Ikaw ba Matinuorong Nagapangita Kang Jehova?

DAKO kaayo ang tinguha sa usa ka Kristohanong lalaki nga ipaambit ang maayong balita gikan sa Bibliya ngadto sa ubang mga pasahero sa tren. (Marcos 13:10) Apan, gidaog siya sa kahadlok. Milunga ba siya? Wala, siya kinasingkasing nga nag-ampo ug naghunahuna ug paagi kon unsaon pagsugod sa pagpakig-estorya. Gitubag ni Jehova nga Diyos ang iyang hangyo ug gihatagan siyag kusog aron makasangyaw.

Hinungdanon ang maong pagkamatinuoron sa dihang kita mangita kang Jehova ug sa iyang pag-uyon. Si apostol Pablo nag-ingon: “Siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Dili igo ang pagpangita lang kang Jehova. Ang matang sa Gregong berbo nga gihubad ug “matinuorong nagapangita” nagpasabot ug mainitong kadasig ug dakong pagkugi. Kini naglakip sa bug-os nga kasingkasing, hunahuna, kalag, ug kusog sa usa ka tawo. Kon kita matinuorong nagapangita kang Jehova, dili kita angay nga dili lang magpakabana, magpasayon sa kaugalingon, o magtinapolan. Hinunoa, atong ipasundayag ang tininuod nga kasibot sa pagpangita kaniya.—Buhat 15:17.

Mga Tawo nga Matinuorong Nangita Kang Jehova

Dunay daghang panig-ingnan sa Kasulatan sa mga tawo nga kuging naningkamot sa pagpangita kang Jehova. Ang usa kanila mao si Jacob, nga munas ginhawang nakiglayog sa nagmateryalisar nga manulonda sa Diyos hangtod sa pagkabanagbanag. Tungod niini, si Jacob ginganlag Israel (Nakigtigi sa Diyos) tungod kay siya nakigtigi, o milahutay sa pagpakiglayog, nakigbisog, milanat sa pagpakigdumog, sa Diyos. Gipanalanginan siya sa manulonda tungod sa iyang matinuorong paningkamot.—Genesis 32:24-30.

Dayon dihay wala-hinganli nga babaye nga taga-Galilea nga 12 ka tuig na nga giagasan ug dugo, nga tungod niini siya nag-antos ug “daghang kasakit.” Sa iyang kahimtang, siya dili angayng mohikap sa ubang mga tawo. Bisan pa niana, siya nangarisgar sa pag-adto aron sa paghimamat kang Jesus. Siya nagsigeg ingon: “Kon makahikap lang ako sa iyang panggawas nga besti ako mamaayo.” Hunahunaa ang iyang pag-ukiok diha sa ‘dakong panon sa katawhan nga nagsunod ug nakigdutdot kang Jesus.’ Sa paghikap niya sa panggawas nga besti ni Jesus, iyang nabati nga “mitang-on ang iyang pagtalinugo”—naayo ang dugay na niyang sakit! Sa dihang nangutana si Jesus, “Kinsay mihikap sa akong panggawas nga mga besti?” siya nahadlok. Apan si Jesus mabinationg misulti kaniya: “Anak, ang imong pagtuo nakapaayo kanimo. Lakaw nga malinawon, ug mamaayo na ang imong lawas gikan sa imong grabeng sakit.” Nabaslan ang iyang mga paningkamot.—Marcos 5:24-34; Levitico 15:25-27.

Sa lain pang higayon, usa ka babayeng Fenicianhon matinuorong mihangyo kang Jesus nga ayohon ang iyang anak nga babaye. Si Jesus mitubag nga dili haom nga ang pagkaon sa mga bata ihatag ngadto sa gagmay nga mga iro. Ang iyang  gipasabot mao nga dili mahimong atimanon niya ang mga dili-Israelinhon nga dili na niya mahatagag pagtagad ang takos nga mga Hudiyo. Nakasabot sa punto sa iyang ilustrasyon, siya nagpakiluoy gihapon: “Oo, Ginoo; apan sa pagkatinuod ang gagmay nga mga iro mokaon sa mga mumho nga mahulog gikan sa lamesa sa ilang mga agalon.” Ang iyang lig-ong pagtuo ug pagkasinsero nakatukmod kang Jesus sa pag-ingon: “Oh babaye, dako ang imong pagtuo; ipahinabo kini kanimo sumala sa buot mo.”—Mateo 15:22-28.

Unsa kahay nahitabo niining mga tawhana kon sila wala molahutay sa ilang mga paningkamot? Nakadawat kaha sila sa maong mga panalangin kon milunga pa sila sa dihang miatubang sa unang kababagan o pagsalikway? Wala! Maayong pagkailustrar niining maong mga pananglitan ang punto nga gitudlo ni Jesus, nga ang ‘pagkamalahutayon’ husto, hinungdanon pa gani, sa pagpangita kang Jehova.—Lucas 11:5-13.

Sumala sa Iyang Kabubut-on

Sa gihisgotang mga asoy bahin sa mga tawong naayo sa milagrosong paagi, ang pagkamatinuoron lang ba ang bugtong kinahanglanon mao nga sila naayo? Dili, ang ilang mga hangyo kinahanglang nahiuyon sa kabubut-on sa Diyos. Si Jesus gihatagan ug milagrosong gahom sa pagpakitag talagsaong pamatuod nga siya Anak sa Diyos, ang gisaad nga Mesiyas. (Juan 6:14; 9:33; Buhat 2:22) Dugang pa, ang mga milagro nga gihimo ni Jesus maoy mga pasiuna sa daghang panalangin dinhi sa yuta nga ihatag unya ni Jehova sa mga tawo panahon sa Pagmando ni Kristo sa Milenyo.—Pinadayag 21:4; 22:2.

Dili na kabubut-on sa Diyos nga ang mga tawong nagsubay sa matuod nga relihiyon makaangkon ug milagrosong gahom, sama sa katakos sa pag-ayo ug sa pagsultig lainlaing mga pinulongan. (1 Corinto 13:8, 13) Apil sa iyang kabubut-on sa atong adlaw mao ang pagpahayag sa maayong balita sa Gingharian sa tibuok yuta aron ang “tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4; Mateo 24:14; 28:19, 20) Ang mga alagad sa Diyos makadahom gayod nga dunggon ang ilang kinasingkasing nga mga pag-ampo kon sila sinserong maningkamot uyon sa iyang kabubut-on.

Ang uban tingali mangutana, ‘Nganong maningkamot pa kita nga sa ngadtongadto matuman ra man gihapon ang kabubut-on sa Diyos?’ Bisan tuod pagatumanon ni Jehova ang iyang katuyoan bisag unsa pay paningkamot sa tawo, malipay siya nga molihok ang mga tawo sa pagtuman sa iyang kabubut-on. Mahimong ikatandi si Jehova sa usa ka tawong nagtukod ug balay. Ang magtutukod dunay kompletong plano alang sa proyekto, apan nagpili siyag mga materyales alang sa pagtukod nga mapalit sa maong lugar. Sa susama, si Jehova dunay proyektong taposonon karon ug malipay siya sa paggamit sa iyang mga alagad, kinsa mahinangpong nagtanyag sa ilang kaugalingon.—Salmo 110:3; 1 Corinto 9:16, 17.

Tagda ang kasinatian sa batan-ong si Toshio. Sa pagtungha niya sa hayskul, gusto siya nga makahatag ug dakong pagpamatuod kutob sa mahimo  diha sa iyang talagsaong teritoryo. Siya kanunayng nagdala sa iyang Bibliya ug naningkamot pag-ayo nga mahimong sulondang Kristohanon. Sa hapit nang matapos ang iyang unang tuig sa hayskul, mitungha ang kahigayonan nga makapakigpulong siya sa klase. Nag-ampo si Toshio kang Jehova alang sa tabang ug nalipay sa pagkakita sa tibuok klase nga naminaw pag-ayo sa iyang pakigpulong nga nag-ulohang “Ang Akong Tumong nga Himoong Karera ang Pagpayunir.” Iyang gipatin-aw nga gusto siya nga mahimong usa ka bug-os-panahong ministro sa mga Saksi ni Jehova. Ang usa sa mga estudyante misugot sa pagtuon sa Bibliya uban niya ug miuswag hangtod sa punto nga nabawtismohan siya. Ang matinuorong mga paningkamot ni Toshio nga nahiuyon sa iyang mga pag-ampo dagayang gigantihan.

Unsa Ikaw ka Matinuoron?

Mahimo nimong ikapakita sa lainlaing mga paagi nga ikaw matinuorong nangita kang Jehova ug nagtinguha sa iyang mga panalangin. Una, dunay hinungdanong mga butang nga imong mahimo, sama sa pagpangandam ug maayo alang sa Kristohanong mga panagkatigom. Pinaagi sa inandam pag-ayong mga komento, pagpakigpulong sa paagi nga makapalihok sa mga mamiminaw, ug epektibong mga demonstrasyon, imong gipakita ang kahugot sa imong tinguha sa pagpangita kang Jehova. Imo usab nga ikapasundayag ang imong pagkamatinuoron pinaagi sa pagpauswag sa kalidad sa imong ministeryo. Nganong dili maningkamot nga mahimong mas mahigalaon sa imong paagi sa pagpakig-estorya sa tagbalay ug sa paggamit ug epektibong mga introduksiyon nga mohaom sa imong teritoryo? (Colosas 3:23) Pinaagi sa kinasingkasing nga pagkugi, ang usa ka Kristohanong lalaki mahimong modawat ug mga buluhaton diha sa kongregasyon, sama sa pag-alagad ingong ministeryal nga alagad o ansiyano. (1 Timoteo 3:1, 2, 12, 13) Pinaagi sa pagtanyag sa imong kaugalingon, imong matagamtam ang kalipay sa paghatag. Makaaplay ka sa pag-alagad diha sa proyekto sa sangang buhatan alang sa pagpanukod, o mag-alagad diha sa sangang buhatan sa mga Saksi ni Jehova. Kon ikaw kuwalipikado nga ulitawo, basin buot kang motungha sa Tunghaan sa Ministeryal nga Pagbansay, nga nagsangkap sa espirituwal nga mga lalaki aron mahimong maayong mga magbalantay. Kon ikaw minyo, tingali ang pag-alagad ingong misyonaryo maoy paagi sa pagpakita sa imong matinuorong tinguha sa pag-alagad pa ug dugang kang Jehova. Tingali may posibilidad nga ikaw makabalhin sa dapit diin mas dako ang panginahanglag mga magsasangyaw sa Gingharian.—1 Corinto 16:9.

Ang labing hinungdanon mao ang espiritu nga imong ginapakita sa pagtuman sa usa ka buluhaton. Bisag unsa pay responsabilidad nga ihatag kanimo, buhata kini nga matinuoron, makugihon, ug uban ang “katim-os sa kasingkasing.” (Buhat 2:46; Roma 12:8) Angay nimong isipon  ang matag buluhaton ingong kahigayonan sa pagpasundayag sa imong kaikag sa pagdayeg kang Jehova. Pag-ampo kanunay alang sa tabang ni Jehova, ug buhata ang imong bug-os nga maarangan. Dayon ikaw magaani ug dagayang ganti.

Matinuorong mga Paningkamot Nabaslan

Nahinumdoman ba nimo ang Kristohanong lalaki nga nag-ampo nga makabuntog sa iyang kahadlok aron makasangyaw sa ubang mga pasahero? Gipanalanginan ni Jehova ang iyang sinserong tinguha. Ang igsoon naghunahuna ug paagi kon unsaon pagsugod sa pagpakig-estorya, nga nag-andam ug daghang ulohan aron makasugod ug panaghisgot. Iyang nagamit sa epektibong paagi ang Bibliya sa pagsangyaw ngadto sa usa ka lalaki nga nabalaka bahin sa makapaguol nga mga relasyon sa tawo. Ang daghang pagbalikduaw sa maong tawo diha sa tren miresulta ug usa ka pagtuon sa Bibliya sa balay. Gipanalanginan gayod siya ni Jehova tungod sa iyang matinuorong mga paningkamot!

Ikaw mahimong makabaton ug susamang mga resulta kon ikaw magpadayon sa pagpangita kang Jehova nga matinuoron. Kon ikaw mapaubsanong molahutay ug bug-os-kasingkasing nga mohimo sa bisan unsang teokratikanhong buluhaton nga imong gipakigbahinan, ikaw pagagamiton ni Jehova uyon sa iyang mga katuyoan ug iyang igabubo diha kanimo ang dagayang panalangin.

[Hulagway sa panid 26]

Unsa kahay nahitabo niining babayhana kon wala pa siya molahutay?

[Hulagway sa panid 27]

Ikaw ba malahutayon sa pagpakiluoy kang Jehova alang sa iyang panalangin?

[Mga hulagway sa panid 28]

Sa unsang paagi imong ikapakita nga ikaw matinuorong nagapangita kang Jehova?