“Ayaw Kahadlok o Kalisang”

“Ayaw kahadlok o kalisang. . . . Si Jehova magauban kaninyo.”—2 CRONICAS 20:17.

1. Unsay epekto sa terorismo diha sa mga tawo, ug nganong masabtan ang ilang kahadlok?

 TERORISMO! Ang paghisgot lang niining pulonga makapahadlok ug makapatunghag mga pagbati sa kawalay-kasegurohan ug kawalay-mahimo. Makapukaw kini ug nagsagol nga pagbati sa kalisang, kaguol, ug kasuko. Ug kini maoy pulong nga naghubit sa gikahadlokan sa daghan nga mohasol sa katawhan sa umaabot nga katuigan. Dunay sukaranan ang maong kahadlok tungod kay ang pipila ka nasod nakigbugno sa lainlaing matang sa terorismo sulod na sa daghang katuigan apan wala gayod makasumpo niini sa bug-os.

2. Unsay reaksiyon sa mga Saksi ni Jehova sa problema sa terorismo, nga motultol sa unsang mga pangutana?

² Bisan pa niana, dunay tinuod nga hinungdan nga molaom. Ang mga Saksi ni Jehova, kinsa aktibong nagasangyaw diha sa 234 ka kayutaan ug mga teritoryo sa yuta, malaomon sa umaabot. Inay mahadlok nga ang terorismo dili gayod mawagtang, sila masaligon nga kini mahanaw ra—ug sa dili madugay. Makataronganon ba nga magmalaomon sama kanila? Kinsa god ang makapapha niining hampaka gikan sa kalibotan, ug sa unsang paagi kini mahitabo? Tungod kay kitang tanan lagmit nga naapektohan sa usa ka matang sa kapintasan, angay natong susihon ang basehanan nianang maong pagkamalaomon.

3. Unsang mga hinungdan sa kahadlok ang naglungtad, ug unsay gitagna bahin sa atong panahon?

³ Karon, ang mga tawo mahadlok ug malisang  tungod sa lainlaing mga hinungdan. Hunahunaa ang daghang tawo nga dili na makaatiman sa ilang kaugalingon tungod sa pagkatigulang, ang mga indibiduwal nga naghigos tungod sa walay-pagkaayo nga mga sakit, ug ang mga pamilya nga nanglimbasog sa pagpangitag kuwarta aron lang makabaton sa mga kinahanglanon sa kinabuhi. Sa pagkatinuod, hunahunaa lang ang pagkawalay-kasegurohan sa kinabuhi mismo! Ang kalit nga kamatayon pinaagi sa aksidente o katalagman daw nagpahipi sa tanang suok, nga andam nga motapos sa tanan natong gimahal. Ang maong kahadlok ug kabalaka, ug ang daghang personal nga kasungian ug mga kahigawad, nagpaila lamang nga ang atong kapanahonan mao ang gihubit ni apostol Pablo: “Hibaloi kini, nga sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, . . . walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo.”—2 Timoteo 3:1-3.

4. Unsay masaarong bahin sa makapaguol nga situwasyon ang gipresentar diha sa 2 Timoteo 3:1-3?

⁴ Bisan tuod kining tekstoha naghulagway ug makapaguol nga situwasyon, kini naghisgot gihapon ug paglaom. Matikdi nga ang makuyaw nga mga panahon molungtad “sa kataposang mga adlaw” sa presenteng daotang sistema sa mga butang ni Satanas. Nagpasabot kini nga ang kahupayan haduol na ug ang daotang sistema sa kalibotan hapit nang pulihan sa pagmando sa hingpit nga Gingharian sa Diyos, nga gitudlo ni Jesus nga iampo sa iyang mga tinun-an. (Mateo 6:9, 10) Ang maong Gingharian mao ang langitnong kagamhanan sa Diyos, nga “dili gayod malumpag,” matod ni manalagnang Daniel, apan “kini magadugmok ug magatapos niining tanang gingharian [sa tawo], ug kini mobarog hangtod sa panahong walay tino.”—Daniel 2:44.

Kristohanong Neyutralidad Kasukwahi sa Terorismo

5. Sa unsang paagi ang mga nasod di pa dugay misanong sa hulga sa terorismo?

⁵ Sulod sa daghang dekada, ang terorismo mikalas ug libolibong kinabuhi. Ang tibuok-kalibotang kaamgohan niining maong kapeligrohan misamot pag-ayo human sa mga pag-atake nga gihimo didto sa New York City ug sa Washington, D.C., sa Septiyembre 11, 2001. Tungod sa kadako ug pagkakaylap sa terorismo, ang mga nasod sa tibuok yuta naghiusa dayon aron sa pagsumpo niini. Pananglitan, sa Disyembre 4, 2001, sumala sa mga taho sa mga tigbalita, “ang langyawng mga ministro sa gobyerno gikan sa 55 ka nasod sa Uropa, Amerika del Norte ug Sentral Asia nagkauyon sa pagsagop sa usa ka plano” nga gidisenyo sa paghiusa sa ilang mga kalihokan. Usa ka taas-ug-ranggong opisyal sa T.B. nagdayeg niining maong aksiyon ingong paghatag ug “bag-ong sukod sa gahom” ngadto sa mga kalihokan nga kontra sa terorismo. Sa kalit lang, gatosan ka milyong tawo ang nalangkit pag-ayo sa gitawag sa The New York Times Magazine nga “sinugdanan sa usa ka dakong gubat.” Tan-awon pa kon molampos ba ang maong mga kalihokan. Apan, ang mga epekto sa maong gubat batok sa kalisang nakapahadlok sa daghan, apan dili niadtong nagasalig kang Jehova.

6. (a) Nganong ang pipila malisdan usahay sa pagdawat sa baroganan sa Kristohanong neyutralidad sa mga Saksi ni Jehova? (b) Unsang panig-ingnan labot sa politikanhong kalihokan ang gihatag ni Jesus alang sa iyang mga sumusunod?

⁶ Ang mga Saksi ni Jehova ilado kaayo tungod sa ilang pagkaneyutral sa politika. Bisan pag ang kadaghanang tawo andam tingaling modawat niining maong baroganan sa panahon sa kalinaw,  mahimong dili kaayo bukas ang ilang hunahuna sa dihang motungha ang talagsaong mga sirkumstansiya. Kasagaran, ang kahadlok ug kawalay-kasegurohan nga gipahinabo sa gubat magpukaw ug kusganong pagbati sa nasyonalismo. Tungod niini malisdan tingali ang uban sa pagsabot kon nganong dunay magpanuko sa pagpaluyo sa popular nga nasodnong mga kalihokan. Bisan pa niana, ang tinuod nga mga Kristohanon nahibalo nga sila kinahanglang mosugot sa sugo ni Jesus nga mahimong “dili bahin sa kalibotan.” (Juan 15:19; 17:14-16; 18:36; Santiago 4:4) Nagkinahanglan kini nga magpabilin silang neyutral maylabot sa politikanhon o katilingbanon nga mga butang. Si Jesus mismo naghatag ug hustong panig-ingnan. Tungod sa iyang hingpit nga kaalam ug talagsaong mga katakos, mapauswag unta niya ang tawhanong mga kalihokan sa iyang adlaw. Bisan pa niana, wala siya mag-apil-apil sa politika. Sa sinugdanan sa iyang ministeryo, hugot nga gibalibaran niya ang tanyag ni Satanas nga pagmando ibabaw sa tanang gingharian sa kalibotan. Sa ulahi, determinado siyang milikay sa pagpili unta kaniya alang sa usa ka politikanhong posisyon.—Mateo 4:8-10; Juan 6:14, 15.

7, 8. (a) Unsay wala ipasabot sa pagkaneyutral sa politika nga gipasundayag sa mga Saksi ni Jehova, ug ngano? (b) Sa unsang paagi gipakita sa Roma 13:1, 2 nga dili angayng makigbahin sa mapintas nga mga kalihokan batok sa mga kagamhanan?

⁷ Ang neyutral nga baroganan sa mga Saksi ni Jehova dili angayng pakasaypon ingong pagsuportar o pagkonsentir sa mga buhat sa kapintasan. Kon buhaton nila kini mosukwahi kini sa ilang pangangkon ingong mga alagad sa “Diyos sa gugma ug sa kalinaw.” (2 Corinto 13:11) Ilang nahibaloan kon unsay pagbati ni Jehova sa kapintasan. Ang salmista misulat: “Si Jehova magausisa sa matarong ug sa daotan, ug si bisan kinsa nga nahigugma sa kapintasan ginadumtan gayod sa Iyang kalag.” (Salmo 11:5) Nahibalo usab sila kon unsay giingon ni Jesus ngadto kang apostol Pedro: “Ibalik ang imong espada sa sakoban niini, kay ang tanang mogamit sa espada mamatay pinaagi sa espada.”—Mateo 26:52.

⁸ Bisan tuod klarong gipakita sa kasaysayan nga ang mini nga mga Kristohanon subsob nga migamit sa “espada,” dili ingon niana ang mga Saksi ni Jehova. Sila naglikay gikan sa tanang kalihokan nga sama niana. Ang mga Saksi matinumanong nagtuman sa sugo diha sa Roma 13:1, 2: “Magpasakop ang tanang kalag sa labaw nga mga awtoridad [mga magmamando sa kagamhanan], kay walay awtoridad gawas nga pinaagi sa Diyos; ang nagalungtad nga mga awtoridad napahimutang sa ilang relatibong mga posisyon pinaagi sa Diyos. Busa siya nga mosukol sa awtoridad misukol sa kahikayan sa Diyos; kadtong misukol niini makadawat ug paghukom alang sa ilang kaugalingon.”

9. Sa unsang duha ka paagi nga ang mga Saksi ni Jehova nakigbugno sa terorismo?

⁹ Apan, tungod kay ang terorismo daotan kaayo, dili ba angay nga ang mga Saksi ni Jehova dunay buhaton sa pagtabang sa pagpakigbugno niini? Oo angay nga duna silay buhaton, ug ginabuhat nila kana. Una sa tanan, sila mismo wala mag-apil-apil sa maong kalihokan. Ikaduha, ilang gitudloan ang mga tawo ug Kristohanong mga prinsipyo nga kon sundon magwagtang sa tanang matang sa kapintasan. a Sa miaging tuig, ang mga Saksi migugol ug 1,202,381,302 ka oras sa pagtabang sa mga tawo sa pagkat-on niining Kristohanong paagi sa pagkinabuhi. Wala mausik kining panahona, tungod kay ingong resulta niining maong kalihokan, 265,469 ka tawo ang nabawtismohan ingong mga Saksi ni Jehova, sa ingon nagpakita sa publiko sa ilang bug-os nga pagsalikway sa kapintasan.

10. Unsa ang mga kalaoman sa pagpapha sa kapintasan sa kalibotan karon?

¹⁰ Dugang pa, ang mga Saksi ni Jehova nakaamgo nga dili gayod nila mawagtang ang pagkadaotan gikan sa kalibotan. Mao nga sila misalig sa usa nga makahimo niana—si Jehova nga Diyos. (Salmo 83:18) Bisan pa sa sinserong mga paningkamot, dili mahimong taposon sa tawo ang kapintasan. Ang inspiradong magsusulat sa Bibliya nagpasidaan kanato bahin sa atong panahon, “sa kataposang mga adlaw,” ug nag-ingon: “Ang mga tawong daotan ug mga impostor mosamot pa kangil-ad, nga nagapahisalaag ug nahisalaag.” (2 Timoteo 3:1, 13) Kon lantawon gikan niining maong punto-debista, morag walay paglaom ang  mga tawo nga makadaog sa gubat batok sa pagkadaotan. Sa laing bahin, makasalig kita nga wagtangon ni Jehova ang kapintasan sa bug-os ug hangtod sa hangtod.—Salmo 37:1, 2, 9-11; Proverbio 24:19, 20; Isaias 60:18.

Maisogon Bisan pa sa Nagkaduol nga Pag-atake

11. Unsang mga lakang ang nahimo na ni Jehova sa pagwagtang sa kapintasan?

¹¹ Tungod kay ang Diyos sa kalinaw nagdumot sa kapintasan, masabtan nato kon nganong naghimo siyag mga lakang sa pagluka sa gamot niini, si Satanas nga Yawa. Gani, gipahinabo na niya nga si Satanas makaagom sa makauulawng kaparotan diha sa mga kamot sa arkanghel nga si Miguel—ang bag-ong naentronong Hari sa Diyos, si Kristo Jesus. Gihubit kana sa Bibliya niining paagiha: “Miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:7-9.

12, 13. (a) Nganong hinungdanon ang tuig 1914? (b) Unsay gitagna ni Ezequiel alang niadtong mopaluyo sa Gingharian sa Diyos?

¹² Ang kronolohiya sa Bibliya ug ang mga hitabo sa kalibotan nagkauyon sa pagpunting sa tuig 1914 ingong panahon sa dihang ang maong gubat sa langit nahitabo. Sukad niadto, ang mga kahimtang sa kalibotan nagkagrabe. Ang Pinadayag 12:12 nagpatin-aw kon ngano, nga nag-ingon: “Tungod niini, paglipay kamong kalangitan ug kamong nanagpuyo niini! Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”

¹³ Masabot nga ang kasuko sa Yawa gitumong ilabina ngadto sa dinihogang mga magsisimba sa Diyos ug sa ilang kauban nga “ubang mga karnero.” (Juan 10:16; Pinadayag 12:17) Kining maong pagsupak moabot sa kinatayuktokan niini sa dihang himoon sa Yawa ang grabeng pag-atake niadtong tanan nga nagpaluyo sa natukod nang Gingharian sa Diyos ug kinsa nagsalig niini. Kining determinado kaayong pag-atake gihisgotan diha sa Ezequiel 38 ingong pag-atake ni “Gog sa yuta sa Magog.”

14. Unsang mga paningkamot sa pagpanalipod ang napahimuslan sa mga Saksi ni Jehova kaniadto, ug kanunay bang ingon niini ang kahimtang?

¹⁴ Sukad sa pagpapahawa kang Satanas gikan sa langit, ang katawhan sa Diyos usahay napanalipdan batok sa mga pag-atake ni Satanas pinaagi sa mga paningkamot sa pipila ka kagamhanan, nga gihubit sa simbolikong pinulongan diha sa Pinadayag 12:15, 16. Sa kasukwahi, gipaila sa Bibliya nga panahon sa kataposang pag-atake ni Satanas, walay tawhanong ahensiya nga manalipod niadtong nagasalig kang Jehova. Angay ba kining makapahadlok sa mga Kristohanon? Dili gayod!

15, 16. (a) Ang mapasaligong mga pulong ni Jehova ngadto sa iyang katawhan sa mga adlaw ni Jehosapat naghatag ug unsang hinungdan nga magmalaomon ang mga Kristohanon karon? (b) Unsang sumbanan ang gihatag ni Jehosapat ug sa katawhan alang sa mga alagad sa Diyos karon?

¹⁵ Seguradong paluyohan sa Diyos ang iyang katawhan sama ra nga gipaluyohan niya ang iyang tipikal nga nasod sa adlaw ni Haring Jehosapat. Atong mabasa: “Pamati kamo, tibuok Juda ug kamong mga molupyo sa Jerusalem ug Haring Jehosapat! Ania ang giingon ni Jehova kaninyo,  ‘Ayaw kamo kahadlok o kalisang tungod niining dakong panon sa katawhan; kay ang gubat dili inyo, kondili iya sa Diyos. . . . Dili kamo kinahanglan nga makig-away niining higayona. Pahimutang kamo, barog nga walay lihok ug tan-awa ang kaluwasan ni Jehova alang kaninyo. Oh Juda ug Jerusalem, ayaw kahadlok o kalisang. Ugma gula kamo batok kanila, ug si Jehova magauban kaninyo.’”—2 Cronicas 20:15-17.

¹⁶ Ang katawhan sa Juda gipasaligan nga sila dili kinahanglang makig-away. Sa susama, sa dihang ang katawhan sa Diyos atakehon ni Gog sa Magog, dili sila mogamit ug mga armas aron sa pagdepensa sa kaugalingon. Hinunoa, sila ‘mobarog nga walay lihok ug makakita sa pagluwas ni Jehova’ kanila. Siyempre, ang pagbarog nga walay lihok wala magpasabot nga ang usa wala nay buhaton tungod kay ang katawhan sa Diyos sa mga adlaw ni Jehosapat dunay gibuhat. Atong mabasa: “Dihadiha si Jehosapat miyukbo nga ang nawong ngadto sa yuta, ug ang tibuok Juda ug ang mga molupyo sa Jerusalem nanghapa sa atubangan ni Jehova aron sa pagyukbo kang Jehova. . . . Dugang pa, [si Jehosapat] nakigsabot sa katawhan ug nagbutang ug mga mag-aawit alang kang Jehova ug sa mga nagdayeg uban ang balaang pagkadayandayan samtang sila migula nga nag-una sa mga tawong armado, ug nag-ingon: ‘Dayega ninyo si Jehova, kay ang iyang mahigugmaong-kalulot maoy hangtod sa panahong walay tino.’” (2 Cronicas 20:18-21) Oo, bisan atubangan sa pag-atake sa kaaway, ang katawhan aktibong nagadayeg kang Jehova. Naghatag kinig sumbanan nga sundon sa mga Saksi ni Jehova sa dihang si Gog moatake na kanila.

17, 18. (a) Unsang positibong tinamdan ang nabatonan karon sa mga Saksi ni Jehova maylabot sa pag-atake ni Gog? (b) Unsang pahinumdom ang di pa dugayng gihatag ngadto sa batan-ong mga Kristohanon?

¹⁷ Hangtod nianang panahona—ug bisan human magsugod ang pag-atake ni Gog—ang mga Saksi ni Jehova magpadayon sa pagpaluyo sa Gingharian sa Diyos. Padayon silang mapalig-on ug mapanalipdan pinaagi sa pagpakig-uban sa kapin sa 94,600 ka kongregasyon sa tibuok kalibotan. (Isaias 26:20) Panahon na gayod karon sa pagdayeg kang Jehova nga maisogon! Segurado nga bisag naghulat sila sa nagsingabot nga pag-atake ni Gog wala sila mouk-ok sa kahadlok. Hinunoa, kini nagdasig kanila sa pagpauswag sa ilang halad sa pagdayeg sa sukod nga maarangan nila.—Salmo 146:2.

¹⁸ Kining positibong tinamdan haom nga gipasundayag sa libolibong batan-on sa tibuok kalibotan nga misulod sa bug-os-panahong ministeryo. Aron mapasiugda ang pagkalabaw sa pagpili sa maong dalan sa kinabuhi, ang tract nga Mga Batan-on—Sa Unsang Paagi Gamiton  Ninyo ang Inyong Kinabuhi? giluwatan niadtong 2002 nga distritong mga kombensiyon. Ang mga Kristohanon, bata ug tigulang, mapasalamaton nianang nunot-sa-panahon nga mga pahinumdom.—Salmo 119:14, 24, 99, 119, 129, 146.

19, 20. (a) Nganong ang mga Kristohanon walay katarongan nga mahadlok o malisang? (b) Unsay buhaton sa sunod nga tun-anang artikulo?

¹⁹ Bisan pa sa mga kahimtang sa kalibotan, ang mga Kristohanon dili kinahanglang mahadlok o malisang. Sila nahibalo nga sa dili madugay ang Gingharian ni Jehova bug-os nga magwagtang sa tanang matang sa kapintasan. Sila nahupayan usab sa pagkahibalo nga ang pagkabanhaw magpasig-uli sa kinabuhi sa daghan nga nangamatay tungod sa kapintasan. Samtang ang pagkabanhaw maghatag sa pipila sa ilang unang kahigayonan sa pagkat-on bahin kang Jehova, kini makapaarang sa uban sa pagpadayon sa ilang dalan sa masibotong pag-alagad kaniya.—Buhat 24:15.

²⁰ Ingong tinuod nga mga Kristohanon, atong nasabtan ang panginahanglan sa paghupot sa Kristohanong neyutralidad ug determinadong mobuhat niana. Buot natong hawiran ang kahibulongang palaaboton nga ‘makabarog nga walay lihok ug makakita sa pagluwas ni Jehova.’ Ang sunod nga artikulo magpalig-on sa atong pagtuo pinaagi sa pagpaamgo kanato sa mga hitabo karon nga anam-anam nga naghatag ug katin-awan sa katumanan sa tagna sa Bibliya.

[Footnote]

Makapatin-aw Ka Ba?

• Nganong daghang tawo karon ang dili malaomon sa umaabot?

• Nganong ang mga Saksi ni Jehova malaomon sa umaabot?

• Unsay nahimo na ni Jehova labot sa hinungdan sa tanang kapintasan?

• Nganong wala kitay rason nga mahadlok sa pag-atake ni Gog?

[Mga Pangutana sa Pagtuon]

[Hulagway sa panid 13]

Si Jesus naghatag ug hustong panig-ingnan sa pagpakitag Kristohanong neyutralidad

[Mga hulagway sa panid 16]

Libolibong batan-on nga mga Saksi ang malipayong misulod sa bug-os-panahong ministeryo

[Hulagway sa panid 16]

Mga Batan-on—Sa Unsang Paagi Gamiton Ninyo ang Inyong Kinabuhi?

[Picture Credit Line sa panid 12]

UN PHOTO 186226/M. Grafman