Ang Tinuod nga Pagsimba Makapahiusag Pamilya

TRESE anyos si Maria sa dihang siya ug ang iyang manghod nga babaye, si Lucy, nakadungog bahin kang Jehova gikan sa usa ka paryente. Kini nga paryente nagpatin-aw usab sa paglaom bahin sa Paraiso sa yuta. Kay naikag, mikuyog sila kaniya ngadto sa Kingdom Hall sa mga Saksi ni Jehova. Nakadayeg si Maria sa tin-awng instruksiyon nga gipahayag didto. Lahi kaayo kini didto sa simbahan, diin halos wala na silay laing gihimo kondili mag-awit! Wala madugay ang mga bata nagtuon sa Bibliya uban sa usa sa mga Saksi ni Jehova.

Ang ilang magulang nga lalaki, si Hugo, interesado sa pilosopiya ug ebolusyon. Siya nag-angkong ateyista. Apan samtang nag-alagad sa militar, iyang nabasa ang librong Life—How Did It Get Here? By Evolution or by Creation?  a Siya nakakaplag ug mga tubag sa mga pangutana nga dili matubag sa ubang relihiyon. Sa natapos ang iyang pag-alagad sa militar, siya nagsugod sa pagpalig-on sa iyang bag-ong nakaplagang pagtuo sa Diyos pinaagi sa pagtuon sa Bibliya ug pagtambong sa mga panagkatigom uban sa iyang mga igsoong babaye. Si Maria ug Lucy nabawtismohan niadtong 1992, duha ka tuig human madungog sa unang higayon ang kamatuoran, ug ang ilang igsoong lalaki nabawtismohan usab duha ka tuig sa ulahi.

Sa kasamtangan ang ilang mga ginikanan, nga debotado sa mga tradisyon sa Katoliko, wala kaayoy interes sa kamatuoran. Alang kanila ang mga Saksi ni Jehova mga samokan, bisan tuod nakadayeg sila sa maayong pamatasan ug ligdong nga sininaan sa batan-ong mga Saksi nga dapiton sa ilang mga anak diha sa ilang balay. Panahon sa pagpangaon, ang mga bata maghisgot usab bahin sa ilang nakat-onan sa tigom, ug nakatukbil kini sa pagkamausisaon sa ilang mga ginikanan.

Apan, ang mga ginikanan naikag sa pagpang-ungo. Ang amahan palahubog nga nagdagmal sa iyang asawa. Hapit nang mabungkag ang pamilya. Dayon, nabilanggo ang amahan sa duha ka semana tungod sa badlongong paggawi sa dihang nahubog. Samtang napriso, nagsugod siya sa pagbasa sa Bibliya. Samtang nagbasa, iyang namatikdan ang mga pulong ni Jesus mahitungod sa ilhanan sa kataposang mga adlaw. Kay nalibog, ang amahan ug inahan miadto sa Kingdom Hall ug midawat ug pagtuon sa Bibliya sa balay. Sa pagkakat-on sa kamatuoran, ilang gisunog ang tanan nilang mga basahon bahin sa pagpang-ungo ug nakalingkawas sa pag-atake sa mga demonyo tungod sa ilang pagtawag sa ngalan ni Jehova. Nagsugod sila sa paghimog dagkong mga kausaban sa ilang mga personalidad.

Imo bang mahanduraw kon unsa ka makapatandog kang Maria ug Lucy ang pagtan-aw sa ilang mga ginikanan nga gibawtismohan ni Hugo sa usa sa distritong mga kombensiyon sa Bolivia niadtong 1999? Nahitabo kini mga siyam ka tuig human nga nadungog sa unang higayon ni Maria ug Lucy ang mahitungod kang Jehova ug sa iyang mga saad. Uban ni Hugo, sila nag-alagad karon diha sa bug-os-panahong ministeryo. Pagkadako sa ilang kalipay tungod kay ang matuod nga pagsimba nakapahiusa sa ilang pamilya!

[Footnote]