Pagkakat-on sa Sekreto sa Pagkakontento

Diha sa usa ka makapadasig nga sulat ngadto sa mga Kristohanon sa Filipos, si apostol Pablo misulat: “Akong nakat-onan, bisan unsa man ang akong kahimtang, nga magmakontento. . . . Sa tanang butang ug sa tanang kahimtang nakat-onan ko ang sekreto kon unsaon pagkabusog ug kon unsaon pagkagutom, kon unsaon sa pagkinabuhi sa kadagaya ug kon unsaon sa pag-antos sa kawalad-on.”—Filipos 4:11, 12.

Unsa ang sekreto sa pagkakontento ni Pablo? Tungod sa kamahal sa palaliton ug sa kahuyang sa ekonomiya sa atong panahon, mapuslanon gayod nga ang matuod nga mga Kristohanon makakat-on sa pagkakontento aron padayon nilang masentro ang pagtagad diha sa ilang pag-alagad sa Diyos.

SA UNANG bahin sa iyang sulat, gihubit ni Pablo ang iyang malamposong karera kanhi. Siya miingon: “Kon aduna may laing tawo nga naghunahunang siya may pasukaranan sa pagsalig diha sa unod, ako labi pa gayod: gituli sa ikawalong adlaw, gikan sa banay sa Israel, sa tribo ni Benjamin, natawo nga usa ka Hebreohanon gikan sa mga Hebreohanon; kon bahin sa balaod, usa ka Pariseo; kon bahin sa kasibot, naglutos sa kongregasyon; kon bahin sa pagkamatarong nga pinaagi sa balaod, usa nga walay-ikasaway.” (Filipos 3:4-6) Dugang pa, ingong usa ka masibotong Hudiyo, si Pablo gisugo ug gipaluyohan sa pangulong mga saserdote sa Jerusalem. Tungod niini, mabatonan unta niya ang gahom ug kabantog—politikal, relihiyoso, ug sa walay duhaduha sa pinansiyal—diha sa Hudiyohanong sistema.—Buhat 26:10, 12.

Apan, nausab pag-ayo ang kahimtang sa dihang si Pablo nahimong usa ka masibotong Kristohanong ministro. Tungod sa maayong balita, kinabubut-on niyang gisakripisyo ang iyang malamposong karera ug ang tanan nga giisip kaniadto nga hinungdanon sa Hudiyohanong katilingban. (Filipos 3:7, 8) Unsaon na man niya karon pagsustento sa iyang kaugalingon? May madawat ba kaha siyang suweldo ingong ministro? Sa unsang paagi matagan-an ang iyang personal nga mga panginahanglan?

Gihimo ni Pablo ang iyang ministeryo nga walay suweldo. Aron dili makapabug-at sa uban nga iyang gialagaran, miduyog siya kang Aquila ug Priscila sa pagpanghimog tolda samtang didto sa Corinto, ug mihimo siyag lain pang mga butang aron sa pagsustento sa iyang kaugalingon. (Buhat 18:1-3; 1 Tesalonica 2:9; 2 Tesalonica 3:8-10) Si Pablo mihimog tulo ka lagyong misyonaryong panaw, ug miadto usab siya sa mga kongregasyon nga kinahanglang duawon. Tungod kay siya puliki kaayo sa pag-alagad sa Diyos, siya diyutay lag materyal nga kabtangan. Kasagaran, itagana ra sa mga igsoon ang iyang mga panginahanglan. Apan, usahay, tungod sa lisod nga mga kahimtang, siya nag-antos sa kawalad-on ug kakabos. (2 Corinto 11:27; Filipos 4:15-18) Bisan pa niana, si Pablo wala gayod moreklamo bahin sa iyang kahimtang, ug wala niya kaibgi ang nabatonan sa uban. Kinabubut-on  ug malipayon siyang naghago alang sa kaayohan sa mga isigka-Kristohanon. Gani, si Pablo maoy nagkutlo sa iladong mga pulong ni Jesus: “Adunay labaw nga kalipay sa paghatag kay sa pagdawat.” Pagkatalagsaong panig-ingnan alang kanatong tanan!—Buhat 20:33-35.

Ang Kahulogan sa Pagkakontento

Ang usa ka hinungdanong butang nga nakaamot sa kalipay ug katagbawan ni Pablo mao ang iyang pagkakontento. Apan, unsa may kahulogan sa pagkakontento? Sa yanong pagkasulti, kini nagkahulogan ug pagkakontento sa pangunang mga butang. Maylabot niini, giingnan ni Pablo si Timoteo, nga iyang kauban diha sa ministeryo: “Sa pagkatinuod, kini maoy usa ka paagi nga makaganansiyag dako, kining diyosnong pagkamahinalaron inubanan sa pagkakontento. Kay kita walay gidalang bisan unsa nganhi sa kalibotan, ug kita walay madala nga bisan unsa sa atong paggawas niini. Busa, kon kita adunay makaon ug ikabesti, kita magmakontento na niining mga butanga.”—1 Timoteo 6:6-8.

Matikdi nga gilangkit ni Pablo ang pagkakontento sa diyosnong pagkamahinalaron. Giila niya nga ang tinuod nga kalipay maggikan sa diyosnong pagkamahinalaron, nga mao, ang pag-una sa atong pag-alagad sa Diyos, ug dili sa materyal nga mga kabtangan o bahandi. Ang ‘pagkaon ug besti’ maoy kasangkapan lamang aron siya makapadayon sa pagpangagpas sa diyosnong pagkamahinalaron. Busa alang kang Pablo, ang sekreto sa pagkakontento mao ang pagsalig kang Jehova, bisag unsa pay kahimtang.

Daghang tawo karon ang nabalaka pag-ayo ug dili malipayon tungod kay wala sila masayod sa maong sekreto o wala nila kini panumbalinga. Imbes ugmaron ang pagkakontento, gipalabi nila ang pagsalig sa salapi ug sa kon unsay ilang mapalit sa salapi. Ang industriya sa panganunsiyo ug ang ahensiya sa balita magpabati sa mga tawo nga dili sila magmalipayon gawas kon mabatonan nila ang kinabag-ohan ug kinamahalan nga mga produkto ug mga kasangkapan—ug mabatonan kini dihadiha. Tungod niana, daghan ang nahaylo sa  pagpangagpas sa salapi ug materyal nga mga butang. Imbes makaplagan ang kalipay ug katagbawan, sila “mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.”—1 Timoteo 6:9, 10.

Ilang Nakat-onan ang Sekreto

Karong panahona, posible ba gayod ang pagkinabuhi uban ang diyosnong pagkamahinalaron ug pagkakontento ug makakaplag ug kalipay ug katagbawan? Oo, posible. Sa pagkatinuod, milyonmilyong tawo karon ang nagkinabuhi gayod nianang paagiha. Ilang nakat-onan ang sekreto sa pagkahimong malipayon uban sa materyal nga mga butang nga ilang nabatonan. Sila mao ang mga Saksi ni Jehova, kinsa nagpahinungod sa ilang kaugalingon ngadto sa Diyos, nga nagbuhat sa iyang kabubut-on ug nagtudlo sa mga tawo bisan diin bahin sa iyang katuyoan.

Tagda, pananglitan, kadtong miboluntaryo nga bansayon ug ipadala ingong mga misyonaryo ngadto sa langyawng mga nasod aron sa  pagsangyaw sa maayong balita sa Gingharian sa Diyos. (Mateo 24:14) Subsob nga ang kahimtang sa pagkinabuhi sa mga nasod nga gipadad-an kanila maoy kabos, nga dili sama sa ilang naandan. Pananglitan, sa dihang nangabot ang mga misyonaryo sa usa ka nasod sa Asia sa 1947, makita gihapon ang mga epekto sa gubat, ug pipila lang ka balay ang may elektrisidad. Diha sa daghang nasod, nakaplagan sa mga misyonaryo nga usausahon pagkuskos ang ilang labhang besti ibabaw sa usa ka tabla o sa mga bato diha sa suba imbes sa dekoryenteng washing machine. Apan sila nangadto aron tudloan ang mga tawo sa kamatuoran sa Bibliya, busa sila nagpasibo sa lokal nga mga kahimtang ug nahimong puliki diha sa ministeryo.

Ang uban misulod sa bug-os-panahong ministeryo o mibalhin ngadto sa mga dapit nga wala pa masangyawi sa maayong balita. Si Adulfo nag-alagad ingong bug-os-panahong ministro kapin na sa 50 ka tuig diha sa nagkalainlaing dapit sa Mexico. Matod niya: “Sama kang apostol Pablo, ang akong asawa ug ako nakakat-on sa pagpasibo sa among kaugalingon sa mga kahimtang. Pananglitan, usa sa mga kongregasyon nga among giduaw layo kaayo gikan sa bisan unsang siyudad o tiyanggihan. Sa matag pagpangaon, kontento na ang mga igsoon sa pagkaon ug usa ka tortilyas nga may diyutayng mantika ug asin ug usa ka tasang kape. Mao ra nay ilang kaonon—tortilyas sa pamahaw, paniudto, ug sa panihapon. Busa nakakat-on kami sa pagkinabuhi nga sama sa among mga igsoon. Natagamtam nako ang daghang kasinatian nga sama niini sulod sa 54 ka tuig nga akong pag-alagad kang Jehova nga bug-os-panahon.”

Nahinumdoman ni Florentino kon giunsa niya sa pagpasibo ug sa iyang pamilya sa malisod nga mga kahimtang. Sa paghinumdom sa panahon nga siya bata pa, siya miingon: “Ang akong amahan maoy usa ka mauswagong negosyante. Yutaan siya. Nahinumdoman ko pa ang lamesa diha sa iyang tindahan. Dihay hunos nga 50 sentimetros ang gilapdon ug 20 sentimetros ang giladmon, ug kini may upat ka kahonkahon. Among ibutang didto ang mga halin sa tibuok adlaw. Pagkahapon, kanunay kining magsugwak sa mga sensilyo ug mga papel de bangko.

“Unya sa kalit lang, nagkalisodlisod mi sa panalapi ug gikan sa pagkaadunahan kami nahimong kabos. Nahanaw kanamo ang tanan gawas sa among balay. Gawas pa niini, usa sa akong mga igsoong lalaki naaksidente ug nabaldado ang duha niya ka tiil. Lahi na gayod ang kahimtang. Sulod sa usa ka panahon naninda kog mga prutas ug karne. Nangani usab akog gapas, ubas, ug alfalfa (matang sa kompay), ug nakaapil ko sa pagpatubig sa mga uma. Ang ubang mga tawo nagtawag kanakong jack of all trades o daghag naantigohan. Si Mama kanunayng maghupay kanamo pinaagi sa pag-ingon nga anaa kanamo ang kamatuoran, usa ka espirituwal nga kabtangan nga pipila lang ang nakabaton. Busa nakat-onan nako ang pagkinabuhi sa kahamugaway ug usab sa kawalad-on. Karon nga nakaalagad na ako kang Jehova nga bug-os-panahon sulod sa mga 25 ka tuig, makaingon ako nga matag adlaw nasinati nako ang kalipay sa pagkahibalo nga gipili nako ang labing maayong dalan sa kinabuhi—ang pag-alagad kang Jehova nga bug-os-panahon.”

Ang Bibliya direktang nag-ingon kanato nga “ang talan-awon niining kalibotana nagakausab.” Tungod niini, kini nag-awhag usab kanato: “Kadtong nanagmaya manig-ingon kanilang wala managmaya, ug kadtong nanagpamalit manig-ingon kanilang wala magapanag-iya, ug kadtong nagagamit sa kalibotan manig-ingon kanilang wala magagamit niini sa bug-os.”—1 Corinto 7:29-31.

Busa, karon na ang panahon sa pagsusi pag-ayo sa imong paagi sa pagkinabuhi. Kon nagkalisodlisod ka, magbantay nga dili maglagot, mayugot ba hinuon ug masina. Sa laing bahin, bisan unsang materyal nga kabtangan nga imo tingaling nabatonan, maalamon ang paghupot ug balanseng panghunahuna bahin niana aron dili ka maulipon niana. Sama sa gitambag ni apostol Pablo, angayng ibutang nimo ang imong paglaom, “dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan.” Kon buhaton nimo kana, nan ikaw usab makaingon nga ikaw nakakat-on sa sekreto sa pagkakontento.—1 Timoteo 6:17-19.

[Hulagway sa panid 9]

Si Pablo nagtrabaho aron dili makapabug-at sa uban

[Mga hulagway sa panid 10]

Libolibo ang nakakaplag ug kalipay sa pagkinabuhi uban ang ‘diyosnong pagkamahinalaron ug pagkakontento’