Barog nga Walay Lihok ug Tan-awa ang Pagluwas ni Jehova!

‘Pahimutang kamo, barog nga walay lihok ug tan-awa ang pagluwas ni Jehova kaninyo.’—2 CRONICAS 20:17.

1, 2. Nganong ang nagsingabot nga pag-atake ni “Gog sa yuta sa Magog” mas peligroso kay sa hulga sa internasyonal nga terorismo?

 ANG terorismo gihubit sa pipila ingong pag-atake sa katilingban sa kalibotan, bisan sa sibilisasyon mismo. Masabtan nga ang maong hulga kinahanglang tagdon gayod. Sa laing bahin, ang mas peligrosong hulga mao ang laing pag-atake, nga niana ang katilingban sa kalibotan wala kaayo magtagad. Unsa man kana?

² Mao kana ang pag-atake ni “Gog sa yuta sa Magog,” nga gihisgotan sa Bibliya diha sa Ezequiel kapitulo 38. Paghinobra ba ang pag-ingon nga kining maong pag-atake mas peligroso kay sa hulga sa internasyonal nga terorismo? Dili gayod, tungod kay ang atakehon ni Gog dili lang kay tawhanong mga kagamhanan. Atakehon niini ang langitnong kagamhanan sa Diyos! Apan, dili sama sa mga tawo, kinsa diyutay lamang tingali ug kalamposan sa pagsagubang sa mga pag-atake sa ilang sistema, ang Maglalalang makahimo gayod sa pagbuntog sa mas mapintas nga pag-atake ni Gog.

 Pag-atake sa Kagamhanan sa Diyos

3. Giawhag ang mga magmamando sa kalibotan sa pagbuhat sa unsa sukad pa sa 1914, ug unsay ilang reaksiyon?

³ Ang gubat tali sa nagamando nang Hari sa Diyos ug sa daotang sistema ni Satanas nagapadayon sukad pa sa pagkatukod sa Gingharian sa Diyos didto sa mga langit sa 1914. Nianang panahona, ang tawhanong mga magmamando giawhag sa pagpasakop sa piniling Magmamando sa Diyos. Apan dili nila gustong magpasakop, sumala sa gitagna: “Ang mga hari sa yuta mibarog ug ang hataas nga mga opisyal naghugpong ingong usa batok kang Jehova ug batok sa iyang dinihogan, nga nagaingon: ‘Bugtoon nato ang ilang mga gapos ug isalibay ang ilang mga higot gikan kanato!’” (Salmo 2:1-3) Ang pagsupak sa pagmando sa Gingharian klarong makaabot sa kinatayuktokan niini panahon sa pag-atake ni Gog sa Magog.

4, 5. Sa unsang paagi ang mga tawo makapakig-away sa dili-makita, langitnon nga kagamhanan sa Diyos?

⁴ Maghunahuna tingali kita kon sa unsang paagi ang mga tawo makapakig-away sa dili-makita, langitnon nga kagamhanan. Kining maong kagamhanan, matod sa Bibliya, gilangkoban sa “usa ka gatos ug kap-atag-upat ka libo, nga gipalit gikan sa yuta,” ug sa “Kordero,” si Kristo Jesus. (Pinadayag 14:1, 3; Juan 1:29) Tungod kay langitnon, ang bag-ong kagamhanan gitawag nga “bag-ong mga langit,” samtang ang yutan-ong mga ginsakpan niini makataronganong tawgon nga “usa ka bag-ong yuta.” (Isaias 65:17; 2 Pedro 3:13) Kadaghanan sa 144,000 ka kaubang mga magmamando ni Kristo nakatapos na sa ilang yutan-ong dalan nga matinumanon. Sa ingon napamatud-an nila ang ilang pagkatakos nga modawat sa ilang bag-ong mga asaynment sa pag-alagad didto sa langit.

⁵ Apan, ang usa ka gamayng nanghibilin sa 144,000 ania pa sa yuta. Sa kapin sa 15,000,000 nga mitambong sa selebrasyon sa Panihapon sa Ginoo niadtong 2002, ang nagpahayag sa ilang paglaom ingong pinili alang niining langitnong asaynment maoy 8,760 lamang. Si bisan kinsa  nga mangahas sa pag-atake sa nanghibiling umaabot nga mga membro sa Gingharian sa pagkatinuod nakig-away sa Gingharian sa Diyos.—Pinadayag 12:17.

Gitapos sa Hari ang Iyang Pagpangdaog

6. Unsay panglantaw ni Jehova ug ni Kristo sa pagsupak nga gipuntirya sa katawhan sa Diyos?

⁶ Ang reaksiyon ni Jehova sa pagsupak nga gipuntirya sa iyang natukod nga Gingharian gitagna: “Ang Usa nga nagalingkod sa kalangitan magakatawa; himoon sila ni Jehova nga yubitonon. Nianang panahona siya mosulti kanila sa iyang kasuko ug sa iyang kapungot iyang gubton sila, nga magaingon: ‘Ako, ako mismo, nagpahimutang sa akong hari Ibabaw sa Zion, ang akong bukid nga balaan.’” (Salmo 2:4-6) Ang panahon miabot na nga si Kristo, ilalom sa pagtultol ni Jehova, ‘motapos sa iyang pagpangdaog.’ (Pinadayag 6:2) Unsay panglantaw ni Jehova sa pagsupak nga gipuntirya sa iyang katawhan sulod sa yugto sa kataposang pagpangdaog? Lantawon kana ni Jehova ingong gipuntirya kaniya ug sa iyang nagamandong Hari. “Siya nga nagahilabot kaninyo nagahilabot sa kalimutaw sa akong mata,” nag-ingon si Jehova. (Zacarias 2:8) Ug hugot nga miingon si Jesus nga isipon niya ang gibuhat o wala buhata sa mga tawo ngadto sa iyang dinihogang mga igsoon ingong gibuhat o wala buhata ngadto kaniya.—Mateo 25:40, 45.

7. Tungod sa unsang mga rason nga kadtong sakop sa “dakong panon,” nga gihubit diha sa Pinadayag 7:9, nakasinati sa kapungot ni Gog?

⁷ Siyempre, kadtong aktibo nga nagapaluyo sa dinihogang nanghibilin makaagom usab sa kapungot ni Gog. Kining umaabot nga mga membro sa “bag-ong yuta” sa Diyos maoy “usa ka dakong panon” nga gitawag “gikan sa tanang kanasoran ug mga tribo ug katawhan ug mga pinulongan.” (Pinadayag 7:9) Sila gihisgotan ingong “nagbarog atubangan sa trono ug atubangan sa Kordero, nga nagsul-ob ug maputing tag-as nga mga besti.” Sa ingon sila adunay inuyonang baroganan atubangan sa Diyos ug kang Kristo Jesus. Nanagdalag “mga palwa sa palma diha sa ilang mga kamot,” ilang gibayaw si Jehova ingong takos nga Soberano sa uniberso, kansang pagmando gipahayag pinaagi sa paghari sa iyang naentronong Hari, si Jesu-Kristo, “ang Kordero sa Diyos.”—Juan 1:29, 36.

8. Ang pag-atake ni Gog magpahinabo kang Kristo sa pagbuhat sa unsa, uban sa unsang resulta?

⁸ Ang pag-atake ni Gog magpahinabo sa naentronong Hari sa Diyos sa paglihok ug pagpakig-away diha sa gubat sa Armagedon. (Pinadayag 16:14, 16) Kadtong wala moila sa pagkasoberano ni Jehova makaagom sa kalaglagan. Sa laing bahin, kadtong nakalahutay sa kasakitan tungod sa ilang pagkamaunongon ngadto sa Gingharian sa Diyos makaeksperyensiya ug dumalayong kahupayan. Mahitungod niini, si apostol Pablo misulat: “Kini maoy pamatuod sa matarong nga paghukom sa Diyos, nga motultol sa pag-isip kaninyo nga takos sa gingharian sa Diyos, nga alang niini kamo sa pagkatinuod nagaantos. Ginatagad dinhi nga matarong sa bahin sa Diyos nga mobalos ug kasakitan niadtong nagsakit kaninyo, apan, kaninyo nga nag-antos ug kasakitan, kahupayan uban kanamo inigpadayag na sa Ginoong Jesus gikan sa langit uban sa iyang gamhanang mga manulonda sa nagdilaab nga  kalayo, sa dihang siya manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.”—2 Tesalonica 1:5-8.

9, 10. (a) Sa unsang paagi gihatag ni Jehova sa Juda ang kadaogan batok sa usa ka makalilisang nga kaaway? (b) Unsay angay nga padayong buhaton sa mga Kristohanon karon?

⁹ Panahon sa nagsingabot nga dakong kasakitan, nga matapos sa Armagedon, si Kristo makiggubat batok sa tanang daotan. Apan dili kinahanglang makig-away ang iyang mga sumusunod, sama ra nga wala kinahanglanang makig-away ang mga molupyo sa duhay-tribo nga gingharian sa Juda libolibo ka tuig kanhi. Ang gubat iya ni Jehova, ug iyang gihatag ang kadaogan. Ang talaan nag-ingon: “Si Jehova nagbutang ug mga tawong magbabanhig batok sa mga anak sa Ammon, sa Moab ug sa bukirong rehiyon sa Seir nga nangadto sa Juda, ug sila nagpinatyanay sa usag usa. Ug ang mga anak sa Ammon ug Moab mitindog batok sa mga molupyo sa bukirong rehiyon sa Seir aron sa paglaglag kanila ug sa pagpuo kanila; ug sa pagkahuman gayod nila sa mga molupyo sa Seir, ang tagsatagsa kanila nagtinabangay sa paglaglag sa iyang isigkatawo. Apan kon bahin sa Juda, kini nakaabot sa bantayanang torre sa kamingawan. Sa dihang sila milingi ngadto sa panon sa katawhan, aw, atua sila, ang ilang mga patayng lawas nangapukan sa yuta nga walay usa nga nakaikyas.”—2 Cronicas 20:22-24.

¹⁰ Sama gayod kadto sa gitagna ni Jehova: “Dili kamo kinahanglan nga makig-away.” (2 Cronicas 20:17) Naghatag kinig sumbanan nga angayng sundon sa mga Kristohanon sa dihang si Jesu-Kristo molihok na sa “pagtapos sa iyang pagpangdaog.” Sa kasamtangan, sila magpadayon sa pagpakig-away sa daotan, dili pinaagi sa literal nga mga hinagiban, kondili pinaagi sa espirituwal nga mga hinagiban. Busa ‘padayon nilang daogon ang daotan pinaagi sa maayo.’—Roma 6:13; 12:17-21; 13:12; 2 Corinto 10:3-5.

Kinsay Manguna sa Pag-atake ni Gog?

11. (a) Unsang mga ahensiya ang gamiton ni Gog sa iyang pag-atake? (b) Unsay nalangkit sa pagtukaw sa espirituwal?

¹¹ Si Gog sa Magog giila ingong si Satanas nga Yawa diha sa iyang gipaubos nga kahimtang sukad sa 1914. Ingong espiritung linalang, dili siya makaatake nga direkta, apan mogamit siya ug tawhanong mga ahensiya aron buhaton kini. Kinsa man unya kining tawhanong mga ahensiya? Ang Bibliya wala mohatag kanatog mga detalye, apan kini naghatag kanatog mga timailhan nga motabang kanato sa pag-ila kon kinsa sila. Samtang mapadayag ang mga panghitabo sa kalibotan ingong katumanan sa mga tagna sa Bibliya, anam-anam natong masabtan kini. Ang katawhan ni Jehova dili mamanabana kondili magpabiling nagtukaw sa espirituwal, nga bug-os nga nahibalo sa politikanhon ug relihiyoso  nga mga kaugmaran nga magpaila sa katumanan sa tagna sa Bibliya.

12, 13. Sa unsang paagi ang manalagnang si Daniel nagtagna ug kataposang pag-atake nganha sa katawhan sa Diyos?

¹² Si manalagnang Daniel naghatag ug impormasyon bahin sa kataposang pag-atake batok sa katawhan sa Diyos, nga misulat: “Siya [ang hari sa amihanan] mogula gayod nga may dakong kaaligutgot aron sa pagpuo ug sa pagtugyan sa daghan ngadto sa kalaglagan. Ug iyang iugbok ang iyang samag-palasyo nga mga tolda sa taliwala sa dakong dagat ug sa balaang bukid sa Dayandayan.”—Daniel 11:44, 45.

¹³ Sa kapanahonan sa Bibliya, ang “dakong dagat” mao ang Great Sea, o ang Mediteranyo, ug “ang balaang bukid” mao ang Zion, nga bahin niana si Jehova miingon: “Ako, ako mismo, nagpahimutang sa akong hari ibabaw sa Zion, ang akong bukid nga balaan.” (Salmo 2:6; Josue 1:4) Busa, sa espirituwal nga diwa, ang yuta “taliwala sa dakong dagat ug sa balaang bukid” naghawas sa mauswagong espirituwal nga yuta sa dinihogang mga Kristohanon. Wala na sila ilha ingong nalakip sa dagat sa katawhan nga nahimulag sa Diyos, ug sila nagpaabot sa pagmando uban kang Kristo Jesus didto sa langitnong Gingharian. Klaro nga ang dinihogang mga alagad sa Diyos, duyog sa ilang maunongong mga kauban nga naglangkob sa dakong panon, maoy puntiryahon sa hari sa amihanan sa dihang himoon niya ang mapintas nga pag-atake ingong katumanan sa tagna ni Daniel.—Isaias 57:20; Hebreohanon 12:22; Pinadayag 14:1.

Unsa Unyay Reaksiyon sa mga Alagad sa Diyos?

14. Unsa ang tulo ka butang nga buhaton sa katawhan sa Diyos sa dihang sila atakehon?

¹⁴ Unsay gidahom nga buhaton sa mga alagad sa Diyos sa dihang atakehon sila? Sa makausa pa, ang reaksiyon sa tipikong nasod sa Diyos sa mga adlaw ni Jehosapat naghatag ug sumbanan. Matikdi nga ang mga molupyo niini gisugo sa pagbuhat sa tulo ka butang: (1) mopahimutang sila (2) mobarog nga walay lihok, ug (3) motan-aw sa pagluwas ni Jehova. Sa unsang paagi ang katawhan sa Diyos karon molihok nga kaharmonya niining mga pulonga?—2 Cronicas 20:17.

15. Unsay kahulogan sa pagpahimutang sa katawhan ni Jehova?

¹⁵ Mopahimutang sila: Nga dili magduhaduha, ang katawhan sa Diyos magpadayon sa ilang aktibong pagpaluyo sa Gingharian sa Diyos. Magpadayon sila sa paghupot sa ilang Kristohanong neyutralidad. Sila ‘magmalig-on, dili matarog’ diha sa ilang maunongong pag-alagad kang Jehova ug magpadayon sa ilang dayag nga pagdayeg kang Jehova tungod sa iyang mahigugmaong-kalulot. (1 Corinto 15:58; Salmo 118:28, 29) Walay presente o umaabot nga pagpit-os ang makapabiya kanila niining inuyonan sa Diyos nga kahimtang.

16. Sa unsang paagi nga ang mga alagad ni Jehova mobarog nga walay lihok?

¹⁶ Mobarog nga walay lihok: Ang mga alagad ni Jehova dili maningkamot sa pagluwas sa ilang kaugalingon kondili bug-os silang mosalig kang Jehova. Siya lamang ang makaluwas sa iyang mga alagad gikan niining kagubot sa kalibotan, ug siya nagsaad nga himoon kana. (Isaias 43:10, 11; 54:15; Lamentaciones 3:26) Ang pagsalig kang Jehova maglakip sa pagsalig sa modernong-adlaw nga makitang galamiton nga klarong gigamit niya sulod sa daghang dekada aron sa pagpatuman sa iyang mga katuyoan. Labaw kay sukad masukad, ang matuod nga mga Kristohanon kinahanglan unyang mosalig sa mga isigkamagsisimba nga giawtorisahan ni Jehova ug sa iyang nagamandong Hari sa pagpanguna. Kining matinumanong mga lalaki maoy motultol sa katawhan sa Diyos. Ang dili pagtagad sa ilang pagtultol mahimong mosangpot sa katalagman.—Mateo 24:45-47; Hebreohanon 13:7, 17.

17. Nganong ang matinumanong mga alagad sa Diyos makakita sa pagluwas ni Jehova?

 ¹⁷ Motan-aw sa pagluwas ni Jehova: Ang kaluwasan mao unyay ganti alang niadtong tanan nga padayong maghupot sa ilang Kristohanong integridad ug mosalig kang Jehova alang sa kaluwasan. Hangtod sa kataposang higayon—ug sa maarangan nila—ilang ipahibalo ang pag-abot sa adlaw sa paghukom ni Jehova. Ang tanang linalang kinahanglan nga mahibalo nga si Jehova ang matuod nga Diyos ug nga siya adunay matinumanong mga alagad dinhi sa yuta. Dili na gayod unya magkinahanglan ug dugay pa nga panaglantugi labot sa pagkamatarong sa pagkasoberano ni Jehova.—Ezequiel 33:33; 36:23.

18, 19. (a) Sa unsang paagi ang awit sa kadaogan diha sa Exodo kapitulo 15 nagbanaag sa pagbati niadtong makalabang-buhi sa pag-atake ni Gog? (b) Unsay haom nga buhaton karon sa katawhan sa Diyos?

¹⁸ Uban ang bag-ong kusog, ang katawhan sa Diyos mosulod ngadto sa bag-ong kalibotan, nga andam moawit ug awit sa kadaogan, sama sa mga Israelinhon kaniadto human sila maluwas latas sa Pulang Dagat. Mapasalamaton gayod kang Jehova tungod sa iyang panalipod, sa tinagsatagsa ug sa tiningob, ilang ipalanog ang mga pulong sa dugay nang panahon: “Paawita ako kang Jehova, kay siya nahimong binayaw kaayo. . . . Si Jehova maoy kusganong lalaki sa panggubatan. Jehova ang iyang ngalan. . . . Ang imong tuong kamot, Oh Jehova, makagupok ug kaaway. Ug sa imong hilabihang pagkalabaw ikaw makapukan nilang motindog batok kanimo; ikaw magpadala sa imong nagasilaob nga kasuko, kini molamoy kanila sama sa dagami. . . . Sa imong mahigugmaong-kalulot ikaw nagtultol sa katawhan nga imong gibawi; sa imong kusog ikaw tinong maghatod kanila ngadto sa imong balaang puloy-anang dapit. . . . Ikaw magdala kanila ug magtanom kanila sa bukid sa imong panulondon, sa usa ka piho nga dapit nga imong giandam aron imong puy-an, Oh Jehova, usa ka sangtuwaryo, Oh Jehova, nga gitukod sa imong mga kamot. Si Jehova magmando ingong hari hangtod sa panahong walay tino, bisan hangtod sa kahangtoran.”—Exodo 15:1-19.

¹⁹ Karon nga ang palaaboton nga walay kataposang kinabuhi mas klaro kay sukad masukad, higayon na kini nga ang mga alagad sa Diyos magpasundayag sa ilang debosyon ngadto kang Jehova ug magbag-o sa ilang determinasyon nga moalagad kaniya ingong ilang walay-kataposang Hari!—1 Cronicas 29:11-13.

Makapatin-aw Ka Ba?

• Nganong ang pag-atake ni Gog ipuntirya sa mga dinihogan ug sa ubang mga karnero?

• Sa unsang paagi mopahimutang ang katawhan sa Diyos?

• Unsay kahulogan sa pagbarog nga walay lihok?

• Sa unsang paagi ang katawhan sa Diyos makakita sa pagluwas ni Jehova?

[Mga Pangutana sa Pagtuon]

[Hulagway sa panid 18]

Si Jehova naghatag ug kadaogan kang Jehosapat ug sa iyang katawhan, nga dili na sila kinahanglang makig-away

[Hulagway sa panid 20]

Ang mga dinihogan ug ang ubang mga karnero makigbahin sa pagbayaw sa pagkasoberano ni Jehova

[Hulagway sa panid 22]

Sama sa mga Israelinhon kaniadto, ang katawhan sa Diyos sa dili madugay magaawit ug awit sa kadaogan