Scriptures, nga gipatik sa mga Saksi ni Jehova.
Unsay Imong mga Tubag?
• Nganong gisugdan ni Jesus ang Panihapon sa Ginoo?
• Unsa ka subsob angayng saulogon ang Memoryal?
• Unsay kahulogan sa tinapay nga walay lebadura sa Memoryal?
• Unsay gihawasan sa bino sa Memoryal?
[Mga Pangutana sa Pagtuon]
[Hulagway sa panid 15]
Gisugdan ni Jesus ang Panihapon sa Ginoo