Ikaw Mainitong Gidapit

ANG Kataposang Panihapon, nga gisugdan sa Ginoong Jesu-Kristo mga 2,000 ka tuig kanhi, maoy labaw pa kay sa usa ka makaiikag lamang nga kasaysayan. Kini adunay gamhanang epekto diha sa mga tawo sukad sa inagurasyon niini. Tungod kay natandog sa ilang nabasahan sa mga asoy sa Ebanghelyo bahin sa nahitabo niadtong gabhiona, daghan ang naningkamot sa pagsaulog sa Panihapon sa Ginoo sa nagkalainlaing mga paagi.

Kining tanang kaikag masabtan, tungod kay si Jesu-Kristo mismo nagsugo sa iyang mga sumusunod nga saulogon kining maong okasyon ug nga himoon nila kini sa regular nga paagi. Siya espesipikong nagsugo kanila: “Ipadayon ninyo ang pagbuhat niini sa paghandom kanako.”—Lucas 22:19; 1 Corinto 11:23-25.

Siyempre, aron ang maong kasaulogan mahimong usa ka magantihon gayod nga kasinatian, ang usa kinahanglang adunay tukmang pagsabot sa kahulogan niini, ingon sa gipadayag diha sa Pulong sa Diyos, ang Bibliya. Dugang pa, hinungdanon ang pagkahibalo kon unsa ang ginaingon sa Bibliya kon kanus-a ug kon sa unsang paagi saulogon ang maong okasyon.

Agig pagsunod sa sugo ni Jesus, ang mga Saksi ni Jehova sa tibuok kalibotan magkatigom sa gabii sa Miyerkoles, Abril 16, 2003, aron saulogon ang kamatayon ni Jesus. Alang kanila, kini mahimong usa ka higayon sa pagsusi sa Kasulatan ug sa pagbag-o sa ilang pagtuo ug gugma kang Ginoong Jesu-Kristo, kinsa miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Ikaw mainitong gidapit sa pagtambong duyog kanila nianang gabhiona aron mapalig-on usab nimo ang imong pagtuo ug gugma alang kang Jesu-Kristo ug sa langitnong Amahan, si Jehova nga Diyos.