Mga Pangutana Gikan sa mga Magbabasa

Sayop ba kon patyon ang masakiton o tigulang na kaayo nga binuhing hayop?

Ang nagkadaiyang mga mananap makaiikag ug makapalipay alang sa kadaghanang tawo. Ang pipila ka gipaaghop nga mga mananap maayong ikauban ingong mga binuhi. Pananglitan, ang mga iro nailhan nga bug-os nga motuman ug mahigugma sa ilang mga amo. Busa, masabtan ang pagbati sa mga tawo alang sa maong binuhi, ilabina sa usa ka binuhi nga ilang nakauban sulod na sa daghang tuig.

Ugaling lang, dili kaayo taas ang kinabuhi sa kadaghanang binuhi. Ang mga iro tingali mabuhi sa 10 ngadto sa 15 ka tuig o kapin pa, sama sa mga iring, depende sa matang. Kon tigulang na, ang mga binuhi mag-antos sa mga sakit ug pagkainutil nga makapaguol sa ilang mga tag-iya, kinsa mahinumdom sa mga panahong batan-on ug mas lagsik pa kining mga mananapa. Sayop ba nga taposon ang ilang pag-antos pinaagi sa pagpatay kanila?

Ang usa ka Kristohanon buot nga molihok uyon sa kabubut-on sa Diyos diha sa iyang pagtratar sa mga mananap. Ang mabangis nga pagtratar kanila maoy batok gayod sa kabubut-on sa Diyos, kay ang iyang Pulong nag-ingon: “Ang matarong nagaatiman sa kalag sa iyang binuhing hayop.” (Proverbio 12:10) Apan, wala kini magpasabot nga parehas ang panglantaw sa Diyos sa mga hayop ug sa mga tawo. Sa dihang gilalang sa Diyos ang mga tawo, iyang gipakita nga may klarong kalainan tali nila ug sa mga mananap. Pananglitan, siya naghatag sa mga tawo ug paglaom sa kinabuhing walay kataposan, apan wala gayod niya ihatag kini nga paglaom ngadto sa mga mananap. (Roma 6:23; 2 Pedro 2:12) Tungod kay siya ang Maglalalang, siya ang may katungod sa paglatid sa hustong relasyon tali sa mga tawo ug mga hayop.

Gisultihan kita sa Genesis 1:28 kon unsa kana nga relasyon. Ang Diyos nag-ingon ngadto sa unang mga tawo: “Pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.” Sa susama, ang Salmo 8:6-8 nag-ingon: “Ang tanan gibutang mo [Diyos] sa ilalom sa iyang [tawo] mga tiil: ang mga karnero ug mga kanding ug mga baka, silang tanan, ug ang mga mananap usab sa kapatagan, ang mga langgam sa kalangitan ug ang mga isda sa dagat.”

Klarong gipakita sa Diyos nga ang mga hayop mahimong gamiton sa hustong paagi ug mahimong patyon sa tawo. Pananglitan, ang ilang panit magamit ingong mga besti. Ang Diyos nagtugot usab sa mga tawo sa pagkaon sa karne sa mga hayop human sa Lunop sa adlaw ni Noe, nga gidugang sa pagkaong utanon nga maoy unang gihatag kanila.—Genesis 3:21; 4:4; 9:3.

Kini wala magtugot sa way-kokaluoy nga pagpatay sa mga hayop agig kalingawan. Sa Genesis 10:9, gihubit sa Bibliya si Nimrod ingong “usa ka gamhanang mangangayam.” Apan ang maong bersikulo nag-ingon nga naghimo kini kaniya nga ‘kaaway ni Jehova.’

Busa, bisan tuod ang mga mananap nailalom sa gahom sa tawo, dili niya angay abusohan ang maong awtoridad kondili gamiton kini uyon sa mga prinsipyo sa Pulong sa Diyos. Tingali apil niini ang dili pagtugot nga mag-antos sa walay hinungdan ang binuhi tungod kay tigulang na kaayo, grabeng nasamdan, o may sakit nga ikamatay. Sa ingon niini nga kahimtang, responsibilidad sa usa ka Kristohanon ang paghukom kon unsay buhaton. Kon siya mohukom sa pagpakitag kaluoy pinaagi sa pagtapos sa pag-antos sa usa ka binuhi nga wala nay paglaom pang maulian, nan tingali modesisyon siya sa pagpapatay niini.