Usa ka Video nga Motandog sa mga Kasingkasing sa mga Batan-on

DAGHANG batan-on ang nadasig sa pagsusi pag-ayo sa ilang panggawi sa dihang ilang natan-aw ang video nga Young People Ask—How Can I Make Real Friends? a Ang maong video naundan ug maayong Kasulatanhong tambag, personal nga mga pahayag sa Kristohanong mga batan-on, ug makapatandog nga modernong drama nga gibase sa asoy sa Bibliya bahin kang Dina. (Genesis, kapitulo 34) Ang mosunod nga mga pahayag bahin sa video naggikan sa Mexico.

Si Martha miingon: “Ang video nakatandog gayod sa akong kasingkasing. Morag gihimo kini alang gayod kanako. Abi nakog igo na alang sa akong mga magtutudlo ug sa akong mga eskolmet ang pagkahibalo nga ako usa sa mga Saksi ni Jehova. Napakyas ako sa pagpamatuod niana pinaagi sa pagsangyaw kanila. Mapasalamaton ako sa tanang impormasyon nga gitagana ni Jehova, ilabina sa dihang kini makapatandog pag-ayo kanamo sama sa gihimo niining maong video.”

Si Juan Carlos nag-ingon: “Kini nga video makapahunahuna gayod kanimo. Ingong usa ka batan-on, nakahimo akog mga kasaypanan ug susama kana sa ubang mga magdudula sa drama. Pipila ka tuig kanhi, nagkinabuhi akog dobleng kinabuhi, apan akong naamgohan nga ang maong pagkinabuhi magdalag daotang mga sangpotanan. Human matan-aw ang video, determinado akong magmatinumanon kang Jehova.”

Si Sulem miangkon: “Sa dihang gitan-aw nako ang video, natandog gayod ako. Kaniadto, mihunong na ako sa pagbasa sa Bibliya, ug wala na kaayo ko mag-ampo kang Jehova. Sa dihang gipamati nako ang mga pahayag sa mga batan-on diha sa video, natukmod ako sa pagsugod pag-usab sa pagtuon sa Bibliya ug sa pag-ampo kang Jehova.”

Ang mga batan-on karon nag-atubang ug daghang suliran, ug ang ilang pagpili ug mga higala sagad makaimpluwensiya kaayo kon unsaon nila sa pagkinabuhi. (Salmo 26:4; Proverbio 13:20) Ang video nga Young People Ask—How Can I Make Real Friends? nagatabang sa daghan sa paghimog maayong mga desisyon maylabot niini.

[Footnote]