Sugilanon sa Kinabuhi

Ang Pag-alagad sa Uban Makapahupay sa Pag-antos

SUMALA SA GIASOY NI JULIÁN ARIAS

Sa 1988, sa dihang nag-edad akog 40 anyos, ang kaugmaon sa akong propesyonal nga karera morag segurado kaayo. Ako mao ang rehiyonal nga direktor sa usa ka kompaniya nga may mga sanga sa nagkalainlaing mga nasod. Agig balos sa akong trabaho gihatagan akog mahalon nga awto, dakong suweldo, ug usa ka maluhong opisina diha sa sentro sa Madrid, Espanya. Nagpasumbingay pa gani ang kompaniya nga himoon ko nilang nasyonal nga direktor. Wala ko maamgohi niadto nga hapit nang mahitabo ang dakong kausaban sa akong kinabuhi.

USA ka adlaw nianang tuiga, giingnan ko sa akong doktor nga aduna koy multiple sclerosis, usa ka sakit nga walay pagkaayo. Hilabihan nakong guola. Sa ulahi, sa dihang nakabasa ako kon unsay mahimo sa multiple sclerosis ngadto sa usa ka tawo, nahadlok ako. a Morag ang akong kinabuhi naglatay sa usa ka lugas lanot. Unsaon nako pag-atiman ang akong asawa, si Milagros, ug ang akong tres-anyos nga anak lalaki, si Ismael? Sa unsang paagi kami makasagubang? Samtang nangapkap pa ako sa mga tubag niining mga pangutanaha, laing makapaguol nga kahimtang ang nahitabo.

Mga usa ka bulan human ko sultihi sa akong doktor bahin sa akong sakit, gipatawag ko sa akong superbisor ngadto sa iyang opisina ug giingnan ko nga ang kompaniya nagkinahanglag mga tawo nga “maayog panagway.” Ug ang usa ka tawo nga may makapaluya nga sakit—bisan sa unang mga ang-ang  niini—wala magpadayag sa maong panagway. Busa, dihadiha dayon, gipapahawa ko sa akong amo. Sa kalit lang, ang akong sekular nga karera natapos!

Atubangan sa akong pamilya, gipaningkamotan kong maisogon tan-awon, apan nangandoy kong mag-inusara, nga maghunahuna sa akong bag-ong mga kahimtang, ug mamalandong sa akong umaabot. Nakigbisog ako sa nagkadakong pagbati sa kahigwaos. Ang nakapaguol gayod kanako mao nga sa usa lang ka pagpamilok nahimo akong inutil sa panan-aw sa akong kompaniya.

Pagkakaplag ug Kusog Gikan sa Kahuyangan

Maayo na lang, niining makapaguol nga panahon, makasalig ako sa ubay-ubayng mga tinubdan sa kusog. Mga 20 ka tuig nga sayosayo pa, nahimo akong usa sa mga Saksi ni Jehova. Busa tim-os akong miampo kang Jehova bahin sa akong mga pagbati ug kawalay-kasegurohan bahin sa umaabot. Ang akong asawa, nga sama nakog relihiyon, maoy tinubdan kanunay sa kusog, ug gipaluyohan usab ako sa pipila ka suod nga mga higala kansang kalulot ug pagkamabination bililhon gayod kaayo.—Proverbio 17:17.

Ang pagbati nga aduna koy responsabilidad sa uban nakatabang usab. Gusto kong matutuon pag-ayo ang akong anak nga lalaki, tudloan siya, makigdula uban kaniya, ug bansayon siya diha sa buluhatong pagsangyaw. Busa dili ko angayng mawad-ag paglaom. Dugang pa, ako usa ka ansiyano sa usa sa mga kongregasyon sa mga Saksi ni Jehova, ug ang akong Kristohanong mga igsoong lalaki ug babaye didto nagkinahanglan sa akong pagpaluyo. Kon akong tugotan ang akong kasakitan nga mopahuyang sa akong pagtuo, unsang matanga sa panig-ingnan ang akong ikahatag ngadto sa uban?

Dili kalikayan nga nausab ang akong kinabuhi sa pisikal ug labot sa panalapi—sa ubang mga paagi mas milisod ang kinabuhi apan sa ubang mga paagi kini miarang-arang. Kas-a nakabati kog usa ka doktor nga miingon: “Ang sakit dili makadaot sa usa ka tawo; kondili, makapausab kini kaniya.” Ug akong nakat-onan nga ang mga kausaban dili pulos negatibo.

Una sa tanan, ang akong “tunok sa unod” nakatabang kanako sa pagsabot pag-ayo sa mga suliran sa panglawas sa ubang mga tawo ug sa pagsimpatiya kanila. (2 Corinto 12:7) Mas nasabtan nako kay sukad masukad ang mga pulong sa Proverbio 3:5: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot.” Labaw sa tanan, ang akong bag-ong mga kahimtang nagtudlo kanako kon unsa gayoy hinungdanon sa kinabuhi ug kon unsay makahatag ug tinuod nga katagbawan ug pagbatig pagtamod sa kaugalingon. Aduna pa akoy daghang mahimo diha sa organisasyon ni Jehova. Akong nadiskobrehan ang tinuod nga kahulogan sa giingon ni Jesus: “Adunay labaw nga kalipay sa paghatag kay sa pagdawat.”—Buhat 20:35.

Usa ka Bag-ong Kinabuhi

Wala madugay human madayagnos ang akong sakit, gidapit ako ngadto sa usa ka seminar sa Madrid diin ang Kristohanong mga boluntaryo gitudloan sa pag-ugmad sa kooperasyon tali sa mga doktor ug sa ilang Saksi nga mga pasyente. Sa ulahi, ang maong mga boluntaryo giorganisar ingong mga Hospital Liaison Committee. Alang kanako, ang maong seminar miabot gayod sa hustong panahon. Nakaplagan ko ang mas maayong karera, usa nga makahatag kanakog mas dakong katagbawan kay sa bisan unsang komersiyal nga trabaho.

Nahibaloan namo sa seminar nga ang bag-ong naporma nga mga Hospital Liaison Committee mobisita sa mga ospital, mointerbiyo sa mga doktor, ug mohimog mga pasundayag ngadto sa mga trabahante maylabot sa panglawas, ngatanan uban sa tuyo nga maugmad ang kooperasyon ug malikayan ang mga komprontasyon. Ang maong mga komite nagtabang sa mga isigka-Saksi sa pagpangitag mga doktor nga andam mohimog mga paagi sa pagtambal nga dili mogamit ug dugo. Siyempre, tungod kay wala akoy medikal nga pagbansay, kinahanglan kong masayod ug dugang bahin sa medikal nga mga termino, medikal nga mga prinsipyo, ug organisasyon sa ospital. Bisan pa niana, ang maong seminar nakapausab sa akong pagkatawo, nga nasangkapan  sa bag-ong hagit nga nakapahinam kanako.

Mga Pagduaw sa Ospital—Usa ka Tinubdan sa Katagbawan

Bisan tuod ug ang akong sakit inanay ug padayong nagpaluya kanako, ang akong responsabilidad ingong membro sa Hospital Liaison Committee midaghan. Gihatagan akog pensiyon tungod sa pagkabaldado, busa aduna akoy panahon nga mohimog mga pagduaw sa ospital. Bisan pa sa panagsang mga kahigawad, kining maong mga pagduaw napamatud-ang mas sayon ug mas magantihon kay sa akong gidahom. Bisan tuod ug ako karon kanunay nang mag-wheelchair, wala gayod kini mahimong dakong babag. Kanunay kong kuyogan sa usa ka kaubang membro sa komite. Gawas pa, ang mga doktor naanad na sa pagpakig-estorya sa mga tawo nga nag-wheelchair, ug usahay morag maminaw sila nga mas matinahoron sa dihang ilang mamatikdan ang paningkamot nga akong gihimo sa pagduaw kanila.

Sa miaging napulo ka tuig, nakaduaw na akog gatosan ka doktor. Ang uban andam nga motabang kanamo halos sukad gayod sa sinugdan. Si Dr. Juan Duarte—usa ka siruhano sa kasingkasing sa Madrid kinsa mapasigarbohong nagtahod sa tanlag sa pasyente—nagtanyag dayon sa iyang mga serbisyo. Sukad niadto, nakahimo na siya ug kapin sa 200 ka operasyon nga wala mogamit ug dugo nganha sa mga pasyenteng Saksi gikan sa daghang dapit sa Espanya. Latas sa katuigan, nagkadaghang doktor ang misugod sa pag-opera nga walay dugo. Ang among regular nga mga pagduaw may gikaamot, apan ang kauswagan maoy tungod usab sa medikal nga pag-uswag ug sa maayong mga resulta nga nakab-ot sa walay-dugo nga operasyon. Ug kombinsido kami nga gipanalanginan ni Jehova ang among mga paningkamot.

Ilabina akong nadasig sa sanong sa pipila ka siruhano sa kasingkasing nga nag-espesyalisar sa pagtambal sa mga bata. Sulod sa duha ka tuig ginaduaw namo ang usa ka tem sa duha ka siruhano ug ang ilang mga anestesiologo. Gihatagan namo silag medikal nga mga literatura nga nagpatin-aw kon unsay ginahimo sa ubang mga doktor niini nga natad. Ang among mga paningkamot gigantihan niadtong 1999 panahon sa Medical Conference on Infantile Cardiovascular Surgery. Ang duha ka siruhano—nga gipangunahan sa usa ka kooperatibong siruhano nga taga-Inglaterra—mihimo ug lisod kaayong operasyon diha sa usa ka bata sa Saksi kansang balbula sa dakong ugat kinahanglang bag-ohon. b Nalipay ako uban sa mga ginikanan sa dihang ang usa sa mga siruhano migawas sa lawak operahanan ug nagpahibalo nga malamposon ang operasyon ug gitahod ang tanlag sa pamilya. Karon kining duha ka siruhano regular nang modawat ug mga pasyente nga Saksi gikan sa tibuok Espanya.

Ang nakaplagan kong makapatagbaw gayod bahin sa maong mga kahimtang mao ang pagkasayod nga makatabang diay ako sa akong Kristohanong mga igsoon. Kasagaran, sa dihang kontakon nila ang Hospital Liaison Committee, usa kana sa kinalisorang mga panahon sa ilang kinabuhi. Nag-atubang silag operasyon, ug ang mga doktor diha sa lokal nga ospital dili-andam o dili-makahimo sa pagtambal kanila nga walay dugo. Apan, sa dihang nahibaloan sa mga igsoon nga dunay kooperatibong mga siruhano diha sa tanang medikal nga natad dinhi sa Madrid, sila nahupayan pag-ayo. Nakita nako nga nausab ang panagway sa usa ka igsoon gikan sa pagkamabalak-on ngadto pagkakalmado, tungod lang kay anaa kami sa iyang tupad diha sa ospital.

 Ang Kalibotan sa mga Huwes ug ang Medikal nga mga Prinsipyo

Sa di pa dugayng katuigan, ang mga membro sa mga Hospital Liaison Committee nagaduaw usab sa mga huwes. Panahon sa maong mga pagduaw, gihatagan namo silag publikasyon nga gitawag ug Family Care and Medical Management for Jehovah’s Witnesses, nga linaing gipatik aron sa paghatag kanilag kasayoran bahin sa atong baroganan maylabot sa paggamit sa dugo ug sa mabatonang dili-dugo nga medikal nga mga kapilian. Kinahanglanon gayod ang maong mga pagduaw, tungod kay kaniadto naandan na sa Espanya nga tugotan sa mga huwes ang mga doktor sa pag-abonog dugo bisag supak sa kabubut-on sa pasyente.

Ang lawak sa mga huwes maoy makapahingangha nga mga dapit, ug sa akong unang pagduaw, mibati akong gamay kaayo nga miagi sa mga pasilyo nga nag-wheelchair. Misamot pa gayod ang akong kaulaw sa dihang nadisgrasya mi ug nahulog ko gikan sa akong wheelchair ug napaluhod sa salog. Ang pipila ka huwes ug mga abogado nga nakakita sa akong kahimtang malulotong miduol ug mitabang kanako, apan naulaw gayod ako atubangan nila.

Bisag wala matino sa mga huwes ang among katuyoan sa pagduaw kanila, ang kadaghanan malulotong nagtagad kanamo. Ang unang huwes nga akong giduaw naghunahuna na diay sa among baroganan, ug miingon nga gusto niyang makigsulti pag-ayo kanamo. Sa among sunod nga pagduaw, siya mismo ang nagtulod sa akong wheelchair paingon sa iyang lawak ug naminaw pag-ayo. Ang maayong mga resulta gikan niining unang duaw nakadasig sa akong mga kauban ug kanako sa pagbuntog sa among kahadlok, ug sa wala madugay nakita namo ang dugang maayong mga resulta.

Niana gihapong tuiga, gibinlan namog kopya sa Family Care ang laing huwes, kinsa malulotong nag-abiabi kanamo ug misaad nga basahon niya ang maong impormasyon. Gihatag nako niya ang numero sa akong telepono engkaso nga kinahanglan mi niyang kontakon panahon sa usa ka emerhensiya. Duha ka semana sa ulahi giteleponohan ko niya ug miingon siya nga may lokal nga siruhano nga mihangyo kaniya nga mohatag ug awtorisasyon sa pag-abonog dugo nganha sa usa ka Saksi nga kinahanglang operahan. Gihangyo mi sa huwes nga tabangan siya sa pagpangitag solusyon nga magtahod sa tinguha sa Saksi nga dili maabonohag dugo. Wala ra kaayo mi maglisod sa pagpangitag laing ospital, diin malamposong gipahigayon sa mga siruhano ang operasyon nga walay dugo. Nalipay kaayo ang huwes sa pagkahibalo sa resulta, ug mipasalig siya nga mangita siyag susamang mga solusyon sa umaabot.

Panahon sa akong mga pagduaw sa ospital, ang pangutana bahin sa medikal nga mga prinsipyo sagad  motungha, sanglit gusto namong ipatagad sa mga doktor ang mga katungod ug tanlag sa pasyente. Gidapit ako sa usa ka kooperatibong ospital sa Madrid sa pag-apil sa kurso nga ilang ginatanyag maylabot sa mga prinsipyo. Kining kursoha nakapaarang kanako sa pagpresentar sa among binase-sa-Bibliya nga panglantaw ngadto sa daghang espesyalista niini nga natad. Nakatabang usab kini kanako sa pagsabot sa daghang malisod nga mga desisyon nga himoon sa mga doktor.

Usa sa mga magtutudlo sa kurso, si Propesor Diego Gracia, regular nga nag-organisar ug dungganong kurso alang sa mga graduwado maylabot sa mga prinsipyo alang sa Katsila nga mga doktor ug nahimong usa ka lig-ong tigpaluyo sa among katungod sa may-kasayorang pag-uyon maylabot sa mga pag-abonog dugo. c Ang among regular nga pakigkontak kaniya mitultol ngadto sa pagdapit sa pipila ka hawas sa sangang buhatan sa mga Saksi ni Jehova sa Espanya sa pagpatin-aw sa among baroganan ngadto sa graduwadong mga estudyante ni Propesor Gracia, nga ang uban kanila giila nga labing maayong mga doktor sa nasod.

Pagdawat sa Kamatuoran

Siyempre, kining makapatagbawng buluhaton alang sa mga isigkamagtutuo wala magsulbad sa tanan kong personal nga mga problema. Ang akong sakit migrabe pa gayod. Apan, maayo na lang kay aktibo ang akong hunahuna. Tungod sa akong asawa ug anak nga lalaki, kinsa wala gayod moreklamo, makadumala gihapon ako sa akong mga responsabilidad. Kon wala pa ang ilang tabang ug pagpaluyo, dili ko gayod kini mahimo. Dili gani nako ikataod ang butones sa akong karsones o ikasul-ob ang akong amerkana. Malipay gayod ako sa pagsangyaw matag Sabado uban sa akong anak, si Ismael, kinsa magtulod sa akong wheelchair aron ikaestorya nako ang nagkalainlaing mga tagbalay. Ug maatiman gihapon nako ang akong mga katungdanan ingong ansiyano sa kongregasyon.

Aduna akoy pipila ka makapasubo nga mga yugto sulod sa miaging 12 ka tuig. Usahay, ang pagkasayod kon sa unsang paagi ang akong depekto sa lawas nakaapektar sa akong pamilya nakahatag kanakog mas dakong kasakit kay sa aktuwal nga sakit. Nahibalo ko nga sila nag-antos, apan giluom lamang nila kini. Dili pa dugay, sulod lang sa usa ka tuig, ang akong ugangang babaye ug ang akong amahan namatay. Nianang tuiga usab, dili na ako makahimo sa pagsuroysuroy nga walay wheelchair. Ang akong amahan, kinsa nagpuyo sa among balay, namatay gumikan sa laing makapaluya nga sakit. Si Milagros, kinsa maoy nag-atiman kaniya, mibati nga daw iyang nasaksihan kon unsay mahitabo kanako sa umaabot.

Apan, sa positibong bahin, ang among pamilya nagkahiusa sa pagsagubang sa mga kalisdanan. Bisan pag dili na ako rehiyonal nga direktor ug nag-wheelchair na lang, ang akong kinabuhi sa pagkatinuod mas maayo sa pagkakaron tungod kay bug-os kining gideboto alang sa pag-alagad sa uban. Ang paghatag makahupay sa pag-antos, ug gituman gayod ni Jehova ang iyang saad sa pagpalig-on kanamo sa panahon sa panginahanglan. Sama kang Pablo, ako makaingon gayod: “Sa tanang butang ako adunay kusog pinaagi kaniya nga naghatag ug gahom kanako.”—Filipos 4:13.

[Mga footnote]

[Kahon sa panid 24]

Ang Hunahuna sa Usa ka Asawa

Alang sa usa ka asawa, malisod ang pagkinabuhi uban sa usa ka kapikas nga nag-antos sa multiple sclerosis—sa mental, emosyonal, ug sa pisikal nga paagi. Kinahanglan akong magmakataronganon sa kon unsay akong giplano nga himoon ug magmaandam sa pagsalikway sa wala-kinahanglanang kabalaka bahin sa umaabot. (Mateo 6:34) Bisan pa niana, ang pagkinabuhi uban ang pag-antos makapadayag sa kinamaayohang hiyas sa usa ka tawo. Ang among kaminyoon mas lig-on kay kaniadto, ug ang akong relasyon uban kang Jehova mas suod. Ang mga sugilanon sa kinabuhi sa uban nga anaa sa susamang malisod nga mga kahimtang nakapalig-on usab pag-ayo kanako. Gibati ko ang susamang katagbawan nga gibati ni Julián tungod sa iyang bililhong pag-alagad alang sa mga igsoon, ug akong nakaplagan nga si Jehova dili gayod magpakyas kanato, bisan pag ang matag adlaw magdalag bag-ong mga suliran.

[Kahon sa panid 24]

Ang Hunahuna sa Usa ka Anak nga Lalaki

Diha sa pagkamalahutayon ug positibong espiritu sa akong amahan, nakaplagan ko ang usa ka maayo kaayong panig-ingnan, ug mobati akong mapuslanon sa dihang ipaseyo nako siya sakay sa wheelchair. Nahibalo ako nga dili nako mahimo kanunay ang gusto nakong himoon. Ako karon usa na ka tin-edyer, apan kon mohamtong na unya ako, gusto nakong moalagad ingong membro sa Hospital Liaison Committee. Nahibalo ako gikan sa mga saad sa Bibliya nga temporaryo lamang ang pag-antos ug nga daghang igsoong lalaki ug babaye ang nag-antos ug labaw pa kay kanamo.

[Hulagway sa panid 22]

Ang akong asawa maoy tinubdan sa kusog alang kanako

[Hulagway sa panid 23]

Pagpakig-estorya sa siruhano sa kasingkasing nga si Dr. Juan Duarte

[Hulagway sa panid 25]

Ang akong anak ug ako nalipay nga magkauban sa pagsangyaw