Kahupayan Alang Niadtong Nagatuaw Alang sa Tabang

ANG Bibliya dili usa ka basahon sa mental nga kahimsog. Apan, kini mohatag kanato ug kahupayan ug motabang kanato sa pagpabili sa kinabuhi bisan pa sa mga suliran nga atong masagubang. Sa pagkatinuod, ang Kasulatan nag-ingon: “Ang tawo, nga natawo sa usa ka babaye, mubo ug kinabuhi ug tugob sa kasamok.” (Job 14:1) Ang atong pagkadili-hingpit maoy nakaingon sa uban natong mga pagsulay. Apan kinsay pangunang nakaingon sa tawhanong pag-antos?

Ang Bibliya nagpaila nianang usa ingong usa ka daotang espiritu nga gitawag ug Yawa ug Satanas. Siya mao ang “nagpahisalaag sa tibuok gipuy-ang yuta” ug nagpahinabo sa daghang suliran nga mihampak sa katawhan. Bisan pa niana, ang Bibliya nag-ingon usab nga ang iyang panahon hamubo na lamang. (Pinadayag 12:9, 12) Sa dili madugay ang tanang pag-antos nga gipahamtang ni Satanas sa mga molupyo sa yuta taposon pinaagi sa pagsalga sa Diyos. Sumala sa Bibliya, ang gisaad sa Diyos nga bag-ong kalibotan sa pagkamatarong magtapos sa kawalay-paglaom.—2 Pedro 3:13.

Pagkadakong kahupayan ang pagkahibalo nga ang tawhanong pag-antos maoy temporaryo! Ubos sa pagmando sa langitnong Gingharian sa Diyos sa mga kamot ni Jesu-Kristo, ang inhustisya ug pag-antos matapos. Mahitungod sa tinudlong Hari sa Diyos, ang Kasulatan nag-ingon: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.”—Salmo 72:12-14.

Ang panahon alang sa katumanan niining matagnaong mga pulong haduol na kaayo. Matagamtam nato ang kinabuhing walay kataposan diha sa usa ka paraisong yuta ilalom sa kahibulongang mga kahimtang. (Lucas 23:43; Juan 17:3) Ang kahibalo bahin niining makapahupay nga mga saad sa Kasulatan mohatag ug paglaom ug kahupayan niadtong nagatuaw alang sa tabang.

[Picture Credit Line sa panid 32]

Depressed girl: Photo ILO/J. Maillard