Ang Gugma Hinungdanon

BISAN unsay edad, kultura, pinulongan, o rasa, ang tanang tawo nagkinahanglan gayod ug gugma. Kon dili matagbaw ang maong panginahanglan, sila dili magmalipayon. Usa ka medikal nga tigdukiduki misulat: “Ang gugma ug kasuod hinungdanon sa pagtino kon unsay makapahimo kanatong masakiton ug kon unsay makapahimo kanatong maayog panglawas, kon unsay magpahinabo ug kagul-anan ug kon unsay makahatag ug kalipay, kon unsay makapahimo kanatong mag-antos ug kon unsay makapaalim. Kon ang usa ka bag-ong tambal dunay susamang epekto, halos tanang doktor sa nasod morekomendar niana sa ilang mga pasyente. Sayop nga paagi sa pagtambal ang dili pagreseta niana.”

Apan, ang modernong katilingban, ilabina ang ahensiya sa balita ug ang popular nga mga sulondan, subsob nga naghatag ug dakong pagtagad sa bahandi, gahom, dungog, ug sekso inay kay sa tawhanong panginahanglan alang sa mainiton, mahigugmaon nga mga relasyon. Daghang edukador ang nagpasiugda sa sekular nga mga tumong ug mga karera, nga nagsukod sa kalamposan pinaagi sa nakab-ot sa usa ka tawo ug sa iyang posisyon diha sa katilingban. Tinuod, ang edukasyon ug ang pag-ugmad sa mga katakos sa usa hinungdanon, apan angay ba kining agpason uban ang ingon nianang determinasyon nga ang usa wala nay panahon alang sa pamilya ug mga higala? Ang usa ka edukadong magsusulat kaniadto nga usa ka alistong maniniid sa tawhanong kinaiyahan nagtandi sa gitugahan apan walay gugma nga tawo ngadto sa “usa ka banha nga tulonggong tumbaga o usa ka nagapangkaay nga piyangpiyang.” (1 Corinto 13:1) Ang maong mga tawo modato tingali, mahimo pa ganing bantogan, apan dili gayod tinuod nga malipayon.

Si Jesu-Kristo, kinsa may lalom nga pagsabot ug linaing pagmahal alang sa mga tawo, nag-isip sa gugma alang sa Diyos ug silingan ingong labing hinungdanon nga bahin sa iyang pagtulon-an. Siya miingon: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan. . . . Higugmaon mo ang imong silingan sama sa imong kaugalingon.” (Mateo 22:37-39) Kadto lamang mosunod niining mga pulonga ang tinuod nga mga sumusunod ni Jesus. Busa, siya miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:35.

Apan, sa unsang paagi ang gugma maugmad sa usa sa kalibotan karon? Ug sa unsang paagi ang mga ginikanan makatudlo ug gugma ngadto sa ilang mga anak? Ang sunod nga artikulo magtubag niining mga pangutanaha.

[Mga hulagway sa panid 3]

Usa ka hagit ang pag-ugmad ug gugma diha sa usa ka kalibotan nga gimandoan sa kadalo