Iyang Gihigugma ang Kalulot

NATAPOS ni Milton G. Henschel, nga dugay nang membro sa Nagamandong Lawas sa mga Saksi ni Jehova, ang iyang yutan-ong kinabuhi niadtong Sabado, Marso 22, 2003. Siya nag-edad ug 82 anyos.

Sa batan-on pa, si Milton Henschel nahimong membro sa kawani sa hedkuwarter sa mga Saksi ni Jehova ug matinumanong nag-alagad ug kapin sa 60 ka tuig. Nailhan dayon siya tungod sa iyang maayong panghukom ug kinasingkasing nga interes sa buluhatong pagsangyaw sa Gingharian. Sa 1939 siya nahimong sekretaryo ni N. H. Knorr, kinsa magtatan-aw niadtong tungora sa imprentahan sa mga Saksi ni Jehova sa Brooklyn. Sa dihang si Brader Knorr nagsugod sa pagdumala sa buluhaton sa mga Saksi sa tibuok kalibotan sa 1942, iyang gihimong luyoluyo si Brader Henschel. Naminyo si Brader Henschel kang Lucille Bennett sa 1956, ug magkauban silang nakasinati sa mga kalipay ug kalisod sa kinabuhi.

Si Brader Henschel kuging nakigtambayayong kang Brader Knorr hangtod nga namatay si Knorr sa 1977. Si Brader Henschel, nga kauban kanunay ni Brader Knorr, nakaadto sa kapin sa 150 ka nasod, nga nagduaw ug nagdasig sa mga Saksi ni Jehova sa tibuok kalibotan, ilabina sa mga misyonaryo ug sa mga igsoon diha sa mga sangang buhatan. Ang maong mga biyahe mahago usahay, peligroso pa gani. Niadtong 1963 sa dihang mibisita sa usa ka kombensiyon sa Liberia, si Brader Henschel nabiktima sa mapintas nga paglutos tungod sa pagdumili sa pagpakigbahin sa usa ka patriotikong seremonyas. a Wala matarog, si Brader Henschel mibalik sa Liberia pipila lang ka bulan sa ulahi aron sa pagpakigkita sa presidente sa nasod ug sa pagtinguha nga mahatagan ug dugang kagawasan sa pagsimba ang mga Saksi ni Jehova didto.

Sa dihang magdumala ug malisod nga mga problema ug mga suliran, si Brader Henschel nailhan nga praktikal, mapailin-ilinon, ug makataronganon. Ilabinang gipabilhan sa iyang mga kauban sa trabaho ang iyang kahapsay, kaligdong, ug pagkasiawan. Tungod sa iyang talagsaong memorya, daghang misyonaryo sa tibuok kalibotan ang nalipay tungod kay dali niyang mahinumdoman ang ilang mga ngalan, makamao siya ug pipila ka mga pulong sa lokal nga pinulongan, ug abtik nga makasulti ug pulong nga makapakatawa—nga iyang isulti uban ang mapahiyomon nga mga mata.

Ang Miqueas 6:8 nagpahinumdom kanato nga buot ni Jehova nga Diyos nga ‘higugmaon nato ang kalulot.’ Si Milton Henschel pagahandomon tungod sa pagpasundayag ug panig-ingnan niining bahina. Bisan pa sa iyang bug-at nga responsabilidad, siya kanunayng sayon maduol, malumo, ug maluloton. Siya kanunayng moingon, “Sa dihang magduhaduha kon unsaon pag-atubang ang usa ka kahimtang, hinumdomi nga ang pagkamalumo mao ang husto.” Bisan tuod naguol kita nga namatay kining hinigugmang igsoon, malipayon kita nga siya matinumanong nakalahutay hangtod sa kataposan, masaligon nga iyang nadawat ang iyang ganti, “ang purongpurong sa kinabuhi.”—Pinadayag 2:10.

[Footnote]

[Hulagway sa panid 31]

Si M. G. Henschel uban ni N. H. Knorr

[Hulagway sa panid 31]

Uban sa iyang asawa, si Lucille