“Duol sa Diyos, ug Siya Moduol Kaninyo”

Kaniadto ug Karon—Madulom nga Kagahapon, Masanag nga Kaugmaon

“ANG pulong sa Diyos buhi ug gamhanan ug mahait pa kay sa espada nga duhay-sulab . . . ug makatugkad sa mga hunahuna ug mga tuyo sa kasingkasing.” (Hebreohanon 4:12) Mao kini ang giingon ni apostol Pablo bahin sa mahait nga gahom sa mensahe sa Diyos. Ang katakos niini sa pagdulot sa kasingkasing ilabinang nakita niadtong unang siglo K.P. Bisan pa sa dili-maayong impluwensiya niadtong panahona, nahimo sa mga Kristohanon ang pagsul-ob sa bag-ong personalidad.—Roma 1:28, 29; Colosas 3:8-10.

Ang makapabag-o nga gahom sa pulong sa Diyos, nga girekord diha sa Bibliya, makita usab karon. Pananglitan, tagda ang nahitabo sa usa ka taas, kusgan nga lalaki nga ginganlag Richard. Kay init ug ulo, si Richard makigsumbagay bisag mapikal lang ug diyutay. Ang iyang kinabuhi gidaot sa kapintasan. Miapil pa gani si Richard sa usa ka klab sa boksing. Siya nagbansay pag-ayo ug nahimong kampeyon sa heavyweight nga boksing sa Westphalia, Alemanya. Palainom usab si Richard ug kanunayng mahisugamak sa mga away. Sa usa ka panag-away, dihay namatay, ug hapit mapriso si Richard.

Komosta ang kaminyoon ni Richard? “Sa wala pa kami ni Heike magtuon sa Bibliya,” nahinumdom si Richard, “nag-iyaiya mig kinabuhi. Si Heike kanunayng makig-uban sa iyang mga higalang babaye, samtang ako nalingaw sa akong mga pasatiempo—kasagaran boksing, pag-surf, ug pagpanalom.”

Sa dihang si Richard ug Heike nagsugod sa pagtuon sa Bibliya uban sa mga Saksi ni Jehova, nalisdan si Richard sa paghunahuna nga siya kinahanglang mohimo ug daw imposibleng mga kausaban aron sa pagpahiuyon sa iyang kinabuhi sa taas nga mga sukdanan nga gilatid diha sa Pulong sa Diyos. Apan, samtang nasinati niya ug dugang si Jehova nga Diyos, naugmad ni Richard ang dakong tinguha sa pagpahimuot kaniya. Si Richard nakaamgo nga ang Diyos supak sa mga mahigugmaon sa kapintasan o niadtong mogamit niini agig kalingawan. “Si bisan kinsa nga nahigugma sa kapintasan ginadumtan gayod sa kalag [ni Jehova],” sumala sa nakat-onan ni Richard.—Salmo 11:5.

Dugang pa, ang paglaom nga mabuhi sa walay kataposan sa paraiso sa yuta nakapaikag kang Richard ug Heike. Buot nila nga magpuyo didto nga magkauban! (Isaias 65:21-23) Ang pagdapit nga “duol sa Diyos, ug siya moduol kaninyo” nakatandog gayod kang Richard. (Santiago 4:8) Nasabtan niya ang kabililhon sa pagtuman niining inspiradong tambag: “Ayaw kasinahi ang mapintas nga tawo, ni pilia ang bisan unsa sa iyang mga dalan. Kay ang hiwi nga tawo maoy dulumtanan kang Jehova, apan ang Iyang pagpakigsuod anaa uban sa mga matul-id.”—Proverbio 3:31, 32.

Bisan pa sa iyang dakong tinguha nga magbag-o sa iyang kinabuhi, si Richard nakaamgo nga dili niya kini mahimo sa iyang kaugalingong kusog. Iyang naamgohan nga kinahanglang mangayo siyag tabang sa Diyos pinaagi sa pag-ampo. Sa ingon siya milihok uyon sa mga pulong ni Jesus ngadto sa Iyang mga apostoles: “Mag-ampo nga mapinadayonon, aron dili kamo mahiagom sa tentasyon. Hinuon, maikagon ang espiritu, apan maluya ang unod.”—Mateo 26:41.

Human makakat-on kon unsay panglantaw sa Diyos bahin sa kapintasan ug pagsinta sa kasuko, natino ni Richard nga dili-dalawatong esport ang boksing. Sa tabang ni Jehova ug sa pagdasig niadtong nagtudlo kaniya sa Bibliya, gitalikdan ni Richard ang kapintasan. Iyang gibiyaan ang boksing ug pagpakig-away  ug mihukom sa pagpauswag sa iyang pamilyahanong kinabuhi. “Ang pagkakat-on sa kamatuoran gikan sa Bibliya nakatabang nako sa paghunahuna sa dili pa molihok,” matod pa ni Richard, kinsa karon usa na ka malumog-buot nga magtatan-aw diha sa usa sa mga kongregasyon sa mga Saksi ni Jehova. Siya midugang: “Ang mga prinsipyo sa gugma ug pagtahod mao na karon ang naggiya kanako sa akong relasyon sa akong asawa ug mga anak. Tungod niini, ang among pamilya nasuod.”

Ang mga tawong nakadawat ug sayop nga impormasyon bahin sa mga Saksi ni Jehova usahay nagsumbong kanila nga nangdaot kono ug mga pamilya. Apan, ang mga panig-ingnan sa mga tawo nga sama ni Richard nagpamatuod nga sayop ang ilang giingon. Sa pagkatinuod, ang kamatuoran sa Bibliya makapalig-on sa pamilya ug makahatag ug usa ka masanag nga kaugmaon alang niadtong may madulom nga kagahapon.—Jeremias 29:11.

[Blurb sa panid 9]

“Ang paglaom sa paraisong yuta nakapalihok kanako nga magbag-o”

[Kahon sa panid 9]

Epektibong mga Prinsipyo sa Bibliya

Dako gayod ug impluwensiya ang Bibliya diha sa kinabuhi sa mga tawo. Ania ang pipila ka Kasulatanhong mga prinsipyo nga nakapausab sa mapintas nga mga tawo:

“Siya nga mahinay sa kasuko mas maayo pa kay sa tawong gamhanan, ug siya nga nagapugong sa iyang espiritu kay niadtong nagbihag sa usa ka siyudad.” (Proverbio 16:32) Ang dili-mapugngang kasuko maoy ilhanan sa kahuyang, dili sa kalig-on.

“Ang hait nga salabotan sa usa ka tawo magapahinay gayod sa iyang kasuko.” (Proverbio 19:11) Ang pagbaton ug hait nga salabotan bahin sa usa ka kahimtang makatabang aron makita ang taphawng mga rason kon nganong gustong makigharong ang usa ka tawo ug masanta ang pagsilaob sa kasuko.

“Ayaw pagpakig-uban kang bisan kinsa nga masuk-anon aron dili ka masinati sa iyang mga dalan.” (Proverbio 22:24, 25) Ang mga Kristohanon maalamong naglikay sa pagpakig-uban niadtong daling masuko.