“Kini Mihulip sa Kahaw-ang sa Akong Kasingkasing”

“SALAMAT kaninyo gikan sa kinahiladman sa akong kasingkasing tungod sa maanindot nga gasang Pakigsuod Kang Jehova. Kini mihulip sa kahaw-ang sa akong kasingkasing—ang panginahanglan nga mobati nga gihigugma ug gimahal ni Jehova. Gibati ko karon nga mas suod kang Jehova ug sa iyang minahal nga Anak. Buot kong sultihan ang tanan bahin niining libroha ug hatagag kopya ang tanan kong minahal.” Kana ang gibati sa usa sa mga Saksi ni Jehova bahin sa bag-ong 320-panid nga libro nga giluwatan sa “Masibotong mga Magmamantala sa Gingharian” Distritong mga Kombensiyon nga gihimo sa tuig 2002/03. Atong susihon ang pipila ka kinaiyahan niining bag-ong libro ug kon nganong kini gipatik.

Pipila ka Kinaiyahan sa Bag-ong Libro

Unsay unod niining bag-ong libro? Ang tanang impormasyon nga gipadayag sa duha ka tun-anang mga artikulo niining isyuha—ug daghan pa! Ang libro adunay 31 ka kapitulo, nga ang kada usa susamag gitas-on sa usa ka tun-anang artikulo sa Bantayanang Torre. Human sa introduksiyon ug sa unang tulo ka kapitulo, ang libro gibahin sa upat ka seksiyon, nga matag usa naghisgot sa matag usa sa pangunang mga hiyas ni Jehova. Gisugdan ang matag seksiyon sa sumaryo sa usa ka hiyas. Ang sunod nga pipila ka kapitulo naghisgot kon sa unsang paagi gipadayag ni Jehova ang maong hiyas. Ang kada seksiyon adunay usa ka kapitulo bahin kang Jesus. Ngano? Aw, si Jesus miingon: “Siya nga nakakita kanako nakakita usab sa Amahan.” (Juan 14:9) Kay si Jesus usa ka hingpit nga aninag ni Jehova, si Jesus mihatag kanato ug tin-aw nga mga panig-ingnan sa pagpadapat sa mga hiyas sa Diyos. Ang matag seksiyon gitapos pinaagi sa usa ka kapitulong nagtudlo kanato kon unsaon pagsundog kang Jehova sa pagpasundayag sa hiyas nga gihisgotan. Sa paghisgot sa mga hiyas ni Jehova, kining bag-ong libro nagkutlo sa matag basahon sa Bibliya.

Ang librong Pakigsuod kang Jehova naundan usab ug pipila ka espesyal nga mga kinaiyahan. Sugod sa kapitulo 2, ang matag kapitulo adunay usa ka kahon nga nag-ulohang “Mga Pangutana nga Palandongon.” Ang mga kasulatan ug mga pangutana nga gitagana dili para sa pagrepaso sa kapitulo. Hinunoa, kana gitagana sa pagtabang kanimo nga gamiton ang Bibliya sa pagpalandong pag-ayo sa ulohan. Gisugyot nga imong basahon pag-ayo ang matag usa sa mga teksto sa Kasulatan. Unya hinuktoki ang pangutana ug paningkamoti ang pagpadapat niana sa personal. Ang maong pamalandong makapukaw sa imong kasingkasing, nga makatabang kanimo nga masuod pa kang Jehova.—Salmo 19:14.

Ang mga dibuho sa librong Pakigsuod Kang Jehova gidukiduki pag-ayo ug gihimo aron makatudlo ug makatukmod. Ang napulog-pito ka kapitulo naundan ug matahom ug tibuok-panid nga mga hulagway sa Biblikanhong mga esena.

Nganong Gipatik?

Nganong gipatik ang librong Pakigsuod Kang Jehova? Ang pangunang katuyoan niining bag-ong basahon mao ang pagtabang kanato nga mas makaila kang Jehova aron maugmad nato ang mas lig-ong personal nga relasyon uban sa atong Diyos.

May mahunahunaan ka ba nga makabatog kaayohan sa librong Pakigsuod Kang Jehova, tingali usa ka estudyante sa Bibliya o bisan usa ka dili-aktibong Kristohanong igsoong lalaki o babaye? Komosta ka man—gisugdan na ba nimog basa kining bag-ong libro? Kon wala pa, nganong dili mag-eskedyul ug panahon nga masugdan kana pagbasa sa labing madaling panahon? Paggahin ug panahon sa pagpalandong sa imong nabasa. Hinaot kining bag-ong basahon makatabang kanimo nga mas masuod kang Jehova nga Diyos, aron imong imantala ang maayong balita sa iyang Gingharian uban ang mas dakong kalipay ug kasibot!