Mga Pangutana Gikan sa mga Magbabasa

Sa Hebreohanon 2:14, nganong si Satanas gitawag man nga “ang usa nga may gahom sa pagpahinabog kamatayon”?

Sa laktod, gipasabot ni Pablo nga si Satanas, sa personal o pinaagi sa iyang mga ahente, makapahinabog kamatayon sa mga tawo. Uyon niana, ginganlan ni Jesus si Satanas nga “usa ka mamumuno sa iyang pagsugod.”—Juan 8:44.

Ang sayop nga pagsabot basin motungha mahitungod sa Hebreohanon 2:14 tungod sa paagi sa paghubad sa pipila ka hubad sa Bibliya, nga nag-ingong si Satanas adunay “gahom sa kamatayon” o “gahom ibabaw sa kamatayon.” (King James Version; Revised Standard; New International Version; Jerusalem Bible) Ang maong mga hubad daw nagpakita nga si Satanas adunay walay-kinutobang katakos sa pagpatay sa tanan nga iyang magustohan. Apan, dili kana tinuod. Kay kon mao pa, lagmit dugay na kaayo niyang gilampornas ang mga magsisimba ni Jehova sa nawong sa yuta.—Genesis 3:15.

Ang Gregong ekspresyon nga gihubad “gahom ibabaw sa kamatayon” diha sa ubang mga hubad ug ang “may gahom sa pagpahinabog kamatayon” diha sa New World Translation maoy “kraʹtos tou tha·naʹtou.” Ang tou tha·naʹtou maoy ekspresyon nga nagkahulogang “kamatayon.” Ang kraʹtos sa paninugdan nagkahulogang “puwersa, kusog, gahom.” Sumala sa Theological Dictionary of the New Testament, nagpasabot kini sa “presensiya ug kahinungdanon sa puwersa o kusog inay kay sa paggamit niini.” Busa, sa Hebreohanon 2:14, si Pablo wala magpasabot nga si Satanas adunay bug-os nga gahom ibabaw sa kamatayon. Hinunoa, iyang gipunting ang katakos ni Satanas o posibilidad nga siya magpahinabog kamatayon.

Sa unsang paagi gigamit ni Satanas ang iyang “gahom sa pagpahinabog kamatayon”? Sa basahon sa Job, atong mabasa ang usa ka kahimtang nga morag talagsaon. Ang asoy nag-ingon nga gigamit ni Satanas ang bagyo sa ‘pagpahinabog kamatayon’ sa mga anak ni Job. Apan, matikdi nga si Satanas nakahimo lamang niadto tungod sa pagtugot sa Diyos, nga gihatag tungod sa usa ka hinungdanong isyu nga gitino niadtong higayona. (Job 1:12, 18, 19) Sa pagkatinuod, si Satanas wala makahimo sa pagpatay kang Job. Wala siya tugoti sa paghimo niadto. (Job 2:6) Nagpakita kini nga bisag si Satanas usahay makapahinabog kamatayon sa matinumanong mga tawo, dili kita angayng mahadlok nga iya lamang kitang patyon bisan kanus-a niya gusto.

Si Satanas makapahinabo usab ug kamatayon pinaagi sa tawhanong mga ahente. Busa, daghang Kristohanon namatay tungod sa ilang pagtuo, ang uban gipatay sa napungot nga magubtanong mga tawo o dili-makataronganong gipatay tungod sa mando sa mga opisyal sa kagamhanan o hiwi nga mga maghuhukom.—Pinadayag 2:13.

Dugang pa, si Satanas magpahinabo usab ug kamatayon pinaagi sa pagpahimulos sa tawhanong mga kahuyangan. Balik sa mga adlaw sa Israel, gihulhogan ni propetang Balaam ang mga Moabinhon nga tentalon ang mga Israelinhon “nga dili magmatinumanon kang Jehova.” (Numeros 31:16) Hinungdan kadto nga namatay ang kapin sa 23,000 ka Israelinhon. (Numeros 25:9; 1 Corinto 10:8) Sa samang paagi, ang pipila karon mahulog sa “malipatlipatong mga kaugdahan” ni Satanas ug mahaylo sa seksuwal nga imoralidad o ubang dili-diyosnong mga panggawi. (Efeso 6:11) Tinuod, ang maong mga tawo dili dayon kawad-an sa ilang kinabuhi. Apan sila mameligro nga mawad-an sa walay kataposang kinabuhi, ug sa maong paagi si Satanas magpahinabo sa ilang kamatayon.

Bisan tuod atong giila ang posibilidad nga si Satanas magpahinabog kadaot, kita dili angayng sobrang mahadlok kaniya. Sa dihang si Pablo miingon nga si Satanas may gahom sa pagpahinabog kamatayon, siya usab miingon nga si Kristo namatay aron iyang “mawagtang [si Satanas] . . . ug nga iyang mapagawas ang tanan nga tungod sa kahadlok sa kamatayon nailalom sa pagkaulipon sa tibuok nilang kinabuhi.” (Hebreohanon 2:14, 15) Oo, gibayad ni Jesus ang halad lukat ug sa ingon nagpagawas sa matinuohong katawhan gikan sa pagkaulipon sa sala ug kamatayon.—2 Timoteo 1:10.

Siyempre, makapahinuklog ang paghunahuna nga si Satanas may gahom sa pagpahinabog kamatayon, apan kita makasalig nga si Jehova makawagtang sa bisan unsang kadaot nga ipahinabo ni Satanas ug sa iyang mga ahente. Si Jehova nagpasalig kanato nga ang nabanhaw nga si Jesus ‘magbungkag sa mga buhat sa Yawa.’ (1 Juan 3:8) Sa gahom ni Jehova, banhawon ni Jesus ang mga patay ug sa ingon magwagtang sa kamatayon mismo. (Juan 5:28, 29) Sa ngadtongadto, sa talagsaong paagi iyagyag ni Jesus ang kinutbanan sa gahom ni Satanas pinaagi sa pagtambog kaniya sa bung-aw. Sa kataposan si Satanas pagalaglagon sa bug-os.—Pinadayag 20:1-10.