Sa Dihang ang Pagsangyaw Halandomon Kaayo

“Naglagiting ang kainit sa adlaw. Ang dalan sa kabukiran daw walay kinutoban. Human masagubang ang ubay-ubayng mga babag, sa kataposan nakaabot ra kami sa among gipadulngan: ang kinalay-ang balangay. Ang kakapoy napulihan sa kalipay sa dihang nanuktok mi sa unang pultahan ug mainitong giabiabi. Pagkatapos sa adlaw, napahimutang namo ang tanang literatura nga among dala ug nakasugod ug ubay-ubayng panagtuon sa Bibliya. Gustong makakat-on ang mga tawo. Karon kinahanglan na kaming mobiya, apan misaad kaming mobalik.”

KOMON na ang maong mga eksperyensiya taliwala sa usa ka grupo sa payunir nga mga ministro sa Mexico. Determinado sila sa pagpakig-ambit nga masiboton sa katumanan sa sugo nga gihatag ni Jesu-Kristo ngadto sa iyang mga tinun-an: “Kamo mahimong akong mga saksi . . . hangtod sa kinalay-ang dapit sa yuta.” (Buhat 1:8) Sa Mexico, ang linaing mga kampanya sa pagsangyaw—nga gitawag ug mga ruta sa payunir—giorganisar aron maabot ang mga teritoryo nga wala maasayn sa usa ka kongregasyon ug, busa, dili kanunayng masangyawan sa maayong balita sa Gingharian sa Diyos. Kasagaran, ang maong mga teritoryo layo o lisod adtoon. Gitabangan usab ang hilit nga mga kongregasyon nga may dakong teritoryo nga kobrehan.

Aron matino kon unsang mga dapita sa nasod ang pagakobrehan pinaagi sa mga ruta sa payunir, ang sangang buhatan sa mga Saksi ni Jehova nagsusi sa mga panginahanglan sa teritoryo. a Sa dihang nasusi na kini, gipadala ang mga grupo sa mga espesyal payunir aron kobrehan ang teritoryo. Gitagan-an silag mga sakyanan nga angay sa batoon, dili sementado nga mga dalan. Ang mga sakyanan nagsilbi usab nga mga bodega sa literatura ug katulganan kon gikinahanglan.

Pagsanong nga Kinabubut-on

Sukad sa Oktubre 1996, ang mga imbitasyon gipaabot ngadto sa ubang mga magwawali sa maayong balita aron makig-ambit niini nga kalihokan, nga makig-uban sa mga espesyal payunir. Ang mga magmamantala sa Gingharian maingon man ang mga regular payunir nga andam moalagad diin mas dako ang panginahanglan, miduyog sa kampanya sa nagkalainlaing mga hugna. Ang uban giasayn ngadto sa mga kongregasyon nga maagian sa ruta aron sa pag-atiman sa teritoryo ug pag-ugmad sa interes nga nakaplagan. Daghang batan-ong mga magmamantala ug mga payunir ang midawat sa maong mga imbitasyon ug nabuhong sa makapadasig kaayong mga eksperyensiya.

Pananglitan, si Abimael, usa ka batan-ong Kristohanon nga may dakog-suweldong trabaho diha sa usa ka kompaniya sa mobile phone, mihukom nga makig-ambit sa kalihokan sa pagsangyaw didto nianang layo nga mga rehiyon. Sa dihang nahibaloan sa iyang mga amo nga moundang na siya sa pagtrabaho, gitanyagan nila siya ug promosyon ug umento sa suweldo. Gipit-os siya sa iyang mga kauban sa trabaho, nga miinsistir nga talagsaon ang maong kahigayonan ug nga buang siya kon dili niya kini dawaton. Apan, determinado si Abimael nga paluyohan ang linaing kampanya sa pagsangyaw sulod sa tulo ka bulan. Human mapahimusli ang maong pag-alagad, mihukom si Abimael sa pagpabilin sa walay tinong gidugayon didto sa usa ka hilit nga kongregasyon diin dako ang panginahanglan sa mga magmamantala sa Gingharian. Siya karon may trabaho nga dili kaayo dako ang suweldo ug nakakat-on sa pagpayano sa iyang kinabuhi.

Sa laing kahimtang, si Julissa kinahanglang mobiyahe ug 22 oras pinaagig bus aron makaabot sa  iyang asaynment. Sa kataposang hugna sa iyang biyahe, nabiyaan siya sa kataposang bus nianang adlawa. Hinunoa, dihay pickup nga trak nga nagdala sa mga trabahante. Nagmaisogon si Julissa ug mihangyo kanila nga pasakyon siya. Masabot nga medyo nahadlok siya, tungod kay siya lang ang babaye taliwala sa daghan kaayong lalaki. Sa dihang misugod siya sa pagsangyaw ngadto sa usa ka batan-ong lalaki, iyang naamgohan nga siya diay usa sa mga Saksi ni Jehova! “Gawas pa niana,” nahinumdom si Julissa, “ang drayber sa pickup usa diay ka ansiyano sa kongregasyon nga akong adtoan!”

Nakig-ambit ang mga Tigulang

Kini nga kalihokan, hinunoa, dili lang para sa mga batan-on. Si Adela, nga usa ka tigulang nga sister, buot gayong mogahin ug mas daghang panahon diha sa buluhatong pagsangyaw. Nakahigayon siya sa pagbuhat niana sa dihang nakadawat siyag imbitasyon nga makig-ambit sa maong linaing kalihokan sa pagsangyaw. Siya miasoy: “Nalipay ko pag-ayo sa akong asaynment nga mihangyo ako sa mga ansiyano sa kongregasyon nga tugotan akong magpabilin sa walay tinong gidugayon. Malipayon ako tungod kay bisan ako tigulang na, magamit gihapon ako ni Jehova.”

Sa samang paagi, kay natukmod sa pagpabili kang Jehova ug sa gugma sa iyang isigkatawo, ang 60-anyos nga si Martha nagtanyag sa iyang kaugalingon aron makapakig-ambit sa kampanya. Kay nakamatikod nga tungod sa gilay-on ug lisod nga agianan sa teritoryo dili maabot sa iyang grupo ang tanang tawo, mipalit siya ug sakyanan aron magamit sa mga payunir. Tungod sa amot sa maong igsoong babaye, nakobrehan ang mas dagkong teritoryo ug mas daghang tawo ang napaambitan sa kamatuoran sa Bibliya.

Makapadasig nga mga Sanong

Ang tumong niadtong nakig-ambit sa maong linaing mga kampanya sa pagsangyaw mao ang “paghimog mga tinun-an.” Niining bahina, maayo kaayo ang mga resulta. Ang mga tawo nga anaa sa hilit nga mga dapit nakadawat ug nagaluwas-kinabuhing mga kamatuoran gikan sa Bibliya. (Mateo 28:19, 20) Daghang pagtuon sa Bibliya ang nasugdan. Sila ginadumalahan ug pagtuon sa mga magmamantala sa maong dapit o sa mga magwawali nga nagpabilin diha sa teritoryo. Sa pipila ka kahimtang, naorganisar ang mga grupo sa mga magmamantala, ug diha sa uban, natukod ang gagmayng mga kongregasyon.

Si Magdaleno ug ang iyang mga kauban naggamit sa publikong transportasyon aron makaabot sa hilit nga teritoryo diin sila giasayn. Sa pagpaingon didto, gipahimuslan nila ang kahigayonan sa pagsangyaw sa drayber. “Giingnan mi niining tawhana nga sa miaging semana, dihay mga Saksi nga miadto sa iyang balay samtang wala siya. Sa  iyang pagpauli, gisuginlan siya sa iyang pamilya sa ilang nadungog. Giingnan namo siya nga wala mi magpuyo sa duol kondili naggikan kami sa nagkalainlaing mga estado sa nasod aron sa pagpaluyo niining linaing kampanya sa pagsangyaw ug nga kaming tanan maoy miabaga sa kaugalingon namong mga galastohan. Kay nakadayeg, ang drayber miingon nga magsugod siya sa pagtuon sa Bibliya uban sa iyang pamilya nianang semanaha mismo. Nakatabang pa gani siya sa buluhaton tungod kay wala mi niya papleteha.”

Nakadayeg usab pag-ayo si Magdaleno sa sanong sa mga nitibo sa kabukiran sa Chiapas. “Naeksperyensiyahan nako ug sa akong asawa ang pagpaambit sa mensahe sa Gingharian uban sa usa ka grupo sa 26 ka batan-on nga nagtambongan sa Presbyterian Church. Silang tanan naminaw pag-ayo sulod sa 30 minutos. Ilang gikuha ang ilang mga Bibliya, ug nakahimo kami ug bug-os nga pagpamatuod kanila bahin sa mga katuyoan ni Jehova. Ang kadaghanan sa mga tawo dunay kaugalingong mga Bibliya sa pinulongang Tzeltal.” Nasugdan ang daghang mauswagon nga mga pagtuon sa Bibliya.

Mikalma ang Pagsupak

May komunidad sa Chiapas nga wala masangyawi sa mensahe sa Bibliya sulod na sa kapin sa duha ka tuig tungod sa pagsupak sa pipila ka tawo. Si Teresa, nga usa ka bug-os-panahong ebanghelisador, nakamatikod nga nagpanuko ang ubang mga Saksi sa pagsangyaw sa maong balangay. “Sa katingala sa tanan, ang mga tawo andam nang maminaw. Sa dihang nahuman na ang among pagsangyaw, misugod pagbunok ang ulan. Nangitag kapasilongan, nahiabot kami sa balay sa maabiabihong tawo nga ginganlag Sebastián, kinsa nagpadayon kanamo aron makapasilong. Sa didto na sa sulod, nangutana ko dayon niya kon nasangyawan na ba siya sukad. Sa dihang miingon siya nga wala, gisangyawan dayon nako siya ug gisugdan ang pagtuon sa Bibliya ginamit ang librong Kahibalo nga Motultol sa Kinabuhing Walay Kataposan. b Sa dihang nahuman na kami, mihangyo si Sebastián nga nanglugmaw ang mga luha nga pabalikon kami aron magtuon uban kaniya.”

Ang laing grupo sa mga payunir nga misangyaw sa Chiapas nagtaho: “Sa tabang ni Jehova, maayo ang mga resulta. Sa unang semana, nakasugod kamig 27 ka pagtuon; sa ikaduhang semana, gidapit namo ang mga tawo sa pagtan-aw sa atong video nga The Bible—Its Power in Your Life. Kan-uman ang mitambong. Nalingaw ang tanan niini. Sa kataposan, misugyot kami nga mosugod ug usa ka grupo sa pagtuon sa Bibliya. Ikatingala, duha ka grupo sa pagtuon ang naporma niining balangaya.

“Human namo masangyawi ang giasayn nga mga teritoryo, giduaw namo pagbalik ang balangay aron palig-onon ang mga interesado ug susihon kon maayo bag kahimtang ang naorganisar nga mga grupo sa pagtuon sa Bibliya. Gidapit namo sila ngadto sa usa ka pakigpulong publiko  ug sa Pagtuon sa Bantayanang Torre. Apan, walay igong luna nga katigoman. Ang tawo nga mitanyag sa iyang balay alang sa grupo sa pagtuon mitudlo sa luyo sa iyang balay ug miingon: ‘Makatigom ta diha sa luyo sa balay.’ ”

Sa hinapos sa maong semana, ang nagaduaw nga mga payunir ug ang interesadong mga tawo madasigong mitabang sa pag-andam sa maong luna aron magamit alang sa mga tigom. Dihay 103 ka tawong mitambong sa unang tigom. Karon 40 ka pagtuon sa Bibliya ang gidumala sa maong balangay.

“Usa ka Talagsaong Eksperyensiya”

Gawas pa sa pagkabaton ug maayo kaayong mga resulta diha sa pagsangyawng buluhaton, kadtong nakigbahin niining maong kalihokan sa pagwali nakabaton ug dakong kaayohan. Si María, usa ka batan-ong payunir nga nakigbahin sa usa sa maong mga kampanya, nagpahayag sa iyang mga pagbati niining paagiha: “Kadto maoy usa ka talagsaong eksperyensiya tungod sa duha ka rason. Ang akong kalipay sa pagsangyaw miuswag, ug mas nasuod ako kang Jehova. Kas-a sa dihang nanungas mi sa bukid, gibati namo ang kakapoy. Human makahangyo kang Jehova alang sa tabang, among naeksperyensiyahan ang giingon sa Isaias 40:29-31: ‘Kadtong naglaom kang Jehova maulian sa kusog.’ Busa nakaabot kami didto ug nakadumalag mga pagtuon uban sa mga tawo nga maabiabihon kaayo kanamo.”

Lain pang batan-ong payunir, ang 17-anyos nga si Claudia, nag-ingon kanamo: “Nakabenepisyo kog dako. Nakat-onan ko ang pagkahimong mas hanas diha sa ministeryo, nga nakahatag kanakog dakong kalipay, ug kini nagtultol kanako sa paghimog espirituwal nga mga tumong. Mihamtong usab ako sa espirituwal. Sa among balay ang akong inahan maoy mohimo sa tanang butang alang nako. Karon, uban sa dugang kasinatian, nahimo kong mas responsable. Pananglitan, pilian kaayo ko sa akong kan-onon. Apan karon nga nakapasibo na ako sa nagkalainlaing mga kahimtang, dili na ko magreklamo bahin sa pagkaon. Kining matanga sa pag-alagad nakatabang kanako sa pag-ugmad sa maayo kaayong mga panaghigalaay. Nag-ambitay kami sa tanan namong nabatonan ug nagtinabangay sa usag usa.”

Usa ka Malipayong Ani

Unsay mga resulta niining linaing paningkamot? Sa unang bahin sa 2002, mga 28,300 ka payunir ang nakigbahin niining mga ruta sa payunir. Nakadumala silag kapin sa 140,000 ka pagtuon sa Bibliya, nga nakagahin ug kapin sa duha ka milyong oras diha sa buluhatong pagsangyaw. Aron matabangan ang mga tawo nga makakat-on sa kamatuoran sa Bibliya, sila nakapahimutang ug duolan sa 121,000 ka libro ug duolan sa 730,000 ka magasin. Dili talagsaon alang sa pipila ka payunir nga makadumalag 20 o kapin pa nga mga pagtuon sa Bibliya.

Ang nakadawat sa maong kalulot mapasalamaton kaayo tungod sa dugang paningkamot nga gihimo aron ikapaambit kanila ang mensahe sa Bibliya. Bisan pa sa ilang kawalad-on, daghan ang miinsistir nga dawaton sa mga magmamantala ang mga donasyon. Usa ka kabos nga 70-anyos nga babaye kanunayng nagtanyag ug bisan unsa ngadto sa mga payunir nga mobisita kaniya. Kon dili nila kini dawaton, siya mohilak. Usa ka pobre nga pamilya miingon sa bug-os-panahong mga magwawali nga nangitlog ang himungaan alang gayod kanila ug giawhag sila sa pagkuha sa mga itlog.

Labing hinungdanon, kadtong sinserong mga tawo nagpabili gayod sa espirituwal nga mga butang. Pananglitan, usa ka batan-ong babaye ang mag-inusarang molakaw ug tulo ka oras ug tunga aron makatambong sa Kristohanong mga tigom, nga wala mopalta bisag usa niana. Bisan pag magsakit ang iyang tuhod, usa ka tigulang nga babaye ang mibiyahe ug duha ka oras aron makadawat ug instruksiyon gikan sa Bibliya panahon sa duaw sa nagapanawng magtatan-aw. Ang uban nga dili edukado gustong makakat-on sa pagbasa ug pagsulat aron mas pa nilang mapahimuslan ang edukasyon sa Bibliya. Dagayang gipanalanginan ang ilang mga paningkamot.

Diha sa basahon sa Mga Buhat, gihubit ni Lucas ang usa ka panan-awon nga nakita ni apostol Pablo: “Dihay usa ka tawong Macedonianhon nga nagbarog ug nangaliyupo kaniya ug nag-ingon: ‘Dali ngari sa Macedonia ug tabangi kami.’ ” Si Pablo kinabubut-ong midawat sa maong pagdapit. Karong adlawa, diha sa lagyong mga dapit sa Mexico, daghan ang misanong uban sa mao gihapong espiritu, nga nagtanyag sa ilang kaugalingon sa pagmantala sa maayong balita “hangtod sa kinalay-ang dapit sa yuta.”—Buhat 1:8; 16:9, 10.

[Mga footnote]

[Hulagway sa panid 9]

Daghang Saksi sa Mexico ang nakigbahin sa linaing mga kampanya sa pagsangyaw