Dayega si Jehova “sa Taliwala sa Kongregasyon”

ANG Kristohanong mga tigom maoy tagana gikan kang Jehova aron ang iyang katawhan makapabiling lig-on sa espirituwal. Pinaagi sa regular nga pagtambong sa mga tigom, atong ginapakita ang atong apresasyon sa mga tagana ni Jehova. Dugang pa, atong ‘madasig ang atong mga igsoon sa paghigugma ug sa maayong mga buhat,’ nga maoy hinungdanong paagi sa pagpasundayag ug gugma sa usag usa. (Hebreohanon 10:24; Juan 13:35) Apan, sa unsang paagi atong madasig ang atong mga igsoon diha sa mga tigom?

Pagkomento Panahon sa mga Tigom

Si Haring David misulat bahin sa iyang kaugalingon: “Ipahayag ko ang imong ngalan ngadto sa akong mga igsoon; sa taliwala sa kongregasyon pagadayegon ko ikaw. Gikan kanimo ang akong pagdayeg moabot diha sa dakong kongregasyon.” “Pagadayegon ko ikaw diha sa dako nga kongregasyon; pagadayegon ko ikaw taliwala sa daghang katawhan.” “Akong gipahayag ang maayong balita sa pagkamatarong diha sa dakong kongregasyon. Tan-awa! Ang akong mga ngabil wala ko pugngi.”—Salmo 22:22, 25; 35:18; 40:9.

Sa panahon ni apostol Pablo, sa dihang ang mga Kristohanon magtigom alang sa pagsimba, sila nagpahayag usab sa ilang pagtuo kang Jehova ug bahin sa iyang himaya. Niining paagiha sila nagdinasigay ug nagpalig-onay sa usag usa sa paghigugma ug sa maayong mga buhat. Sa atong adlaw, daghang siglo human sa panahon ni David  ug Pablo, ato gayong ‘makita nga ang adlaw ni Jehova nagkaduol na.’ (Hebreohanon 10:24, 25) Ang sistema sa mga butang ni Satanas nagsampiray padulong sa kalaglagan, ug nagkadaghan ang mga problema. Mas ‘gikinahanglan nato nga molahutay’ karong panahona. (Hebreohanon 10:36) Kinsa man ang makadasig kanato sa paglahutay kon dili ang atong mga igsoon?

Karon, sama sa unang mga panahon, dunay mga tagana aron ang tagsa ka magtutuo makapahayag sa iyang pagtuo “sa taliwala sa kongregasyon.” Ang usa ka kahigayonan nga bukas alang sa tanan mao ang pagkomento sa pagtubag sa mga pangutanang isukna ngadto sa mga tumatambong panahon sa mga tigom sa kongregasyon. Ayaw gayod pakamenosa ang mga kaayohan nga mahimo niini. Pananglitan, ang mga komento nga nagpahayag kon unsaon pagsagubang o paglikay sa mga problema makapalig-on sa determinasyon sa atong mga igsoon sa pagsunod sa mga prinsipyo sa Bibliya. Ang mga komento nga magpatin-aw sa gisitar apan wala kutloa nga mga teksto sa Bibliya o mga komento nga maglakip ug mga ideya nga napupo gikan sa personal nga panukiduki makadasig sa uban sa pag-ugmad ug maayong mga batasan sa pagtuon.

Ang pagkahibalo nga kita ug ang uban makabaton ug kaayohan kon kita mokomento panahon sa mga tigom angayng magpalihok sa tanang Saksi ni Jehova sa pagbuntog sa pagkamaulawon o pagkahilomon. Hinungdanon kaayo nga ang mga ansiyano ug ministeryal nga mga alagad mokomento panahon sa mga tigom, tungod kay sila gidahom nga manguna sa pagpakigbahin sa tigom, maingon man sa pagtambong. Apan, unsaon man pag-uswag sa usa ka indibiduwal kon malisdan siya niining partikular nga bahin sa iyang Kristohanong kalihokan?

Mga Sugyot Aron Mouswag

Hinumdomi nga nalangkit si Jehova. Ang usa ka Kristohanon nga igsoong babaye nga nagpuyo sa Alemanya nagsaysay kon unsay iyang panglantaw sa iyang mga komento. “Kini maoy akong personal nga tubag sa mga paningkamot ni Satanas sa pagpugong sa katawhan sa Diyos sa pagpahayag sa ilang pagtuo.” Ang usa ka bag-ong nabawtismohan nga igsoong lalaki nga nakig-uban sa mao gihapong kongregasyon nag-ingon: “Kon bahin sa pagkomento, kini akong giampo kanunay.”

Pangandam ug maayo. Kon dili ka magtuon daan sa artikulo, malisdan ka sa pagkomento ug dili kaayo epektibo ang imong mga komento. Ang mga sugyot alang sa pagkomento sa mga tigom sa kongregasyon mabasa diha sa publikasyong Pahimusli ang Edukasyon sa Teokratikanhong Tunghaan sa Ministeryo, panid 70. a

Himoang tumong nga makahatag ug labing menos usa ka komento matag tigom. Sa ato pa kinahanglang mag-andam ug daghang tubag, kay kon ikaw kanunayng mag-isa sa imong kamot, mas dako ang purohan nga tawgon ka sa nagadumalang igsoon. Basin buot nimong sultihan siya daan kon unsang mga pangutanaha ang imong giandaman ug tubag. Kini ilabinang mapuslanon kon ikaw bag-ohan. Tungod kay magpanuko ka tingali sa pag-isa sa imong kamot “diha sa dakong kongregasyon,” ang pagkasayod nga kini  maoy imong parapo ug nga ang nagdumala sa tigom magpaabot nga ikaw moisa sa imong kamot makadasig kanimo sa pagkomento.

Komento dayon. Ang malisod nga buluhaton dili mosayon kon kini iunya-unya. Makatabang ang pagkomento dayon sa pagsugod sa tigom. Matingala ka nga sayon ang pagkomento sa ikaduha o ikatulo nga higayon sa dihang mabuntog na nimo ang kalisod sa paghatag nianang unang komento.

Pagpili ug nahiangay nga kalingkoran. Sayon alang sa uban ang pagkomento kon sila naglingkod dapit sa unahan diha sa Kingdom Hall. Dili kaayo sila malinga, ug sila daling makita sa nagadumala. Kon sulayan nimo kini, hinumdomi ang pagsultig kusog nga igong madungog sa tanan, ilabina kon ang kongregasyon wala maggamit ug mga mikropono nga ipasa.

Paminaw ug maayo. Motabang kini kanimo nga dili masubli ang gisulti sa bag-o pang mitubag. Dugang pa, ang komento sa uban mahimong magpahinumdom kanimo sa usa ka teksto o punto nga ikadugang diha sa ideya nga bag-o pang gipahayag. Usahay, mahimong ikailustrar ang punto nga gihisgotan pinaagig usa ka mubong kasinatian. Ang maong mga komento mapuslanon kaayo.

Tun-i ang pagtubag sa imong kaugalingong mga pulong. Ang pagbasa sa komento gikan sa tun-anan mahimong magpakita nga imong nakaplagan ang hustong tubag, ug tingali kini maoy usa ka maayong paagi sa pagsugod sa pagkomento. Apan ang pag-uswag hangtod nga makatubag ka na sa imong kaugalingong mga pulong magpakita nga ikaw nakasabot sa punto. Dili kinahanglang mokutlo letra-por-letra gikan sa atong mga publikasyon. Ang mga Saksi ni Jehova dili lang basta magsumaysumay kon unsay gisulti sa ilang mga publikasyon.

Ayawg tipas sa ulohan. Dili haom nga mohatag ug mga komento nga walay labot sa ulohan o motipas gikan sa pangunang mga punto nga gihisgotan. Nagpasabot kini nga ang imong mga komento kinahanglang may koneksiyon sa ulohan nga gihisgotan. Makatabang kini nga mahimong makapadasig sa espirituwal ang panaghisgot sa tema.

Himoang tumong nga ikaw makadasig sa uban. Sanglit ang hinungdanong rason sa pagkomento mao ang pagdasig sa uban, kita kinahanglang maningkamot sa paglikay nga makasulti ug mga butang nga basin makapaluya kanila. Dugang pa, ayawg komentohi ang tibuok parapo nga gamay na lang o wala nay nabilin nga ikomento ang uban. Kasagarang malubog ang kahulogan kon taas o komplikado ang mga tubag. Ang mugbong mga tubag nga may pipila lang ka mga pulong epektibo kaayo, ug makadasig kini sa mga bag-ohan sa paghatag ug mugbong mga tubag.

Ang Papel sa mga Nagadumala sa Tigom

Kon bahin sa pagkamakapadasig ngadto sa uban, ang nagadumala sa tigom dunay bug-at nga responsibilidad. Siya angayng magpakita ug sinserong interes sa matag komento nga ihatag pinaagi sa pagpaminaw ug maayo ug sa pagtan-aw nga matinahoron sa usa nga nagakomento imbes nga malinga sa ubang butang. Dili angay nga dili siya maminawg maayo ug, tungod niana, magsubli sa bag-o pang gisulti o mosukna ug pangutana nga bag-o pang gitubag!

Dili usab makapadasig kon ang nagadumala kanunayng magsubli sa bag-o pang gikomento pinaagi sa pagsulti niini sa medyo laing mga pulong, nga mora bag dunay kulang sa maong komento. Sa laing bahin, pagkamakapadasig kon ang mga komento makapukaw ug dugang nga panaghisgot sa usa ka hinungdanong punto. ‘Sa unsang paagi kini atong ikapadapat sa atong  kongregasyon?’ o, ‘Unsang teksto diha sa parapo ang nagpamatuod sa bag-o lang gitubag?’ mao ang matang sa mga pangutana nga makaaghat ug positibong mga komento, nga makahatag ug dugang mapuslanong impormasyon sa panaghisgot.

Siyempre, ang mga bag-ohan o mga maulawon kinahanglan usab nga hatagan ug komendasyon sa dihang sila mokomento. Mahimo kining buhaton sa personal nga paagi human sa tigom aron malikayan ang pagbati tingalig kaulaw ug aron ang nagdumala may kahigayonan sa paghatag ug mga sugyot kon kini haom nga ihatag.

Sa ordinaryong kokabildo, ang tawo nga maoy magdominar sa panagsultihay dili makadasig sa uban sa pag-apil sa panag-estoryahay. Ang mga tawong maminaw kaniya mobati nga sila dili na kinahanglang mosulti. Dili na kaayo sila interesadong maminaw kon sila maminaw man ugaling. Susama niana ang mahitabo kon ang nagadumala magdominar sa panaghisgot pinaagi sa pagsigeg komento. Apan, sa popanahon mahimong dasigon sa nagadumala sa tigom ang tumatambong sa pagkomento ug sa pagpalihok sa ilang hunahuna bahin sa topiko pinaagi sa pagpatunghag dugang nga mga pangutana. Ang maong mga pangutana kinahanglang panagsa rang isukna.

Dili kinahanglang tawagon dayon sa nagadumala ang unang indibiduwal nga moisa sa iyang kamot. Kini dili makadasig sa mga indibiduwal nga nagkinahanglan pa ug gamayng panahon sa pagbalay sa ilang mga ideya. Pinaagi sa paghulat sa makadiyot, iyang mahatagag higayon nga makakomento kadtong wala pa makatubag. Siya usab makapakitag pagsabot kon dili niya tawgon ang gagmayng mga bata sa pagtubag sa mga pangutana may kalabotan sa mga topiko nga dili nila masabtan.

Komosta na man kon dili husto ang gihatag nga tubag? Ang nagadumala kinahanglang maglikay nga maulawan ang indibiduwal nga mitubag. Ang mga komento, bisag dili husto, sagad nga gilangkoban ug pipila ka bahin nga husto. Pinaagi sa mataktikanhong paghisgot nianang husto nga punto, pinaagi sa pagbalay pag-usab sa pangutana, o pagsuknag dugang pangutana, matul-id sa nagadumala ang tubag nga walay maulawan.

Aron madasig ang uban sa pagkomento, kinahanglang likayan sa nagadumala sa tigom ang dili-espesipiko nga mga pangutana, sama sa, ‘Duna pa bay laing mokomento?’ Ang pangutanang, ‘Kinsay wala pa makakomento? Kini na ang inyong kataposang higayon!’ tingali isukna uban ang maayong katuyoan, apan dili gayod kini makadasig sa indibiduwal sa pagpahayag sa iyang kaugalingon sa bukas nga paagi. Dili angayng ipabati sa mga igsoon nga sila sad-an tungod kay sila wala dayon mokomento sa pagsugod sa panagtuon. Hinunoa, sila kinahanglang dasigon sa pagpaambit sa ilang nahibaloan tungod kay ang pagpaambit maoy usa ka pagpasundayag ug gugma. Dugang pa, human matawag sa nagadumala ang usa ka indibiduwal sa paghatag ug komento, mas maayong dili moingong, “Pagkahuman niya, atong paminawon ang komento ni Brader Pulano ug dayon ang komento ni Sister Pulana.” Ang nagadumala kinahanglang maminaw una sa komento ug dayon magtino kon gikinahanglan pa ba ang dugang komento.

Ang Pagkomento Maoy Usa ka Pribilehiyo

Ang pagtambong sa Kristohanong mga tigom maoy usa ka espirituwal nga kinahanglanon; ang pagkomento nianang panahona maoy usa ka pribilehiyo. Kon sa unsang sukod kita makigbahin niining talagsaong paagi sa pagdayeg kang Jehova “taliwala sa kongregasyon,” niana nga sukod kita nagasundog sa panig-ingnan ni David ug nagapatalinghog sa tambag ni Pablo. Ang atong pagpakigbahin diha sa mga tigom magpamatuod nga atong gihigugma ang atong mga igsoon ug nga kita bahin sa dakong kongregasyon ni Jehova. Asa ka pa man gustong moadto nga ‘nakita na nimo nga ang adlaw nagkaduol na’?—Hebreohanon 10:25.

[Footnote]

[Mga hulagway sa panid 20]

Hinungdanon ang pagpaminaw ug pagkomento diha sa Kristohanong mga tigom

[Hulagway sa panid 21]

Ang nagadumala magpakita ug sinserong interes sa matag komento