“Nakaplagan Ko ang Tanan Kong Gikinahanglan”

ANG depresyon, sumala sa usa ka taho sa World Health Organization, gibanabana nga sa pagkakaron nakaapektar sa kapin sa 120 milyones ka tawo sa tibuok kalibotan. Matag tuig, usa ka milyong tawo ang maghikog ug tali sa 10 ug 20 milyones ang mosulay sa paghunos sa ilang kinabuhi. Unsay makatabang niadtong nag-antos sa depresyon? Ang medikal nga pagtambal mahimong makahupay sa pag-antos, ug hinungdanon ang emosyonal nga pagpaluyo. Dugang pa, ang pipila nga nakasinati sa maong mga pagbati nakakaplag ug dugang tabang pinaagi sa praktikal, binase-sa-Bibliya nga mga publikasyon sa mga Saksi ni Jehova, ingon sa gipakita sa mosunod nga sulat gikan sa Pransiya.

“Di pa dugay ang miagi, gusto na kong magpakamatay. Nag-ampo ko sa Diyos nga mamatay na lang unta ako. Sa akong kahiladman, morag patay na ako. Tungod kay nangitag pagtultol, tim-os akong nag-ampo kang Jehova. Nakahukom usab ako sa pagbasa sa 2002 Tinuig nga Basahon sa mga Saksi ni Jehova ug gihuman kana sa tulo ka adlaw. Makaingon ko nga nadasig gayod ako niana ug napalig-on ang akong pagtuo.

“Nanukiduki ko diha sa mga magasing Bantayanang Torre ug Pagmata!, ug nasorpresa gayod ako! Tigbasa ako niining mga magasina kapin na sa 15 ka tuig, apan wala ko gayod maamgohi kon unsa ka makapadasig ug makalingaw ang maong mga artikulo. Puno kini sa gugma—usa ka hiyas nga talagsaon kaayo niining mga adlawa. Nakaplagan ko ang tanan kong gikinahanglan.”

Ang Bibliya nag-ingon: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” (Salmo 34:18) Walay duhaduha, ang tanang “dugmok ug kasingkasing” o “nahugno sa espiritu” makakaplag ug kalipay ug paglaom alang sa umaabot diha sa Bibliya. Ang mga Saksi ni Jehova nag-apod-apod ug binase-sa-Bibliya nga mga literatura aron sa pagtabang niadtong kinahanglang makabenepisyo gikan sa maong inspirado-sa-Diyos nga tinubdan sa kahupayan.