Kon Nganong Dili Mahimong Ilain Nato ang Atong Kaugalingon

“Ang duha mas maayo kay sa usa . . . Kon ang usa kanila mapukan, ang usa makabangon sa iyang kauban.”—Haring Solomon

SI Haring Solomon sa karaang Israel miingon: “Ang duha mas maayo kay sa usa, tungod kay sila adunay maayong balos alang sa ilang kahago. Kay kon ang usa kanila mapukan, ang usa makabangon sa iyang kauban. Apan unsaon na lamang sa usa nga mapukan kon walay lain nga magbangon kaniya?” (Ecclesiastes 4:9, 10) Sa ingon niini gipasiugda sa maalamong tigpaniid sa panggawi sa tawo ang atong panginahanglag panag-ubanay ug ang bili sa paglikay sa paglain sa atong kaugalingon. Apan, dili kini ordinaryong opinyon sa tawo. Ang mga pulong ni Solomon maoy bunga sa kaalam ug pagdasig sa Diyos.

Dili maalamon nga ilain nato ang atong kaugalingon gikan sa uban. Ang mga tawo nagkinahanglan sa usag usa. Kitang tanan nagkinahanglan sa kusog ug tabang nga atong makuha gikan sa ubang mga tawo. “Ang nagalain sa iyang kaugalingon mangita sa iyang hakog nga tinguha,” nag-ingon ang sanglitanan sa Bibliya. “Siya mobatok sa tanang praktikal nga kaalam.” (Proverbio 18:1) Busa dili ikahibulong nga ang mga siyentipiko nga nagtuon bahin sa tawhanong katilingban nagdasig sa mga tawo nga magpakig-uban sa usa ka grupo ug magpakitag interes sa uban.

Lakip sa mga rekomendasyon aron mapasig-uli ang pagkinabuhi diha sa komunidad, si Propesor Robert Putnam naghisgot bahin sa “paglig-on sa impluwensiya sa relihiyosong pagtuo.” Ang mga Saksi ni Jehova talagsaon niining bahina tungod kay ilang gitagamtam ang panalipod diha sa samag-pamilya nga mga kongregasyon sa tibuok yuta. Nahiuyon sa mga pulong ni apostol Pedro, sila adunay ‘gugma alang sa tibuok kapunongan sa mga igsoon,’ nga adunay matahaong “kahadlok sa Diyos.” (1 Pedro 2:17) Ang mga Saksi naglikay usab sa paglain sa ilang kaugalingon ug sa makadaot nga mga epekto niini tungod kay ang daghang positibong mga kalihokan nga nalangkit sa matuod nga pagsimba nagpapuliki kanila sa pagtabang sa ilang mga isigkatawo sa pagkakat-on sa kamatuoran nga makita diha sa Pulong sa Diyos, ang Bibliya.—2 Timoteo 2:15.

Ang Gugma ug Pag-ubanay Nakausab sa Ilang mga Kinabuhi

Ang mga Saksi ni Jehova gilangkoban sa nagkahiusa nga komunidad diin ang matag membro nagdula ug usa ka hinungdanong papel. Pananglitan, tagda ang kaso ni Miguel, Froylán, ug Alma Ruth, tulo ka membro sa usa ra ka pamilya nga Latino-Amerikano. Sila adunay dala-sa-pagkatawo nga sakit sa bukog nga maoy hinungdan sa usa ka matang sa pagkaenano. Silang tulo nag-wheelchair. Sa unsang paagi naapektohan ang ilang mga kinabuhi sa pagpakig-uban sa mga Saksi?

Si Miguel mikomento: “Daghan ako ug naagiang mga kalisod, apan sa dihang nagsugod ako sa pagpakig-uban sa katawhan ni Jehova, ang akong  kinabuhi nausab. Peligroso kaayo nga atong ilain ang atong kaugalingon. Ang pagpakig-uban sa mga isigkamagtutuo diha sa Kristohanong mga tigom, nga makauban sila matag semana, nakatabang kaayo nako sa pagkahimong kontento ug may katagbawan.”

Si Alma Ruth midugang: “Kaniadto mobati usahay ako ug grabe kaayong depresyon; nagmagul-anon kaayo ako. Apan sa dihang nakakat-on ako bahin kang Jehova, mibati ako nga makabaton ako ug suod nga relasyon uban kaniya. Para nako kana ang labing importante sa kinabuhi. Ang among pamilya dako kaayog natabang kanamo sa emosyonal nga paagi, ug mas nahiusa kami tungod niana.”

Si Miguel mahigugmaong gitudloan sa iyang amahan sa pagbasa ug pagsulat. Dayon gitabangan ni Miguel si Froylán ug Alma Ruth sa pagbasa ug pagsulat usab. Importante kini alang sa ilang espirituwalidad. “Ang pagkakat-on sa pagbasa nakahatag ug dakong kaayohan kanamo tungod kay sa ingon niana kami mapakaon sa espirituwal pinaagi sa pagbasa sa Bibliya ug sa binase-sa-Bibliya nga mga publikasyon,” matod pa ni Alma Ruth.

Sa pagkakaron, si Miguel nag-alagad ingong Kristohanong ansiyano. Si Froylán nakabasa sa Bibliya siyam na ka beses. Si Alma Ruth nagpadako sa iyang pag-alagad kang Jehova pinaagi sa pag-alagad ingong payunir nga ministro, o bug-os-panahong magwawali sa Gingharian, sukad sa 1996. Siya miingon: “Pinaagi sa panalangin ni Jehova akong nakab-ot kining tumonga, tungod sa pagpaluyo sa akong minahal nga mga sister nga nagtabang kanako dili lamang sa pagsangyaw kondili sa pagpanudlo usab pinaagi sa pagdumala ug 11 ka pagtuon sa Bibliya nga akong nasugdan.”

Ang laing maayong panig-ingnan gipakita ni Emelia, kinsa naaksidente busa siya kinahanglang mogamit ug wheelchair tungod sa sakit sa iyang mga batiis ug taludtod. Gitun-an siya sa mga Saksi ni Jehova sa Bibliya sa Siyudad sa Mexico, ug siya nabawtismohan sa 1996. Si Emelia miingon: “Sa wala pa makahibalo sa kamatuoran, gusto kong maghikog; dili na ako gustong mabuhi pa. Mibati ako nga ang akong kinabuhi walay kahulogan, nga maghilak adlaw ug gabii. Apan sa dihang nakig-uban ako sa katawhan ni Jehova, akong nabati ang gugma sa mga igsoon. Ang ilang gipakitang personal nga interes kanako makapadasig kaayo. Ang usa sa mga ansiyano samag akong igsoon o amahan. Hapiton ako sa pipila sa ministeryal nga mga alagad ug dad-on ngadto sa mga tigom ug sa buluhatong pagsangyaw diha sa akong wheelchair.”

Si José, nga nabawtismohan ingong usa sa mga Saksi ni Jehova sa 1992, nag-inusara sa pagpuyo. Siya maoy 70 anyos, nga miretiro na niadtong 1990. Si José nakaagi ug depresyon sa daghang higayon, apan human nga gisangyawan siya sa usa ka Saksi, siya nagsugod dayon sa pagtambong sa Kristohanong mga tigom. Nakaangay siya sa iyang nadunggan ug nakit-an didto. Pananglitan, iyang  napanid-an ang panag-ubanay sa mga igsoon ug nabati ang ilang kabalaka alang kaniya ingong indibiduwal. Ang mga ansiyano ug ministeryal nga mga alagad sa iyang kongregasyon maoy nag-atiman kaniya karon. (Filipos 1:1; 1 Pedro 5:2) Kining maong mga isigkamagtutuo maoy “makapalig-ong tabang” kaniya. (Colosas 4:11) Ilang ihatod siya ngadto sa doktor, duawon siya diha sa iyang balay, ug nagtabang kaniya panahon sa iyang upat ka operasyon. Siya miingon: “Sila nagpakita ug kabalaka kanako. Sila maoy akong tinuod nga pamilya. Malipay ako sa ilang pagpakig-uban nako.”

Adunay Tinuod nga Kalipay ang Paghatag

Sa dihang miingon si Haring Solomon nga ang “duha mas maayo kay sa usa,” bag-o pa siyang nakasulti bahin sa kakawangan sa paggugol sa tanang kusog sa pagbaton ug materyal nga mga bahandi. (Ecclesiastes 4:7-9) Mao gayod kanay maikagong gipangagpas sa daghan karon, bisan pag masakripisyo niini ang tawhanong mga relasyon diha sa sulod ug sa gawas sa pamilya.

Ang maong espiritu sa kadalo ug kahakog nakatukmod sa daghan sa pagpalain sa ilang kaugalingon. Kini wala makahatag kanilag kalipay o katagbawan sa kinabuhi, kay ang kahigawad ug pagkawalay-paglaom komon sa mga tawo nga nagpadaog sa maong espiritu. Sa kasukwahi, ang mga sugilanon sa kinabuhi nga bag-o pang giasoy nagpakita sa maayong mga epekto sa pagpakig-uban sa mga tawo nga nag-alagad kang Jehova ug napalihok sa gugma alang kaniya ug sa ilang isigkatawo. Ang pagtambong kanunay sa Kristohanong mga tigom, ang tabang ug kabalaka nga gipakita sa mga isigka-Kristohanon, ug ang madasigong kalihokan diha sa ministeryo maoy hinungdanong mga butang nga nakatabang niining mga tawhana sa pagbuntog sa negatibong mga pagbati nga nalambigit sa pagpalain sa kaugalingon.—Proverbio 17:17; Hebreohanon 10:24, 25.

Sanglit kita nagadepende sa usag usa, natural nga ang pagbuhat sa mga butang alang sa uban makahatag ug katagbawan. Si Albert Einstein, kansang mga buhat nakabenepisyo sa uban, miingon: “Ang bili sa usa ka tawo . . . angay makita sa kon unsa ang iyang gihatag ug dili sa iyang madawat.” Nahiuyon kini niining mga pulonga sa atong Ginoong Jesu-Kristo: “Adunay labaw nga kalipay sa paghatag kay sa pagdawat.” (Buhat 20:35) Busa, samtang maayo kaayo nga makadawat ug gugma, maayo usab kaayo nga magpakita ug gugma ngadto sa uban.

Usa ka nagapanawng magtatan-aw nga daghang tuig nang nagaduaw sa mga kongregasyon aron sa paghatag ug espirituwal nga tabang ug kinsa nakatabang sa pagtukod ug mga tigomanan alang sa mga Kristohanon nga kabos mipahayag sa iyang pagbati niining paagiha: “Ang kalipay sa pag-alagad sa akong mga igsoon ug sa pagtan-aw sa ilang mga nawong nga mapabilhon kaayo nagpalihok kanako sa pagpadayon sa pagpangitag mga higayon nga makatabang. Nabati ko nga ang pagpakitag personal nga interes ngadto sa uban mao ang yawi sa kalipay. Ug ako nahibalo nga ingong mga ansiyano, kita angay nga mahimong sama sa ‘tagoanang dapit gikan sa hangin . . . , sama sa mga sapa sa tubig sa usa ka walay-tubig nga yuta, sama sa landong sa usa ka dako kaayong bato sa usa ka umaw nga yuta.’”—Isaias 32:2.

Pagkamaayo ug Pagkamakalilipay nga Mag-uban Pagpuyo Diha sa Panaghiusa!

Duna gayoy dakong kaayohan ug tinuod nga kalipay ang pagtabang sa uban ug ang pagpakig-uban sa mga tawo nga nag-alagad kang Jehova. “Tan-awa!” miingon ang salmista. “Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!” (Salmo 133:1) Ang panaghiusa sa pamilya maoy usa ka hinungdanong butang sa pagtabang sa usag usa, sama sa gipakita  sa kahimtang ni Miguel, Froylán, ug Alma Ruth. Ug pagkadako nga panalangin nga mahiusa sa usag usa diha sa matuod nga pagsimba! Human mihatag ug tambag sa Kristohanong mga bana ug asawa, si apostol Pedro nagsulat: “Sa kataposan, kamong tanan magbaton ug samang panghunahuna, nga magpakitag pagbati alang sa isigkaingon, nga magbaton ug inigsoong pagbati, magmabination uban ang kalumo, magmapainubsanon sa hunahuna.”—1 Pedro 3:8.

Ang tinuod nga panaghigalaay mohatag ug dagkong mga kaayohan, sa emosyonal ug espirituwal nga paagi. Nakigsulti ngadto sa mga kauban sa pagtuo, si apostol Pablo nagtambag: “Hupaya ang magul-anong mga kalag, buligi ang mga maluya, magmataas-ug-pailob sa tanan. . . . Kanunayng tinguhaa ang maayo sa usag usa ug sa tanan.”—1 Tesalonica 5:14, 15.

Busa, pangitag praktikal nga mga paagi nga makabuhat ug maayo ngadto sa uban. ‘Buhata ang maayo ngadto sa tanan, apan ilabina kanila nga kabanay [ninyo] sa pagtuo,’ kay kini makahatag ug tinuod nga kahulogan sa imong kinabuhi ug makapabati kanimong kontento ug may katagbawan. (Galacia 6:9, 10) Ang tinun-an ni Jesus nga si Santiago nagsulat: “Kon ang usa ka igsoong lalaki o babaye anaa sa hubo nga kahimtang ug walay pagkaon nga igo alang sa maong adlaw, ug unya usa kaninyo moingon kanila: ‘Panglakaw kamo nga malinawon, painiti ug busga ang inyong kaugalingon,’ apan wala ninyo sila hatagi sa mga kinahanglanon alang sa ilang lawas, unsay kapuslanan niini?” (Santiago 2:15, 16) Ang tubag nianang pangutanaha dayag kaayo. Kita kinahanglang ‘magtan-aw, dili lamang sa personal nga interes sa mga butang labot sa atong kaugalingon, kondili sa personal nga interes usab sa uban.’—Filipos 2:4.

Dugang pa sa pagtabang sa uban sa materyal nga paagi kon adunay linain nga panginahanglan o kon may mahitabong kalamidad, ang mga Saksi ni Jehova puliki kaayo sa buluhaton nga makahatag ug kaayohan sa mga tawo sa hinungdanon kaayong paagi—pinaagi sa pagsangyaw sa maayong balita sa Gingharian sa Diyos. (Mateo 24:14) Ang pagpakigbahin sa kapin sa 6,000,000 ka Saksi nga nagwali niini nga mensahe sa paglaom ug paglipay maoy pamatuod sa ilang tinuod, mahigugmaong interes sa uban. Apan ang paghatag ug tabang gikan sa Balaang Kasulatan makatabang usab sa pagtagana sa laing tawhanong panginahanglan. Unsa man kana?

Pagtagana sa Usa ka Hinungdanong Panginahanglan

Aron matagamtam ang tinuod nga kalipay, kita nagkinahanglan ug hustong relasyon uban sa Diyos. Kini ang gikaingon: “Sukad pa sa sinugdan hangtod karon, bisan pag asa, ang tawo sa tanang panahon mobati ug panukmod sa pagsangpit sa usa ka butang nga iyang gituohan nga mas hataas ug mas gamhanan kay kaniya, nga nagpakita nga anaa sa dugo sa tawo ang pagdangop ug relihiyon ug angay nga ilhon gayod kana sa siyensiya. . . . Kita angay mataha, mahibulong ug motahod tungod kay atong nakita nga ang tanang tawo nagapangita, ug nagtuo ug usa ka supremo nga persona.”—Man Does Not Stand Alone, ni A. Cressy Morrison.

Si Jesu-Kristo miingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Ang tawo dili makalahutay kon ibulag sa dugayng panahon gikan sa ubang mga tawo. Apan, mas labaw nga malisod kon ilain nato ang atong kaugalingon gikan sa atong Maglalalang. (Pinadayag 4:11) Ang pagbaton ug pagpadapat sa “mismong kahibalo sa Diyos” angayng mahimong hinungdanong bahin sa atong kinabuhi. (Proverbio 2:1-5) Sa pagkatinuod, kinahanglang determinado kita sa pagtagbaw sa atong espirituwal nga panginahanglan, kay dili mahimong ilain nato ang atong kaugalingon gikan sa uban ug gikan sa Diyos. Ang usa ka malipayon ug magantihong kinabuhi nagadepende sa maayong relasyon uban kang Jehova, “ang labing Hataas ibabaw sa tibuok nga yuta.”—Salmo 83:18.

[Hulagway sa panid 5]

Miguel: “Daghan ako ug naagiang mga kalisod, apan sa dihang nagsugod ako sa pagpakig-uban sa katawhan ni Jehova, ang akong kinabuhi nausab”

[Hulagway sa panid 5]

Alma Ruth: “Sa dihang nakakat-on ako bahin kang Jehova, mibati ako nga makabaton ako ug suod nga relasyon uban kaniya”

[Hulagway sa panid 6]

Emelia: “Sa wala pa makahibalo sa kamatuoran, . . . mibati ako nga ang akong kinabuhi walay kahulogan”

[Hulagway sa panid 7]

Ang pagpakig-uban sa matuod nga mga magsisimba makatabang sa pagtagbaw sa atong espirituwal nga panginahanglan