Mga Batan-on—Si Jehova Dili Malimot sa Inyong Buhat!

“Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.”—HEBREOHANON 6:10.

1. Sa unsang paagi gipakita sa mga basahon sa Bibliya nga Hebreohanon ug Malaquias nga si Jehova nagpabili sa imong pag-alagad?

 NAKAHIMO ka ba sukad ug malulotong buhat alang sa usa ka higala ug unya wala ka pasalamati? Makapahiubos kaayo sa dihang ang malulotong buhat dili lang tagdon o, daotan pa, bug-os nga kalimtan. Apan pagkalahi sa dihang kita bug-os-kasingkasing nga mag-alagad kang Jehova! Ang Bibliya nag-ingon: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.” (Hebreohanon 6:10) Hunahunaa kon unsay kahulogan niana. Isipon gayod ni Jehova nga dili-matarong nga buhat sa iyang kabahin—nga maoy usa ka sala—kon iyang kalimtan ang imong nabuhat ug kon unsay imong gipadayon sa pagbuhat diha sa pag-alagad kaniya. Mapabilhon kaayo siya nga Diyos!—Malaquias 3:10.

2. Unsay nakapaespesyal gayod sa pag-alagad kang Jehova?

 ² Ikaw adunay espesyal nga kahigayonan sa pagsimba ug pag-alagad sa maong mapabilhon nga Diyos. Sanglit aduna lamay mga unom ka milyon nga imong isigkamagtutuo kon itandi sa mga unom ka bilyong tawo sa tibuok kalibotan, ang imong pribilehiyo maoy talagsaon gayod. Dugang pa, ang kamatuorang ikaw nagpatalinghog ug misanong sa mensahe sa maayong balita maoy ebidensiya nga si Jehova adunay personal nga interes kanimo. Ngani, si Jesus nag-ingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Oo, si Jehova motabang sa matag tawo aron makapahimulos sa mga kaayohan sa halad ni Kristo.

Pagkamapasalamaton sa Imong Talagsaong Pribilehiyo

3. Sa unsang paagi ang mga anak ni Kore nagpabili sa pribilehiyo sa pag-alagad kang Jehova?

³ Sumala sa gihisgotan sa nag-unang artikulo, ikaw anaa sa talagsaong kahimtang nga makapalipay sa kasingkasing ni Jehova. (Proverbio 27:11) Kini butang nga dili angay nimong ibalewala lamang. Sa usa sa ilang inspiradong mga salmo, ang mga anak ni Kore nagpahayag sa ilang pagpabili sa pribilehiyo sa pag-alagad kang Jehova. Mabasa nato: “Ang usa ka adlaw sa imong mga sawang labi pang maayo kay sa usa ka libo sa laing dapit. Gipili ko ang pagtindog sa pultahan sa balay sa akong Diyos kay sa paglibotlibot sa mga tolda sa pagkadaotan.”—Salmo 84:10.

4. (a) Nganong giisip sa pipila nga ang pagsimba kang Jehova mapig-oton? (b) Sa unsang paagi gipakita ni Jehova nga siya maikagon sa pagmatikod ug pagganti sa iyang mga alagad?

⁴ Kana ba ang imong gibati bahin sa imong pribilehiyo sa pag-alagad sa imong langitnong Amahan? Tinuod, usahay ang pagsimba kang Jehova maorag maglimite sa imong kagawasan. Ang pagkinabuhi subay sa mga prinsipyo sa Bibliya nagkinahanglan gayod ug pagsakripisyo-sa-kaugalingon. Apan, ang gikinahanglan ni Jehova gikan kanimo sa kataposan moresulta sa imong kaayohan. (Salmo 1:1-3) Dugang pa, si Jehova makakita sa imong mga paningkamot ug magpasundayag sa iyang pagpabili sa imong pagkamatinumanon. Sa pagkatinuod, si Pablo misulat nga si Jehova “maoy tigganti sa mga matinuorong nagapangita kaniya.” (Hebreohanon 11:6) Si Jehova nagapangitag kahigayonan sa pagbuhat niini. Ang usa ka matarong nga manalagna sa karaang Israel miingon: “Mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.”—2 Cronicas 16:9.

5. (a) Unsa ang usa sa labing maayong mga paagi nga ikapakita nimo nga ang imong kasingkasing maoy bug-os kang Jehova? (b) Nganong ang pagpakigsulti sa uban bahin sa imong pagtuo daw lisod?

⁵ Usa sa labing maayong mga paagi nga ikapakita nimo nga ang imong kasingkasing maoy bug-os kang Jehova mao ang pagpakigsulti sa uban mahitungod kaniya. Ikaw ba nakahigayon sa pagpakigsulti ngadto sa imong pipila ka kauban sa tunghaan bahin sa imong pagtuo? Sa sinugdan, basin ikaw motalaw, ug ang ideya mismo tingali makahahadlok ug diyutay. ‘Dili kaha ila akong kataw-an?’ ikaw tingali mangutana. ‘Dili kaha isipon nila nga katingad-anan ang akong relihiyon?’ Giila ni Jesus nga dili ang tanan magpatalinghog sa mensahe sa Gingharian. (Juan 15:20)  Apan, kini wala magpasabot nga ikaw makasinati na lamang sa kinabuhing tinamay ug sinalikway. Sa kasukwahi, daghang batan-ong mga Saksi ang gipamatian ug gitahod pag-ayo sa ilang mga isigkabatan-on tungod sa pagsunod sa ilang mga tinuohan.

“Si Jehova Motabang Kanimo”

6, 7. (a) Sa unsang paagi ang usa ka 17-anyos nga babaye nakahimo sa pagsangyaw ngadto sa iyang mga klasmet? (b) Unsay imong nakat-onan gikan sa kasinatian ni Jennifer?

⁶ Apan sa unsang paagi ikaw makabatog kaisog sa pagpahayag sa imong pagtuo? Nganong dili ka magmatinud-anon ug moprangka sa dihang ang mga tawo mangutana bahin sa imong relihiyon? Tagda ang kasinatian sa 17-anyos nga si Jennifer. “Ako niadto naniudto diha sa tunghaan. Naghisgot ug relihiyon ang mga babaye diha sa akong lamesa, ug usa sa mga babaye nangutana kon unsay akong relihiyon,” siya miingon. Ginerbiyos ba si Jennifer sa pagtubag? “Oo,” miangkon siya, “kay wala ko makapaneguro kon unsay ilang reaksiyon.” Busa unsay gibuhat ni Jennifer? “Giingnan ko ang mga babaye nga ako Saksi ni Jehova,” nagpadayon siya. “Sa sinugdan sila daw natingala. Kalagmitan, sila nagtuo nga ang mga Saksi ni Jehova maoy katingad-anan nga mga tawo. Kadto nakadasig kanila sa pagsukna kanako ug daghang pangutana, ug ako nakapatin-aw sa pipila ka sayop nilang mga ideya. Bisan human niadto, pipila sa mga babaye miduol panagsa kanako uban ang mga pangutana.”

⁷ Nagbasol ba si Jennifer sa pagpahimulos sa higayon nga ipahayag ang iyang mga tinuohan? Wala gayod! “Maayo ang akong gibati bahin niadto pagkahuman sa paniudto,” matod niya. “Karon kadtong mga bayhana mas nakasabot kon kinsa gayod ang mga Saksi ni Jehova.” Ang tambag karon ni Jennifer maoy yano: “Kon malisdan ka sa pagsangyaw ngadto sa mga klasmet o mga magtutudlo, himoa ang mubong pag-ampo. Si Jehova motabang kanimo. Malipay ka nga imong napahimuslan ang imong pribilehiyo nga makasangyaw.”—1 Pedro 3:15.

8. (a) Sa unsang paagi ang pag-ampo nakatabang kang Nehemias sa dihang nakaatubang siya ug wala-damhang kahimtang? (b) Unsa ang pipila ka kahimtang sa tunghaan sa dihang kinahanglan mo tingaling molitok ug mubo, hilom nga pag-ampo kang Jehova?

⁸ Matikdi nga si Jennifer nagsugyot sa ‘paghimo ug mubong pag-ampo’ kang Jehova inigtungha sa kahigayonan sa pagsangyaw bahin sa imong pagtuo. Kini gayod ang gihimo ni Nehemias, ang magtitiing ug bino sa Persianong Haring Artajerjes, sa dihang siya nakaatubang ug wala-damhang kahimtang. Nadayag nga si Nehemias naguol kay siya gipahibalo bahin sa kahimtang sa mga Hudiyo ug iyang nasayrang ang paril ug mga ganghaan sa Jerusalem nagun-ob. Namatikdan sa hari nga si Nehemias morag mabalak-on, busa iyang gisukna si Nehemias kon unsay suliran. Sa wala pa motubag, miampo si Nehemias alang sa giya. Unya siya maisogong nangayog permiso nga mobalik sa Jerusalem aron motabang sa pagtukod pag-usab sa nagun-ob nga siyudad. Gitugotan ni Artajerjes ang hangyo ni Nehemias. (Nehemias 2:1-8) Ang pagtulon-an? Kon nerbiyoson ka inigtungha sa kahigayonan sa pagsangyaw bahin sa imong pagtuo, ayaw kalimti ang imong higayon nga makaampo sa hilom. “Inyong itugyan [kang Jehova] ang tanan ninyong mga kabalaka,” misulat si Pedro, “kay siya may kahingawa kaninyo.”—1 Pedro 5:7; Salmo 55:22.

“Andam sa Pagdepensa”

9. Sa unsang paagi ang 13-anyos nga si Leah nakapahimutang ug 23 ka kopya sa librong Gisukna sa mga Batan-on?

⁹ Tagda ang laing kasinatian. Si Leah, 13 anyos, nagbasa sa librong Mga Pangutanang Gisukna sa mga Batan-on—Mga Tubag nga Mosaler a panahon sa pahulay sa klase alang sa paniudto. “Ang uban nagtan-aw kanako,” matod niya, “ug taudtaod ang usa ka panon nagdungaw na sa akong abaga. Nangutana sila kon bahin sa unsa kadtong libroha.” Pagkatapos sa maong adlaw, upat ka babaye ang mihangyo kang Leah ug kopya sa librong Gisukna sa mga Batan-on. Sa wala madugay gipabasa niadtong mga bayhana ang libro sa uban, ug unya buot na usab sa uban nga makabatog kopya. Sa sunod pipila ka semana, si Leah nakapahimutang ug 23 ka kopya sa librong Gisukna sa mga Batan-on sa iyang mga kauban sa tunghaan ug sa ilang mga higala. Gisayonan ba si Leah sa pagsangyaw sa dihang ang uban sa sinugdan nangutana bahin sa libro nga iyang gibasa? Wala gayod! “Sa sinugdan, ginerbiyos ako,” siya miangkon. “Bisan pa niana, miampo ako, ug nahibalo ako nga si Jehova nag-uban kanako.”

10, 11. Sa unsang paagi ang usa ka dalagitang Israelinhon nakatabang sa usa ka pangulo sa kasundalohan sa Sirya nga mahibalo bahin kang Jehova, ug unsang kausaban ang iyang gihimo human niadto?

 ¹⁰ Ang kasinatian ni Leah tingali magpahinumdom kanimo sa susamang kahimtang nga giatubang sa usa ka dalagitang Israelinhon nga nabihag sa Sirya. Si Naaman, nga usa ka pangulo sa kasundalohan sa Sirya, usa ka sanlahon. Tingali ang asawa ni Naaman maoy unang nakigsulti nga nakadasig niadtong dalagita sa pagpahayag bahin sa iyang pagtuo. “Kon ang akong ginoo atua pa unta sa atubangan sa manalagna sa Samaria!” matod niya. “Niana siya mag-ayo kaniya sa iyang sanla.”—2 Hari 5:1-3.

¹¹ Tungod sa pagkamaisogon sa maong dalagita, si Naaman nahidangat sa pagkahibalo nga “walay Diyos bisan diin sa yuta gawas sa Israel.” Mihukom pa gani siya nga siya “dili na maghalad ug usa ka halad-nga-sinunog o usa ka halad ngadto sa bisan unsang lain nga mga diyos gawas kang Jehova.” (2 Hari 5:15, 17) Gipanalanginan gayod ni Jehova ang kaisog niadtong dalagita. Siya makaarang sa paghimo ug mohimo gayod sa samang butang alang sa mga batan-on karon. Kana usab ang kasinatian ni Leah. Ngadtongadto, ang pipila niya ka kauban sa tunghaan miduol kaniya ug misulti nga ang librong Gisukna sa mga Batan-on nakatabang kanila bahin sa ilang pamatasan. “Nalipay ako,” matod ni Leah, “kay nahibaloan ko nga ako nakatabang sa uban sa pagkakat-on  ug dugang bahin kang Jehova ug nakatabang kanila sa pagbag-o sa ilang kinabuhi.”

12. Sa unsang paagi mapalig-on ka aron makadepensa sa imong pagtuo?

¹² Ikaw mahimong makabaton ug mga kasinatian nga susama sa kang Jennifer ug Leah. Sunda ang tambag ni Pedro, kinsa misulat nga isip Kristohanon angay kang mahimong ‘andam kanunay sa pagdepensa atubangan sa tanan nga mangayo kanimog katarongan sa paglaom nga anaa kanimo, apan magabuhat niini uban ang kalumo sa buot ug halawom nga pagtahod.’ (1 Pedro 3:15) Sa unsang paagi imong mahimo kana? Sundoga ang gibuhat sa unang-siglong mga Kristohanon nga miampo kang Jehova nga siya motabang kanila aron makawali “uban ang bug-os nga kaisog.” (Buhat 4:29) Unya magmaisogon sa pagpakigsulti sa uban bahin sa imong mga tinuohan. Basin matingala ka sa mga resulta. Dugang pa, makapalipay ka sa kasingkasing ni Jehova.

Mga Video ug Espesyal nga mga Proyekto

13. Unsang mga kahigayonan sa pagsangyaw ang gipahimuslan sa pipila ka batan-on? (Tan-awa ang mga kahon sa mga panid 20 ug 21.)

¹³ Daghang batan-on ang nagpatin-aw sa ilang pagtuo ngadto sa mga kauban sa tunghaan o mga magtutudlo pinaagi sa paggamit sa mga video. Usahay, ang mga proyekto sa tunghaan nagbukas usab sa kahigayonan sa pagdayeg kang Jehova. Pananglitan, ingong bahin sa ilang klase sa kasaysayan sa kalibotan, duha ka 15-anyos nga mga batang lalaki, nga mga Saksi ni Jehova, nakadawat ug asaynment nga mosulat ug usa ka report bahin sa usa sa mga relihiyon sa kalibotan. Ang duha ka batan-on nag-uban sa pagsulat sa ilang report bahin sa mga Saksi ni Jehova, nga gigamit ang librong Mga Saksi ni Jehova—Mga Magmamantala sa Gingharian sa Diyos ingong ilang reperensiya. b Gipahayag usab nila ang lima ka minutos nga binaba nga report. Human niadto, ang magtutudlo ug mga estudyante may daghan kaayong pangutana nga ang mga batang lalaki didto atubangan sa klase sa dugang 20 minutos. Sulod sa daghang semana human niadto, ang ilang mga klasmet nagpadayon sa pagpangutana bahin sa mga Saksi ni Jehova!

14, 15. (a) Nganong ang pagkahadlok sa tawo maoy usa ka lit-ag? (b) Nganong angay kang magmasaligon bahin sa pagpakig-ambit sa imong mga tinuohan sa uban?

 ¹⁴ Sumala sa gihulagway sa nag-unang mga kasinatian, ang talagsaong mga panalangin masinati kon imong sultihan ang uban bahin sa imong mga tinuohan ug mga kombiksiyon isip usa sa mga Saksi ni Jehova. Ayaw itugot nga ang pagkahadlok sa tawo maghikaw kanimo sa pribilehiyo ug kalipay nga makatabang sa uban sa pagkaila kang Jehova. Ang Bibliya nag-ingon: “Ang pagpangurog tungod sa mga tawo nagadala ug usa ka lit-ag, apan siya nga nagasalig kang Jehova pagapanalipdan.”—Proverbio 29:25.

¹⁵ Hinumdomi, isip Kristohanong batan-on imong nabatonan ang usa ka butang nga gikinahanglan kaayo sa imong mga isigkabatan-on—ang kinamaayohang paagi sa kinabuhi karon ug ang saad nga kinabuhing walay kataposan sa umaabot. (1 Timoteo 4:8) Makaiikag, sa Tinipong Bansa—diin imong gihunahuna tingali nga ang mga tawo sagad dili matinagdanon o kalibotanon ug panghunahuna—gipadayag sa usa ka surbi nga labing menos katunga sa mga batan-on seryoso kaayong naghunahuna bahin sa relihiyon, ug un-tersiya nag-ingon nga ang relihiyosong pagtuo mao “ang labing hinungdanong impluwensiya” sa ilang kinabuhi. Ang kahimtang lagmit susama diha sa daghang ubang mga bahin sa kalibotan. Nan, lagmit gayod nga ang imong mga isigkabatan-on sa tunghaan malipayng magpatalinghog kon unsay imong isulti bahin sa Bibliya.

Isip Batan-on, Pakigsuod Kang Jehova

16. Unsay nalangkit sa pagpahimuot kang Jehova gawas pa sa pagpakigsulti sa uban bahin kaniya?

¹⁶ Hinuon, dili lamang ang pagpakigsulti bahin kaniya ang makapalipay sa kasingkasing ni Jehova. Kinahanglang imong ipahiuyon usab ang imong panggawi sa iyang mga sukdanan. Si apostol Juan misulat: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Masayran nimong tinuod kini kon makigsuod ka kang Jehova. Sa unsang paagi imong mahimo kana?

17. Sa unsang paagi makigsuod ka kang Jehova?

¹⁷ Hatagig panahon ang pagbasa sa Bibliya ug sa binase-sa-Bibliya nga mga publikasyon. Kon mas daghan ang imong mahibaloan bahin kang Jehova, mas sayon unya ang pagsunod kaniya ug pagpakigsulti sa uban bahin kaniya. “Ang maayong tawo magapagula ug maayo gikan sa maayong bahandi sa iyang kasingkasing,” matod ni Jesus, “kay gikan sa kadagaya sa kasingkasing ang iyang baba magasulti.” (Lucas 6:45) Busa pun-a ang imong kasingkasing ug maayong mga butang. Nganong dili magbutang ug mga tumong bahin niini? Tingali imong mapauswag ang pagpangandam alang sa mga tigom sa kongregasyon sa sunod semana. Ang sunod nimong tumong mahimong mao ang pagpakigbahin pinaagi sa paghatag ug mubo apan kinasingkasing nga komento. Siyempre, hinungdanon usab nga imong ipadapat ang mga butang nga imong nakat-onan.—Filipos 4:9.

18. Bisan pa kon makasinati kag pagsupak, ikaw makasalig sa unsa?

¹⁸ Ang mga panalangin tungod sa pag-alagad kang Jehova maoy malungtaron—sa pagkamatuod, walay kataposan. Tinuod, usahay ikaw makasinatig pagsupak o pagtamay tungod kay usa ka Saksi ni Jehova. Apan hunahunaa si Moises. Ang Bibliya nag-ingon nga ‘siya nagtutok ngadto sa pagbayad sa ganti.’ (Hebreohanon 11:24-26) Ikaw usab makasalig nga pagagantihan ka ni Jehova tungod sa mga paningkamot nga imong gihimo sa pagkakat-on bahin kaniya ug pagpakigsulti bahin kaniya. Sa pagkamatuod, dili gayod niya ‘kalimtan ang imong buhat ug ang gugma nga imong gipakita alang sa iyang ngalan.’—Hebreohanon 6:10.

[Mga footnote]

Nahinumdom Ka Ba?

• Nganong makapaneguro ka nga gipabilhan ni Jehova ang imong pag-alagad?

• Unsang mga paagi sa pagsangyaw sa tunghaan ang nadiskobrehan sa uban nga malamposon?

• Sa unsang paagi mapalig-on ka aron makasangyaw sa mga klasmet?

• Sa unsang paagi makigsuod ka kang Jehova?

[Mga Pangutana sa Pagtuon]

[Kahon/Mga hulagway sa panid 20]

Bisan ang mga Bata pa Kaayo Nagdayeg Kang Jehova!

Bisan ang mga bata pa kaayo nakasangyaw diha sa tunghaan. Tagda kini nga mga kasinatian.

Ang kinto-gradong klase sa 10-anyos nga si Amber nagbasag libro bahin sa pag-atake sa mga Nazi sa mga Hudiyo panahon sa Gubat sa Kalibotan ll. Mihukom si Amber nga dad-on ang video nga Purple Triangles ngadto sa iyang maestra. Natingala ang maestra sa pagkahibalo nga ang mga Saksi ni Jehova gilutos usab ubos sa pagmando sa mga Nazi. Ang maestra nagpasalida sa video ngadto sa enterong klase.

Sa edad nga otso anyos, si Alexa misulat ngadto sa iyang klase nga nagpatin-aw kon nganong siya dili makaapil sa ilang pagsaulog sa Pasko. Ang iyang magtutudlo nakadayeg kaayo nga iyang gipabasag kusog ni Alexa ang sulat ngadto sa iyang klase ug sa duha pa ka laing klase! “Natudloan ako nga magmatinahoron sa uban kansang mga tinuohan lahi kay sa akoa,” matod niya sa hapit nang konklusyon, “ug ako nagpasalamat kaninyo tungod sa pagtahod sa akong desisyon nga dili mosaulog sa Pasko.”

Sa pagsugod gayod sa unang grado, gidala ni Eric sa tunghaan ang libro nga Akong Basahon sa mga Estorya sa Bibliya ug nananghid nga ipakita kana sa iyang mga klasmet. “Duna koy mas maayong ideya,” matod sa iyang maestra. “Dili ba mas maayo nga imong basahon kana ngadto sa klase?” Gibasa kana ni Eric. Human niadto, iyang gidapit ang tanan nga buot makabaton ug kopya sa pag-isa sa ilang kamot. Napulog-walo ka tawo—lakip ang maestra—ang nag-isa sa kamot! Gibati karon ni Eric nga siya aduna nay iyang kaugalingong teritoryo nga sangyawanan.

Ang nuybe-anyos nga si Whitney mapasalamaton tungod sa brosyur nga Mga Saksi ni Jehova ug Edukasyon. c “Ang akong inahan kasagarang mohatag sa maong brosyur sa akong mga magtutudlo kada tuig,” siya nag-ingon, “apan karong tuiga ako mismo ang naghatag niana. Sa tabang sa maong brosyur, ang akong maestra nagrekomendar kanako alang sa ganti sa pagkahimong ‘estudyante sa semana.’”

[Footnote]

[Kahon/Mga hulagway sa panid 21]

Mga Kahimtang nga Gigamit sa Pipila sa Pagpakigsulti Bahin sa Ilang Pagtuo

Sa dihang iasayn ang usa ka report o proyekto sa tunghaan, ang pipila nagpilig usa ka ulohan nga nagpaposible nga sila makasangyaw

Ubay-ubay nga batan-on naghatag sa ilang magtutudlo ug usa ka video o publikasyon mahitungod sa usa ka ulohang gihisgotan sa klase

Sa dihang nagbasa sa Bibliya o publikasyon nga binase sa Bibliya panahon sa reses, ang pipila ka batan-on giduol sa ubang batan-on nga may mga pangutana

[Hulagway sa panid 18]

Ang mga may-kasinatian makatabang sa pagbansay sa mga batan-on sa pag-alagad kang Jehova