Kon sa Unsang Paagi Maugmad ang Tinuod nga Gugma

“Ang gugma mao ang tambal sa tanang balatian; ang gugma maoy kinabuhi.”—Living to Purpose, ni Joseph Johnson, 1871.

SA UNSANG paagi ang tawo makakat-on sa paghigugma? Pinaagi sa pagtuon ug sikolohiya? Pinaagi sa pagbasag mga librong giya sa pag-ugmad sa personalidad? Pinaagi sa pagtan-aw ug romantikong mga salida? Dili gayod. Ang mga tawo unang makakat-on sa paghigugma pinaagi sa panig-ingnan ug pagbansay sa ilang mga ginikanan. Ang mga bata makakat-on sa kahulogan sa gugma kon, diha sa usa ka palibot nga dunay mainitong pagmahal, ilang makita ang ilang mga ginikanan nga nagpakaon ug nanalipod kanila, nakigsulti kanila, ug nagpakita ug personal nga kaikag kanila. Makakat-on usab sila sa paghigugma sa dihang ang ilang mga ginikanan magtudlo kanila sa pagsunod sa maayong mga prinsipyo sa kon unsay husto ug sayop.

Ang tinuod nga gugma labaw pa kay sa taphaw lamang nga emosyon. Kini kanunayng molihok alang sa labing ikaayo sa uban, bisan pag dili nila bug-os nga masabtan kana nianang panahona, nga kasagarang maoy kahimtang sa mga bata sa dihang gipahamtang ang mahigugmaong pagdisiplina. Ang usa ka maayo kaayong panig-ingnan sa usa nga nagpakitag dili-mahakogong gugma mao ang Maglalalang mismo. Si apostol Pablo misulat: “Anak ko, ayaw pakamenosa ang disiplina gikan ni Jehova, ni maluya sa dihang ikaw tul-iron niya; kay ang gihigugma ni Jehova iyang ginadisiplina.”—Hebreohanon 12:5, 6.

Mga ginikanan, sa unsang paagi masundog ninyo si Jehova sa pagpakitag gugma ngadto sa inyong pamilya? Ug unsa ka hinungdanon ang panig-ingnan nga gihatag ninyo diha sa inyong relasyon sa usag usa ingong bana ug asawa?

Pagtudlo ug Gugma Pinaagi sa Panig-ingnan

Kon ikaw usa ka bana, ikaw ba may pagtamod, o nagpabili pag-ayo, sa imong asawa ug nagpasidungog ug nagtahod kaniya? Kon ikaw usa ka asawa, ikaw ba mahigugmaon ug mapaluyohon sa imong bana? Ang Bibliya nag-ingon nga ang bana ug asawa kinahanglang mahigugma ug magtahod sa usag usa. (Efeso 5:28; Tito 2:4) Kon buhaton nila kana, ang ilang mga anak makakita mismo nga aktibong nagalihok ang Kristohanong gugma. Pagkaepektibo ug pagkabililhon nga pagtulon-an kana!

Ang mga ginikanan makapasiugda usab ug gugma diha sa panimalay sa dihang sila mosunod sa hataas nga mga sukdanan alang sa pamilya maylabot sa mga butang sama sa kalingawan, moralidad, ug mga tumong ug prioridad. Sa tibuok kalibotan, nakaplagan sa mga tawo nga ang Bibliya maoy dakong tabang sa paghatag nianang maong mga sukdanan sa pamilya, ug sila mismo maoy buhing pamatuod nga ang Bibliya tinuod nga “inspirado sa Diyos  ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.” (2 Timoteo 3:16) Sa pagkatinuod, ang moral nga mga balaod ug giya sa kinabuhi nga makaplagan bisan diha lamang sa Wali sa Bukid kaylap nga giisip nga dili hitupngan.—Mateo, mga kapitulo 5 ngadto sa 7.

Sa dihang ang tibuok pamilya modangop sa Diyos alang sa giya ug mosunod sa iyang mga sukdanan, ang matag tawo mobating mas may kasegurohan ug ang mga anak mas lagmit nga magdako nga nahigugma ug nagtahod sa ilang mga ginikanan. Sa kaatbang, diha sa panimalay nga dunay doble, dili-husto, o luag nga mga sukdanan, ang mga bata mahimong mayugot, masuko, ug mahimong rebelyoso.—Roma 2:21; Colosas 3:21.

Komosta ang nag-inusarang mga ginikanan? Dako ba ang ilang disbentaha sa pagtudlo ug gugma ngadto sa ilang gagmayng mga anak? Dili kanunayng ingon niana. Bisan tuod wala nay mas maayo pa kay sa pagtambayayongay sa maayong inahan ug amahan, gipakita sa kasinatian nga ang kalidad sa mga relasyon sa pamilya sa usa ka sukod makapuli sa ginikanan nga wala diha. Kon ikaw usa ka nag-inusarang ginikanan, paningkamot sa pagpadapat sa mga prinsipyo sa Bibliya diha sa imong panimalay. Oo, usa ka proverbio nag-ingon: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan”—lakip na sa alagianan sa pagkaginikanan.—Proverbio 3:5, 6; Santiago 1:5.

Daghang batan-on ang gimatuto diha sa usay-ginikanan nga palibot ug sa pagkakaron matinumanong nagaalagad sa Diyos diha sa libolibong Kristohanon nga mga kongregasyon sa mga Saksi ni Jehova sa tibuok kalibotan. Kini maoy pamatuod nga ang nag-inusarang mga ginikanan mahimong molampos usab sa pagtudlo sa ilang mga anak bahin sa gugma.

Kon sa Unsang Paagi ang Tanan Makaugmad ug Gugma

Gitagna sa Bibliya nga ang “kataposang mga adlaw” pagatiman-an sa kakulang sa “kinaiyanhong pagbati,” sa ato pa, kakulang sa kinaiyanhong kasuod nga kasagarang nabatonan sa mga membro sa pamilya alang sa usag usa. (2 Timoteo 3:1, 3) Apan, bisan kadtong nagdako tingali sa usa ka palibot nga kulang sa kinaiyanhong pagbati makakat-on sa pag-ugmad ug gugma. Sa unsang paagi? Pinaagi sa pagkat-on gikan kang Jehova, kinsa mao ang mismong Tuboran sa gugma ug kinsa nagpasundayag ug gugma ug pagmahal ngadto sa tanan nga tibuok-kasingkasing nga modangop kaniya. (1 Juan 4:7, 8) “Kon ugaling biyaan ako sa akong amahan ug sa akong inahan, si Jehova mismo magsagop kanako,” miingon ang usa ka salmista.—Salmo 27:10.

Gipakita ni Jehova ang iyang gugma kanato diha sa daghang nagkalainlaing mga paagi. Naglakip kini sa inamahan nga giya pinaagi sa Bibliya, tabang sa balaang espiritu, ug sa mainitong pagpaluyo sa Kristohanong mga igsoon. (Salmo 119:97-105; Lucas 11:13; Hebreohanon 10:24, 25) Tagda kon sa unsang paagi kining tulo ka pagpahayag sa gugma sa Diyos makatabang kanimo sa pagpauswag sa imong gugma sa Diyos ug sa silingan.

Inspiradong Inamahan nga Giya

Aron maugmad ang mainitong bugkos uban sa usa ka persona, kinahanglang masinati nato siya pag-ayo. Pinaagi sa pagpadayag sa iyang kaugalingon diha sa mga panid sa Bibliya, si Jehova nag-awhag kanato sa pagpakigsuod kaniya. Apan, dili pa igo ang pagbasa sa Bibliya. Kinahanglang ipadapat nato ang mga pagtulon-an ug masinati ang mga benepisyo nga moresulta. (Salmo 19:7-10) “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan,” nag-ingon ang Isaias 48:17. Oo, si Jehova, ang personipikasyon sa gugma, nagtudlo kanato alang sa atong kaayohan—dili  tungod kay gusto niyang kutohan ang atong kagawasan pinaagig wala-kinahanglanang mga balaod ug mga lagda.

Ang tukmang kahibalo sa Bibliya makatabang usab kanato nga mouswag ang atong gugma alang sa atong mga isigkatawo. Tungod kini kay ang kamatuoran sa Bibliya nagtudlo kanato sa panglantaw sa Diyos sa mga tawo ug nagpakita kanato sa mga prinsipyo nga angayng mogahom sa atong mga pakiglabot sa usag usa. Uban nianang maong impormasyon, kita adunay lig-ong sukaranan sa pag-ugmad ug gugma sa silingan. Si apostol Pablo miingon: “Mao kini ang padayon ko nga ginaampo, nga ang inyong gugma mosamot pa sa pagdagaya uban ang tukmang kahibalo ug bug-os nga katakos sa pag-ila.”—Filipos 1:9.

Sa pag-ilustrar kon sa unsang paagi ang gugma hustong ikapakita pinaagi sa “tukmang kahibalo,” tagda ang sukaranang kamatuoran nga giingon diha sa Buhat 10:34, 35: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” Kon ginahukman sa Diyos ang mga tawo sumala sa ilang matarong nga mga panggawi ug diyosnong kahadlok, dili sumala sa ilang nasyonalidad o rasa, dili ba nato angayng lantawon ang atong isigkatawo uban ang susamang pagkadili-mapihigon?—Buhat 17:26, 27; 1 Juan 4:7-11, 20, 21.

Gugma—Usa ka Bunga sa Espiritu sa Diyos

Maingon nga ang pag-ulan sa hustong panahon makatabang sa prutasan sa pagpamunga ug daghan, ang espiritu sa Diyos makapatungha diha sa madinawaton nga mga tawo ug mga hiyas nga gihubit sa Bibliya ingong “bunga sa espiritu.” (Galacia 5:22, 23) Ang pangunang bunga mao ang gugma. (1 Corinto 13:13) Apan sa unsang paagi mabatonan nato ang espiritu sa Diyos? Ang usa ka hinungdanong paagi mao ang pag-ampo. Kon mag-ampo kita alang sa espiritu sa Diyos, ihatag niya kini kanato. (Lucas 11:9-13) Ikaw ba “padayon” nga nagaampo alang sa balaang espiritu? Kon gibuhat nimo kana, nan ang bililhong bunga niini, lakip na ang gugma, angay nga mas madayag pa diha sa imong kinabuhi.

Apan, dunay laing matang sa espiritu nga nagalihok batok sa espiritu sa Diyos. Gitawag kini sa Bibliya ug “espiritu sa kalibotan.” (1 Corinto 2:12; Efeso 2:2) Kini maoy daotang impluwensiya, ug ang tuboran niini walay lain kondili si Satanas nga Yawa, ‘ang magmamando niining kalibotan’ sa katawhan nga nahimulag sa Diyos. (Juan 12:31) Sama sa hangin nga moukay sa abog ug sagbot, “ang espiritu sa kalibotan” magpukaw sa makadaot nga mga tinguha nga modaot sa gugma ug magtagbaw sa mga kahuyangan sa unod.—Galacia 5:19-21.

Makuha sa mga tawo kanang daotang espiritu sa dihang iladlad nila ang ilang kaugalingon sa materyalistiko, ako-una nga panghunahuna, sa pintas nga mga tinamdan, ug sa hiwi ug kasagarang tinuis nga panglantaw sa gugma nga komon kaayo sa kalibotan. Kon buot nimong motubo diha sa tinuod nga gugma, kinahanglang pakigbisogan nimo ang espiritu sa kalibotan. (Santiago 4:7) Apan, ayaw pagsalig sa imong kaugalingong kusog; pangayog tabang kang Jehova. Ang iyang espiritu—ang labing gamhanang puwersa sa uniberso—makapalig-on kanimo ug magpalampos kanimo.—Salmo 121:2.

Pagkat-on ug Gugma Gikan sa Kristohanong mga Igsoon

Maingon nga ang mga bata makakat-on sa pagpakitag gugma pinaagi sa pagkasinati niini diha sa  balay, kitang tanan—bata ug tigulang—mahimong motubo diha sa gugma pinaagi sa pagpakig-uban sa ubang mga Kristohanon. (Juan 13:34, 35) Sa pagkatinuod, ang usa sa pangunang mga buluhaton sa Kristohanong kongregasyon mao ang pagtagana ug usa ka palibot diin ang mga indibiduwal makahimo sa “pagdasig sa usag usa ngadto sa paghigugma ug sa maayong mga buhat.”—Hebreohanon 10:24, New International Version.

Ang maong gugma ilabinang gipabilhan niadto tingaling “pinanitan ug nagkatibuagsa” diha sa walay-gugma nga kalibotan palibot nato. (Mateo 9:36) Gipakita sa kasinatian nga ang mahigugmaong mga relasyon sa panahon sa pagkahamtong makabuntog sa daghang dili-maayong mga epekto sa panahon sa pagkabata nga gihikawan sa gugma. Busa, pagkahinungdanon nga ang tanang dedikadong mga Kristohanon magpakita ug kinasingkasing gayod nga pag-abiabi sa mga bag-ohan nga mosugod sa pagpakig-uban kanato!

“Ang Gugma Dili Gayod Mapakyas”

Ang Bibliya nag-ingon nga “ang gugma dili gayod mapakyas.” (1 Corinto 13:8) Sa unsang paagi? Giingnan kita ni apostol Pablo: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot.” (1 Corinto 13:4, 5) Klaro nga kining gugmaha dili kay hinanduraw lamang o taphaw nga pagbati. Sa kasukwahi—kadtong nagpakita niana nakaamgo ug miila sa mga kahigawad ug kasakit sa kinabuhi, apan wala nila kini tugoti nga mopahuyang sa ilang gugma alang sa isigkatawo. Ang maong gugma maoy “hingpit nga bugkos sa panaghiusa.”—Colosas 3:12-14.

Tagda ang pananglitan sa usa ka 17-anyos nga Kristohanong babaye sa Korea. Sa dihang nagsugod siya sa pag-alagad kang Jehova nga Diyos, ang iyang pamilya misupak ug kinahanglang mopahawa siya sa balay. Apan, imbes masuko, giampo niya ang maong butang, nga gitugotan ang Pulong sa Diyos ug espiritu nga moumol sa iyang panghunahuna. Human niana, kanunay siyang mosulat sa iyang pamilya, nga gipuno ang iyang mga sulat sa tinuod nga mainitong pagmahal nga iyang gibati alang kanila. Ingong sanong, ang iyang duha ka magulang nga lalaki misugod pagtuon sa Bibliya ug karon maoy dedikadong mga Kristohanon. Ang iyang inahan ug manghod nga lalaki midawat usab sa kamatuoran sa Bibliya. Sa kataposan, nausab ang tinamdan sa iyang amahan, kinsa misupak pag-ayo kaniadto. Ang Saksing babaye misulat: “Kaming tanan nangaminyo sa mga isigka-Kristohanon, ug karon duna nay 23 ka nahiusang mga magsisimba sa among pamilya.” Pagkadakong kadaogan sa gugma!

Buot ba nimong ugmaron ang tinuod nga gugma ug tabangan ang uban sa pagbuhat sa susama? Nan dangop kang Jehova, ang Tuboran nianang bililhong hiyas. Oo, sunda ang iyang Pulong, mag-ampo alang sa balaang espiritu, ug regular nga makig-uban sa Kristohanong mga igsoon. (Isaias 11:9; Mateo 5:5) Pagkamakapadasig ang pagkahibalo nga sa dili madugay ang tanang daotan mawala na, nga ang mahibilin mao lamang kadtong nagpakita ug tinuod nga Kristohanong gugma! Sa pagkatinuod, ang gugma mao ang yawi ngadto sa kalipay ug kinabuhi.—Salmo 37:10, 11; 1 Juan 3:14.

[Mga hulagway sa panid 6]

Ang pag-ampo ug pagtuon sa Pulong sa Diyos motabang kanato sa pag-ugmad ug tinuod nga gugma