Tan-awa ang Maayo Diha sa Tanan
Tan-awa ang Maayo Diha sa Tanan
“Hinumdomi ako, Oh Diyos ko, alang sa kaayohan.”—NEHEMIAS 13:31.
1. Sa unsang paagi si Jehova nagpakitag pagkamaayo ngadto sa tanan?
SA PAGLABAY sa daghang gabonon ug dag-omon nga mga adlaw, ang galamhan mapukaw dihang mosidlak ang adlaw. Ang mga tawo mas maayog buot ug malipayon. Sa susama, human sa dugayng yugto nga naglagiting ang kainit sa adlaw ug uga ang panahon, ang taligsik—bisan ang bunok nga ulan—mohatag ug kahayahay ug kahupayan. Ang atong mahigugmaong Maglalalang, si Jehova, nagdisenyo niining kahibulongang gasa nga klima diha sa atmospera sa yuta. Si Jesus naghisgot bahin sa pagkamahinatagon sa Diyos sa dihang siya nagtudlo: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo; aron inyong mapamatud-an ang inyong kaugalingon nga mga anak sa inyong Amahan nga anaa sa mga langit, sanglit siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mateo 5:43-45) Oo, si Jehova nagpakitag pagkamaayo ngadto sa tanan. Ang iyang mga alagad kinahanglang maningkamot sa pagsundog kaniya pinaagi sa pagtan-aw kon unsay maayo diha sa uban.
2. (a) Unsay pasikaranan ni Jehova sa pagpakitag pagkamaayo? (b) Unsay obserbahan ni Jehova sa atong pagsanong sa iyang pagkamaayo?
2 Unsay pasikaranan ni Jehova sa pagpakitag pagkamaayo? Sukad sa pagkahulog ni Adan sa sala, si Jehova nagtan-aw sa kon unsay maayo diha sa mga tawo. (Salmo 130:3, 4) Ang iyang katuyoan mao ang pagpasig-uli sa masinugtanong katawhan aron mabuhi sa Paraiso. (Efeso 1:9, 10) Ang iyang dili-takos nga kalulot naghatag kanato ug paglaom nga maluwas gikan sa sala ug pagkadili-hingpit pinaagi sa gisaad nga Binhi. (Genesis 3:15; Roma 5:12, 15) Ang pagdawat sa kahikayan sa lukat nagpaposible nga mapasig-uli ngadtongadto sa kahingpitan. Ang usa sa mga butang nga gipanid-an ni Jehova karon sa matag usa kanato mao ang atong pagsanong sa iyang pagkamahinatagon. (1 Juan 3:16) Iyang mamatikdan bisan unsay atong buhaton sa pagpasundayag sa atong apresasyon sa iyang pagkamaayo. “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan,” misulat si apostol Pablo.—Hebreohanon 6:10.
3. Unsang pangutana ang takos natong tagdon?
3 Nan, sa unsang paagi atong masundog si Jehova sa pagtan-aw kon unsay maayo diha sa uban? Atong tagdon ang mga tubag niining pangutanaha diha sa upat ka bahin sa kinabuhi: (1) sa Kristohanong ministeryo, (2) sa pamilya, (3) sa kongregasyon, ug (4) sa atong relasyon sa uban.
Diha sa Pagsangyaw ug Paghimog Tinun-an
4. Sa unsang paagi ang pagpakigbahin sa Kristohanong ministeryo maoy usa ka paagi sa pagtan-aw kon unsay maayo diha sa uban?
4 “Ang uma mao ang kalibotan,” si Jesus nag-ingon agig tubag sa mga pangutana sa iyang mga tinun-an bahin sa kahulogan sa sambingay sa trigo ug sa mga bunglayon. Ingong modernong-adlaw nga mga tinun-an ni Kristo, atong giila kini nga kamatuoran sa dihang ginahimo nato ang atong ministeryo. (Mateo 13:36-38; 28:19, 20) Ang atong ministeryo sa kanataran naglangkit sa atong publikong pagpahayag sa atong pagtuo. Ang pagkailado mismo sa mga Saksi ni Jehova karon tungod sa ilang ministeryo sa kabalayan ug sa kadalanan nagpamatuod sa atong kakugi sa pagpangita sa tanang takos nga makadungog sa mensahe sa Gingharian. Sa pagkatinuod, si Jesus nag-ingon: “Sa bisan unsang siyudad o balangay nga kamo mosulod, pangitaa kon kinsa didto ang takos.”—Mateo 10:11; Buhat 17:17; 20:20.
5, 6. Nganong molahutay kita nga mobalikbalik sa pagduaw sa mga tawo diha sa ilang mga balay?
5 Sa dihang kita mohimog wala-damhang mga pagduaw sa mga tawo, atong mamatikdan ang ilang reaksiyon sa atong mensahe. Usahay ang usa ka membro sa panimalay maminaw kanato samtang ang laing membro sa mao rang panimalay, moingon, “Dili kami interesado,” ug matapos na ang pagduaw. Masubo kita nga ang pagsupak o kawalay-interes sa usa ka tawo nakaapektar sa sanong sa laing tawo! Nan, unsa may atong mahimo aron makalahutay sa pagtan-aw kon unsay maayo diha sa tanan?
6 Ang atong sunod nga pagduaw sa maong panimalay sa dihang mosangyaw kita nianang dapita tingali mohatag kanatog kahigayonan sa pagpakigsulti mismo sa tawong nakaputol sa atong unang pagduaw. Ang paghinumdom sa nahitabo nianang higayona makatabang kanato sa pagpangandam. Tingali gihimo kadto sa magsusupak nga may maayong mga motibo, kay nagtuo nga kinahanglang santaon niya ang usa nga masanongon sa pagpaminaw sa mensahe sa Gingharian. Tingali ang iyang panglantaw naimpluwensiyahan sa sayop nga impormasyon bahin sa atong intensiyon. Apan dili kana magpugong kanato sa paglahutay sa pagsangyaw sa maayong balita sa Gingharian nianang panimalaya, nga mataktikanhong naningkamot sa pagtul-id sa sayop nga mga pagsabot. Kita interesado sa pagtabang sa tanan nga makadangat sa tukmang kahibalo bahin sa Diyos. Dayon, basin si Jehova magkabig nianang maong tawo ngadto kaniya.—Juan 6:44; 1 Timoteo 2:4.
7. Unsay makatabang kanato nga magmapositibo sa dihang moduol sa mga tawo?
7 Ang mga instruksiyon ni Jesus sa iyang mga tinun-an nagtagad usab mahitungod sa pagsupak sa pamilya. Dili ba miingon siya: “Ako mianhi sa pagpahinabog panagkabahin, sa lalaki batok sa iyang amahan, ug sa anak nga babaye batok sa iyang inahan, ug sa batan-ong asawa batok sa iyang ugangang babaye”? Si Jesus midugang: “Ang mga kaaway sa usa ka tawo mao unya ang mga tawo sa iyang kaugalingong panimalay.” (Mateo 10:35, 36) Apan, ang mga kahimtang ug mga tinamdan mausab. Ang kalit nga pagsakit, pagkamatay sa usa ka paryente, mga katalagman, emosyonal nga krisis, ug daghan pang uban nga mga hinungdan makaimpluwensiya sa reaksiyon sa mga tawo sa atong pagsangyaw. Kon kita dunay negatibong tinamdan—nga ang mga tawong atong gisangyawan dili gihapon mamati—kita ba nagtan-aw gayod kon unsay maayo diha kanila? Uban ang kangaya, nganong dili sila duawon pag-usab sa laing higayon? Basig lahi na ang atong makitang reaksiyon. Usahay dili lang ang atong isulti kondili ang atong paagi sa pagsulti ang makapahinabog lahi nga sanong. Ang hugot nga pag-ampo ngadto kang Jehova sa dili pa magsugod sa pagsangyaw makatabang gayod kanato sa pagkahimong positibo ug sa pagsulti sa mensahe sa Gingharian sa makapadani nga paagi ngadto sa tanan.—Colosas 4:6; 1 Tesalonica 5:17.
8. Unsay mahimong resulta kon tan-awon sa mga Kristohanon ang maayo diha sa ilang dili-magtutuong mga paryente?
8 Diha sa pipila ka kongregasyon daghang membro sa usa ra ka pamilya ang nag-alagad kang Jehova. Ang kasagarang nakapahinabog pagdayeg ug pagtahod diha sa mas bata nga mga paryente mao ang paglahutay sa mas magulang nga paryente kansang maayong relasyon sulod sa pamilya ug sulod sa bugkos sa kaminyoon nagbukas sa dalan aron mausab ang tinamdan sa mas bata nga mga membro sa pamilya. Ang pagpatalinghog sa tambag ni apostol Pedro nakatabang sa daghang Kristohanong mga asawa sa pagkabig sa ilang bana “nga walay pulong.”—1 Pedro 3:1, 2.
Diha sa Pamilya
9, 10. Sa unsang paagi gitan-aw ni Jacob ug Jose ang maayo diha sa ilang pamilya?
9 Ang kasuod nga nagbugkos sa mga membro sa pamilya maoy laing bahin diin atong makita ang maayo diha sa uban. Tagda ang leksiyon nga makat-onan gikan sa pagpakiglabot ni Jacob sa iyang mga anak nga lalaki. Sa Genesis kapitulo 37, bersikulo 3 ug 4, gipakita sa Bibliya nga mas dako ang pagmahal ni Jacob kang Jose. Nasina ang mga igsoon ni Jose, hangtod sa punto nga nagkunsabo sila sa pagpatay kaniya. Apan, matikdi ang tinamdan ni Jacob ug Jose sa ulahi. Ilang gitan-aw ang maayo diha sa ilang pamilya.
10 Sa dihang si Jose nag-alagad isip pangulong administrador sa pagkaon didto sa gihampak-sa-gutom nga Ehipto, iyang giabiabi ang iyang mga igsoon. Samtang wala niya ipaila dihadiha kon kinsa siya, iyang gimaniobra ang mga panghitabo aron maseguro nga sila maatiman pag-ayo ug may pagkaong madala ngadto sa ilang tigulang nga amahan. Oo, bisan ug nabiktima sa ilang pagdumot, dihay gihimo si Jose nga nakahatag kanilag kaayohan. (Genesis 41:53–42:8; 45:23) Sa susama, sa dihang siya himalatyon, si Jacob mipahayag ug matagnaong mga panalangin alang sa tanan niyang anak. Bisan tuod naibanan ang pipila nila ka pribilehiyo tungod sa ilang sayop nga mga buhat, ang tanan nakadawat ug panulondon nga yuta. (Genesis 49:3-28) Pagkadalayegong pagpahayag sa malungtarong gugma ang gipasundayag ni Jacob!
11, 12. (a) Unsang matagnaong pananglitan ang nagpasiugda sa kahinungdanon sa pagtan-aw kon unsay maayo diha sa pamilya? (b) Unsang leksiyon ang atong makat-onan gikan sa panig-ingnan sa amahan diha sa ilustrasyon ni Jesus bahin sa anak nga mausikon?
11 Ang hataas nga pailob ni Jehova sa iyang pagpakiglabot sa walay-pagtuo nga nasod sa Israel naghatag ug dugang katin-awan kon sa unsang paagi niya gitan-aw ang maayo diha sa iyang katawhan. Naggamit sa kahimtang sa pamilya ni manalagnang Oseas, giilustrar ni Jehova ang iyang malungtarong gugma. Si Gomer, ang asawa ni Oseas, daghang higayon na nga nanapaw. Bisan pa niana, si Jehova nagsugo kang Oseas: ‘Lakaw pag-usab, higugmaa ang usa ka babaye nga gihigugma sa usa ka kauban ug nagapanapaw, ingon sa gugma ni Jehova alang sa mga anak sa Israel bisan kon sila miliso ngadto sa ubang mga diyos ug nahigugma sa mga tinapay nga dunay pasas.’ (Oseas 3:1) Nganong mao man kana ang sugo? Nasayod si Jehova nga diha sa nasod nga mitipas sa iyang mga dalan, dunay mga indibiduwal nga mosanong sa iyang pailob. Si Oseas mipahayag: “Human niana ang mga anak sa Israel mobalik ug mangita gayod kang Jehova nga ilang Diyos, ug kang David nga ilang hari; ug sila mangadto nga magakurog kang Jehova ug sa iyang pagkamaayo sa kaulahiang bahin sa mga adlaw.” (Oseas 3:5) Kini maoy usa gayod ka maayong pananglitan nga palandongon sa dihang makaagom ug mga kalisdanan sa pamilya. Ang imong padayong pagtan-aw kon unsay maayo diha sa ubang mga membro sa pamilya sa labing menos magsilbing maayong panig-ingnan sa pailob.
12 Ang sambingay ni Jesus bahin sa anak nga mausikon naghatag kanato ug dugang katin-awan kon sa unsang paagi atong tan-awon ang maayo diha sa atong kaugalingong pamilya. Ang manghod nga lalaki mipauli human nga iyang gibiyaan ang iyang mausikong kinabuhi. Ang amahan nagpakitag kaluoy kaniya. Unsay reaksiyon sa amahan sa mga reklamo sa magulang nga anak nga wala gayod mobiya sa iyang pamilya? Namulong ngadto sa iyang magulang nga anak, ang amahan miingon: “Anak, ikaw sa kanunay kauban nako, ug ang tanang butang nga akoa imoha man.” Kini dili masakit nga pangasaba kondili pagkompirmar lang sa gugma sa amahan. “Angay lamang nga kita maglipay ug magmaya,” siya nagpadayon, “tungod kay kining imong igsoong lalaki namatay ug nabuhi pag-usab, ug siya nawala ug nakaplagan.” Sa susama kita usab magpadayon sa pagtan-aw kon unsay maayo diha sa uban.—Lucas 15:11-32.
Diha sa Kristohanong Kongregasyon
13, 14. Unsa ang usa ka paagi sa pagpadapat sa harianong balaod sa gugma diha sa Kristohanong kongregasyon?
13 Ingong mga Kristohanon, kita nagtinguha nga mapadapat ang harianong balaod sa gugma. (Santiago 2:1-9) Tinuod, tingali atong gidawat ang mga membro sa atong kongregasyon kansang materyal nga kahimtang lahi kay sa atoa. Apan kita ba adunay “pagpihig” binase sa rasanhon, kultural, o bisan relihiyoso nga mga gigikanan? Kon mao, sa unsang paagi nato patalinghogan ang tambag ni Santiago?
14 Ang pag-abiabi sa tanan nga motambong sa Kristohanong mga tigom maoy pamatuod sa atong bukas nga kasingkasing. Kon kita maoy mouna sa pagpakig-estorya sa mga bag-ohang motambong sa Kingdom Hall, ang ilang bationg kakulba o kaulaw sa sinugdanan lagmit nga mawala. Ang tinuod, ang uban nga mitambong ug Kristohanong tigom sa unang higayon miingon: “Ang tanan mahigalaon kaayo. Morag akong kaila nang daan ang tanan. Relaks kaayo ko.”
15. Sa unsang paagi ang mga batan-on diha sa kongregasyon matabangan sa pagpakitag interes sa mga edaran?
15 Diha sa ubang mga kongregasyon, ang pipila ka batan-on magtapoktapok tingali sa sulod o gawas sa Kingdom Hall pagkahuman sa tigom, nga naglikay nga makig-uban sa mga edaran. Unsang positibong lakang ang mahimo aron mabuntog kini nga hilig? Siyempre, ang unang lakang mao nga ang mga ginikanan magbansay sa ilang mga anak diha sa balay, nga tudloan sila nga mangandam alang sa mga tigom. (Proverbio 22:6) Mahimong hatagan silag trabaho sa pag-andam sa lainlaing mga publikasyon aron ang tanan dunay kompletong gamit nga kinahanglang dad-on sa mga tigom. Ang mga ginikanan usab mao gayod ang angay nga modasig sa ilang mga anak sa pagpakig-estorya sa mga edaran ug sa maluyahon diha sa Kingdom Hall. Ang mga bata mobatig katagbaw tungod kay duna silay mapuslanong ikasulti sa maong mga igsoon.
16, 17. Sa unsang paagi tan-awon sa mga hamtong ang maayo diha sa mga batan-on sa kongregasyon?
16 Ang edarang mga igsoon kinahanglang magpakitag interes sa mga batan-on diha sa kongregasyon. (Filipos 2:4) Mahimong silay mouna sa pagpakig-estorya sa mga batan-on sa makapadasig nga paagi. Kasagaran dunay talagsaong mga punto nga hisgotan panahon sa tigom. Ang mga batan-on mahimong pangutan-on kon naikag ba sila sa tigom ug kon duna bay mga punto nga giapresyar gayod nila nga mahimong ikapadapat. Ingong hinungdanong bahin sa kongregasyon, ang mga batan-on kinahanglang apresyahon tungod sa ilang pagpatalinghog ug maayo ug kinahanglang dayegon sa bisan unsang gihatag nilang komento panahon sa tigom o sa bisan unsang bahin nila sa programa. Ang paagi sa mga batan-on sa pagpakiglabot sa mga edaran diha sa kongregasyon ug ang ilang pag-atiman sa yanong mga buluhaton sa balay magpasundayag nga sila dakog purohan nga makapangabaga ug mas dagkong mga responsabilidad sa kinabuhi sa ulahi.—Lucas 16:10.
17 Pinaagi sa pagdawat ug responsabilidad, ang ubang mga batan-on mouswag sa punto diin ang ilang espirituwal nga mga hiyas nagpaposible kanila sa pagdawat ug mas hinungdanong mga buluhaton. Ang pagkapuliki mahimong makatabang usab sa pagpukgo sa binuang nga paggawi. (2 Timoteo 2:22) Ang maong mga buluhaton maoy ‘pagsulay kon angayan ba’ ang mga igsoong lalaki nga nagtinguha sa pag-alagad ingong ministeryal nga mga alagad. (1 Timoteo 3:10) Ang ilang pagkaabtik nga makigbahin sa mga tigom ug ang ilang kasibot diha sa ministeryo, maingon man ang ilang personal nga interes ngadto sa tanan diha sa kongregasyon, motabang sa mga ansiyano nga makita ang ilang potensiyal sa dihang magtimbangtimbang kon hatagan ba silag dugang nga mga buluhaton.
Tan-awa ang Maayo Diha sa Tanan
18. Unsang lit-ag sa pagpanghukom ang kinahanglang likayan, ug ngano?
18 “Ang pagpihigpihig sa paghukom dili maayo,” nag-ingon ang Proverbio 24:23. Usa ka kinahanglanon alang sa mga ansiyano nga ipasundayag ang kaalam sa Diyos pinaagi sa paglikay sa pagpihigpihig sa dihang maghukom sa sulod sa kongregasyon. Si Santiago nag-ingon: “Ang kaalam nga gikan sa itaas maoy una sa tanan putli, unya makigdaiton, makataronganon, andam mosunod, tugob sa kaluoy ug maayong mga bunga, dili mapihigpihigon, dili salingkapaw.” (Santiago 3:17) Dayag nga samtang nagtan-aw sa maayo diha sa uban, kinahanglang paneguroon sa mga ansiyano nga ang ilang paghukom dili mabutaan sa ilang personal nga mga relasyon o emosyon. “Ang Diyos nagpahimutang sa iyang kaugalingon diha sa katigoman sa Diyos,” misulat ang salmista nga si Asap. “Sa taliwala sa mga diyos [o sa laing pagkahubad “mga samag diyos,” nga nagtumong sa mga tawong maghuhukom] siya magahukom: ‘Hangtod kanus-a ba nga magpadayon kamo sa paghukom nga walay hustisya ug sa pagpakita ug pagpalabi sa mga daotan?’” (Salmo 82:1, 2) Busa, gilikayan sa Kristohanong mga ansiyano ang bisan unsang kiling sa paboritismo diin nalangkit ang usa ka higala o paryente. Niining paagiha ilang mapatunhay ang panaghiusa sa kongregasyon ug dili mababagan ang pag-agos sa espiritu ni Jehova.—1 Tesalonica 5:23.
19. Sa unsang mga paagi atong matan-aw ang maayo diha sa uban?
19 Sa dihang magtan-aw kon unsay maayo diha sa atong mga igsoon, atong gipabanaag ang tinamdan ni Pablo sa dihang namulong siya ngadto sa kongregasyon sa Tesalonica. Siya miingon: “Dugang pa, kami masaligon sa Ginoo maylabot kaninyo, nga kamo nagbuhat ug nagpadayon sa pagbuhat sa mga butang nga among gisugo.” (2 Tesalonica 3:4) Mas mokiling kita sa pagpalabay sa sayop sa uban kon atong tan-awon ang maayo diha kanila. Mangita kita ug mga paagi nga atong madayeg ang atong mga igsoon, nga maglikay gayod sa hinawayong espiritu. “Ang gipangita diha sa mga piniyalan,” misulat si Pablo, “mao nga ang usa ka tawo makaplagang matinumanon.” (1 Corinto 4:2) Dili lamang ang pagkamatinumanon niadtong mga piniyalan sa kongregasyon kondili sa tanan natong Kristohanong mga igsoon ang maghimo kanila nga hiligugmaon kanato. Sa ingon kita mas masuod pa kanila, nga nagpalig-on sa mga bugkos sa Kristohanong panaghigalaay. Kita nagbaton ug tinamdan nga sama sa gipakita ni Pablo ngadto sa mga igsoon sa iyang adlaw. Sila maoy “mga isigkamagbubuhat sa gingharian sa Diyos” ug “makapalig-on nga tabang” kanato. (Colosas 4:11) Sa ingon atong gipasundayag ang tinamdan ni Jehova.
20. Unsang mga panalangin ang maangkon niadtong nagtan-aw kon unsay maayo diha sa tanan?
20 Kita moampo sama gayod sa pag-ampo ni Nehemias: “Hinumdomi ako, Oh Diyos ko, alang sa kaayohan.” (Nehemias 13:31) Pagkadako sa atong kalipay nga si Jehova nagtan-aw kon unsay maayo diha sa mga tawo! (1 Hari 14:13) Hinaot nga ingon usab niana kita magpakiglabot sa uban. Ang pagbuhat niana maghatag kanato ug paglaom nga matubos ug maangkon ang kinabuhing dayon diha sa bag-ong kalibotan nga haduol na kaayo karon.—Salmo 130:3-8.
Unsaon Nimo Pagtubag?
• Unsay pasikaranan ni Jehova sa pagpakitag pagkamaayo ngadto sa tanan?
• Sa unsang paagi atong tan-awon ang maayo diha sa tanan
• diha sa atong ministeryo?
• diha sa atong pamilya?
• diha sa atong kongregasyon?
• diha sa tanan natong relasyon?
[Mga Pangutana sa Pagtuon]
[Hulagway sa panid 18]
Bisan pa sa pagdumot kanhi sa iyang mga igsoon kaniya, gitan-aw ni Jose ang maayo diha kanila
[Hulagway sa panid 19]
Ang pagsupak dili makapugong kanato sa pagpaningkamot sa pagtabang sa tanan
[Hulagway sa panid 20]
Bisan pa sa ilang kaagi, ang tanang anak ni Jacob nakadawat sa iyang mga panalangin
[Hulagway sa panid 21]
Abiabiha ang tanan diha sa Kristohanong mga tigom