Tunghaang Gilead—60 ka Tuig nga Nagbansay ug mga Misyonaryo

“TUNGOD sa among matukiong pagtuon sa Bibliya, nasuod kami kang Jehova ug nakakat-on ug dugang bahin sa iyang organisasyon. Pinaagi niini giandam kami alang sa pagkinabuhi diha sa langyawng teritoryo.” Mao kanay paghubit sa usa ka graduwado sa unang klase sa mga metodo sa iyang pagtuon sa Watchtower Bible School of Gilead. Sukad nga gisugdan kini 60 ka tuig kanhi, ang Tunghaang Gilead padayon nga nagpadala ug mga misyonaryo. Sa Marso 8, 2003, ang graduwasyon sa ika-114ng klase gihimo didto sa Watchtower Educational Center sa Patterson, New York. Ang 6,404 nga nagtigom diha sa awditoryum ug sa ubang mga lugar diin ang programa gipakita pinaagig telebisyon naminaw pag-ayo sa programa, nga naglakip ug mga pakigpulong, interbiyo, ug panaghisgot sa grupo.

Si Theodore Jaracz, membro sa Nagamandong Lawas sa mga Saksi ni Jehova, maoy tsirman. Ang iyang pangbukas nga mga pulong naghisgot bahin sa internasyonal nga mga tumatambong, nga gilangkoban ug mga bisita gikan sa Asia, sa Caribbeano, Sentral Amerika ug Amerika del Sur, ug Uropa. Nagbase sa iyang mga komento sa 2 Timoteo 4:5, gipasiugda ni Brader Jaracz ang pangunang buluhaton sa usa ka misyonaryong gibansay sa Gilead—ang ‘paghimo sa buluhaton sa usa ka tig-ebanghelyo.’ Sila magpamatuod sa kamatuoran pinaagi sa pagtudlo sa mga tawo bahin sa Bibliya.

Mga Estudyante Midawat ug Kataposang Instruksiyon

Ang unang misulti sa serye sa mugbong mga pakigpulong mao si John Larson, membro sa Komite sa Sanga sa Tinipong Bansa, nga naghisgot bahin sa makapalig-on-sa-pagtuo nga ulohang “Kon ang Diyos Dapig Kanato, Kinsa ang Batok Kanato?” (Roma 8:31) Gipatin-aw sa mamumulong ang Biblikanhong pasikaranan alang sa mga estudyante sa pagbaton ug bug-os nga pagsalig sa gahom ni Jehova sa pagtabang kanila sa pagbuntog sa bisan unsang babag nga tingali ilang maatubang sa ilang mga asaynment. Naggamit sa Roma 8:38, 39, gitambagan ni Brader Larson ang mga estudyante: “Hunong ug palandonga ang gahom nga gigamit sa Diyos alang kaninyo, ug hinumdomi nga walay bisan unsa nga makabalda sa personal nga pagbati ni Jehova alang kaninyo.”

Ang sunod nga mamumulong mao si Guy Pierce, usa ka membro sa Nagamandong Lawas. Iyang gipili ang tema nga “Hupting Malipayon ang Inyong mga Mata!” (Lucas 10:23) Iyang gipatin-aw nga mabati ang tinuod nga kalipay kon ang usa nakaila kang Jehova ug nakasabot sa iyang walay-kataposang katuyoan maingon man nakakita sa katumanan sa mga tagna sa Bibliya. Bisan asa sila moadto, ang mga estudyante padayon nga mobatig tinuod nga kalipay pinaagi sa paghupot sa ilang mga mata nga malipayon. Gidasig ni Brader Pierce ang mga graduwado sa pagpalandong pag-ayo sa kaayo ni Jehova ug sa pagsentro kanunay sa ilang hunahuna ug kasingkasing sa pagbuhat sa Iyang kabubut-on. Pinaagi sa padayong pagbaton ug positibong tinamdan, masagubang sa mga graduwado ang bisan unsang problema nga maatubang nila.—Salmo 77:12.

Dayon nadungog sa klase ang mga pagdasig agig panamilit gikan sa duha ka instruktor nga nagtudlo kanila adlaw-adlaw. “Ikaw ba Nagtinguha ug Himaya?” mao ang pangutana ni Lawrence Bowen diha sa ulohan sa iyang pakigpulong. Alang sa kadaghanang tawo, ang himaya mao ang pagbaton ug pagdayeg, kadungganan, ug kabantog. Apan, nasabtan ni salmistang Asap ang tinuod nga himaya—ang bililhong bahandi nga mao ang usa ka dungganong relasyon  uban kang Jehova. (Salmo 73:24, 25) Ang 48 ka estudyante nga migraduwar gidasig sa paghupot ug suod nga relasyon uban kang Jehova pinaagi sa pagpadayon sa matukiong pagtuon sa Bibliya. Ang mga manulonda “nangandoy sa pagsud-ong” sa mga detalye maylabot sa katumanan sa katuyoan ni Jehova pinaagi kang Kristo. (1 Pedro 1:12) Buot nilang makakat-on kutob sa mahimo bahin sa ilang Amahan aron ikapabanaag ang iyang himaya diha sa ilang mga asaynment nga hinatag sa Diyos. Dayon giawhag sa mamumulong ang mga estudyante sa paghimaya kang Jehova diha sa ilang mga asaynment ingong mga misyonaryo pinaagi sa pagtabang sa uban nga makaplagan ang bililhon kaayong bahandi.

Ang tigrehistro sa tunghaan, si Wallace Liverance, nagtapos sa unang serye sa mga pakigpulong pinaagi sa temang “Isulti ang Kaalam sa Diyos Ingong Sagradong Tinago.” (1 Corinto 2:7) Unsa kining diyosnong kaalam nga gihisgotan ni apostol Pablo panahon sa iyang misyonaryong pag-alagad? Kini mao ang maalamon ug gamhanang paagi ni Jehova sa pagpahinabog tibuok-kalibotang pakigdait ug panaghiusa. Kining maong kaalam nasentro diha kang Jesus. Imbes magsangyaw bahin sa pagpadapat sa Kristohanong mga prinsipyo diha sa suliran sa katilingban, gitabangan ni Pablo ang mga tawo nga masabtan kon sa unsang paagi tul-iron sa Diyos ang mga resulta sa sala ni Adan. (Efeso 3:8, 9) Giawhag sa mamumulong ang iyang mga mamiminaw: “Gamita  ang inyong pribilehiyo sa pag-alagad sama sa paggamit niini ni Pablo, kinsa nag-isip sa iyang misyonaryong asaynment ingong kahigayonan sa pagtabang sa mga tawo nga masabtan kon sa unsang paagi tumanon sa Maglalalang, si Jehova, ang iyang katuyoan pinaagi kang Jesus.”

Pagkahuman niini, gipangunahan ni Mark Noumair, laing instruktor sa Gilead, ang usa ka sadya nga panaghisgot uban sa ubay-ubayng mga estudyante sa klase. Ang temang “Ang Pagtuon sa Pulong sa Diyos Moresulta sa Pagkahimong Masibotong mga Ministro” nagpasiugda sa mga pulong ni Pablo sa Roma 10:10. Giasoy sa klase ang daghang kasinatian sa pag-alagad sa kanataran nga ilang naeksperyensiyahan samtang nagtungha. Ang ilang mga kasinatian nagpakita nga kon kita magtuon ug mamalandong sa Pulong sa Diyos, ang maayong mga butang maylabot kang Jehova nga Diyos ug sa iyang Gingharian magapuno sa atong kasingkasing ug mogawas kini sa atong mga ngabil. Sa lima ka bulan nga pagpuyo nila didto sa Watchtower Educational Center, ang mga estudyante nakasugod ug 30 ka panagtuon sa Bibliya sa balay uban sa interesadong mga tawo diha sa kanunayng-gisangyawan nga mga teritoryo sa kasikbit nga mga kongregasyon.

Misulti ang mga Hamtong

Panahon sa ilang pagtungha, napahimuslan sa mga estudyante ang pagpakig-uban sa mga membro sa pamilyang Bethel sa Tinipong Bansa. Ang mga membro sa kawani sa sanga nga si Robert Ciranko ug Robert P. Johnson miinterbiyo sa pipila ka karaan nga matinumanong mga alagad ni Jehova, lakip na sa nagapanawng mga magtatan-aw nga gihatagag linaing pagbansay nianang tungora diha sa Watchtower Educational Center. Ang tanan nga giinterbiyo maoy mga graduwado sa Gilead nga nakaalagad kanhi ingong mga misyonaryo. Makapadasig alang sa mga estudyante ug sa ilang mga pamilya ug mga higala ang pagkadungog ug mga pulong sa kaalam gikan niining eksperyensiyado nga espirituwal nga mga lalaki.

Mao kini ang pipila sa ilang mga tambag: “Magmapuliki kutob sa mahimo diha sa ministeryo ug sa kongregasyon.” “Ayaw isipa ang inyong kaugalingon nga hinungdanon kaayo. Kanunayng hunahunaa ang inyong katuyoan ingong misyonaryo, ug isipa ang lugar nga inyong ginaalagaran ingong inyong kaugalingong dapit.” Ang ubang mapuslanong mga komento nag-ilustrar kon sa unsang paagi ang pagbansay sa Gilead nagsangkap sa usa ka ministro alang sa maayong buhat, bisag asa pa siya iasayn. Ania ang pipila niini: “Nakakat-on kami sa pagtambayayongay ug pagtinabangay.” “Ang tunghaan nakatabang kanamo sa pagdawat ug bag-ong mga kultura.” “Gitudloan kami sa paggamit sa Kasulatan diha sa laing panglantaw.”

Si John E. Barr, dugay nang membro sa Nagamandong Lawas, naghatag sa pangunang pakigpulong sa maong programa. Ang iyang tema nga binase sa Kasulatan mao “Ang Ilang Tingog Miabot sa Tibuok nga Yuta.” (Roma 10:18) Siya nangutana, Natuman ba sa katawhan sa Diyos karon kining malisod nga tahas? Oo, natuman gayod nila! Niadtong 1881, ang mga magbabasa sa magasing Bantayanang Torre gipangutana: “Ikaw ba nagasangyaw”? Dayon gipahinumdoman sa mamumulong ang tanang tumatambong sa makasaysayanhong panawagan sa kombensiyon sa 1922 sa Cedar Point, Ohio, T.B.A.: “Imantala ang Hari ug ang iyang Gingharian!” Sa paglabay sa panahon, ang kasibot sa matinumanong mga alagad sa Diyos nagpalihok kanila sa pagwali sa kahibulongang mga kamatuoran sa Gingharian ngadto sa tanang kanasoran. Pinaagi sa pinatik nga mga basahon ug sa binaba, ang maayong balita nakaabot ngadto sa kinatumyang mga bahin sa gipuy-ang yuta—kining tanan maoy alang sa pagpasidungog ug pagdayeg kang Jehova. Sa makapadasig nga konklusyon, giawhag ni Brader Barr ang mga graduwado nga palandongon ang ilang mga panalangin, nga nag-ingon: “Adlaw-adlaw, sa dihang mag-ampo kamo kang Jehova diha sa inyong asaynment, pasalamati siya gikan sa kinailadman sa inyong kasingkasing tungod sa inyong bahin sa katumanan sa mga pulong, ‘Ang ilang tingog miabot sa tibuok nga yuta.’”

Human niini nga pakigpulong, gibasa ang mga pangomosta, ug gihatag sa tsirman ang mga diploma ngadto sa matag graduwado. Dayon, uban sa nagsagol nga mga pagbati sa kalipay ug kasubo nga biyaan ang ilang gimahal nga tunghaan, gibasa sa usa ka hawas sa klase ang kinasingkasing nga resolusyon alang sa Nagamandong Lawas ug sa pamilyang Bethel, nga nagpahayag sa determinasyon sa mga graduwado sa pagdayeg kang Jehova “sukad karon hangtod sa panahong walay tino.”—Salmo 115:18.

Among giampo nga kining mga graduwado makapasibo diha sa ilang bag-ong mga pinuy-anan ug makatabang sa pag-uswag sa buluhatong pagsangyaw sa tibuok kalibotan, sama sa nahimo niadtong nag-una kanila sulod na sa 60 ka tuig.

[Kahon sa panid 23]

ESTADISTIKA SA KLASE

Gidaghanon sa mga nasod nga gihawasan: 12

Gidaghanon sa mga nasod nga gipadalhan: 16

Gidaghanon sa mga estudyante: 48

Aberids nga edad: 34.4

Aberids nga katuigan sa kamatuoran: 17.6

Aberids nga katuigan sa bug-os-panahong ministeryo: 13.5

[Hulagway sa panid 24]

Ika-114 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.