Mga Pangutana Gikan sa mga Magbabasa

Nganong Ang Bantayanang Torre sa Abril 1, 2002, nag-ingon diha sa panid 11, parapo 7, nga ang bawtismo sa tubig sa bag-ong Hudiyong mga magtutuo sa Pentekostes 33 K.P. maoy simbolo sa “personal nilang pagpahinungod ngadto sa Diyos pinaagi ni Kristo,” samtang ang gituohan kanhi mao nga ang bawtismo sa mga Hudiyo sukad sa 33 K.P. hangtod sa 36 K.P. wala magkinahanglan sa maong personal nga pagpahinungod?

Sa 1513 W.K.P., gihatag ni Jehova nga Diyos ngadto sa mga Israelinhon ang kahigayonan nga mahimong usa ka balaang nasod ngadto kaniya sa kondisyon nga ‘hugot nilang sugton ang iyang tingog ug magatuman sa iyang pakigsaad.’ Sila mitubag: “Andam kami sa pagbuhat sa tanan nga gisulti ni Jehova.”—Exodo 19:3-8; 24:1-8.

Pinaagi sa pag-uyon nga tumanon ang pakigsaad sa Moisesnong Balaod, ang mga Israelinhon nagpahinungod sa ilang kaugalingon ngadto sa Diyos. Ang nagsunod nga mga kaliwatan sa mga Hudiyo natawo diha niining napahinungod nga nasod. Apan, ang bawtismo sa mga Hudiyo nga nahimong mga sumusunod ni Jesu-Kristo sukad sa Pentekostes 33 K.P. padayon, naglangkit ug labaw pa kay sa pagpresentar sa ilang kaugalingon sa Diyos ingong mga membro sa usa ka napahinungod nga nasod. Kini nagsimbolo sa ilang pagpahinungod ngadto kang Jehova nga Diyos diha sa usa ka bag-ong relasyon uban kaniya pinaagi ni Jesu-Kristo. Sa unsang paagi?

Human sa pagbubo sa balaang espiritu ngadto sa mga 120 ka tinun-an nga nagtigom didto sa itaas nga lawak sa Jerusalem sa Pentekostes 33 K.P., si apostol Pedro mitindog ug misugod pagwali ngadto sa daghang Hudiyo ug mga proselita nga nangabot aron sa pagsusi kon unsay nahitabo. Human makahatag ug bug-os nga pamatuod, giingnan niya ang mga Hudiyo nga gitulisok sa ilang tanlag: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala.” Agig sanong sa dugang pag-awhag ni Pedro, “kadtong kinasingkasing nga misagop sa iyang pulong nabawtismohan, ug nianang adlawa mga tulo ka libong kalag ang nadugang.”—Buhat 2:1-41.

Dili ba ang maong mga Hudiyo nga nabawtismohan human sa pag-awhag ni Pedro mga membro na man sa usa ka napahinungod nga nasod? Wala ba nila mapahimusli ang usa ka napahinungod nga relasyon uban sa Diyos? Wala. Si apostol Pablo nagsulat nga ‘gikuha sa Diyos ang Balaod pinaagi sa paglansang niini sa estaka sa pagsakit.’ (Colosas 2:14) Pinaagi sa kamatayon ni Kristo sa 33 K.P., gikuha ni Jehova nga Diyos ang pakigsaad sa Balaod—ang mismong basehanan sa pagdala sa mga Israelinhon ngadto sa usa ka napahinungod nga relasyon uban Kaniya. Ang nasod nga nagsalikway sa Anak sa Diyos gisalikway  na karon sa Diyos mismo. “Kanang Israel nga unodnon” dili na makapangangkon nga usa ka nasod nga napahinungod ngadto sa Diyos.—1 Corinto 10:18; Mateo 21:43.

Ang pakigsaad sa Balaod gipapas niadtong 33 K.P., apan ang yugto sa linaing pabor ug pagtagad nga gihatag sa Diyos ngadto sa mga Hudiyo wala matapos niadtong panahona. a Ang maong yugto nagpadayon hangtod sa 36 K.P., sa dihang gisangyawan ni Pedro ang mahinadlokon sa Diyos nga Italyanong si Cornelio ug ang iyang panimalay maingon man ang ubang mga Hentil. (Buhat 10:1-48) Unsay basehanan niining paglugway sa pabor?

“Kinahanglang . . . ipatuman [sa Mesiyas] ang pakigsaad sulod sa usa ka semana alang sa daghan,” nag-ingon ang Daniel 9:27. Ang pakigsaad nga gipatuman sulod sa pito ka tuig, o “usa ka semana,” gikan sa pagbawtismo kang Jesus ug sa sinugdanan sa publikong ministeryo sa Mesiyas sa 29 K.P. mao ang Abrahamikong pakigsaad. Aron mahiapil sa maong relasyon sa pakigsaad, ang usa ka tawo kinahanglang usa gayod ka Hebreohanon nga kaliwat ni Abraham. Ang maong unilateral nga pakigsaad, diin ang Diyos lang ang nanaad, wala maghatag ug basehanan nga ang usa ka tawo makabaton ug napahinungod nga relasyon uban kang Jehova. Busa, ang mga magtutuong Hudiyo nga nagpabawtismo human sa pakigpulong ni Pedro sa Pentekostes 33 K.P., bisan pag gihatagan sila ug linaing pagtagad ingong kinaiyanhong mga Hudiyo, dili makaangkon nga sila adunay napahinungod nga relasyon uban sa Diyos sa dihang gikuha na ang pakigsaad sa Balaod. Sila kinahanglang personal nga magpahinungod sa ilang kaugalingon ngadto sa Diyos.

Ang personal nga pagpahinungod sa bahin sa mga Hudiyo ug mga proselita nga nagpresentar sa ilang kaugalingon aron mabawtismohan sa adlaw sa Pentekostes 33 K.P. gikinahanglan tungod sa lain pang katarongan. Giawhag ni apostol Pedro ang iyang mga mamiminaw sa paghinulsol ug pagpabawtismo diha sa ngalan ni Jesus. Aron mahimo kana, kinahanglan nga ilang isalikway ang paagi sa kalibotan ug ilhon si Jesus ingong Ginoo ug Mesiyas, ingong Hataas nga Saserdote, ug ingong usa nga naglingkod sa tuong kamot sa Diyos didto sa langit. Kinahanglan silang motawag sa ngalan ni Jehova nga Diyos alang sa kaluwasan pinaagi ni Kristo Jesus, nga naglangkit sa pagpasundayag ug pagtuo kang Kristo ug pag-ila kaniya ingong ilang Pangulo. Ang bug-os nga basehanan aron mabatonan ang relasyon uban sa Diyos ug aron mapasaylo ang mga sala nausab na karon. Ingong mga indibiduwal, kinahanglang dawaton sa matinuohong mga Hudiyo kining bag-ong kahikayan. Sa unsang paagi? Pinaagi sa pagpahinungod ngadto sa Diyos ug sa dayag nga pagpasundayag nga sila nakapahinungod na ngadto sa Diyos pinaagi sa pagpabawtismo sa tubig sa ngalan ni Jesu-Kristo. Ang bawtismo sa tubig maoy simbolo sa ilang pagpahinungod ngadto sa Diyos, nga nagdala kanila ngadto sa usa ka bag-ong relasyon uban kaniya pinaagi kang Jesu-Kristo.—Buhat 2:21, 33-36; 3:19-23.

[Footnote]