Nahinumdom Ka Ba?

Nalingaw ka ba sa pagbasa sa di pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Sa unsang paagi makabenepisyo kita sa pagkasayod bahin sa pamilya ni Sapan?

Si Sapan maoy usa ka tigkopya ug sekretaryo ni Haring Josias sa Juda. Ingong usa ka tawo nga may impluwensiya diha sa gingharian, gipaluyohan ni Sapan ang kampanya sa hari sa pagpasig-uli sa matuod nga pagsimba. Duha sa mga anak nga lalaki ni Sapan miunong kang manalagnang Jeremias. Ug ang laing anak nga lalaki ug duha ka apong lalaki naggamit usab sa ilang impluwensiya alang sa matuod nga pagsimba. Sa susama, kita angayng maggamit sa atong mga kahinguhaan ug impluwensiya sa pagtuboy sa matuod nga pagsimba.—12/15, mga panid 19-22.

• Sa unsang paagi nasagubang ni Irene Hochstenbach ang usa ka dakong babag ug nakaarang sa pag-alagad kang Jehova?

Siya nabungol sa dihang siya nag-edad ug pito ka tuig. Bisan pag bungol, siya nakakat-on sa pagpakigkomunikar sa ubang mga tawo ug karon nagapanaw uban sa iyang bana (usa ka nagapanawng magtatan-aw) samtang siya nagaalagad sa mga kongregasyon sa Netherlands.—1/1, mga panid 23-6.

• Unsa ang duha ka bag-ong mga tabang sa pagtuon nga giluwatan diha sa “Masibotong mga Magmamantala sa Gingharian” nga Distritong mga Kombensiyon?

Ang mga Kristohanon sa tibuok kalibotan nalipay sa pagkadawat sa Simbaha ang Bugtong Matuod nga Diyos, nga gidisenyong tun-an uban sa mga bag-ohan human nila matun-i ang librong Kahibalo nga Motultol sa Kinabuhing Walay Kataposan; ang lain pang bag-ong libro mao ang Pakigsuod Kang Jehova, nga nagsentro sa pagtagad diha sa mga hiyas ug mga pakiglabot ni Jehova. Gipakita usab niini kon sa unsang paagi ato siyang masundog pinaagi sa pagpasundayag sa iyang mga hiyas.—1/15, mga panid 23-4.

• Unsa ang diwa sa Proverbio 12:5: “Ang mga hunahuna sa mga matarong maoy hustisya”?

Ang mga hunahuna sa maayong mga tawo maoy husto sa moral nga paagi ug gipunting sa kon unsay makiangayon ug makataronganon. Sanglit ang mga matarong ginatukmod sa gugma alang sa Diyos ug sa ilang mga isigkatawo, maayo ang ilang mga intensiyon.—1/15, panid 30.

• Unsay makatabang sa usa ka tawo sa pag-ugmad ug usa ka timbang nga panglantaw sa trabaho?

Mapuslanon nga mabansay sukad pa sa pagkabata aron magpabili sa trabaho. Ang Bibliya nag-awhag kanato nga magbaton ug maayong batasan sa pagtrabaho, nga dili magtinapolan. (Proverbio 20:4) Nagdasig usab kini sa mga Kristohanon nga dili malinga pag-ayo sa trabaho. Angay natong ilhon nga ang pag-alagad sa Diyos mao ang labing hinungdanong bahin sa atong kinabuhi. (1 Corinto 7:29-31) Dugang pa, ang matuod nga mga Kristohanon masaligon nga ang Diyos dili motalikod kanila.—2/1, mga panid 4-6.

• Asa unang gihisgotan diha sa Bibliya ang usa ka halaran?

Makita kini diha sa Genesis 8:20, nga nagtumong sa halaran nga gibuhat ni Noe sa dihang nanaog siya sa arka human sa Lunop. Apan, si Cain ug Abel mahimong naggamit usab ug mga halaran sa pagtanyag sa ilang mga halad. (Genesis 4:3, 4)—2/15, panid 28.

• Sa unsang paagi ang pipila ka Kristohanon maalamong naggamit sa ilang nabag-ong mga kahimtang?

Ang uban midawat—o nagsugod—sa kausaban sa ilang mga trabaho nga naghatag kanila ug dugang panahon alang sa ministeryo. Ang uban nagpauswag sa ilang panahon ug mga pribilehiyo diha sa pag-alagad sa Diyos sa dihang nakunhoran na ang ilang mga kaakohan sa pamilya, sama pananglitan sa dihang ang ilang mga anak mihamtong na ug nangaminyo.—3/1, mga panid 19-22.

• Sa unsang paagi ang mga panig-ingnan ni Jonas ug ni apostol Pedro makatabang kanato sa pagtan-aw sa uban ingon sa pagtan-aw ni Jehova kanila?

Si Jonas ug Pedro adunay dayag nga mga kasaypanan diha sa ilang panghunahuna ug kon sa unsang paagi sila misanong sa mga pagsulay sa pagtuo ug pagkamatinumanon. Bisan pa niana, tin-awng nakita ni Jehova ang ilang maayong mga hiyas ug padayong naggamit kanila diha sa pag-alagad kaniya. Sa dihang pasakitan o pakyason kita sa ubang mga tawo, kita makasentro sa atong pagtagad diha sa ilang maayong mga hiyas nga lagmit nakapadani kanato sa miagi ug sa maayong mga hiyas nga nakita sa Diyos diha kanila.—3/15, mga panid 16-19.

• Nganong ang mga hubad sa Bibliya magkalahi man bahin sa pagnumero sa basahon sa mga Salmo?

Adunay kalainan sa pagnumero tali sa mga libro diha sa orihinal nga Hebreohanong pinulongan ug sa hubad niini ngadto sa Grego diha sa Septuagint. Ang mas bag-ong mga hubad mahimong magkalahi, nga nagdepende kon kini ba gipasukad sa Hebreohanong teksto o kaha sa Septuagint.—4/1, panid 31.