Mamatikdan ba ni Jehova Kon Unsay Imong Ginabuhat?

UNSAON nimo pagtubag kanang pangutanaha? Daghan ang moingon: ‘Nagtuo ko nga namatikdan sa Diyos ang mga kalamposan sa mga tawong sama ni Moises, Gideon, ug David, apan wala ko magtuo nga interesado siya sa bisan unsa nga akong mahimo. Dili gayod ako mahisama kang Moises, Gideon, o David.’

Tinuod nga ang pipila ka matinumanong mga lalaki sa kapanahonan sa Bibliya nakahimog talagsaong mga buhat sa pagtuo. Sila ‘nagpildi ug mga gingharian, nagpatak-om sa baba sa mga leyon, nagpahunong sa puwersa sa kalayo, ug nakaikyas sa sulab sa espada.’ (Hebreohanon 11:33, 34) Apan, ang uban nagpasundayag sa ilang pagtuo sa dili kaayo talagsaong mga paagi, ug ang Bibliya nagpasalig kanato nga namatikdan usab sa Diyos ang ilang mga buhat sa pagtuo. Sa pag-ilustrar, tagda ang Kasulatanhong mga panig-ingnan sa usa ka magbalantay sa karnero, sa usa ka manalagna, ug sa usa ka balo.

Usa ka Magbalantay sa Karnero Naghalad

Unsay imong mahinumdoman bahin kang Abel, ang ikaduhang anak ni Adan ug Eva? Mahinumdoman tingali nimo nga siya namatay ingong martir, usa ka butang nga pipila lang kanato ang lagmit makaeksperyensiya. Apan si Abel unang namatikdan sa Diyos tungod sa laing katarongan.

Usa ka adlaw niana, nagdala si Abel ug pipila sa kinamaayohang mga mananap sa iyang panon ug naghalad ngadto sa Diyos. Ang iyang gasa mahimong isipon nga kasarangan lamang karong adlawa, apan si Jehova nakamatikod niana ug nagpahayag sa iyang pag-uyon. Apan, dili kay kana ra. Duolag upat ka libo ka tuig sa ulahi, giinspirar ni Jehova si apostol Pablo sa pagsulat bahin niana diha sa basahon sa Mga Hebreohanon. Paglabay sa daghan kaayong katuigan, wala malimti sa Diyos ang maong simple nga halad!—Hebreohanon 6:10; 11:4.

Giunsa paghukom ni Abel kon unsang matanga sa halad ang itanyag? Walay giingon ang Bibliya, apan lagmit gihunahuna gayod niya kini pag-ayo. Siya maoy usa ka magbalantay sa karnero, busa angayng dahomon nga maghalad siya gikan sa iyang panon sa kahayopan. Apan, matikdi nga gihatag niya ang kinamaayohan—ang “matambok nga mga bahin.” (Genesis 4:4) Posible usab nga gipalandong niya ang giingon ni Jehova ngadto sa bitin didto sa tanaman sa Eden: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Genesis 3:15; Pinadayag 12:9) Bisan pag wala makaila kon kinsa ang “babaye” ug ang iyang “binhi,” lagmit naamgohan ni Abel nga ang ‘pagsamad sa tikod’ sa binhi sa babaye maglangkit sa pag-ula ug dugo. Nasabtan gayod niya nga walay mas bililhon pa kay sa buhi, nagginhawa nga linalang. Labing hinungdanon, ang halad nga iyang gitanyag haom gayod.

Sama kang Abel, ang mga Kristohanon karong adlawa nagtanyag ug mga halad ngadto sa Diyos. Ilang ginahalad, dili ang mga panganay sa panon sa mga hayop, kondili “ang halad sa pagdayeg, nga mao, ang bunga sa mga ngabil nga naghimog pagpahayag sa dayag sa ngalan [sa Diyos].” (Hebreohanon  13:15) Ang atong mga ngabil makapahayag sa dayag sa dihang ipaambit nato ang atong pagtuo ngadto sa ubang mga tawo.

Gusto ba nimong mapauswag ang kalidad sa imong halad? Nan hunahunaa pag-ayo ang mga panginahanglan sa mga tawo diha sa imong teritoryo. Unsay ilang gikabalak-an? Unsay ilang gikaikagan? Unsang bahina sa mensahe sa Bibliya ang makapadani kanila? Sa dihang ikaw nagasangyaw, analisaha ang mga pagduaw nga imong nahimo sa tuyo nga mahimo kang mas epektibo. Ug sa dihang mosulti ka bahin kang Jehova, himoa kana uban ang kombiksiyon, nga kinasingkasing. Himoa ang imong halad nga usa gayod ka “halad sa pagdayeg.”

Usa ka Manalagna Nagsangyaw Ngadto sa Dili-Madinawatong Katawhan

Tagda karon ang manalagna nga si Enoc. Mahimong nag-inusara lamang gayod siya ingong saksi ni Jehova nga Diyos. Ikaw ra ba, sama kang Enoc, ang bugtong membro sa imong pamilya nga matinumanong nag-alagad kang Jehova? Ikaw ra ba ang bugtong estudyante sa imong klase o ang bugtong trabahante sa imong gitrabahoan nga nagsunod sa mga prinsipyo sa Bibliya? Kon mao, makaatubang kag mga pagpit-os. Ang mga higala, paryente, klasmet, o kauban sa trabaho mahimong mag-aghat kanimo sa paglapas sa mga balod sa Diyos. “Walay mahibalo kon unsay imong gibuhat,” moingon tingali sila. “Dili mi magsaba.” Moinsistir tingali sila nga binuang ang pagkabalaka bahin sa moral nga mga sukdanan sa Bibliya tungod kay wala magtagad ang Diyos sa imong ginabuhat. Kay maglagot nga wala ka maghunahuna ug magalihok nga sama kanila, mahimong buhaton nila ang tanan nilang maarangan aron pahuyangon ka.

Tinuod, dili sayon atubangon ang maong mga pagpit-os, apan dili kini imposible. Hunahunaa si Enoc, ang ikapitong lalaki gikan kang Adan. (Judas 14) Pagkatawo ni Enoc, kadaghanan sa mga tawo nawad-an na sa tanang moral nga pagbati. Makauulaw ang ilang sinultihan; “makalilisang” ang ilang panggawi. (Judas 15) Milihok sila nga sama gayod sa ginahimo sa daghang tawo karong adlawa.

Sa unsang paagi nakasagubang si Enoc? Ang tubag nianang pangutanaha makapaikag kanato karong adlawa. Bisan pag si Enoc mao lang tingali ang bugtong tawo sa yuta nga nag-alagad kang Jehova, wala gayod siya mag-inusara. Si Enoc naglakaw uban sa Diyos.—Genesis 5:22.

Ang pagpahimuot sa Diyos mao ang sentro sa kinabuhi ni Enoc. Nahibalo siya nga ang paglakaw uban sa Diyos nagkahulogan ug labaw pa kay sa pagkinabuhi ug hinlo, moral nga kinabuhi. Si Jehova nagdahom kaniya nga mosangyaw. (Judas 14, 15) Ang mga tawo kinahanglang pasidan-an nga ang ilang dili-diyosnong mga buhat namatikdan. Si Enoc padayong naglakaw uban sa Diyos sulod sa kapin sa 300 ka tuig—nga milahutay gayod nga mas dugay pa kay ni bisan kinsa kanato. Hangtod nga siya namatay, siya padayong naglakaw uban sa Diyos.—Genesis 5:23, 24.

Sama kang Enoc, kita usab gisugo sa pagsangyaw. (Mateo 24:14) Gawas pa sa pagsangyaw diha sa balay ug balay, maningkamot kita sa pagsangyaw sa maayong balita ngadto sa atong mga paryente, kasosyo sa negosyo, ug mga klasmet. Apan, usahay magpanuko kita sa pagsulti. Mao ba kana ang imong kahimtang? Ayawg kaluya. Sundoga ang unang mga Kristohanon, ug pag-ampo sa Diyos alang sa kaisog. (Buhat 4:29) Ayawg kalimti nga kon magpadayon ka sa paglakaw uban sa Diyos, wala ka gayod mag-inusara.

Usa ka Balo Naghikay ug Pagkaon

Tiaw mo na, usa ka wala hinganling balo nakadawat ug duha ka panalangin tungod kay siya naghikay ug usa ka yanong pagkaon! Siya dili usa ka Israelinhon, kondili usa ka langyaw nga nagpuyo sa lungsod sa Zarepta sa ikanapulo nga siglo W.K.P. Sa hinapos nga bahin sa taas nga yugto sa hulaw ug gutom, ang abiyo sa pagkaon sa maong balo hapit nang mahurot. Ang nahibilin na lang kaniya mao ang usa ka hakop nga harina ug  igong lana aron makaluto ug kataposang pagkaon alang kaniya ug sa iyang anak nga lalaki.

Niining higayona, usa ka bisita miabot. Kadto mao ang manalagna sa Diyos nga si Elias, kinsa mihangyo nga bahinag gamay sa ilang diyutay nga pagkaon. Dili na paigo ang pagkaon alang kaniya ug sa iyang anak nga lalaki, ug dayag nga wala na siyay ikahatag sa bisita. Apan gipasaligan siya ni Elias, pinaagi sa pulong ni Jehova, nga kon bahinan niya siyag pagkaon, siya ug ang iyang anak dili magutman. Gikinahanglan ang pagtuo nga ang Diyos sa Israel makamatikod kaniya, nga usa ka langyawng balo. Bisan pa niana, mituo siya kang Elias, ug gigantihan siya ni Jehova. “Ang tadyaw sa harina wala mahutdi, ug ang gamayng banga sa lana wala makabsi, sumala sa pulong ni Jehova nga iyang gisulti pinaagi kang Elias.” Ang babaye ug ang iyang anak nga lalaki adunay regular nga suplay sa pagkaon hangtod natapos ang gutom.—1 Hari 17:8-16.

Hinunoa, laing panalangin ang naghulat sa balo. Pipila ka panahon ang milabay human sa maong milagro, ang iyang hinigugmang anak nasakit ug namatay. Gitukmod sa kaluoy, gihangyo ni Elias si Jehova nga banhawon ang bata. (1 Hari 17:17-24) Nagkinahanglan kanag usa ka milagro nga wala pa gayod mahitabo. Walay narekord nga may gibanhaw na kaniadto! Ipakita ba kaha pag-usab ni Jehova ang kaluoy ngadto sa langyawng balo? Gihimo niya kana. Gihatagan ni Jehova si Elias ug gahom aron banhawon ang bata. Sa ulahi, si Jesus miingon bahin sa maong bulahan nga babaye: “Daghan ang mga babayeng balo sa Israel . . . Bisan pa niana si Elias [gipadala] ngadto . . . sa usa ka babayeng balo sa Zarepta sa yuta sa Sidon.”—Lucas 4:25, 26.

Ang kahimtang sa ekonomiya karong adlawa dili gayod malig-on, bisan diha sa industriyalisadong mga nasod. Ang pipila ka dagkong mga kompaniya nanangtang ug mga empleyado nga maoy maunongong mga trabahante sulod sa daghang katuigan. Kay nag-atubang sa posibilidad nga mawad-ag trabaho, ang usa ka Kristohanon maaghat tingali sa paggugol ug dakong panahon sa pagtrabaho, nga naglaom nga dili siya tangtangon sa iyang kompaniya. Tungod sa paghimo niana gamay na lang tingali siyag panahon sa pagtambong sa Kristohanong mga tigom, pagpakigbahin diha sa ministeryo sa kanataran, o sa pag-atiman sa emosyonal ug espirituwal nga mga panginahanglan sa iyang pamilya. Apan, gibati niya nga kinahanglang mahuptan ang maong trabaho bisag unsa pay dangatan.

Ang usa ka Kristohanon nga anaa sa malisod nga kahimtang sa ekonomiya may katarongang mabalaka. Lisod ang pagpangitag trabaho niining mga adlawa. Kadaghanan kanato wala maningkamot nga madato, kondili sama sa balo sa Zarepta, gusto lang natong mabatonan ang mga kinahanglanon sa kinabuhi. Hinunoa, si apostol Pablo nagpahinumdom kanato nga ang Diyos nag-ingon: “Dili ko gayod ikaw pagabiyaan ni sa bisan unsang paagi pagatalikdan.” Masaligon kitang makaingon: “Si Jehova ang akong magtatabang; dili ako mahadlok. Unsay arang mabuhat sa tawo kanako?” (Hebreohanon 13:5, 6) Si Pablo nagsalig gayod nianang saara, ug si Jehova kanunayng nag-atiman kaniya. Ingon gihapon niana ang buhaton sa Diyos alang kanato kon dili nato siya talikdan.

Mahimong bation nato nga dili gayod nato matupngan ang talagsaong nahimo sa espirituwal nga mga tawo sama ni Moises, Gideon, ug David, apan atong masundog ang ilang pagtuo. Ug atong mahinumdoman ang simpleng mga buhat sa pagtuo nga gihimo ni Abel, Enoc, ug sa balo sa Zarepta. Interesado si Jehova sa tanang buhat sa pagtuo—bisag ginagmay lang. Sa dihang balibaran sa mahinadlokon sa Diyos nga estudyante ang droga gikan sa isigkaingon, sa dihang isalikway sa usa ka trabahanteng Kristohanon ang pagbirigbirig diha sa trabahoan, o sa dihang ang usa ka tigulang nga Saksi matinumanong motambong sa mga tigom sa kongregasyon bisan pa sa kakapoy ug dili maayong panglawas, si Jehova makakita niana. Ug siya malipay!—Proverbio 27:11.

 Namatikdan ba Nimo ang Ginahimo sa Uban?

Oo, namatikdan ni Jehova kon unsay atong ginabuhat. Busa, ingong mga tigsundog sa Diyos, kita angayng magmaabtik sa pag-ila sa mga paningkamot sa ubang tawo. (Efeso 5:1) Nganong dili susihon pag-ayo ang mga babag nga gisagubang sa imong mga isigka-Kristohanon aron lang makatambong sa mga tigom sa kongregasyon, makapakigbahin diha sa ministeryo sa kanataran, bisan sa paghimo sa ilang inadlawng mga kalihokan?

Nan, pahibaloa ang imong mga isigkamagsisimba ni Jehova nga imong gipabilhan ang ilang mga paningkamot. Malipay sila nga ikaw nakamatikod, ug ang imong kahingawa mahimong magpasalig kanila nga si Jehova nakamatikod usab.