Unsa ka Hinungdanon ang Mahigugmaong-Kalulot?

“ANG tilinguhaong butang diha sa yutan-ong tawo mao ang iyang mahigugmaong-kalulot,” nag-ingon ang Bibliya. (Proverbio 19:22) Sa pagkatinuod, tilinguhaon gayod ang mga buhat sa kalulot nga gipalihok sa gugma. Apan, ang pulong “mahigugmaong-kalulot” diha sa Bibliya nagtumong sa kalulot nga gipasukad sa naglungtad nang relasyon, sama sa usa ka relasyon nga naugmad tungod sa gipakitang kalulot sa miagi nga gihimo sa laing tawo. Busa, nalangkit niini ang ideya sa pagkamaunongon.

Si Haring Jehoas sa Juda napakyas sa pag-ugmad niining tilinguhaong hiyas. Nakautang siyag dakong kabubut-on sa iyang iyaan ug sa iyang uyoan nga si Jehoiada. Sa dihang si Jehoas wala pay usa ka tuig ang edad, ang iyang daotan nga apohang babaye naghimo sa iyang kaugalingon nga rayna ug nagpapatay sa tanang igsoong lalaki ni Jehoas, nga maoy mga manununod sa trono. Apan, wala niya mapatay ang batang si Jehoas, kay siya gitagoan ug maayo sa iyang iyaan ug uyoan. Gitudloan usab nila si Jehoas sa Balaod sa Diyos. Sa nag-siyete anyos na si Jehoas, gigamit sa iyang uyoan ang awtoridad niini ingong hataas nga saserdote sa pagpapatay sa daotang rayna ug sa pag-entrono kang Jehoas.—2 Cronicas 22:10–23:15.

Maayo ang pagmando sa batan-ong si Jehoas hangtod sa kamatayon sa iyang uyoan, apan human niana siya misimba sa mga diyosdiyos. Gipadala sa Diyos si Zacarias, nga anak ni Jehoiada, aron pasidan-an si Jehoas sa iyang apostasya. Gipabato hinuon ni Jehoas si Zacarias. Pagkagrabeng buhat sa pagkadi-maunongon ngadto sa pamilya nga iyang nautangan ug dakong kabubut-on!—2 Cronicas 24:17-21.

Ang Bibliya nag-ingon: “Si Jehoas nga hari wala mahinumdom sa mahigugmaong-kalulot nga gipakita kaniya ni Jehoiada nga . . . amahan [ni Zacarias], mao nga siya nagpatay sa iyang anak nga lalaki.” Sa hapit na siyang mamatay, si Zacarias miingon: “Si Jehova magatan-aw unta niini ug magasingil niini.” Ingong katumanan sa mga pulong ni Zacarias, si Jehoas nasakit ug grabe ug gibuno sa iyang mga sulugoon.—2 Cronicas 24:17-25.

Imbes nga mahisama kang Haring Jehoas, ang tanang mosunod niining tambaga makabatog kahibulongang kaugmaon: “Hinaot ang mahigugmaong-kalulot ug ang kamatinud-anon dili mobiya kanimo. . . . Ug sa ingon makakaplag ka ug pabor . . . sa mga mata sa Diyos ug sa yutan-ong tawo.”—Proverbio 3:3, 4.