Pabiling Malig-on, ug Dag-a ang Lumba sa Kinabuhi

KON kinahanglan nimong molawig latas sa unoson nga dagat, unsang matanga sa barko ang imong pilion? Pilion ba nimo ang gamayng sakayan o ang usa ka lig-on, maayong pagkahimo nga barko? Walay duhaduha nga pilion nimo ang barko, tungod kay mas makasungsong kini sa dagkong mga balod.

Samtang kita nagatadlas niining unoson ug peligroso nga sistema sa mga butang, sagubangon nato ang makapabalaka nga mga suliran. Pananglitan, ang mga batan-on usahay mobatig kalibog ug kawalay-kasegurohan taliwala niining makapalibog nga mga ideya ug mga uso sa kalibotan. Ang mga indibiduwal nga bag-o lang misubay sa Kristohanong dalan mahimong mobati gihapon ug pagduhaduha. Bisan ang ubang mga malig-on nga matinumanong nag-alagad sa Diyos sa daghang katuigan mahimong nagasagubang ug pagsulay tungod kay ang ilang mga panahom wala pa gayod matuman.

Ang maong mga pagbati dili bag-o. Ang matinumanong mga alagad ni Jehova, sama kang Moises, Job, ug David, nabalaka usahay. (Numeros 11:14, 15; Job 3:1-4; Salmo 55:4) Bisan pa niana, ang ilang dalan sa kinabuhi gitiman-an sa malig-ong debosyon ngadto kang Jehova. Ang ilang maayong panig-ingnan nagadasig kanato nga magmalig-on usab, apan gusto ni Satanas nga Yawa nga malinga kita gikan sa lumba alang sa kinabuhing walay kataposan. (Lucas 22:31) Busa, sa unsang paagi kita makapabiling “malig-on sa pagtuo”? (1 Pedro 5:9) Ug sa unsang paagi mapalig-on nato ang atong mga isigkamagtutuo?

Gusto ni Jehova nga Kita Magmalig-on

Kon magmaunongon kita kang Jehova, siya anaa kanunay sa pagtabang kanato sa paghupot sa atong kalig-on. Ang salmistang si David nagsagubang ug daghang malisod nga mga kahimtang, apan milaom siya sa Diyos ug busa miawit: “Gipagawas usab ako [ni Jehova] gikan sa nagadaguok nga gahong, gikan sa lapok sa mga linugdang. Unya gipahimutang niya ang akong mga tiil sa ibabaw sa usa ka dakong bato; gilig-on niya ang akong mga lakang.”—Salmo 40:2.

Si Jehova nagapalig-on kanato sa pagpakigbugno sa “maayong pakigbugno sa pagtuo” aron kita ‘makapangupot pag-ayo sa kinabuhing walay kataposan.’ (1 Timoteo 6:12) Gitagana usab niya ang paagi aron kita makapabiling malig-on ug magmadaogon diha sa atong espirituwal nga pagpakiggubat. Giawhag ni apostol Pablo ang mga isigka-Kristohanon nga “magpadayon sa pagbaton ug gahom diha sa Ginoo ug diha sa pagkagamhanan sa iyang kusog,” ug ‘isul-ob ang kompletong armadura gikan sa Diyos aron sila makabarog nga malig-on batok sa mga malipatlipatong kaugdahan sa Yawa.’ (Efeso 6:10-17) Apan unsay makapabalaka kanato? Ug sa unsang paagi atong mapanalipdan ang atong kaugalingon batok sa maong makapahuyang nga mga kahimtang?

Pagbantay sa Makapahuyang nga mga Kahimtang

Maalamong hinumdoman kining hinungdanong kamatuoran: Ang mga desisyon nga atong himoon sa ngadtongadto makaapektar sa atong Kristohanong kalig-on sa ikaayo o sa ikadaot. Ang mga  batan-on nag-atubang ug mga desisyon maylabot sa mga butang sama sa karera, dugang edukasyon, ug kaminyoon. Ang mga hamtong mahimong modesisyon kon mobalhin ba ngadto sa laing dapit o mokuha ug dugang trabaho. Kita magahimog mga desisyon matag adlaw maylabot sa paggamit sa panahon ug daghang uban pang mga butang. Unsay makatabang kanato sa paghimog maalamong mga desisyon nga makapalig-on kanato ingong mga alagad sa Diyos? Usa ka dugay nang Kristohanon miingon: “Mangayo kog tabang kang Jehova sa dihang mohimog mga desisyon. Nagtuo ko nga hinungdanon ang pagdawat ug pagpadapat sa tambag nga gihatag diha sa Bibliya, sa Kristohanong mga tigom, sa mga ansiyano, ug sa binase-sa-Bibliya nga mga publikasyon.”

Sa dihang mohimog mga desisyon, angay natong pangutan-on ang atong kaugalingon: ‘Lima o napulo ka tuig gikan karon, malipay kaha ako sa mga desisyon nga akong pagahimoon karong adlawa, o pagabasolan ko kini? Naningkamot ba ako sa pagseguro nga ang akong mga desisyon dili makapahuyang kanako sa espirituwal kondili makaamot sa akong espirituwal nga pag-uswag?’—Filipos 3:16.

Ang pagpadaog sa mga tentasyon o pagtugot sa ilang kaugalingon nga halos makalapas na sa mga balaod sa Diyos nakapahuyang sa pipila ka bawtismadong mga indibiduwal. Ang pipila nga napalagpot sa kongregasyon tungod sa dili-mahinulsolong pagpadayon sa makasasalang dalan nanlimbasog pag-ayo nga mapasig-uli, ug unya gipalagpot pag-usab—usahay wala madugay human mapasig-uli—tungod sa mao ra gihapong matang sa kalapasan. Tungod ba kaha kana kay sila wala moampo sa tabang sa Diyos sa ‘pagkasilag sa daotan ug sa paghawid sa maayo’? (Roma 12:9; Salmo 97:10) Kitang tanan kinahanglang ‘magatul-id sa mga alagianan sa atong mga tiil.’ (Hebreohanon 12:13) Busa, tagdon nato ang pipila ka punto nga makatabang kanato sa paghupot sa atong espirituwal nga kalig-on.

Magpabiling Lig-on Pinaagi sa Kristohanong Kalihokan

Ang usa ka paagi nga mahuptan ang makanunayong gikusgon diha sa atong lumba sa kinabuhi mao ang pagkapuliki diha sa buluhatong pagsangyaw sa Gingharian. Oo, ang atong Kristohanong ministeryo maoy usa ka bililhong tabang sa pagsentro sa atong mga kasingkasing ug hunahuna diha sa pagtuman sa kabubut-on sa Diyos ug lig-ong napunting sa ganti nga kinabuhing walay kataposan. Niining bahina, giawhag ni Pablo ang mga taga-Corinto: “Akong hinigugmang mga igsoon, magmalig-on, dili matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.” (1 Corinto 15:58) Ang pulong ‘malig-on’ nagkahulogan nga ‘lig-ong nahiluna.’ Ang mga pulong “dili matarog” mahimong magpasabot nga ‘dili tugotan ang kaugalingon nga mairog sa gibarogan niini.’ Busa, ang pagkapuliki diha sa atong ministeryo makapalig-on sa atong Kristohanong dalan. Ang pagtabang sa ubang mga tawo nga mahibalo bahin kang Jehova makapatugob sa atong kinabuhi ug makapalipay kanato.—Buhat 20:35.

Si Pauline, usa ka Kristohanon nga nakagugol na ug kapin sa 30 ka tuig ingong misyonaryo ug sa uban pang bug-os-panahong kalihokan, miingon: “Ang ministeryo maoy usa ka panalipod tungod kay pinaagi sa pagsangyaw ngadto sa uban nahimong hugot ang akong pagtuo nga nahuptan ko ang kamatuoran.” Ang mao gihapong pagtuo mabatonan usab gikan sa regular nga pagpakig-ambit diha sa ubang Kristohanong mga kalihokan, sama sa pagtambong sa mga tigom alang sa pagsimba ug paghimog makugihong personal nga pagtuon sa Bibliya.

Napalig-on Tungod sa Mahigugmaong Panag-igsoonay

Ang pagkahimong bahin sa tibuok-kalibotang organisasyon sa matuod nga mga magsisimba adunay gamhanan, makapalig-on nga epekto kanato. Pagkadakong panalangin nga mahimong bahin sa maong mahigugmaon, tibuok-kalibotang kapunongan sa mga igsoon! (1 Pedro 2:17) Ug kita makapalig-on sa atong mga isigkamagtutuo.

Tagda ang pagkamatinabangon sa matul-id nga tawong si Job. Bisan ang mini nga maghuhupay nga si Elipaz napugos sa pag-angkon: “Bisan kinsa nga mapandol pagabangonon sa imong mga pulong; ug ang mga tuhod nga miangka imong palig-onon.” (Job 4:4) Komosta man kita niining bahina? Ang tagsatagsa kanato may responsibilidad sa pagtabang sa atong espirituwal nga mga igsoong lalaki ug babaye nga magmalahutayon diha sa pag-alagad sa Diyos. Diha sa atong pagpakiglabot kanila, kita makalihok sumala sa mga pulong: “Pabaskoga ninyo ang luyang mga kamot, ug palig-ona ang mga tuhod nga nagkurogkurog.” (Isaias 35:3) Busa nganong dili nimo himoong tumong ang pagpalig-on  ug pagdasig sa usa o duha ka isigka-Kristohanon sa matag higayon nga mahimamat nimo sila? (Hebreohanon 10:24, 25) Ang makapadasig nga mga pulong sa pagdayeg ug pagpasalamat tungod sa ilang mapinadayonong mga paningkamot sa pagpahimuot kang Jehova makatabang gayod kanila sa pagpabiling lig-on nga malaomong modaog sa lumba sa kinabuhi.

Ang Kristohanong mga ansiyano dako gayod ug mahimo sa pagdasig sa mga bag-ohan. Posible kini pinaagi sa pagtanyag ug mapuslanong mga sugyot ug maayong Kasulatanhong tambag ug pinaagi sa pagpakig-uban kanila diha sa ministeryo. Si apostol Pablo kanunayng nagpahimulos sa mga kahigayonan sa pagpalig-on sa uban. Nangandoy siya nga makita ang mga Kristohanon sa Roma aron makatabang siya sa pagpalig-on kanila sa espirituwal nga paagi. (Roma 1:11) Giisip niya ang iyang hinigugmang mga igsoong lalaki ug babaye sa Filipos nga iyang “kalipay ug purongpurong” ug nag-awhag kanila sa ‘pagbarog nga malig-on niining paagiha diha sa Ginoo.’ (Filipos 4:1) Sa pagkadungog bahin sa mga kalisdanan sa iyang mga igsoon sa Tesalonica, gipadala ni Pablo si Timoteo aron sa ‘paglig-on kanila ug sa paghupay kanila, aron walay usa nga matarog sa mga kasakitan.’—1 Tesalonica 3:1-3.

Si apostol Pablo ug Pedro nag-ila ug nagpabili sa matinumanong mga paningkamot sa ilang mga isigkamagsisimba. (Colosas 2:5; 1 Tesalonica 3:7, 8; 2 Pedro 1:12) Isentro usab nato ang atong pagtagad, dili sa mga kahuyangan sa atong mga igsoon, kondili sa ilang maayong mga hiyas ug sa ilang malamposong pagpakigbisog nga magpabiling malig-on ug magpasidungog kang Jehova.

Kon kita negatibo o hinawayon, mahimong sa wala tuyoa gilisodlisod nato pag-ayo ang uban nga magmalig-on diha sa pagtuo. Haom nga hinumdoman gayod nato nga ang atong mga igsoon maoy “pinanitan ug nagkatibuagsa” niining sistemaha sa mga butang! (Mateo 9:36) Diha sa Kristohanong kongregasyon, gidahom gayod nila nga mahupay ug malagsik. Busa, hinaot nga kitang tanan mohimo sa bug-os natong maarangan sa pagdasig sa atong mga isigkamagtutuo ug sa pagtabang kanila nga magpabiling lig-on.

Usahay trataron tingali kita sa uban sa paagi nga makapahuyang kanato. Tugotan ba nato ang masakit nga sinultihan o ang dili-malulotong lihok nga magpaluya kanato diha sa atong pag-alagad kang Jehova? Hinaot nga dili nato tugotan si bisan kinsa nga molampos sa pagpahuyang kanato!—2 Pedro 3:17.

Ang mga Saad sa Diyos—Usa ka Makapalig-ong Impluwensiya

Ang saad ni Jehova nga usa ka kahibulongang kaugmaon ilalom sa pagmando sa Gingharian maghatag kanatog paglaom nga motabang kanato sa paghupot sa atong kalig-on. (Hebreohanon 6:19) Ug ang pagtuo nga ang Diyos kanunayng magtuman sa iyang mga saad magpalihok kanato nga ‘magtukaw ug mobarog nga malig-on sa pagtuo.’ (1 Corinto 16:13; Hebreohanon 3:6) Ang daw pagkalangan sa katumanan sa pipila ka saad sa Diyos mahimong magsulay sa atong pagtuo. Busa, hinungdanon gayod nga magbantay kita batok sa pagkahisalaag gumikan sa bakak nga mga pagtulon-an ug mapahilayo gikan sa atong paglaom.—Colosas 1:23; Hebreohanon 13:9.

Ang dili-maayong panig-ingnan sa mga Israelinhon nga nangamatay tungod kay sila wala motuo sa mga saad ni Jehova angayng magsilbing pasidaan alang kanato. (Salmo 78:37) Inay mahisama kanila, hinaot magmalig-on kita, nga magaalagad sa Diyos uban ang pagbati sa pagkadinalian niining kataposang mga adlaw. “Ako nagakinabuhi matag adlaw nga daw ang adlaw ni Jehova moabot ugma,” matod sa usa ka eksperyensiyadong ansiyano.—Joel 1:15.

 Oo, ang dakong adlaw ni Jehova haduol na. Hinunoa, wala kitay angayng kahadlokan kon kita magpabiling suod sa Diyos. Kon hugot natong sundon ang iyang matarong nga mga sukdanan ug magpabiling malig-on, magmalamposon kita sa pagdagan sa lumba alang sa kinabuhing walay kataposan!—Proverbio 11:19; 1 Timoteo 6:12, 17-19.

[Hulagway sa panid 23]

Gihimo mo ba ang tanan mong maarangan sa pagtabang sa mga isigka-Kristohanon nga magpabiling malig-on?

[Picture Credit Line sa panid 21]

The Complete Encyclopedia of Illustration/J. G. Heck