Nahinumdom Ka Ba?

Nalingaw ka ba sa pagbasa sa di pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsa ang pipila ka paagi diin si Ruth nagsilbing usa ka maayong panig-ingnan?

Siya maoy sulondan sa iyang gugma alang kang Jehova, sa iyang maunongong gugma kang Noemi, ug sa pagpasundayag sa mga hiyas sa pagkakugihan ug pagkamapaubsanon. Tungod sa daghang katarongan, ang mga tawo nag-isip kaniya ingong “maayo kaayo nga babaye.” (Ruth 3:11)—4/15, mga panid 23-6.

• Sa unsang paagi kita nahibalo nga si Jehova nahigugma sa ordinaryong mga tawo?

Iyang giingnan ang mga Israelinhon, kinsa gidaogdaog didto sa Ehipto, nga dili maltratahon ang mga tawong kabos. (Exodo 22:21-24) Si Jesus, kinsa nagsundog sa iyang Amahan, nagpakitag tiunayng interes sa ordinaryong mga tawo, ug ang iyang gipili ingong mga apostoles maoy mga tawong “dili-edukado ug ordinaryo.” (Buhat 4:13; Mateo 9:36) Kita makasundog sa Diyos pinaagi sa pagpakitag kahingawa sa uban, sama sa mga batan-on.—4/15, mga panid 28-31.

• Nganong makatuo kita nga namatikdan ni Jehova ang atong ginabuhat?

Ang mga asoy sa Bibliya nagpakita nga namatikdan ni Jehova ang kalamposan sa mga tawo. Namatikdan niya ang halad nga gitanyag ni Abel, ug nakita niya ang atong ‘mga halad sa pagdayeg, ang bunga sa mga ngabil.’ (Hebreohanon 13:15) Nahibalo usab si Jehova nga si Enoc naningkamot sa pagpahimuot kaniya pinaagi sa pagkinabuhi ug hinlo, ligdong nga kinabuhi. Ug napanid-an sa Diyos kon sa unsang paagi ang dili-Israelinhon nga balo sa Zarepta nagpaambit sa limitado niyang kahinguhaan uban sa manalagnang si Elias. Namatikdan usab ni Jehova ang atong mga buhat sa pagtuo.—5/1, mga panid 28-31.

• Nganong ikaingon nga human sa Pentekostes 33 K.P., ang mga Hudiyo nga nahimong mga Kristohanon kinahanglang mohimog personal nga pahinungod ngadto sa Diyos?

Sa 1513 W.K.P., ang karaang mga Israelinhon misulod ngadto sa usa ka napahinungod nga relasyon uban kang Jehova. (Exodo 19:3-8) Human niana, ang mga Hudiyo natawo sa maong napahinungod nga nasod ilalom sa Balaod sa pakigsaad. Apan gitangtang ni Jehova ang maong Balaod sa pakigsaad pinaagi sa kamatayon ni Kristo sa 33 K.P. (Colosas 2:14) Human niadto, ang mga Hudiyo nga buot moalagad sa Diyos sa dalawatong paagi kinahanglang magpahinungod ngadto kaniya ug magpabawtismo sa ngalan ni Jesu-Kristo.—5/15, mga panid 30-1.

• Bahin ba sa matuod nga pagsimba karong adlawa ang pagsunog ug insenso?

Ang paggamit ug insenso maoy bahin sa matuod nga pagsimba sa karaang Israel. (Exodo 30:37, 38; Levitico 16:12, 13) Apan ang Balaod sa pakigsaad, nga naglakip sa paggamit ug insenso, natapos sa pagkamatay ni Kristo. Ang mga Kristohanon makahukom sa ilang kaugalingon kon angay bang mogamit ug insenso alang sa dili-relihiyosong mga katuyoan, apan dili na kana bahin sa matuod nga pagsimba karong adlawa. Ang pagbati sa uban angayng tagdon usab aron dili sila mapandol.—6/1, mga panid 28-30.

• Unsang di pa dugayng balita ang nakatukmod sa daghan sa paghunahuna pag-ayo sa kamatuoran nga si Jesus nabuhi sa yuta?

Nabaniog ang usa ka kahon, usa ka ossuary, nga nakaplagan didto sa Israel. Kini morag masubay ngadto sa unang siglo, ug dunay kinulit niana nga mabasa: “Si Santiago, nga anak ni Jose, nga igsoon ni Jesus.” Nagtuo ang uban nga kini mao ‘ang kinakaraanan nga arkeolohikal nga pamatuod gawas sa Bibliya’ mahitungod sa paglungtad ni Jesus.—6/15, panid 3-4.

• Sa unsang paagi ang usa ka tawo makakat-on sa paghigugma?

Ang mga tawo unang makakat-on sa paghigugma pinaagi sa panig-ingnan ug pagbansay sa ilang mga ginikanan. Sa dihang ang bana ug asawa magpakitag gugma sa usag usa, ang mga anak makakat-on sa paghigugma. (Efeso 5:28; Tito 2:4) Bisan pag ang usa ka tawo wala maggikan sa usa ka mahigugmaong pamilya, siya makakat-on sa paghigugma pinaagi sa pagdawat sa amahanong paggiya ni Jehova, pagpangayog tabang sa balaang espiritu, ug pagpahimulos sa mahigugmaong pagpaluyo sa Kristohanong panag-igsoonay.—7/1, mga panid 4-7.

• Kinsa si Eusebius, ug unsang leksiyon ang atong makat-onan gikan sa iyang kinabuhi?

Si Eusebius maoy usa ka historyano sa unang panahon kinsa, sa 324 K.P., nakahuman sa napulo-ka-tomo nga sinulat nga nag-ulohang History of the Christian Church. Bisan pag nagtuo siya nga ang Amahan naglungtad na sa wala pa ang Anak, gidawat ni Eusebius ang lahi nga panghunahuna didto sa konseho sa Nicaea. Dayag nga wala niya tagda ang kinahanglanon ni Jesus nga ang Iyang mga sumusunod angayng “dili bahin sa kalibotan.” (Juan 17:16)—7/15, mga panid 29-31.

• Giusab ba ni Jehova ang iyang panglantaw sa poligamiya?

Wala, si Jehova wala mag-usab sa iyang panglantaw sa poligamiya. (Malaquias 3:6) Ang kahikayan sa Diyos alang sa unang tawo mao nga siya “moipon sa iyang asawa” ug mahimong usa ka unod uban kaniya. (Genesis 2:24) Si Jesus nag-ingon nga ang panagbulag gawas kon tungod sa pakighilawas ug unya pagminyo pag-usab makapahimo sa usa nga mananapaw. (Mateo 19:4-6, 9) Ang pagtugot ni Jehova sa poligamiya natapos sa dihang natukod ang Kristohanong kongregasyon.—8/1, panid 28.