Mga Pangutana Gikan sa mga Magbabasa

May katakos ba si Satanas nga Yawa sa pagbasa sa hunahuna sa tawo?

Bisan tuod dili kita bug-os nga segurado, si Satanas ug ang iyang mga demonyo morag dili makabasa sa atong mga hunahuna.

Tagda ang mahubitong mga ngalan nga gitumong kang Satanas. Gitawag siyag Satanas (Magsusupak), Yawa (Tigpasipala), Halas (parehas ra sa Maglilimbong), Maninental, ug Bakakon. (Job 1:6; Mateo 4:3; Juan 8:44; 2 Corinto 11:3; Pinadayag 12:9) Walay usa niining mahubitong mga ngalan ang nagpasabot nga si Satanas may katakos sa pagbasa sa mga hunahuna.

Hinunoa, isip pagtandi, si Jehova nga Diyos gihubit ingong “tig-usisa sa mga kasingkasing.” (Proverbio 17:3; 1 Samuel 16:7; 1 Cronicas 29:17) “Walay linalang nga dili dayag sa panan-aw [ni Jehova],” nag-ingon ang Hebreohanon 4:13, “apan ang tanang butang hubo ug binuksan sa mga mata niya nga kaniya manubag kita.” Dili ikatingala, gihatagan ni Jehova ug katakos sa pagsusi sa mga kasingkasing ang iyang Anak, si Jesus. Ang nabanhaw nga si Jesus mipahayag: “Ako mao ang usa nga nagasusi sa mga rinyon ug mga kasingkasing, ug ako magabalos sa tagsatagsa kaninyo sumala sa inyong mga buhat.”—Pinadayag 2:23.

Ang Bibliya wala mag-ingon nga si Satanas makasusi sa mga kasingkasing ug hunahuna sa mga tawo. Talagsaon kini, kay si apostol Pablo nagpasalig kanato nga ang mga Kristohanon “dili kay walay alamag sa mga laraw [ni Satanas].” (2 Corinto 2:11) Busa dili kita angay mahadlok nga si Satanas adunay talagsaong katakos nga wala lamang kitay kalibotan.

Bisan pa niana, wala kini magpasabot nga ang atong Kaaway dili makasabot sa atong mga kahuyangan. Daghang siglo na nga gitun-an ni Satanas ang kinaiya sa tawo. Dili kinahanglang mabasa niya ang mga hunahuna aron lang masabtan ang mga sumbanan sa kinaiya nga atong gipakita, aron lang makita ang kalingawan nga atong ginapangagpas, o maminaw sa mga butang nga atong ginahisgotan, ug uban pa. Ang atong panagway ug linihokan maghatag usab ug ilhanan sa atong panghunahuna o pagbati.

Apan, sa katibuk-an, gigamit ni Satanas ang samang mga laraw nga iyang gigamit sa tanaman sa Eden—pamakak, panglimbong, ug pangilad. (Genesis 3:1-5) Bisan tuod ang mga Kristohanon dili angayng mahadlok nga si Satanas makabasa sa ilang hunahuna, angay silang mabalaka bahin sa mga hunahuna nga tingali itisok ni Satanas diha sa ilang kaisipan. Gusto niyang ang mga Kristohanon mahimong ‘dunot ug kaisipan ug makabsan sa kamatuoran.’ (1 Timoteo 6:5) Dili ikatingala nga ang kalibotan ni Satanas nagpagawas ug nagkadaiyang makapadaot nga mga impormasyon ug kalingawan. Aron makabarog sa iyang pag-atake, kinahanglang panalipdan sa mga Kristohanon ang ilang hunahuna pinaagi sa pagsul-ob sa “helmet sa kaluwasan.” (Efeso 6:17) Mahimo nila kini pinaagi sa pagpuno sa ilang hunahuna sa mga kamatuoran sa Bibliya ug paglikay sa dili angayng pagpakig-abyan sa makadaot nga mga impluwensiya sa kalibotan ni Satanas.

Makahahadlok nga kaaway si Satanas. Apan dili kinahanglang magbaton kitag dili-angayng kahadlok kaniya o sa iyang mga demonyo. Ang Santiago 4:7 nagpasalig kanato: “Sukli ang Yawa, ug siya mokalagiw gikan kaninyo.” Kon atong sundon kining tambaga, kita makapahayag, sama kang Jesus, nga si Satanas dili makagahom kanato.—Juan 14:30.