Usa ka Makapaikag nga Talaan

ANG eksplorador nga si Richard E. Byrd nakahimog lima ka ekspedisyon sa Antartika gikan sa 1928 hangtod sa 1956. Pinaagi sa paghupot ug talaadlawan ug tukmang mga talaan, siya ug ang iyang kaubang mga eksplorador nakatino sa mga paghuros sa hangin, nakaandam ug mga mapa, ug nakabaton ug daghang impormasyon bahin sa kontinente sa Antartika.

Ang mga ekspedisyon ni Byrd nag-ilustrar sa kahinungdanon sa paghupot ug usa ka talaan. Diha sa talaan o logbook, gihan-ay ang mga detalye sa pagnabigar o paglupad sa ayroplano. Kining mga impormasyona magamit sa ulahi aron masusi ang nahitabo o masuta ang mga impormasyon nga magamit sa mga panaw sa umaabot.

Ang Kasulatan nagtaganag makapaikag nga asoy bahin sa Lunop sa mga adlaw ni Noe. Ang maong tibuok-yutang Lunop milungtad ug kapin sa usa ka tuig. Isip pagpangandam sa Lunop, si Noe, iyang asawa, ug ang ilang tulo ka anak nga lalaki ug ilang mga asawa migugol ug 50 o 60 ka tuig sa pagtukod ug arka—usa ka dakong sakayan nga may gidak-on nga halos 40,000 metro kubiko. Ang katuyoan niadto? Aron matipigan ang kinabuhi sa pipila ka tawo ug mga hayop latas sa Lunop.—Genesis 7:1-3.

Sa diwa, ang basahong Genesis sa Bibliya adunay matawag nato nga talaan ni Noe bahin sa nahitabo gikan sa pagsugod sa Lunop hangtod nga siya ug ang iyang pamilya mikawas sa arka. Duna bay bisan unsang kahulogan niini alang kanato karon?