Ang Paghatag nga Makapahimuot sa Diyos

SI Jesus ug ang iyang mga tinun-an nangaon ug lamiang pagkaon sa Betania uban sa pipila ka suod nga mga higala, lakip kang Maria, Marta, ug sa di pa dugayng nabanhaw nga si Lazaro. Sa dihang gikuha ni Maria ang 300 gramos nga mahalong lana ug gihaplas kana sa mga tiil ni Jesus, si Judas Iscariote nasuko ug miprangka. “Nganong wala man ibaligya kining pinahumotan nga lana sa tulo ka gatos ka denario [tumbas sa halos usa ka tuig nga suweldo] ug ihatag sa mga tawong kabos?” siya mireklamo. Mipahayag usab dayon ang uban ug samang mga reklamo.—Juan 12:1-6; Marcos 14:3-5.

Hinunoa, si Jesus mitubag: “Pasagdi lang siya. . . . Kay ang mga kabos kanunay nga anaa kaninyo, ug bisan kanus-a nga buot ninyo kamo kanunay nga makabuhat ug maayo kanila, apan ako dili kanunay nga ania kaninyo.” (Marcos 14:6-9) Ang Hudiyohanong relihiyosong mga lider nagtudlo nga ang paghatag ug hinabang sa kabos dili lamang maayo kondili makatabon usab sa mga sala. Si Jesus, sa laing bahin, nagpatin-aw nga ang paghatag nga makapahimuot sa Diyos dili mao lamang ang paghatag ug mga gasa ingong hinabang sa mga kabos.

Ang daklit nga pagsusi sa paagi sa paghatag nga gihimo sa unang Kristohanong kongregasyon magpasiugda sa pipila ka praktikal nga mga paagi nga ikapakita nato ang atong kahangawa ug sa ingon mahimuot ang Diyos sa atong paghatag. Kini magpaila usab sa usa ka talagsaong matang sa paghatag nga labing mapuslanon.

“Paghatag ug mga Gasa sa Kaluoy”

Sa daghang okasyon gidasig ni Jesus ang iyang mga tinun-an sa “paghatag ug mga gasa sa kaluoy,” o ingon sa pagbadbad sa ubang mga hubad sa maong prase, “paghatag ngadto sa buhat sa kaluoy.” (Lucas 12:33; New English Bible; A Translation in the Language of the People, ni Charles B. Williams) Apan, si Jesus nagpasidaan batok sa mapagawalong mga paghatag nga gituyo lamang aron mahimaya ang naghatag imbes ang Diyos. “Sa dihang ikaw magahimog mga gasa sa kaluoy,” siya miingon, “ayaw paghuyop ug trompeta sa imong unahan, ingon sa ginabuhat sa mga salingkapaw diha sa mga sinagoga ug sa kadalanan, aron himayaon sila sa mga tawo.” (Mateo 6:1-4) Kay nagpadapat niining tambaga, ang unang mga Kristohanon naglikay sa mapagawalong pagpasundayag sa salingkapaw nga relihiyosong mga lider sa ilang panahon ug mipalabi sa pagtabang sa mga nanginahanglan pinaagi sa pag-alagad kanila sa personal o paghatag ug pribadong mga gasa.

Sa Lucas 8:1-3, pananglitan, kita giingnan nga si  Maria Magdalena, Juana, Susana, ug uban pa migamit sa “ilang mga kabtangan” sa pag-alagad kang Jesus ug sa iyang mga apostoles sa di-mapagawalong paagi. Bisan tuod kadtong mga tawhana dili mga kakha-tuka, gibiyaan nila ang ilang panginabuhi aron isentro ang ilang mga paningkamot diha lamang sa ministeryo. (Mateo 4:18-22; Lucas 5:27, 28) Pinaagi sa pagtabang kanila aron tumanon ang ilang asaynment nga hinatag sa Diyos, kadtong mga bayhana, sa pagkatinuod, naghimaya sa Diyos. Ug gipakita sa Diyos ang iyang pag-uyon pinaagi sa pagtipig ug usa ka rekord sa ilang maluluy-ong pagkamahinatagon diha sa Bibliya aron mabasa sa tanang umaabot nga mga henerasyon.—Proverbio 19:17; Hebreohanon 6:10.

Si Dorcas maoy lain pang babaye nga naghimog ‘daghang maayong mga buhat ug mga gasa sa kaluoy.’ Iyang gihimoan ug sinina ang kabos nga mga balo didto sa iyang lungsod sa baybayon sa Jope. Gibayran ba kaha niya ang tanang materyales o nagtahi niadto nga walay bayad, kita wala mahibalo. Bisan unsa pay kahimtang, ang iyang maayong buhat maoy hinungdan nga siya gimahal sa mga balo nga iyang gitabangan, ug usab sa Diyos, kinsa maluluy-ong nagganti sa iyang maayong kabubut-on.—Buhat 9:36-41.

Maayong Motibo Hinungdanon

Unsay nagpalihok niining mga tawhana sa paghatag? Sila mitabang dili tungod sa mabinationg pag-agda gumikan sa emosyonal nga pagpangayog hinabang. Ilang gibati nga usa ka moral nga kaakohan nga buhaton ang ilang maarangan kada adlaw aron makatabang niadtong nakigbisog sa kakabos, kagul-anan, sakit, o ubang mga kalisdanan. (Proverbio 3:27, 28; Santiago 2:15, 16) Mao kini ang paagi sa paghatag nga makapahimuot sa Diyos. Sa panguna kadto gipalihok sa halalom nga gugma alang sa Diyos ug sa tinguha sa pagsundog sa iyang maluluy-on ug mahinatagong personalidad.—Mateo 5:44, 45; Santiago 1:17.

Gipasiugda ni apostol Juan kining hinungdanong bahin sa paghatag sa dihang siya nangutana: “Si bisan kinsa nga adunay mga kahinguhaan sa kinabuhi niining kalibotana ug makita ang iyang igsoon nga nanginahanglan ug bisan pa niana magsira sa pultahan sa iyang malumong pagkamabination nganha kaniya, unsaon man sa gugma sa Diyos sa pagpabilin diha kaniya?” (1 Juan 3:17) Dayag ang tubag. Ang gugma sa Diyos maoy nagpalihok sa mga tawo nga magmahinatagon. Pabilhan ug gantihan gayod sa Diyos kadtong kinsa, sama kaniya, magpakitag mahinatagong espiritu. (Proverbio 22:9; 2 Corinto 9:6-11) Makita ba nato kining matanga sa pagkamahinatagon karon? Matikdi ang nahitabo di pa dugay sa usa ka kongregasyon sa mga Saksi ni Jehova.

Ang balay sa usa ka tigulang nga Kristohanong babaye grabeng pagkaguba ug kinahanglang ayohon. Siya nag-inusara ug walay pamilya nga makatabang kaniya. Sulod sa daghang tuig, didto himoa sa iyang balay ang Kristohanong mga tigom, ug kasagarang pakaonon niya si bisan kinsa nga modawat sa iyang pagdapit. (Buhat 16:14, 15, 40) Kay nakasabot sa iyang kahimtang, ang mga membro sa kongregasyon nagkahiusa sa pagtabang kaniya. Ang uban miamot ug salapi, ang uban sa ilang kusog. Sulod sa pipila ka hinapos sa semana, ang mga boluntaryo naghaklap ug bag-ong atop, nagpahimutang ug bag-ong banyo, nagpalitada ug nagpintal sa tibuok nga unang andana, ug nagtaod ug bag-ong mga kabinet sa kosina. Sa ilang paghatag natagan-an ang  mga panginahanglan sa igsoong babaye ug nasuod pa gayod ang kongregasyon ug ang mga silingan nakadayeg sa panig-ingnan sa tinuod nga Kristohanong paagi sa paghatag.

Daghan pa kaayong paagi nga kita personal nga makatabang sa uban. Makagugol ba kitag panahon uban sa usa ka batang lalaki o babaye nga ilo sa amahan? Mahimo kaha nga kitay mamalit o makapanahi alang sa usa ka tigulang nga biyuda nga atong kaila? Mahimo kaha nga kitay moluto o mohatag ug salapi ngadto sa usa nga limitado ang panalapi? Kita makatabang bisan kita dili dato. Si apostol Pablo misulat: “Kon ang pagkaandam anaa nang daan, kini ilabinang dalawaton sumala sa nabatonan sa usa, dili sumala sa wala kaniya.” (2 Corinto 8:12) Apan, ang maong personal, direktang paghatag, mao ba lamang ang matang sa paghatag nga panalanginan sa Diyos? Dili.

Komosta ang Organisadong Paghatag ug Hinabang?

Usahay dili igo ang personal nga mga paningkamot. Ngani, si Jesus ug ang iyang mga apostoles nagtipig ug pondo alang sa mga kabos, ug midawat sila ug mga amot gikan sa mahingawaong mga tawo nga ilang gikahimamat diha sa ilang buluhaton. (Juan 12:6; 13:29) Sa samang paagi, ang unang siglong mga kongregasyon nangolekta sa dihang dihay panginahanglan ug nag-organisar sa pagpanghatag ug hinabang sa dinagkong paagi.—Buhat 2:44, 45; 6:1-3; 1 Timoteo 5:9, 10.

Usa sa maong kahimtang nahitabo sa mga 55 K.P. Ang mga kongregasyon sa Judea nag-antos sa tumang kakabos, basin tungod sa dugayng gutom nga nahitabo di pa dugay. (Buhat 11:27-30) Si apostol Pablo, nga kanunayng mabalak-on sa mga kabos, nangayog tabang sa mga kongregasyon abot pa sa lagyong mga lugar sama sa Macedonia. Personal niyang giorganisar ang pagpangolekta ug gigamit ang inuyonang mga lalaki sa paghatod niadto. (1 Corinto 16:1-4; Galacia 2:10) Siya ug ang uban pang nalangkit wala magpasuhol sa ilang serbisyo.—2 Corinto 8:20, 21.

Ang mga Saksi ni Jehova karon andam usab sa pagtabang sa dihang mohampak ang katalagman. Panahon sa ting-init sa 2001, pananglitan, ang bagyo nga inubanan sa kusog nga mga pagbunok sa ulan nagpahinabog dakong baha sa Houston, Texas, T.B.A. Tanantanan, dihay 723 ka balay sa mga Saksi nga nangadaot, ang daghan niini grabeng pagkaguba. Ang komite sa paghatag ug hinabang panahon sa katalagman nga gilangkoban sa kuwalipikado nga Kristohanong mga ansiyano giporma gilayon aron masusi ang tagsa ka panginahanglan ug makagahin ug pondo aron matabangan ang mga Saksi didtong dapita sa pagsagubang sa kahimtang ug pag-ayo sa ilang mga balay. Ang kinabubut-ong mga boluntaryo gikan sa sikbit nga mga kongregasyon maoy nagbuhat sa tanang trabaho. Tungod sa pagkamapasalamaton sa usa ka Saksi sa maong tabang, sa pagkadawat niya sa bayad gikan sa iyang kompaniya sa insyurans alang sa pag-ayo sa iyang balay, iya dayong giamot ang salapi ngadto sa pondo sa hinabang aron makatabang kadto sa ubang nanginahanglan.

Apan, kon bahin sa paghatag ngadto sa organisadong buhat sa kaluoy, angay kitang magbantay samtang atong tulotimbangon ang daghang hangyo  nga atong madawat. Ang ubang mga organisasyon sa buhat sa kaluoy nagagahin ug dagko kaayong kantidad alang sa mga kawani niini o sa pagpaanunsiyo aron dasigon ang mga tawo sa paghatag, mao nga diyutay na lang ang mahibilin sa nakolektang salapi aron itabang. Ang Proverbio 14:15 nag-ingon: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.” Busa maalamon nga susihon pag-ayo ang mga impormasyon.

Ang Paghatag nga Mapuslanon Kaayo

Dunay usa ka matang sa paghatag nga mas mahinungdanon kay sa buhat sa kaluoy. Gipasabot kini ni Jesus sa dihang ang usa ka dato nga batan-ong magmamando nangutana kon unsay iyang buhaton aron makabaton ug walay-kataposang kinabuhi. Si Jesus miingon kaniya: “Lakaw ug ibaligya ang imong mga kabtangan ug ipanghatag sa mga kabos ug makabaton ka ug bahandi sa langit, ug umari ka mahimong akong sumusunod.” (Mateo 19:16-22) Matikdi nga si Jesus wala lamang moingong, ‘Panghatag sa mga kabos ug ikaw makabaton ug kinabuhi.’ Hinunoa, siya midugang, “Umari ka mahimong akong sumusunod.” Sa laing pagkasulti, bisan tuod ang mga buhat sa kaluoy dalayegon ug mapuslanon, ang Kristohanong pagkatinun-an mas mapuslanon pa.

Ang pangunang interes ni Jesus mao ang pagtabang sa uban sa espirituwal nga paagi. Sa dayon na sa iyang kamatayon, iyang giingnan si Pilato: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.” (Juan 18:37) Bisan tuod nanguna siya sa pagtabang sa mga kabos, pag-ayo sa masakiton, ug pagpakaon sa gigutom, labaw sa tanan gibansay ni Jesus ang iyang mga tinun-an sa pagsangyaw. (Mateo 10:7, 8) Ngani, apil sa iyang pangataposang mga instruksiyon kanila mao ang sugo: “Busa panglakaw kamo ug paghimog mga tinun-an sa katawhan sa tanang kanasoran.”—Mateo 28:19, 20.

Siyempre, ang pagsangyaw dili makasulbad sa tanang problema sa kalibotan. Apan, ang pagpaambit sa maayong balita sa Gingharian sa Diyos ngadto sa tanang matang sa mga tawo maghimaya sa Diyos kay ang pagsangyaw magpalampos sa kabubut-on sa Diyos ug magbukas sa dalan ngadto sa walay-kataposang mga kaayohan alang niadtong modawat sa langitnong mensahe. (Juan 17:3; 1 Timoteo 2:3, 4) Nganong dili maminaw kon unsay isulti sa mga Saksi ni Jehova sa sunod nilang duaw? Ila kang dad-an ug usa ka espirituwal nga gasa. Ug sila nahibalo nga kini mao ang kinamaayohang paagi nga sila makahatag kanimo.

[Mga hulagway sa panid 6]

Dunay daghang paagi nga ikapakita natong kita nahangawa

[Hulagway sa panid 7]

Ang atong pagsangyaw sa maayong balita makapahimuot sa Diyos ug magbukas sa dalan ngadto sa walay kataposang mga kaayohan