‘Magmaisogon ug Magmakusganon Kamo!’

“Magmaisogon! Gidaog ko na ang kalibotan.”—JUAN 16:33.

1. Tungod sa kusganong mga kaaway nga naghulat sa mga Israelinhon sa Canaan, unsang pagdasig ang ilang nadawat?

 SA DIHANG ang mga Israelinhon hapit nang motabok sa Suba sa Jordan ngadto sa Yutang Saad, si Moises miingon kanila: “Magmaisogon ug magmakusganon kamo. Dili kamo mahadlok ni mangurog sa ilang atubangan, kay si Jehova nga imong Diyos mao ang magauban kanimo.” Unya gitawag ni Moises si Josue, nga maoy napili aron manguna sa mga Israelinhon paingon sa Canaan, ug gisulti kaniya mismo ang tambag nga magmaisogon. (Deuteronomio 31:6, 7) Sa ulahi, gidasig ni Jehova mismo si Josue, nga miingon: “Magmaisogon ug magmakusganon ka . . . Magmaisogon ka lamang ug magmakusganon gayod.” (Josue 1:6, 7, 9) Nahiangay ang maong mga pulong. Ang mga Israelinhon magkinahanglan ug kaisog sa pagpakigharong sa kusganong mga kaaway nga naghulat kanila sa pikas nga bahin sa Jordan.

2. Unsang kahimtang ang atong nasinati karong adlawa, ug unsay atong gikinahanglan?

² Karong adlawa, ang matuod nga mga Kristohanon hapit nang motabok ngadto sa gisaad nga bag-ong kalibotan ug, sama kang Josue, sila kinahanglang magmaisogon. (2 Pedro 3:13; Pinadayag 7:14) Hinuon, ang atong kahimtang lahi kay sa kang Josue. Gigamit ni Josue ang mga espada ug mga bangkaw sa pagpakig-away. Kita nagpakigbugno ug espirituhanong pakiggubat ug dili gayod kita mobakyaw ug literal nga armas. (Isaias 2:2-4; Efeso 6:11-17) Dugang pa, gibugno gayod ni Josue ang daghang mabangisong mga pakiggubat bisan sa pagkasulod na sa Yutang Saad. Apan atong nasinati ang atong labing mabangisong mga pakigbugno karon—sa dili pa kita motabok ngadto sa bag-ong kalibotan. Tan-awon nato ang pipila ka kahimtang nga nagkinahanglan nga kita magmaisogon.

Nganong Kinahanglang Makigbisog Kita?

3. Unsay gipadayag sa Bibliya bahin sa pangunang magsusupak nato?

³ Si apostol Juan misulat: “Kita nahibalo nga kita nagagikan sa Diyos, apan ang tibuok kalibotan nailalom sa gahom sa usa nga daotan.” (1 Juan 5:19) Gipadayag nianang mga pulonga ang pangunang hinungdan nga ang mga Kristohanon kinahanglang makigbisog aron padayong mahuptan ang ilang pagtuo. Sa dihang ang usa ka Kristohanon padayong maghupot sa iyang integridad, kini sa usa ka bahin maoy kapildihan ni Satanas nga Yawa. Busa, si Satanas naglibotlibot nga samag “nagangulob nga leyon” nga naningkamot sa paghadlok ug pagtukob sa matinumanong mga Kristohanon. (1 Pedro 5:8) Sa pagkamatuod, nakiggubat siya batok sa dinihogang mga Kristohanon ug sa ilang mga kauban. (Pinadayag 12:17) Sa maong pakiggubat, iyang gigamit ang mga tawo sa pagtuman sa iyang mga tumong, nahibalo man sila o wala. Gikinahanglan ang kaisog aron makabarog nga malig-on batok kang Satanas ug sa iyang tanang ahente.

4. Unsang pasidaan ang gihatag ni Jesus, apan unsang hiyas ang gipasundayag sa matuod nga mga Kristohanon?

⁴ Sanglit si Jesus nahibalo nga si Satanas ug iyang mga ahente mosupak pag-ayo sa maayong balita, Iyang gipasidan-an ang iyang mga sumusunod: “Itugyan kamo sa mga tawo ngadto sa kasakitan  ug pagapatyon kamo, ug kamo pagadumtan sa tanang kanasoran tungod sa akong ngalan.” (Mateo 24:9) Kanang mga pulonga natuman sa unang siglo, ug kana natuman karong adlawa. Sa pagkamatuod, ang paglutos nga giantos sa pipila ka Saksi ni Jehova karon sama ra ka mapintason sa mga paglutos sa tibuok kasaysayan. Bisan pa niana, ang matuod nga mga Kristohanon maisogon sa dihang nag-atubang sa maong pagpit-os. Nahibalo sila nga “ang pagpangurog tungod sa mga tawo nagadala ug usa ka lit-ag,” ug dili nila gustong mabitik sa lit-ag.—Proverbio 29:25.

5, 6. (a) Unsang mga kahimtang ang nagkinahanglan ug kaisog sa atong bahin? (b) Unsay reaksiyon sa matinumanong mga Kristohanon sa dihang ang ilang kaisog pagasulayon?

⁵ Gawas pa sa paglutos adunay ubang mga kalisdanan nga tungod niana kita kinahanglang magmaisogon. Ang pipila malisdan sa pagpakigsulti sa mga estranghero bahin sa maayong balita. Ang pagkamaisogon sa pipila ka bata nga nagtungha masulayan sa dihang ipalitok kanila ang panaad nga magmaunongon ngadto sa nasod o sa bandera. Sanglit ang maong panaad maoy usa ka relihiyosong pagpahayag, ang Kristohanong mga bata maisogong nakahukom nga molihok sa paagi nga sila makapahimuot sa Diyos, ug ang ilang maayong binuhatan nakahatag ug kalipay.

⁶ Kinahanglan usab kitang magmaisogon sa dihang ang mga magsusupak mag-impluwensiya sa media sa pagsabwag ug daotang mga taho bahin sa mga alagad sa Diyos o sa dihang ilang sulayan ang pagpiot sa matuod nga pagsimba pinaagi sa pagmugnag “kasamok pinaagig mando.” (Salmo 94:20) Pananglitan, unsay atong bation sa dihang ang mga balita sa mantalaan, radyo, o telebisyon bahin sa mga Saksi ni Jehova maoy tinuis o binakak? Angay ba kitang matingala? Dili. Gidahom nato kanang mga butanga. (Salmo 109:2) Ug dili kita matingala sa dihang ang pipila motuo sa gipatik nga kabakakan ug mga pagtuis, sanglit “si bisan kinsa nga walay kasinatian motuo sa tagsatagsa ka pulong.” (Proverbio 14:15) Bisan pa niana, ang maunongong mga Kristohanon dili motuo sa bisan unsay isulti bahin sa ilang mga igsoon, ug ang daotang mga balita tinong dili nila himoong hinungdan nga dili sila motambong sa Kristohanong mga tigom, maghinayhinay sa pagsangyaw sa kanataran, o maluya sa ilang pagtuo. Sa kasukwahi, sila ‘nagarekomendar sa ilang kaugalingon nga mga ministro sa Diyos . . . pinaagi sa himaya ug sa kaulawan, pinaagi sa daotang taho ug sa maayong taho; ingong sumala sa mga kaaway mga limbongan apan sa pagkamatuod matinud-anon.’—2 Corinto 6:4, 8.

7. Unsang mausisaong mga pangutana ang ikasukna nato sa atong kaugalingon?

⁷ Si Pablo, sa pagsulat kang Timoteo, miingon: “Kita wala hatagi sa Diyos ug espiritu sa katalaw, kondili sa gahom . . . Busa ayaw ikaulaw ang pagpamatuod bahin sa atong Ginoo.” (2 Timoteo 1:7, 8; Marcos 8:38) Kay nakabasa nianang mga pulonga, kita makasukna sa atong kaugalingon: ‘Ikaulaw ko ba ang akong relihiyosong mga tinuohan, o maisogon ba ako? Sa akong trabahoan (o eskuylahan), gipahibalo ko ba ang akong mga kauban nga ako Saksi ni Jehova, o gitinguha ko ba nga itago kana? Maulaw ba ako nga mahimong lahi sa uban, o magarbohon ako nga mailhang lahi tungod sa akong relasyon uban kang Jehova?’ Kon ang usa mahadlokon sa pagsangyaw sa maayong balita o pagbaton ug dili-popular nga baroganan, ipahinumdom kaniya ang tambag ni Jehova kang Josue: “Magmaisogon ug magmakusganon ka.” Ayaw gayod kalimti, ang opinyon sa atong mga kauban sa trabaho o mga  kasaring dili mao ang hinungdanon kondili kon unsa ang hunahuna ni Jehova ug ni Jesu-Kristo.—Galacia 1:10.

Kon sa Unsang Paagi Kita Magmaisogon

8, 9. (a) Sa usa ka higayon, sa unsang paagi gisulayan ang kaisog sa unang mga Kristohanon? (b) Unsay reaksiyon ni Pedro ug Juan human sa mga panghulga, ug unsay nasinati nila ug sa ilang mga igsoon?

⁸ Sa unsang paagi makabaton kita ug igong kaisog aron mahuptan ang atong integridad niining lisod nga kapanahonan? Buweno, sa unsang paagi ang unang mga Kristohanon nagmaisogon? Tagda kon unsay nahitabo sa dihang ang pangulong mga saserdote ug mga ansiyano sa Jerusalem nagmando kang Pedro ug Juan nga mohunong sa pagwali diha sa ngalan ni Jesus. Ang mga tinun-an midumili ug gihulga ug dayon gibuhian. Human niadto, sila miduyog na usab sa mga igsoon, ug silang tanan nagdungan sa pag-ampo, nga nag-ingon: “Jehova, hatagig pagtagad ang ilang mga hulga, ug itugot sa imong mga alagad ang pagpadayon pagsulti sa imong pulong uban ang bug-os nga kaisog.” (Buhat 4:13-29) Ingong tubag, si Jehova nagpalig-on kanila pinaagi sa balaang espiritu, ug sumala sa gipahayag sa ulahi sa Hudiyong mga pangulo, ilang “gipuno ang Jerusalem” sa ilang pagtulon-an.—Buhat 5:28.

⁹ Atong analisahon ang nahitabo niadtong higayona. Sa gihulga ang mga tinun-an sa Hudiyong mga pangulo, sila wala maghunahuna sa paghunong sa pagwali tungod sa pagpit-os. Hinunoa, ang mga tinun-an nag-ampo aron magmaisogon sa pagpadayon sa pagwali. Unya nanlimbasog sila sa pagtuman kon unsay ilang giampo, ug gipalig-on sila ni Jehova pinaagi sa iyang espiritu. Ang ilang kasinatian nagpadayag nga ang gisulat ni Pablo pipila ka tuig sa ulahi sa lahing kahimtang mapadapat ngadto sa mga Kristohanon sa dihang sila lutoson. Matod ni Pablo: “Sa tanang butang ako adunay kusog pinaagi kaniya nga naghatag ug gahom kanako.”—Filipos 4:13.

10. Sa unsang paagi ang kasinatian ni Jeremias makatabang niadtong maulawon?

¹⁰ Apan, pananglitan kon maulawon ang usa ka tawo? Siya ba makaalagad nga maisogon atubangan sa pagsupak? Segurado gayod! Hinumdomi ang reaksiyon ni Jeremias sa gitudlo siya ni Jehova ingong manalagna. Ang batan-ong lalaki miingon: “Ako usa ka bata lamang.” Tin-aw, iyang gibati nga wala siyay katakos. Bisan pa niana, si Jehova nagdasig kaniya pinaagi niining mga pulonga: “Ayaw pag-ingon, ‘Ako usa ka bata lamang.’ Apan kanilang tanan nga ikaw akong paadtoon, ikaw moadto; ug ang tanan nga isugo ko kanimo, imong isulti. Ayaw kahadlok tungod sa ilang mga nawong, kay ‘ako nagauban kanimo sa pagluwas kanimo.’” (Jeremias 1:6-10) Si Jeremias may pagsalig kang Jehova, ug ingong sangpotanan, tungod sa kusog ni Jehova siya nakabuntog sa iyang pagpanuko sa pagwali ug nahimong maisogon gayod nga saksi sa Israel.

11. Unsay makatabang sa mga Kristohanon karong adlawa nga mahisama kang Jeremias?

¹¹ Ang dinihogang mga Kristohanon karong adlawa adunay tinudlong buluhaton nga susama sa  kang Jeremias, ug uban sa pagpaluyo sa “dakong panon” sa “ubang mga karnero,” sila nagpadayon sa pagmantala sa mga katuyoan ni Jehova, bisan atubangan sa pagkadili-matinagdanon, pagyagayaga, ug paglutos. (Pinadayag 7:9; Juan 10:16) Nadasig sila sa mga pulong ni Jehova ngadto kang Jeremias: “Ayaw kahadlok.” Dili gayod nila hikalimtan nga ang ilang tinudlong buluhaton naggikan sa Diyos ug sila nagawali sa iyang mensahe.—2 Corinto 2:17.

Mga Panig-ingnan sa Kaisog nga Angay Natong Sundogon

12. Unsang maayo kaayong panig-ingnan sa kaisog ang gihatag ni Jesus, ug giunsa niya pagdasig ang iyang mga sumusunod?

¹² Matabangan kita sa atong paningkamot nga makabaton ug kaisog kon palandongon nato ang mga panig-ingnan sa uban kinsa, sama kang Jeremias, nagmaisogon. (Salmo 77:12) Pananglitan, samtang susihon nato ang ministeryo ni Jesus, makadayeg kita sa iyang kaisog sa gitental siya ni Satanas ug sa giatubang niya ang hugot nga pagsupak sa Hudiyong mga pangulo. (Lucas 4:1-13; 20:19-47) Tungod sa kusog ni Jehova, si Jesus wala matarog sa iyang pagtuo, ug sa dayon na siyang mamatay, giingnan niya ang iyang mga tinun-an: “Sa kalibotan kamo adunay kasakitan, apan magmaisogon! Gidaog ko na ang kalibotan.” (Juan 16:33; 17:16) Kon sundon sa mga tinun-an ni Jesus ang iyang panig-ingnan, sila mahimong mga mananaog usab. (1 Juan 2:6; Pinadayag 2:7, 11, 17, 26) Apan sila kinahanglang “magmaisogon.”

13. Unsang pagdasig ang gihatag ni Pablo alang sa mga taga-Filipos?

¹³ Wala madugay sa pagkamatay ni Jesus, si Pablo ug Silas gibalhog sa bilanggoan sa Filipos. Sa ulahi, gidasig ni Pablo ang kongregasyon sa Filipos nga magpadayong “nagabarog nga malig-on sa usa ka espiritu, uban ang usa ka kalag nga naningkamot kiliran sa kiliran alang sa pagtuo sa maayong balita, ug sa bisan unsang paagi dili malisang sa [ilang] mga kaatbang.” Sa pagpalig-on, si Pablo miingon: “Kining butanga mismo [nga ang mga Kristohanon ginalutos] maoy pamatuod sa kalaglagan alang [sa mga maglulutos], apan kaluwasan alang kaninyo; ug kini nga timailhan maoy gikan sa Diyos, tungod kay gihatag kaninyo ang pribilehiyo alang kang Kristo, dili lamang sa pagbutang sa inyong pagtuo kaniya, kondili usab sa pag-antos alang kaniya.”—Filipos 1:27-29.

14. Unsay misangpot sa pagkamaisogon ni Pablo didto sa Roma?

¹⁴ Sa dihang si Pablo misulat ngadto sa kongregasyon sa Filipos, siya nabilanggo na usab, niadtong higayona sa Roma. Bisan pa niadto, siya nagpadayon sa pagwali nga maisogon ngadto sa uban. Unsay sangpotanan? Siya misulat: “Ang akong mga gapos nahibaloan sa publiko kalangkit kang Kristo taliwala sa tanang Praetorianong Guwardiya ug sa tanang uban pa; ug kadaghanan sa mga igsoon diha sa Ginoo, nga mibati ug pagsalig tungod sa akong mga talikala sa bilanggoan, nagapakita ug labi pa gayod nga kaisog sa pagsulti sa pulong sa Diyos sa walay kahadlok.”—Filipos 1:13, 14.

15. Asa nato makaplagi ang maayong mga panig-ingnan sa pagtuo nga makapalig-on sa atong determinasyon nga magmaisogon?

¹⁵ Ang panig-ingnan ni Pablo makapadasig kanato. Mao man usab ang maayong panig-ingnan nga gihatag sa mga Kristohanon karon nga nag-antos sa paglutos diha sa mga nasod nga gimandoan ug diktador o klero. Daghang sugilanon bahin niini gitaho diha sa mga magasing Bantayanang Torre ug Pagmata! ug diha sa mga Tinuig nga Basahon sa mga Saksi ni Jehova. Samtang magbasa ka sa maong mga kasaysayan, hinumdomi nga ang mga tawo kansang sugilanon ginasaysay maoy ordinaryong mga tawo nga sama kanato; apan sa dihang nakasinati silag lisod kaayong mga kahimtang, si Jehova mihatag kanilag gahom nga labaw sa kasagaran ug sila nakaagwanta. Makapaneguro kita nga iyang buhaton ang samang butang alang kanato kon gikinahanglan kana sa mga kahimtang.

 Ang Atong Maisogong Pagbarog Makapahimuot ug Magpasidungog Kang Jehova

16, 17. Sa unsang paagi kita karong adlawa makaugmad ug maisogong tinamdan?

¹⁶ Kon ang Kristohanon mobarog nga malig-on dapig sa kamatuoran ug pagkamatarong, siya maisogon. Kon siya mobarog nga malig-on bisan pag sa kahiladman nahadlok, ang iyang pagbarog mas maisogon pa. Sa pagkatinuod, si bisan kinsang Kristohanon mahimong maisogon, kon gusto gayod niyang buhaton ang kabubut-on ni Jehova, kon siya determinadong magpabiling matinumanon, kon siya kanunayng mosalig sa Diyos, ug kon siya mahinumdom kanunay nga si Jehova sa nangaging panahon nagpalig-on sa di-maihap nga mga tawo nga sama kaniya. Dugang pa, sa dihang makaamgo kita nga ang atong maisogong pagbarog makapahimuot ug magpasidungog kang Jehova, kita mas determinado pa nga dili maluya. Determinado kita nga moagwanta sa pagbiaybiay o sa mas grabeng tratasyon tungod kay dulot natong gihigugma siya.—1 Juan 2:5; 4:18.

¹⁷ Ayaw gayod hikalimti nga sa dihang nagaantos kita tungod sa atong pagtuo, wala kana magpasabot nga kita nakasala. (1 Pedro 3:17) Nagaantos kita tungod sa pagtuboy sa pagkasoberano ni Jehova, sa pagbuhat ug maayo, ug pagkadili-bahin sa kalibotan. Mahitungod niini, si apostol Pedro miingon: “Sa dihang kamo nagbuhat ug maayo ug kamo nagaantos, kamo nagaagwanta niini, butang kini nga kahimut-anan sa Diyos.” Si Pedro miingon usab: “Sila nga nagaantos uyon sa kabubut-on sa Diyos kinahanglang magpadayon sa pagpiyal sa ilang mga kalag ngadto sa usa ka matinumanong Maglalalang samtang sila nagabuhat ug maayo.” (1 Pedro 2:20; 4:19) Oo, ang atong pagtuo makapahimuot sa atong mahigugmaong Diyos, si Jehova, ug magpasidungog kaniya. Puwersado gayod nga hinungdan nga magmaisogon!

Sa Dihang Ipatawag Kita sa mga Awtoridad

18, 19. Sa dihang kita mobarog nga maisogon atubangan sa usa ka maghuhukom, unsang mensahe, sa pagkamatuod, ang atong ginapahayag?

¹⁸ Sa dihang gisultihan ni Jesus ang iyang mga sumusunod nga sila pagalutoson, siya miingon usab: “[Ang mga tawo] magtugyan kaninyo sa lokal nga mga korte, ug sila maghampak kaninyo diha sa ilang mga sinagoga. Oo, kamo pagataralon atubangan sa mga gobernador ug sa mga hari tungod kanako, ingong usa ka pagpamatuod kanila ug sa mga nasod.” (Mateo 10:17, 18) Gikinahanglan ang kaisog sa dihang paatubangon sa usa ka maghuhukom o magmamando tungod sa binakak nga mga sumbong. Bisan pa niana, sa dihang gamiton natong maisogon kanang mga higayona sa pagpamatuod kanila, gipahimuslan nato ang higayon panahon sa usa ka lisod nga kahimtang aron buhaton ang usa ka hinungdanong butang. Sa pagkamatuod, atong ginapahayag ngadto sa mga nagahukom kanato ang mga pulong ni Jehova, nga natala sa ikaduhang Salmo: “Karon, Oh mga hari, gamita ang hait nga salabotan; magpatul-id kamo, Oh mga maghuhukom sa yuta. Alagara si Jehova uban ang kahadlok.” (Salmo 2:10, 11) Kasagaran, sa dihang ang mga Saksi ni Jehova binakak nga gisumbong diha sa hukmanan, ang mga maghuhukom naglaban sa kagawasan sa pagsimba, ug gipabilhan nato kana. Ugaling, ang pipila ka maghuhukom nagpaimpluwensiya sa mga magsusupak. Alang nianang mga tawhana, ang Kasulatan nag-ingon: “Magpatul-id kamo.”

¹⁹ Ang mga maghuhukom angayng mahibalo nga ang kinalabwang balaod mao ang iya ni Jehova nga Diyos. Angay silang mahinumdom nga ang tanang tawo, lakip ang mga maghuhukom, kinahanglang manubag kang Jehova nga Diyos ug kang Jesu-Kristo. (Roma 14:10) Alang kanato, kon makadawat kitag hustisya sa mga kamot sa usa ka tawhanong maghuhukom o dili, kita adunay bug-os nga katarongan nga magmaisogon kay si Jehova nagsuportar kanato. Ang Bibliya nag-ingon: “Malipayon silang tanan nga modangop kaniya.”—Salmo 2:12.

20. Nganong kita malipay kon kita mag-antos sa paglutos ug pagbutangbutang?

 ²⁰ Sa Wali sa Bukid, si Jesus miingon: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit; kay nianang paagiha sila naglutos sa mga manalagna nga nauna kaninyo.” (Mateo 5:11, 12) Hinuon, ang paglutos mismo dili kahimut-anan, apan ang atong pagbarog nga malig-on bisan pa sa paglutos, lakip ang mga pagbutangbutang diha sa media, maoy usa ka katarongan sa paglipay. Nagpasabot kana nga kita nakapahimuot kang Jehova ug makadawat ug ganti. Ang atong maisogong pagbarog magpadayag nga kita adunay tinuod nga pagtuo ug magpasalig nga kita giuyonan sa Diyos. Sa pagkamatuod, kana magpadayag nga kita adunay bug-os nga pagsalig kang Jehova. Ang maong pagsalig mahinungdanon alang sa usa ka Kristohanon, ingon nga ipakita sa mosunod nga artikulo.

Unsay Imong Nakat-onan?

• Unsang mga kahimtang karon ang nagkinahanglan nga kita magmaisogon?

• Sa unsang paagi maugmad nato ang hiyas sa pagkamaisogon?

• Kinsa ang pipila ka maayong mga panig-ingnan sa pagkamaisogon?

• Nganong gusto nato nga magmaisogon?

[Mga Pangutana sa Pagtuon]

[Mga hulagway sa panid 9]

Si Simone Arnold (karon Liebster) sa Alemanya, Widdas Madona sa Malawi, ug si Lydia ug Oleksii Kurdas sa Ukraine nagpakitag kaisog ug misukol sa daotang usa

[Mga hulagway sa panid 10]

Dili nato ikaulaw ang maayong balita

[Hulagway sa panid 11]

Ang kaisog ni Pablo sa bilanggoan nakatabang sa pag-uswag sa maayong balita

[Hulagway sa panid 12]

Kon maisogon natong isaysay ang atong gipasukad-sa-Kasulatan nga baroganan ngadto sa usa ka maghuhukom, atong ginapahayag ang usa ka hinungdanong mensahe