Mga Pangutana Gikan sa mga Magbabasa

Kon ang usa ka Kristohanon makabati ug mga tingog, nagpasabot ba gayod kana nga siya giatake sa demonyo?

Wala. Bisan tuod ang mga demonyo gikataho nga nagpadayag sa ilang kaugalingon nianang paagiha, pinaagi sa pagsusi nasayran sa daghang indibiduwal nga makabati ug mga tingog o makasinati ug uban pang dili-ikapatin-aw, makahasol nga mga pagbati, nga sila dunay sakit.

Bisan sa unang siglo, giila gayod nga ang mga pag-atake sa mga demonyo ug ang mga kahimtang sa panglawas usahay magpatunghag susamang mga epekto. Sa Mateo 17:14-18, atong mabasa ang usa ka batang lalaki nga giayo ni Jesus. Bisan pag makita diha sa bata ang grabeng mga simtoma sa patol, ang iyang pag-antos sa pagkatinuod gipahinabo sa usa ka demonyo. Hinunoa, sa mas unang hitabo sa dihang ang panon sa nag-antos nga mga tawo gidala ngadto kang Jesus aron matambalan, kini naglakip sa pipila ka mga tawong “gigamhan-sa-demonyo ug patolon.” (Mateo 4:24) Dayag nga giila nga ang pipila ka patolon wala gamhi sa demonyo. Ang ilang problema maoy sa panglawas.

Gikataho nga ang pipila nga nag-antos sa schizophrenia, usa ka sakit nga kasagarang matambalan, makabatig mga tingog o makasinatig uban pang mga simtoma nga mopatim-awng misteryoso. a Ang ubang mga kahimtang sa panglawas makapahinabo usab ug kalibog sa hunahuna nga masaypan nilang gipahinabo sa mga demonyo. Busa, bisan pag ang usa ka tawo nga motaho nga nakabatig mga tingog o adunay uban pang makapahasol nga mga pagbati magtuo tingali nga giatake siya sa demonyo, siya angayng dasigon gayod sa paghunahuna kon aduna bay kalabotan sa problema sa panglawas ang iyang nasinatian.

[Footnote]