Pilia ang Kinabuhing Dayon

ANG mga tawo wala pa gayod makabaton sukad masukad ug daghan kaayong kapilian. Pananglitan, ang mga besti nga atong isul-ob, ang pagkaon nga atong kaonon, ug kon asa kita motrabaho ug mopuyo kasagarang nagdepende lang kanimo. Sa daghang bahin sa kalibotan, ang pagpilig kapikas maoy naandang batasan usab. Apan, ang Bibliya nagtanyag ug usa ka kapilian nga labaw pa kay sa tanang uban pang mga kapilian—usa nga bukas alang sa tanang tawo.

Ang Bibliya nag-ingon: “Ang lig-ong nagabarog sa pagkamatarong takos sa kinabuhi, apan ang nagagukod sa daotan takos sa iyang kamatayon.” (Proverbio 11:19) Ug si Jesu-Kristo mipahayag: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Oo, ang atong Maglalalang naghatag kanato ug kahigayonan sa pagpili sa dalan nga motultol ngadto sa kinabuhing walay kataposan! Unsay angay natong buhaton aron maangkon ang kinabuhing dayon?

Sumala sa Bibliya, “diha sa dalan sa pagkamatarong adunay kinabuhi.” (Proverbio 12:28) Kita mahimong malakip sa mga matarong nga nagasubay sa dalan paingon sa kinabuhing walay kataposan. Sa unsang paagi? Pinaagi sa pagseguro nga ang atong kinabuhi nahiuyon sa kabubut-on sa Diyos ug sa iyang mga sugo. (Mateo 7:13, 14) Busa, hinaot makahimo kita ug hustong pagpili ug dawaton ang gasa sa Diyos nga kinabuhing walay kataposan.—Roma 6:23.