Naandang Batasan o Panghiphip?

DIHA sa pipila ka kolehiyo sa Polandia, nabatasan sa mga estudyante ang pagpangolektag kuwarta aron ipalit ug mga gasa alang sa ilang mga magtutudlo, nga naglaom nga makadawat ug dagkong mga grado sa ilang mga pasulit. Dili ikatingala nga ang batan-ong Kristohanon nga ginganlag Katarzyna nag-atubang ug malisod nga situwasyon. “Mohatag ba akog kuwarta o dili?” naghunahuna siya. Ang iyang mga isigkaestudyante nangatarongan: “Naandan na kining batasana. Walay mawala kanimo, kondili daghan kag kaayohan nga madawat, busa nganong magduhaduha ka pa man?”

“Angkonon ko nga sa akong unang tuig sa pagtungha, nakigbahin ako sa pagpangolektag kuwarta,” matod ni Katarzyna. “Sa ulahi lamang nako naamgohan nga niining paagiha gipaluyohan nako ang panghiphip, nga gisaway diha sa Bibliya.” Gihinumdoman niya ang mga kasulatan nga nagpakita nga kusganong gisaway ni Jehova ang panghiphip. (Deuteronomio 10:17; 16:19; 2 Cronicas 19:7) Si Katarzyna nag-ingon: “Nasabtan nako nga dali ra gyod diay kaayong madala sa pagpit-os sa isigkaingon. Gihunahuna ko kini pag-ayo ug sukad niadto wala na ako makigbahin pag-usab sa maong batasan.” Sulod sa miaging tulo ka tuig, bisan pa sa pagbiaybiay sa ubang mga estudyante, nakaarang siya sa pagpatin-aw ngadto sa uban nga siya dili makigbahin sa maong pagpangolektag kuwarta aron ipalit ug “gasa” tungod sa iyang pinasukad-sa-Bibliyang mga pagtuo.

Ang uban nag-akusar kang Katarzyna nga dalo ug dili matinagdanon sa mga panginahanglan sa uban. “Dili gihapon mahigalaon kanako ang uban kanila,” matod niya. “Sa laing bahin, daghan ang nagtahod sa akong panghunahuna, nga nakapalipay kanako.” Si Katarzyna nailhan ingong usa sa mga Saksi ni Jehova, kinsa nagtuman sa mga prinsipyo sa Bibliya diha sa matag adlaw nga pagkinabuhi.