Salig Kang Jehova sa Bug-os Mong Kasingkasing
Salig Kang Jehova sa Bug-os Mong Kasingkasing
“Kadtong nakaila sa imong ngalan mosalig kanimo.”—SALMO 9:10.
1, 2. Unsa ang pipila ka butang nga kawang gisaligan sa mga tawo alang sa kasegurohan?
KARONG adlawa, sa dihang giatubang nato ang daghan kaayong kapeligrohan, normal lang nga kita mosalig sa usa ka tawo o butang nga makahatag ug kasegurohan. Gihunahuna sa pipila ka tawo nga kon aduna silay daghang salapi ang ilang kaugmaon may kasegurohan, apan sa pagkamatuod, ang salapi maoy temporaryo kaayo nga saliganan. Ang Bibliya nag-ingon: “Ang nagasalig sa iyang mga bahandi—siya mapukan.” (Proverbio 11:28) Ibutang sa ubang tawo ang ilang paglaom diha sa tawhanong mga pangulo, apan bisan ang kinamaayohang mga pangulo masayop. Ug sa kadugayan, mamatay silang tanan. Ang Bibliya maalamong nag-ingon: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan.” (Salmo 146:3) Ang maong inspiradong mga pulong nagpasidaan usab kanato nga dili mosalig sa atong kaugalingong paningkamot nga walay tabang gikan sa gawas. Kita usab maoy ‘mga anak sa yutan-ong tawo’ lamang.
2 Gisaway ni propetang Isaias ang mga pangulo sa nasod sa Israel sa iyang panahon tungod kay sila misalig sa “dalangpanan nga bakak.” (Isaias 28:15-17) Sa ilang pagtinguhag kasegurohan, nakig-alyansa sila sa politikanhong paagi sa silingang mga nasod. Ang maong mga pakig-alyansa dili gayod kasaligan—kadto maoy kabakakan. Sa susamang paagi, karong adlawa gidasig sa daghang relihiyosong mga pangulo ang pagpakiglangkit sa politikanhong mga pangulo. Ang maong mga pakig-alyansa mapamatud-an usab nga “bakak.” (Pinadayag 17:16, 17) Kana dili makahatag ug malungtarong kasegurohan.
Ang Maayong mga Panig-ingnan ni Josue ug Caleb
3, 4. Unsay kalainan sa taho ni Josue ug Caleb kay sa napulo ka ubang mga espiya?
3 Nan, asa man diay kita modangop alang sa kasegurohan? Sa mismong tinubdan nga gidangpan ni Josue ug Caleb sa panahon ni Moises. Wala madugay human sa pagkagawas sa Israel gikan sa Ehipto, ang nasod andam na nga mosulod sa Canaan, ang Yutang Saad. Napulog-duha ka lalaki ang gisugo sa pag-espiya sa yuta, ug pagkatapos sa 40 ka adlaw, sila namalik aron mohatag sa ilang taho. Duha lang ka espiya, si Josue ug Caleb, ang paborableng nagtaho bahin sa kalaoman nga ang Israel magmalamposon sa Canaan. Ang ubang mga espiya miuyon nga ang yuta maoy maayo apan miingon: “Ang tinuod mao nga ang katawhan nga nagpuyo sa yuta kusgan, ug ang kinutaang mga siyudad dagko kaayo . . . Dili kita makaarang pagtungas batok sa katawhan, tungod kay mas kusgan sila kay kanato.”—Numeros 13:27, 28, 31.
4 Namati ang mga Israelinhon sa napulo ka espiya ug nangahadlok, sa punto nga nagbagulbol sila batok kang Moises. Sa kataposan, si Josue ug Caleb kinasingkasing nga miingon: “Ang yuta nga among gilatas aron mangespiya niini maoy maayo gayod kaayo nga yuta. Kon si Jehova nakakaplag ug kahimuot kanato, nan siya magpasulod gayod kanato niining yutaa ug maghatag niini kanato, usa ka yuta nga nagaagay sa gatas ug dugos. Ayaw lamang kamo pagsukol batok kang Jehova; ug kamo, ayaw kamo kahadlok sa katawhan sa yuta.” (Numeros 14:6-9) Bisan pa niana, ang mga Israelinhon wala mamati ug, ingong resulta, wala makasulod sa Yutang Saad niadtong panahona.
5. Nganong si Josue ug Caleb mihatag ug maayong taho?
5 Nganong si Josue ug Caleb mihatag ug maayong taho, samtang ang napulo ka espiya mihatag ug daotang taho? Ang tanang 12 ka espiya nakakita sa sama rang lig-ong mga siyudad ug natukod nang mga nasod. Ug husto ang napulo ka espiya sa pag-ingon nga ang Israel walay igong kusog aron pukanon ang yuta. Nasayod usab niana si Josue ug Caleb. Ugaling lang, ang napulo ka espiya nagtan-aw sa mga butang gikan sa tawhanong panglantaw. Si Josue ug Caleb, sa laing bahin, misalig kang Jehova. Sila nakakita sa iyang gamhanang mga buhat sa Ehipto, sa Pulang Dagat, ug sa tiilan sa Bukid sa Sinai. Ngani, mga katuigan sa ulahi ang mga taho bahin sa maong mga buhat igo na sa pagdasig kang Rahab nga taga-Jerico nga ipameligro ang iyang kinabuhi tungod sa katawhan ni Jehova! (Josue 2:1-24; 6:22-25) Si Josue ug Caleb, mga nakasaksi sa mga buhat ni Jehova, may bug-os nga pagsalig nga ang Diyos magpadayon sa pagpakig-away alang sa iyang katawhan. Kap-atan ka tuig sa ulahi, ang ilang pagsalig napamatud-an nga husto sa dihang ang bag-ong kaliwatan sa mga Israelinhon, ubos sa pagpanguna ni Josue, misulod sa Canaan ug nakapukan sa nasod.
Kon Nganong Kita Angayng Mosalig sa Bug-os Kang Jehova
6. Nganong nalisdan ang mga Kristohanon karong adlawa, ug asa nila angayng ibutang ang ilang pagsalig?
6 Niining “makuyaw nga mga panahong lisod sagubangon,” kita, sama sa mga Israelinhon, nag-atubang sa mga kaaway nga mas kusgan kay kanato. (2 Timoteo 3:1) Kita gisulayan sa moral, espirituwal ug, sa pipila ka kaso, bisan sa pisikal nga paagi. Sa atong kaugalingong paningkamot, dili kita makaantos sa maong mga pagsulay, sanglit kana naggikan sa labaw-tawhanong tinubdan, si Satanas nga Yawa. (Efeso 6:12; 1 Juan 5:19) Nan, asa kita modangop? Diha sa pag-ampo kang Jehova, ang usa ka matinumanong tawo sa karaang panahon, miingon: “Kadtong nakaila sa imong ngalan mosalig kanimo.” (Salmo 9:10) Kon kita tinuod nga nakaila kang Jehova ug nakasabot kon unsay gibarogan sa iyang ngalan, kita mosalig gayod kaniya sama sa pagsalig ni Josue ug Caleb.—Juan 17:3.
7, 8.(a) Sa unsang paagi ang kalalangan naghatag kanato ug mga katarongan sa pagsalig kang Jehova? (b) Unsang mga katarongan ang gihatag sa Bibliya sa pagsalig kang Jehova?
7 Nganong angay kitang mosalig kang Jehova? Si Josue ug Caleb misalig tungod kay sila nakakitag pipila ka pasundayag sa iyang gahom. Mao usab kita. Pananglitan, palandonga ang mga linalang ni Jehova, lakip ang uniberso, uban ang binilyong galaksiya niini. Ang labihan ka dagkong pisikal nga mga puwersa nga gikontrolar ni Jehova nagapasundayag nga siya, sa pagkamatuod, mao ang Labing Gamhanan. Samtang palandongon nato ang kahibulongang mga linalang, mouyon gayod kita kang Job, kinsa miingon bahin kang Jehova: “Kinsa ang makasukol kaniya? Kinsa ang moingon kaniya, ‘Unsa ang imong ginabuhat?’” (Job 9:12) Sa pagkatinuod, kon si Jehova dapig kanato, wala kitay angayng kahadlokan sa tibuok uniberso.—Roma 8:31.
8 Tagda, usab, ang Pulong ni Jehova, ang Bibliya. Kining dili-mahutdan nga tinubdan sa balaang kaalam maoy gamhanan nga makatabang kanato sa pagbuntog sa daotang mga buhat ug sa pagpahiuyon sa atong kinabuhi sa kabubut-on ni Jehova. (Hebreohanon 4:12) Pinaagi sa Bibliya kita makaila kang Jehova pinaagi sa ngalan ug makasabot kon unsay kahulogan sa iyang ngalan. (Exodo 3:14) Makaamgo kita nga si Jehova mahimong mao kon unsay pilion niya—mahigugmaong Amahan, matarong nga Maghuhukom, mananaog nga Manggugubat—aron tumanon ang iyang mga katuyoan. Ug masabtan nato nga ang iyang pulong kanunay nga matuman. Samtang tun-an nato ang Pulong sa Diyos, matukmod kita sa pag-ingon, sama sa giingon sa salmista: “Ako nagsalig sa imong pulong.”—Salmo 119:42; Isaias 40:8.
9. Sa unsang paagi ang lukat ug ang pagkabanhaw ni Jesus makapalig-on sa atong pagsalig kang Jehova?
9 Ang kahikayan sa lukat maoy laing katarongan nga mosalig kang Jehova. (Mateo 20:28) Pagkatalagsaon gayod nga gipadala sa Diyos ang iyang Anak aron mamatay ingong usa ka lukat alang kanato! Ug ang lukat tinuod gayong epektibo. Motabon kini sa mga sala sa tanang tawo nga naghinulsol ug modangop kang Jehova uban ang maminatud-ong kasingkasing. (Juan 3:16; Hebreohanon 6:10; 1 Juan 4:16, 19) Kinahanglang banhawon si Jesus aron mabayran ang lukat. Ang maong milagro, nga gipamatud-an sa ginatos ka tawong nakasaksi, maoy dugang katarongan nga mosalig kang Jehova. Usa kini ka garantiya nga ang atong mga paglaom dili mosangko sa kapakyasan.—Buhat 17:31; Roma 5:5; 1 Corinto 15:3-8.
10. Unsa ang atong personal nga mga katarongan sa pagsalig kang Jehova?
10 Pipila lang kini sa mga katarongan kon nganong kita makasalig ug angayng mosalig sa bug-os kang Jehova. Adunay daghan pang katarongan, nga ang pipila niana maoy personal. Pananglitan, matag karon ug unya, kitang tanan makasinatig lisod nga mga kahimtang sa atong kinabuhi. Samtang atong tinguhaon ang giya ni Jehova sa pag-atubang niini, masabtan nato nga mapuslanon kaayo ang maong giya. (Santiago 1:5-8) Kon kita mas mosalig kang Jehova diha sa atong adlaw-adlaw nga pagkinabuhi ug makita ang maayong mga sangpotanan niini, ang atong pagsalig kaniya mas molig-on.
Si David Misalig Kang Jehova
11. Bisan pa sa unsang mga kahimtang nga si David misalig kang Jehova?
11 Si David sa karaang Israel maoy usa nga misalig kang Jehova. Naatubang ni David ang panghulga ni Haring Saul, kinsa buot mopatay kaniya, ug ang puwersadong Filistehanon nga kasundalohan, kinsa nagtinguha sa pagpukan sa Israel. Bisan pa niadto, siya naluwas ug nagmadaogon gayod. Ngano? Si David ang nagsaysay mismo: “Si Jehova mao ang akong kahayag ug ang akong kaluwasan. Kinsa man ang akong kahadlokan? Si Jehova mao ang salipdanan sa akong kinabuhi. Kinsa man ang akong kalisangan?” (Salmo 27:1) Kita usab magmadaogon kon kita susamang mosalig kang Jehova.
12, 13. Sa unsang paagi gipakita ni David nga kita angayng mosalig kang Jehova bisan pag ang mga magsusupak magagamit sa ilang mga dila ingong mga hinagiban batok kanato?
12 Sa usa ka higayon si David miampo: “Patalinghogi, Oh Diyos, ang akong tingog sa kabalaka. Panalipdan mo unta ang akong kinabuhi gikan sa pagkamakalilisang sa kaaway. Tagoan mo unta ako gikan sa kompidensiyal nga pagsultihanay sa mga mamumuhat ug daotan, gikan sa kaguliyang sa mga mamumuhat sa butang nga makadaot, nga nagbaid sa ilang dila sama sa usa ka espada, nga nagpunting sa ilang pana, mga pulong nga mapait, sa pagpana sa usa nga walay-ikasaway.” (Salmo 64:1-4) Wala gayod kita mahibalo kon unsay midasig kang David sa pagsulat niining mga pulonga. Apan nahibalo kita nga karon, ang mga magsusupak susamang “nagbaid sa ilang dila,” pinaagi sa paggamit sa katakos sa pagsulti ingong hinagiban sa gubat. Sila ‘mopana’ sa way-ikasaway nga mga Kristohanon, nga gamiton ang gilitok o sinulat nga mga pulong ingong mga “pana” sa pagpangdaot. Kon kita mosalig nga walay pakyas kang Jehova, unsa unya ang resulta?
13 Si David nagpadayon sa pag-ingon: “Ang Diyos magapana kanila sa kalit. Mga samad ilang maagoman, ug sila magapapandol. Apan ang ilang dila batok sa ilang kaugalingon mismo. . . . Ang matarong magamaya diha kang Jehova ug modangop gayod kaniya.” (Salmo 64:7-10) Oo, bisan pag ang mga kaaway magabaid sa ilang dila batok kanato, sa kataposan ‘ang ilang dila mobatok sa ilang kaugalingon mismo.’ Sa kataposan ipahinabo ni Jehova nga ang mga butang magmalamposon, mao nga kadtong nagsalig kaniya makamaya diha kaniya.
Pagsalig ni Ezequias Napamatud-ang Mapuslanon
14. (a) Sa unsang peligrosong kahimtang nga si Ezequias misalig kang Jehova? (b) Sa unsang paagi gipakita ni Ezequias nga wala siya motuo sa mga kabakakan sa mga Asiryano?
14 Si Haring Ezequias maoy lain pang tawo kansang pagsalig kang Jehova napamatud-an nga mapuslanon. Panahon sa paghari ni Ezequias, gihulga ang Jerusalem sa gamhanang kasundalohan sa Asirya. Ang maong kasundalohan nakapukan nag daghang laing mga nasod. Gipukan gani niini ang mga siyudad sa Juda hangtod ang Jerusalem mao na lang ang wala mapukan, ug si Senakerib nanghambog nga iyang pukanon usab ang maong siyudad. Pinaagi ni Rabsake, siya miingon—nga maoy husto—nga kawang nga mosalig sa Ehipto alang sa panabang. Apan, unya siya miingon: “Ayaw pagpalimbong sa imong Diyos nga imong gisaligan, nga magaingon: ‘Ang Jerusalem dili igahatag ngadto sa kamot sa hari sa Asirya.’” (Isaias 37:10) Ugaling, nahibalo si Ezequias nga siya dili limbongan ni Jehova. Busa siya miampo, nga miingon: “Oh Jehova nga among Diyos, luwasa kami gikan sa . . . kamot [sa Asiryano], aron ang tanang gingharian sa yuta mahibalo nga ikaw, Oh Jehova, mao lamang ang Diyos.” (Isaias 37:20) Si Jehova nagpatalinghog sa pag-ampo ni Ezequias. Sa usa ka gabii, ang usa ka manulonda mipatayg 185,000 ka sundalong Asiryano. Wala mapukan ang Jerusalem, ug si Senakerib mibiya sa yuta sa Juda. Ang tanan nga nakadungog bahin sa maong hitabo nakahibalo bahin sa pagkadako ni Jehova.
15. Unsa lamang ang makatabang kanato sa pagpangandam alang sa bisan unsang kalisdanan nga mahimong atong masinati niining mabalhinong kalibotan?
15 Karong adlawa, sama kang Ezequias, kita adunay pakiggubat. Sa atong kahimtang, espirituwal ang atong pakiggubat. Bisan pa niana, isip espirituwal nga mga manggugubat, kinahanglang pauswagon nato ang mga katakos sa pagpabiling buhi sa espirituwal. Kinahanglang dahomon nato ang mga pag-atake ug mangandam sa atong kaugalingon sa pagsagang niana. (Efeso 6:11, 12, 17) Niining mabalhinong kalibotan, ang mga kahimtang mahimong kalit nga mausab. Ang pagrebelde sa mga lungsoranon mahimong kalit nga mahitabo. Ang mga nasod nga nagmatinugoton sa nagkalainlaing relihiyon basin mahimong dili na matinugoton. Apan kon kita, sama kang Ezequias, mangandam pinaagi sa pagpauswag sa dili-matarog nga pagsalig kang Jehova, nan kita mahimong andam bisan kon unsay mahimong mahitabo.
Unsay Kahulogan sa Pagsalig Kang Jehova?
16, 17. Sa unsang paagi ikapasundayag nato nga kita nagsalig kang Jehova?
16 Ang pagsalig kang Jehova dili lamang ipahayag sa mga pulong. Nalangkit niini ang atong kasingkasing ug kini ipasundayag pinaagi sa atong mga buhat. Kon kita nagsalig kang Jehova, kita bug-os mosalig sa iyang Pulong, ang Bibliya. Atong basahon kini kada adlaw, palandongon kini, ug himoong giya sa atong kinabuhi. (Salmo 119:105) Ang pagsalig kang Jehova naglangkit usab sa pagsalig diha sa gahom sa balaang espiritu. Sa tabang sa balaang espiritu, makaugmad kita sa mga bunga nga makapahimuot kang Jehova ug kita makabuntog sa nakagamot pag-ayo nga daotang mga batasan. (1 Corinto 6:11; Galacia 5:22-24) Busa, sa tabang sa balaang espiritu, daghan ang nakaundang sa panabako o sa paggamit ug mga droga. Ang uban nakabiya sa imoral nga mga estilo sa pagkinabuhi. Oo, kon kita mosalig kang Jehova, kita molihok sa tabang sa iyang kusog, dili sa atong kaugalingong kusog.—Efeso 3:14-18.
17 Dugang pa, ang pagsalig kang Jehova nagkahulogan sa pagsalig sa mga tawo nga iyang gisaligan. Pananglitan, si Jehova naghikay nga ang “matinumanon ug maalamong ulipon” maoy mag-atiman sa intereses sa Gingharian sa yuta. (Mateo 24:45-47) Dili kita mosulay sa paglihok nga independente, ug dili kay dili nato tagdon ang pagkatinudlo sa maong ulipon, kay kita nagsalig sa kahikayan ni Jehova. Dugang pa, ang mga ansiyano nag-alagad diha sa lokal nga Kristohanong kongregasyon ug, sumala ni apostol Pablo, gitudlo sa balaang espiritu. (Buhat 20:28) Pinaagi sa pagkooperar sa kahikayan sa mga ansiyano diha sa kongregasyon, gipakita usab nato nga kita nagsalig kang Jehova.—Hebreohanon 13:17.
Sunda ang Panig-ingnan ni Pablo
18. Sa unsang paagi ang mga Kristohanon karon nagsunod sa panig-ingnan ni Pablo, apan wala nila ibutang ang ilang pagsalig diha sa unsa?
18 Si apostol Pablo miatubang ug daghang kapit-osan sa iyang ministeryo, sama ra kanato karon. Sa iyang panahon ang Kristiyanidad gidaot ngadto sa mga opisyales sa gobyerno, ug may panahong siya naningkamot sa pagtul-id sa maong sayop nga mga panghunahuna o sa pagtukod sa legal nga paagi sa buluhatong pagsangyaw. (Buhat 28:19-22; Filipos 1:7) Karong adlawa, ang mga Kristohanon nagsunod sa iyang panig-ingnan. Bisan diin nga kini posible, tabangan nato ang uban nga malamdagan bahin sa atong buluhaton, nga gamiton ang kahigayonan ug mga paagi sa paghimo niana. Ug kita maningkamot sa pagdepensa ug sa pagtukod sa legal nga paagi sa maayong balita. Hinunoa, dili nato ibutang ang atong bug-os nga pagsalig sa maong mga paningkamot, tungod kay wala nato isipa nga ang kalamposan o kapakyasan nagdepende sa pagdaog nato sa mga kaso sa korte o pagbaton ug maayong publisidad. Hinunoa, kita nagsalig kang Jehova. Atong mahinumdoman ang iyang pagdasig sa karaang Israel: “Ang inyong pagkagamhanan mapamatud-an nga anaa ra sa pagpadayong walay-pagkatugaw ug sa pagkamasaligon.”—Isaias 30:15.
19. Sa dihang nailalom sa paglutos, sa unsang paagi ang pagsalig sa atong mga igsoon kang Jehova napamatud-ang mapuslanon?
19 Sa atong modernong kasaysayan, may mga panahong ang atong buluhaton gidili o gipig-otan sa Silangan ug Kasadpang Uropa, sa mga bahin sa Asia ug Aprika, ug sa mga nasod sa Amerika del Sur ug Amerika del Norte. Nagpasabot ba kini nga nakawang ang atong pagsalig kang Jehova? Wala. Bisan pag itugot niya usahay ang grabeng paglutos tungod kay siya adunay maayong katuyoan, si Jehova mahigugmaong nagpalig-on sa mga nag-antos sa maong paglutos. Samtang nailalom sa paglutos, daghang Kristohanon ang nakamugnag talagsaong rekord labot sa pagtuo ug pagsalig sa Diyos.
20. Bisan pag makapahimulos tingali kita sa legal nga mga kagawasan, sa unsang mga bahin nga dili gayod kita mokompromiso?
20 Sa laing bahin, sa kadaghanang nasod kita giila na sa legal nga paagi, ug usahay madawat nato ang maayong publisidad diha sa media. Kita mapasalamaton niini ug nag-ila nga kini nagtuman sa katuyoan ni Jehova. Uban sa iyang pag-uyon, atong gamiton ang mas dakong kagawasan, dili aron pauswagon ang atong personal nga mga estilo sa pagkinabuhi, kondili aron alagaran si Jehova sa dayag ug mas bug-os pa. Bisan pa niana, sa katuyoan nga dayegon kita sa mga opisyales sa gobyerno, dili gayod nato ikompromiso ang atong neyutralidad, pahinayon ang atong buluhatong pagwali, o sa bisan unsang paagi menosan ang atong pag-alagad kang Jehova. Kita maoy mga sakop sa Mesiyanikong Gingharian ug bug-os nga dapig sa pagkasoberano ni Jehova. Ang atong paglaom mao, dili niining sistemaha sa mga butang, kondili diha sa bag-ong kalibotan, diin ang langitnong Mesiyanikong Gingharian mao na lang ang kagamhanan nga magmando ibabaw niining yutaa. Walay mga bomba, ni mga misil, ni nukleyar nga mga pag-atake ang makatarog sa maong kagamhanan o makapukan niana gikan sa langit. Kini dili mabuntog ug kini magatuman sa katuyoan ni Jehova.—Daniel 2:44; Hebreohanon 12:28; Pinadayag 6:2.
21. Determinado kitang mosubay sa unsang dalan sa pagkinabuhi?
21 Si Pablo nag-ingon: “Dili kita ang matang nga mosibog ngadto sa kalaglagan, kondili ang matang nga adunay pagtuo ngadto sa pagtipig nga buhi sa kalag.” (Hebreohanon 10:39) Nan, hinaot nga kitang tanan matinumanong mag-alagad kang Jehova hangtod sa kataposan. Aduna kitay tanang katarongan sa pagbutang sa atong bug-os nga pagsalig diha kang Jehova karon ug hangtod sa kahangtoran.—Salmo 37:3; 125:1.
Unsay Imong Nakat-onan?
• Nganong si Josue ug Caleb nagdalag paborableng taho sa ilang pagbalik?
• Unsay pipila ka katarongan nga kita angayng mosalig sa bug-os kang Jehova?
• Unsay buot ipasabot sa pagsalig kang Jehova?
• Kay nagsalig kang Jehova, unsa ba ang atong determinasyon?
[Mga Pangutana sa Pagtuon]
[Hulagway sa panid 15]
Nganong si Josue ug Caleb mihatag ug paborableng taho?
[Mga hulagway sa panid 16]
Ang kalalangan mohatag kanato ug lig-ong katarongan sa pagsalig kang Jehova
[Credit Line]
All three images: Courtesy of Anglo-Australian Observatory, photograph by David Malin
[Hulagway sa panid 18]
Ang pagsalig kang Jehova nagkahulogan sa pagsalig sa mga tawo nga iyang gisaligan