Paglutos Tungod sa Relihiyon—Ngano?

NAGTUO ka ba nga ang mga tawo angayng lutoson tungod sa ilang relihiyon? Tingali dili—dili gayod, basta dili sila manghilabot sa mga katungod sa uban. Bisan pa niana, ang paglutos tungod sa relihiyon dugay nang gihimo ug nagpadayon gihapon karon. Pananglitan, daghang Saksi ni Jehova sa Uropa ug sa ubang bahin sa kalibotan kanunayng gihikawan sa ilang mga katungod ug gimaltrato pag-ayo sa tibuok bahin sa ika-20ng siglo.

Nianang mga panahona, ang mga Saksi ni Jehova nag-antos sa mapintas, sistematiko, ug padayon nga paglutos ilalom sa pangunang mga rehimeng diktatoryal sa Uropa. Unsang pagtulon-an ang atong makat-onan gikan sa ilang naagoman maylabot sa paglutos tungod sa relihiyon? Ug unsay atong makat-onan gikan sa paagi sa ilang pagsanong sa pag-antos?

“Dili Bahin sa Kalibotan”

Ang mga Saksi ni Jehova naningkamot nga mahimong masinundanon sa balaod, malinawon, ug maayog moral nga mga tawo. Sila dili makigbingkil sa mga kagamhanan o makig-away kanila, ni manghagit aron sila pagalutoson tungod kay gusto sila nga mahimong mga martir. Kining maong mga Kristohanon maoy neyutral sa politika. Kini nahisubay sa mga pulong ni Jesus: “[Ang akong mga sumusunod] dili bahin sa kalibotan, ingon nga ako dili bahin sa kalibotan.” (Juan 17:16) Ang kadaghanang kagamhanan nahibalo sa neyutral nga baroganan sa mga Saksi. Apan ang mga magmamandong diktatoryal walay pagtahod sa gibaod sa Bibliya nga ang mga Kristohanon kinahanglang dili mahimong bahin sa kalibotan.

 Ang katarongan niini gisaysay diha sa komperensiya sa University of Heidelberg, Alemanya, sa Nobyembre 2000. Ang tema sa komperensiya maoy “Pagpanglupig ug Paglaban sa mga Baroganan: Mga Saksi ni Jehova Ilalom sa Nasyonalistikong Sosyalista ug Komunistang Diktatoryal nga mga Pagmando.” Si Dr. Clemens Vollnhals sa Hannah-Arendt-Institute for Research Into Totalitarianism miingon: “Dili sa politikanhong kalihokan lamang gipaabot sa diktatoryal nga mga rehimen ang ilang awtoridad. Gimbut-an niini nga kinahanglang magpasakop ang bug-os nga pagkatawo.”

Ang matuod nga mga Kristohanon dili makatugyan sa ilang “bug-os nga pagkatawo” ngadto sa tawhanong kagamhanan, tungod kay sila nanaad ug bug-os nga pagkamaunongon ngadto lamang kang Jehova nga Diyos. Ang mga Saksi nga nagpuyo ilalom sa diktatoryal nga mga pagmando nakakaplag nga ang mga balaod sa Estado ug ang mga kinahanglanon sa ilang pagtuo usahay magkasumpaki. Unsay ilang gihimo atubangan niini nga mga panagsumpaki? Sa daghang higayon sa nangagi, gipadapat sa mga Saksi ni Jehova diha sa ilang kinabuhi ang prinsipyo nga gipamulong sa mga disipulo ni Jesu-Kristo: “Kinahanglang among sugton ang Diyos ingong magmamando inay ang mga tawo.”—Buhat 5:29.

Libolibo ka Saksi nagpabiling maunongon sa ilang pagtuo ug nagpabiling neyutral sa mga kalihokan sa politika, bisan pa ilalom sa labing mapintas nga paglutos. Sa unsang paagi sila nakalahutay? Diin sila nagkuha sa ilang kusog aron makapabiling maunongon? Patubaga sila. Ug atong tan-awon kon unsang pagtulon-an ang makat-onan sa matag usa, sa mga Saksi ug dili mga Saksi, gikan sa ilang mga naagoman.

[Blurb sa panid 4]

Ang mga Saksi ni Jehova sa Alemanya nag-antos sa mapintas ug padayong paglutos ilalom sa ika-20ng siglong mga rehimeng diktatoryal

[Blurb sa panid 4]

“Dili sa politikanhong kalihokan lamang gipaabot sa diktatoryal nga mga rehimen ang ilang awtoridad. Gimbut-an niini nga kinahanglang magpasakop ang bug-os nga pagkatawo.”Dr. Clemens Vollnhals

[Hulagway sa panid 4]

Ang pamilyang Kusserow gihikawan sa ilang kagawasan tungod kay dili nila ikompromiso ang ilang pagtuo

[Hulagway sa panid 4]

Si Johannes Harms gipatay diha sa prisohan nga iya sa mga Nazi tungod sa iyang pagtuo