Unsay Nagakahitabo sa mga Buhat sa Kaluoy?

HUMAN ang mga pag-atake niadtong Septiyembre 11, 2001, sa New York City ug Washington, D.C., talagsaon kaayo ang pagsuportar sa publiko alang sa mga biktima sa trahedya. Ang mga organisasyon sa buhat sa kaluoy nakadawat ug $2.7 bilyones isip hinabang aron maatiman ang mga pamilya sa mga biktima. Kay nakurat pag-ayo sa gidak-on sa kalaglagan, ang mga tawo sa bisan diin buot motabang.

Apan, sa wala madugay ang ubang mga tawo napungot sa dihang nabaniog ang mga akusasyon nga ang iladong mga organisasyon sa buhat sa kaluoy sayop nga naggamit sa mga pondo. Naglagot pag-ayo ang mga tawo sa taho nga ang usa ka dakong organisasyon sa buhat sa kaluoy nagplano sa pagtipig sa halos katunga sa $546 milyones nga ilang nadawat ug gamiton kini sa ubang mga katuyoan. Bisan tuod ang maong organisasyon sa ulahi nag-usob sa desisyon niini ug nangayog pasaylo, ang usa ka reporter miingon: “Gisabot sa mga kritiko ang maong kausaban sa mga hitabo nga ulahi na kaayo aron mapasig-uli ang pagsalig” nga ilang gitagamtam sa wala pa ang pag-atake. Komosta ka na man? Ang imo bang pagsalig sa mga organisasyon sa buhat sa kaluoy nadaot di pa dugay?

Mapuslanon o Mausikon?

Ang paghatag ngadto sa mga organisasyon sa buhat sa kaluoy sagad giisip nga dalayegon. Apan, dili tanan nag-isip sa ingon. Kapin sa 200 ka tuig kanhi, si Samuel Johnson, ang Ingles nga magsusulat, misulat: “Mas magmasaligon ka nga maayo ang imong ginabuhat kon imong suholan kadtong naghago sa pagtrabaho, kay sa mohatag ka lamang ug salapi alang sa mga buhat sa kaluoy.” Sa pagkakaron ang uban nagduhaduha usab sa paghatag ngadto sa buhat sa kaluoy, ug ang mga taho nga ang maong mga organisasyon sayop nga naggasto o naggamit sa giamot nga salapi wala makapalambo sa pagsalig sa publiko. Matikdi ang duha ka pananglitan di pa dugay.

Gipaluwat sa katungdanan ang direktor sa usa ka relihiyosong organisasyon sa buhat sa kaluoy sa San Francisco human kono niya pabayra ang iyang ahensiya sa iyang cosmetic surgery ug sa iyang $500 nga bayranan sa restawran kada semana sulod sa duha ka tuig. Sa Britanya, ang mga tig-organisar sa usa ka dakong programa sa buhat sa kaluoy sa telebisyon naulaw sa dihang nadiskobrehan nga sa 6.5 milyones libra esterlina (halos $10 milyones, T.B.) nga gipadala aron itukod ug bag-ong mga balay sa mga ilo didto sa Romania, 12 ka menos-ug-klaseng mga balay lamang ang natukod sukad, ug ginatos ka linibong dolyar ang dili ikapatin-aw kon unsay gigastohan. Ang dili-maayong mga taho nga sama niini angay lang nga magtukmod sa pipila ka tawong moamot  nga mas magmabinantayon kon pila ang ilang iamot ug kinsay ilang hatagan.

Mohatag o Dili Mohatag

Hinuon, ikasubo gayod nga atong tugotan ang mga binuhatan sa pipila ka tawo o mga organisasyon nga magpugong sa atong tim-os nga tinguha ug kahangawa alang sa uban. Ang Bibliya nag-ingon: “Ang dagway sa pagsimba nga hinlo ug wala mahugawi sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan.” (Santiago 1:27) Ang aktibong pagpakabana sa mga kabos ug sa mga hinikawan maoy usa ka hinungdanong bahin sa Kristiyanidad.

Bisan pa niana, tingali ikaw mamalandong, ‘Magpadayon kaha ako paghatag sa mga organisasyon sa buhat sa kaluoy, o maningkamot na lang ako pagtabang pinaagig personal nga mga gasa ngadto sa mga indibiduwal?’ Unsang matanga sa paghatag ang gidahom sa Diyos? Hisgotan sa mosunod nga artikulo kining mga pangutanaha.